Koresa Ekigambo kya Ruhanga Kiine Amagara!

1, 2. Yehova akaha Musa bujunaanizibwa ki, kandi akamuhamiza ata?

OKAAYEHURIRA ota ku waakwemerera omu maisho g’omutegyeki w’amaani omu nsi, okakora nk’omugambirizi wa abaheereza ba Yehova? Obundi noobaasa kugira obwoba, nari oyehurire nk’otarikubaasa. Noobaasa kutebeekanisa ota oku oraatandikye kugaaniira nawe? Noobaasa kukoresa ota ebigambo birungi nk’omujwekyerwa wa Ruhanga ow’obushoboorozi bwona?

² Musa akaba ari omu mbeera nk’egyo. Yehova akaba agizire ngu Musa, “akaba ari omucureezi, okukira abantu boona ab’omu nsi,” n’ahabw’ekyo akamutuma ahari Faraho kucungura abaheereza be abaabaire nibabonabonesibwa omu buhuuku omuri Misri. (Kub. 12:3) Faraho akaba ari omushaija w’amaryo kandi arikutwaza kubi. (Kur. 5:1, 2) Kwonka, Yehova akaba naayenda ngu Musa araagiire Faraho arekure abahuuku be barikuhika nk’obukaikuru bushatu barugye omu ihanga rye! Nitubaasa kwetegyereza ahabw’enki Musa yaabuurize Yehova ati: “Niinye oha kuturukirira Faraho, nkaiha Abaisraeli omuri Misri?” Musa ashemereire kuba yaayehuriire nk’otarikubaasa. Kwonka Ruhanga akamuhamiza arikumugira ati: “Ndyaba nkwine.”​—Kur. 3:9-12.

3, 4. (a) Musa akaba atiinire ki? (b) Ahabw’enki obumwe orikubaasa kugira enyehurira nk’eya Musa?

³ Musa akaba atiinire ki? Hatariho kubanganisa, Musa akaba atiinire ngu Faraho tarikwija kumwikiriza ngu naajwekyera Yehova Ruhanga. Kandi Musa akaba naatiina ngu abantu b’eihanga rye tibarikuza kwikiriza ngu Yehova niwe amutumire kubeebembera kuruga Misri. N’ahabw’ekyo Musa akagira Yehova ati: “Kwonka nimmanya ngu tibarinyikiriza, n’obu kwakuba okumpurira; ahakuba baryagira bati: MUKAMA tarakweyorekire.”​—Kur. 3:15-18; 4:1.

⁴ Oku Yehova yaagarukiremu Musa n’ebyakuratsireho nitubaasa kubyegyeraho ekintu kikuru. N’amazima, nikibaasa kutatwetengyesa kuza omu maisho g’omwebembezi. Kwonka kiraakugumiire kugambira abantu ebirikukwata ahari Ruhanga hamwe n’Obukama bwe? Ku kiraabe kiri kityo, yetegyereze eki turikubaasa kwegyera ahari Musa.

“EKYO EKI OINE OMU NGARO NIKI?”

5. Niki eki Yehova yaateire omu ngaro za Musa, kandi ekyo kikamuhwera kita kutatiina? (Reeba ekishushani aha kutandika.)

⁵ Musa ku yaatiinire ngu ebigambo bye Faraho tarikwija kubihurikiza, Ruhanga akamutendeka ahabw’ebyo ebyabaire nibiija kubaho omu biro by’omumaisho. Ebiri omu Okuruga nibigira biti: “MUKAMA yaamugira ati: Ekyo eki oine omu ngaro niki? Onu ati: N’enkoni. Ruhanga yaamugira ati: Ginagye ahansi. Yaaginaga ahansi; enkoni yaahinduka enjoka; Musa yaagihunga. MUKAMA yaamugira ati: Tayo omukono gwawe, ogikwate omukira, yaatayo omukono, yaagikwata, yaagaruka yaahinduka enkoni omu ngaro ze. Okwo nikwo orikora, bakabona kwikiriza ku MUKAMA Ruhanga . . . yaakweyorekire.” (Kur. 4:2-5) Buzima, Ruhanga akata omu ngaro za Musa eky’okuhamya ngu obutumwa bwe bukaba niburuga ahariwe. Ahabw’amaani ga Ruhanga, enkoni eyaabaire eri omu ngaro za Musa ekahinduka enjoka. Eky’okutangaaza ekyo kikaba nikyongyerera aha bigambo bya Musa kuhamya ngu Yehova akaba naamushagika! N’ahabw’ekyo, Yehova akamugira ati: “Oryaguma otware enkoni egi omu ngaro, ei orikoresa obumanyiso.” (Kur. 4:17) Ahabw’okugira ngu Musa akaba aine obuhame obwo, akaba naabaasa kujwekyera Ruhanga ahari Faraho hamwe n’abantu b’eihanga rye aine obumanzi.​—Kur. 4:29-31; 7:8-13.

