Sherura Abo Abarikwenda Kumanya Amazima
1. Nitworeka tuta ngu nitusiima omugisha gw’okwejumba omu kubuurira?
1 Omu kubuurira kwe, Yesu akateeraho munonga okuhitsya amakuru marungi agarikuhuumuriza, ahari abo abacureezi. (Isa. 61:1, 2) Nk’abarikujwekyera Kristo, naitwe hati twine omugisha gw’okumutooreza omu kuteeraho kwaitu kusherura abarikwenda kwega amazima omu kicweka kyaitu.—Mat. 10:11; 2 Kor. 5:20.
2. Paulo akooreka ata ngu akaba abuurira omu myanya etari emwe n’emwe, kandi n’enki ekyarugiremu?
2 Buurira omu Myanya Etari Emwe n’Emwe: Entumwa Paulo akaba akira kubanza kuza omuri sinagogi kubuurira Abayudaaya n’abo abaahindukire bakaza omu diini y’Ekiyudaaya. (Byak. 14:1) Omuri Filipi, Paulo na Siila bakagyenda kusherura abantu omu kicweka eki ‘baateekateekire ngu kirimu omwanya gw’okushabiramu.’ Bakatandika kwegyesa abakazi baingi, kandi omwe aharibo Ludia, akarahuka kwikiriza amazima.—Byak. 16:12-15.
3. Ni myanya ki endiijo ei turikubaasa kubuuriramu oyihireho emyanya ei turikubuuriramu enju aha nju?
3 Oyihireho okubuurira enju aha nju, noobaasa n’okubuurira abantu omu myanya erikupakirirwaho ebintu, erikwemerezibwamu ebiiruka, omu ofiisi, aha nguuto, omu myanya erikukorerwamu eby’obushuubuzi, n’omu byombeko ebirikugurizibwamu ebintu omu kicweka eki murikubuuriramu. Obundi noobaasa kubuurira abo abari omu byombeko ebiri omu ngo orikubahandikira amabaruha nari kubateerera esimu. Okuteeraho kumanya ebirikufa omu kicweka kyanyu kandi okahindura omu kubuurira kwawe nk’oku embeera ziri, nikiija kukubaasisa kugira ‘bingi eby’okukora omu murimo gwa Mukama.’—1 Kor. 15:58, NW.
4. Nitubaasa kukora ki ekibiina kyaitu kyaba kiine omwanya mukye ogw’okubuuriramu?
4 Ababuurizi baingi batungire omugisha gw’okwongyera aha kubuurira kwabo barikuza omu kibiina ekindi yaaba ekiri omu ihanga ryabo nari erindi. Abandi babaasize kwega endimi ezindi kubaasa kubuurira abantu abarugire omu mahanga agandi.
5. Tushemereire kureeba tuta obwire obu turimu, kandi tushemereire kumariirira kukora ki?
5 Twena tushemereire kuguma nitwijuka ngu “omusiri n’ensi.” (Mat. 9:37; 13:38) Ahabw’okugira ngu emperu y’obusingye obu obubi eri haihi, buri omwe ashemereire kuteekateeka aha mbeera ye, etalanta ze, oku arikubaasa kwongyera aha bwire obu arikumara omu kubuurira. Yehova naatuhamiza ngu twayebembeza eby’Obukama, naija kutuha omugisha omu kuteeraho kwaitu kwongyera aha buheereza bwaitu.—Mat. 6:33.