6. (a) Niki eki tushemereire kuba twine omu ngaro zaitu twaba nitubuurira, kandi n’ahabw’enki? (b) Shoboorora oku “ekigambo kya Ruhanga kiine amagara, n’amaani.”

⁶ Naitwe twaba nituza kubuurira abantu ebiri omu Baibuli, nitubaasa kubuuzibwa ekibuuzo nk’eki: “Ekyo eki oine omu ngaro niki?” Emirundi mingi, nituba twine Baibuli omu ngaro zaitu tweteekateekire kugikoresa. N’obu abamwe baraabe nibagira ngu Baibuli n’ekitabo kirungi kwonka, erimu obutumwa obu Ruhanga yaatuhandiikiire. (2 Pet. 1:21) Erimu ebiraganiso ebirikukwata aha birikwija kukorwa, Obukama bwe ku buraatandike kutegyeka. Egi niyo nshonga ahabw’enki entumwa Paulo yaahandiikire ati: “Ekigambo kya Ruhanga kiine amagara n’amaani.” (Shoma Abaheburaayo 4:12.) Ebiraganiso bya Yehova byona nibigyenda nibihikiirira kandi nibiija kuhikiiririzibwa kimwe. (Isa. 46:10; 55:11) Omuntu yaamanya ngu ebiri omu Kigambo kya Yehova nibihikiirira, byona ebi arikushomamu haine kihango eki birikukora aha magara ge.

7. Nitubaasa ‘kushoboorora gye tuta ekigambo ky’amazima’?

⁷ Buzima, Yehova ateire omu ngaro zaitu Ekigambo kye ekiine amagara eki turikubaasa kukoresa kuhamiza abantu ngu obutumwa obu turikugambira abantu nibwesigwa kandi niburuga ahari Yehova. Niyo nshonga ahabw’enki Paulo ku yaaherize kuhandiikira Abaheburaayo, akahiga Timoseo ngu ‘ayezirikye kushoboorora gye ekigambo ky’amazima.’ (2 Tim. 2:15) Nitubaasa kugyendera tuta aha buhabuzi bwa Paulo? Turikushomera abu turikubuurira ebyahandiikirwe ebi toorainwe gye kandi ebiraabahikye aha mutima. Turakiti ezaashohoziibwe omu 2013 zitebeekanisiibwe kutuhwera omuri ekyo.

SHOMA EKYAHANDIIKIRWE EKITOORAINWE!

8. Omureeberezi omwe orikukora ahaby’obuheereza akagamba ki aha turakiti ensya?

⁸ Turakiti ensya zoona zikozirwe omu muringo gurikushushana. N’ahabw’ekyo ku orikwega kukoresa emwe aharizo, nooba waayega kukoresa zoona. Kwonka shi zoorobi kukoresa? Omureeberezi omwe orikukora ahaby’obuheereza omuri Hawaii, U.S.A., akahandiika ati: “Tukaba tutarikumanya ngu turakiti ezi niziija kukora gye omu kubuurira enju aha nju hamwe n’omu kubuurira omu myanya erimu abantu baingi.” Ashangire ngu omuringo ogu turakiti ezi zihandiikirwemu nigureetera abantu kuhurikiza, kandi eki obwire obwingi nikirugamu okuhikaanisa ebiteekateeko. Naagira ngu ekyo kiri kityo, ahabw’ekibuuzo n’eby’okugarukamu ebi omuntu arikubaasa kutooranaho ebiri aha mutwe gwa turakiti. Ou orikubuurira tashemereire kutiina ngu naija kugarukamu ekigwire.

9, 10. (a) Turakiti ensya nizituhiga zita kukoresa Baibuli? (b) Ni turakiti ki ezi oshangire ngu nizikora gye, kandi n’ahabw’enki?

⁹ Buri turakiti neetuhiga kushoma ekyahandiikirwe ekitoorainwe. Nk’eky’okureeberaho, reeba ahari turakiti Okubonabona Kuryahwaho? Ou orikubuurira ku araatoraneho “eego,” “ngaaha,” nari “torikuhamya” omu kugarukamu ekibuuzo ekyo, mutware omunda otaine kindi ki oyongyeireho reero omugire oti: “Aha hariho eki Baibuli erikwegyesa.” Bwanyima shoma Okushuuruurwa 21:3, 4.

¹⁰ Nikyo kimwe na waaba nookoresa turakiti Baibuli Noogitwara nka Ki? aha by’okugarukamu bishatu ebigiriho, ou orikubuurira yaatooranaho kimwe nikiba kitaine nshonga. Mutware omunda reero omugire oti: “Baibuli neegira ngu Ebyahandiikirwe byona, bihandiikisiibwe Ruhanga.” Noobaasa kwongyeraho oti: “Kwonka ekyahandiikirwe eki kirimu bingi.” Bwanyima oshuuruure Baibuli omushomere 2 Timoseo 3:16, 17.

11, 12. (a) Noobaasa kukoresa ota turakiti kutunga okushemererwa omu kubuurira? (b) Turakiti nizibaasa kukuhwera zita kwetebeekanisa kugarukayo aha bantu?

¹¹ Kurugiirira aha ku ou orikubuurira araatwaze, cwamu aha biri omu turakiti ebi oraashome nawe kandi mukabigaaniiraho. Oyihireho okuha omuntu turakiti, nootunga okumarwa ahabw’okumushomera ebiri omu Kigambo kya Ruhanga, nangwa n’obu waakumushomera ekyahandiikirwe kimwe nari bibiri aha murundi gw’okubanza. Bwanyima, noobaasa kugumizamu orikugaaniira nawe.

¹² Aha muheru gwa buri turakiti nihaba hariho ekibuuzo ekiri ahansi y’omutwe “Eky’okuteekateekaho” hamwe n’ebyahandiikirwe ebirikubaasa kushomwa waagarukayo. “Ruhanga naija kuhindura ata ensi kuba nungi?” nikyo kibuuzo ky’okugaaniiraho waagarukayo ekiri aha turakiti Niki Ekirikwija Kubaho omu Biro by’Omumaisho? Matayo 6:9, 10 na Danieli 2:44 bijuriziibwe. “Ahabw’enki abantu nibakaikura kandi bakafa?” ekibuuzo eki kiri aha turakiti Abaafiire Buzima Baryazooka? Okutandika 3:17-19 na Abarooma 5:12 bijuriziibwe.

13. Shoboorora oku turikubaasa kukoresa turakiti kutandika kwegyesa abantu Baibuli.

¹³ Koresa turakiti kutandika kwegyesa abantu Baibuli. Aha muheru gwa turakiti hariho QR (quick response) code ei omuntu arikubaasa kukoresa kureeba vidiyo “Why study the Bible?” kandi neehiga abantu kwega Baibuli. Turakiti ezi nizooreka akatabo Amakuru Marungi Kuruga Ahari Ruhanga! n’eishomo ry’akatabo ako eri murikubaasa kwega. Nk’eky’okureeberaho, turakiti N’oha Buzima Orikutegyeka Ensi? eriho eishomo 5 ery’akatabo ako. Turakiti Niki Ekirikureeta Okushemererwa omu Ka? eriho eishomo 9. Waakoresa turakiti nk’oku zishemereire kukoresibwa, noija kuba nooyemanyiiza kukoresa Baibuli aha murundi gw’okubanza kubuurira omuntu na waaba ogarukireyo. Kandi ekyo nikibaasa kukuhwera kutunga abeegi baingi ba Baibuli. Niki ekindi eki orikubaasa kukora kubaasa kukoresa gye Ekigambo kya Ruhanga omu kubuurira?

GAMBA AHA NSHONGA EI ABANTU BARIKUKUNDA

14, 15. Nitubaasa kugira tuta emiteekateekyere nk’eya Paulo omu kubuurira?

¹⁴ Paulo akaba naakunda kugamba aha ki abantu barikukunda omu buheereza bwe. (Shoma 1 Abakorinso 9:19-23.) Yetegyereze ngu kikaba kiri ekigyendererwa kya Paulo ‘ky’okubona Abayudaaya . . . , kubona abarikutegyekwa ebiragiro . . . , kubona abataine biragiro . . . , n’okutunga abataine maani.’ Buzima, Paulo akaba naayenda kuhika ahari boona kugira ngu omu miringo yoona abaase kukiza abamwe. (Byak. 20:21) Nitubaasa kugira tuta emiteekateekyere nk’eya Paulo twaba nitwetebeekanisa kuza kubuurira abantu b’emiringo yoona abari omu kicweka kyaitu?​—1 Tim. 2:3, 4.

¹⁵ Zimwe aha nyanjura niziba ziri omu Obuheereza Bwaitu obw’Obukama buri kwezi. Teeraho kuzikoresa. Kwonka omu kicweka kyanyu abantu baaba baine ebindi ebi barikukunda, tebeekanisa enyanjura nungi ezirikuhikaana nabyo. Teekateeka aha mbeera eziri omu kicweka ei orikutuura, abantu abarimu, n’ebyo ebirikubeerarikiriza munonga. Bwanyima, teekateeka aha kyahandiikirwe ekirikuhikaana n’embeera zaabo. Omureeberezi orikutaayaayira ebibiina naagamba aha ku we n’omukazi we barikukoresa Baibuli ati: “Abu turikubuurira abaingi nibatwikiriza kushoma ekyahandiikirwe kimwe twakikora omu bugufu kandi tukahikira aha nshonga. Ku turikuheza kubaramusya obwo twine Baibuli omu ngaro, nitushoma ekyahandiikirwe.” Yetegyereze zimwe aha nshonga, ebibuuzo, n’ebyahandiikirwe ebi bamwe bakoreise, naiwe ebi orikubaasa kukoresa omu kicweka kyanyu.

16. Shoboorora oku ebiri omu Isaaya 14:7 birikubaasa kukoresibwa omu kubuurira.

¹⁶ Waaba nootuura omu mwanya ahu abantu barikukira kuba bataine busingye, noobaasa kubuuza omuntu oti: “Nooteekateeka ngu haine obu ebigambo ebi biriba bihikiriire? Ensi yoona ehuumwire, etuurize; abantu nibateera akaari nibeeshongora? Okwo nikwo Baibuli erikugira omuri Isaaya 14:7. Buzima, Baibuli erimu ebiraganiso bya Ruhanga bingi ebirikworeka ngu omu biro by’omumaisho nihaija kubaho obusingye.” Bwanyima teeraho kumushomera bimwe aha biraganiso ebyo kuruga omu Baibuli.

17. Noobaasa kukoresa ota Matayo 5:3 waaba noobuurira omuntu?

¹⁷ Nikigumira abashaija baingi omu kicweka kyanyu kutunga esente z’okwebaisaho? Ku kiraabe nikwo kiri, noobaasa kutandika kugaaniira nabo orikubabuuza oti: “Omushaija aine kukora sente zirikwingana ki eka ye kubaasa kutunga okushemererwa?” Kurugiirira aha ki araagarukyemu, omugire oti: “Abashaija baingi nibakora ezirikukira ahari ezo kwonka nabwo amaka gaabo tigarikumarwa. Mbwenu shi ekirikwetengyesa buzima niki?” Shoma Matayo 5:3 kandi omushabe kutandika kumwegyesa Baibuli.

18. Noobaasa kukoresa ota Yeremia 29:11 kuhuumuriza abandi?

¹⁸ Abantu omu kicweka kyanyu baaba baherize kuhikwaho ekihikiirizi, noobaasa kutandika enyanjura yaawe orikugira oti: “Naija aha kukuhuumuriza. (Shoma Yeremia 29:11.) Waayetegyereza ebintu bibiri ebi Ruhanga arikutwendeza? ‘N’eby’oburungi,’ ‘n’amatsiko.’ Tikirikushemeza kukimanya ngu naayenda ngu tutungye amagara marungi? Kwonka shi ekyo nikibaasika kita?” Bwanyima mutware omu ishomo eririkuhikaana n’ebi mwaba nimugaaniraho omu katabo Amakuru Marungi.

19. Shoboorora oku turikubaasa kukoresa ebiri omu Okushuuruurwa 14:6, 7 twaba nitubuurira abarikukunda ediini.

¹⁹ Nootuura omu kicweka ei abantu barikukunda ediini? Kyaba nikwo kiri, noobaasa kutandika kugaaniira n’omuntu orikumubuuza oti: “Maraika yaagamba naiwe, noobaasa kuhurikiza ebi arikukugambira? (Shoma Okushuuruurwa 14:6, 7.) Obu maraika ogu arikugira ngu mutiine Ruhanga tikikaabaire eky’obwengye kumanya Ruhanga ou maraika ogwo arikumanyisa? Maraika naatuhwera kumumanya arikugira ngu n’ogwo owaahangire eiguru n’ensi.” Bwanyima shoma Zaaburi 124:8, aharikugira hati: “Okuhwerwa kwaitu kuri omu iziina rya MUKAMA owaahangire eiguru n’ensi.” Tebeekanisa kwongyera kumushoboororera ebirikukwata ahari Yehova Ruhanga.

20. (a) Nitubaasa kukoresa tuta ebiri omu Enfumu 30:4 kwegyesa omuntu eiziina rya Ruhanga? (b) Hariho ekyahandiikirwe eki oreebire kirikukora gye?

²⁰ Noobaasa kutandika kugaaniira n’omunyeeto orikugira oti: “Niinyenda kukushomera ekyahandiikirwe ekirimu ekibuuzo kikuru. (Shoma Enfumu 30:4.) Tihariho omuntu orikubaasa kuhikaana n’ebirikushoboororwaho aha, n’ahabw’ekyo kishemereire kuba nikigamba aha Muhangi waitu.a Nitubaasa kumanya tuta eiziina rye? Niinyenda kurikworeka omu Baibuli.”

KORESA AMAANI G’EKIGAMBO KYA RUHANGA OMU KUBUURIRA

21, 22. (a) Ekyahandiikirwe ekitoorainwe gye nikibaasa kuhindura kita omuntu? (b) Omaririire kukora ki omu kubuurira kwawe?

²¹ Nikibaasa kukutangaaza waareeba oku abantu baraatwaze waaheza kubashomera ekyahandiikirwe ekitoorainwe gye. Nk’eky’okureeberaho, ab’eishe-emwe babiri omuri Australia bakaiguza aha rwigi rw’omukazi muto. Omwe akamubuuza ati: “Noomanya eiziina rya Ruhanga?” reero yaamushomera Zaaburi 83:18. Omukazi ogwo akatangaara. Naagira ati: “Ku baarugireho, nkavuga mahiro 35 naaza omu ibiikiro ry’ebitabo kushwijuma envunuura za Baibuli ezindi kandi naasherura n’eiziina eryo omuri kashoboorozi. Bwanyima y’okuhamya ngu eiziina rya Ruhanga ni Yehova, nkebuuza ku haraabe hariho ekindi eki ntarikumanya.” Bwanyima, omukazi ogwo hamwe n’ogwo owaizire kuba iba bakatandika kwega Baibuli, kandi bakabatizibwa.

²² Ekigambo kya Ruhanga nikihindura abo abarikukishoma reero bakaikiririza omu biraganiso bya Ruhanga. (Shoma 1 Abatesalonika 2:13.) Obutumwa oburi omu Baibuli bwine amaani agarikukira ekintu kyona eki turikubaasa kugamba kuhika aha mutima gw’omuntu. Egi niyo nshonga ahabw’enki tushemereire kukoresa Ekigambo kya Ruhanga nk’oku kirikubaasika. Ahakuba kiine amagara!