Eshuura y’Okubanza
Obumwe omu Kuramya omu Bunaku Bwaitu—Butwiniire Makuru Ki?
1, 2. (a) Nikweyongyera ki okuriho omu bunaku obu? (b) Ni matsiko ki ag’omutaano agu abantu abarikukunda amazima baine?
HARIHO okweyongyera kw’abantu abarikwija omu kuramya okw’amazima omu nsi yoona. Okweyongyera oku nikuteeranira hamwe enkumi n’enkumi z’abantu kuruga omu mahanga goona, enganda zoona n’endimi zoona. Abantu nibeyongyera buri mwaka. Omuri Baibuli, abantu aba nibamanywa nka ‘Abajurizi’ ba Yehova kandi nibeetwa “omutwe muhango gw’abantu.” ‘Nibaheereza Ruhanga nyomushana na nyekiro.’ (Isaaya 43:10-12; Okushuuruurwa 7:9-15) Ahabw’enki nibacwamu kukora batyo? N’ahabw’okuba nibamanya ngu Yehova niwe Ruhanga omwe ow’amazima. Eki nikibaha omujinya gw’okwenda kuhikaanisa amagara gaabo n’emitindo ye. N’ekindi, nibamanya ngu turi omu ‘biro by’emperu’ y’obusingye obu obubi, obu Ruhanga ari haihi kucwekyereza, atyo akareeta ensi enungi ekaza omu mwanya gwabwo.—2 Timoseo 3:1-5, 13; 2 Petero 3:10-13.
2 Ekigambo kya Ruhanga nikiraganisa kiti: “Bwanyima y’akaanya kakye omubi aryaba atakiriho . . . Kwonka abacureezi baryahungura ensi, beesiime ahabw’okugira obusingye bwingi.” (Zaaburi 37:10, 11) “Abahikiriire baryahungura ensi, bagituuremu ebiro byona.” (Zaaburi 37:29) “[Ruhanga] aryaragaza amarira goona aha maisho gaabo; tiharibaho kufa bundi, n’obu kwakuba okucura nari okurira nari obusaasi, ahakuba ebya ira biryaba bihweireho.”—Okushuuruurwa 21:4.
3. Omu bunaku obu, obumwe omu kuramya buriyo nibubaasika buta?
3 Abo abarikuteeranirwa hamwe omu kuramya okw’amazima nibo bariba abatuuzi b’okubanza omu nsi egyo ensya. Beegire, baayetegyereza ebi Ruhanga akunda, kandi bariyo nibabikora n’agaabo goona. Arikworeka obukuru bw’okwega n’okukora ebi Ruhanga akunda, Yesu akagira ati: “Aga nigo magara agatahwaho, okumanya Iwe Ruhanga omwe ow’amazima, n’Ogwo ou waatumire Yesu Kristo.” (Yohaana 17:3) Entumwa Yohaana akahandiika ati: “Ensi egi neehwaho n’okwetenga kwayo; kwonka okora ebi Ruhanga akunda, agumaho ebiro byona.”—1 Yohaana 2:17.
Eki Obumwe Buzima Burikutumanyisa
4. (a) Okuteeranirwa hamwe kwa baingi omu kuramya okw’amazima omu bunaku obu nikutumanyisa ki buzima? (b) Baibuli neeshoborora eta aha kuteeranirwa hamwe oku?
4 Okuteeranirwa hamwe kw’abantu nyamwingi omu kuramya okw’amazima omu bunaku obu nikutumanyisa ki? Nikworeka gye ngu turi haihi n’emperu y’ensi egi embi eraakuratirwe ensi ya Ruhanga ensya. Turi baakareebi b’okuhikiirira kw’obunabi bw’omu Baibuli oburikuranga aha kuteeranirwa hamwe oku. Bumwe aha bunabi obwo nibugira buti: “Omu biro by’aha muheru [gw’ebiro ebi eby’emperu] Orushozi rw’enju ya MUKAMA [okuramya kwa Yehova okurikukira okundi kwona] ruryahamibwa kuba orushozi orurikukira ezindi aha mutwe, [ahaiguru y’okuramya okundi kwona], . . . kandi amahanga garyahimintikirayo. N’amahanga maingi garyaija gagire gati: Nimwije twinamukye aha rushozi rwa MUKAMA, aha nju ya Ruhanga wa Yakobo, atwegyese emihanda ye, tubone kugigyenderamu.”—Miika 4:1, 2; Zaaburi 37:34.
5, 6. (a) Ni mu muringo ki ogu amahanga gariyo nigaija omu kuramya kwa Yehova okw’amazima? (b) Ni bibuuzo ki ebi tushemereire kwebuuza?
5 N’obu abantu boona omu mahanga goona baraabe batarikwija omu kuramya kwa Yehova okw’amazima, bakye kuruga omuri buri ihanga hati abarikuhika omu bukaikuru bo nibaija. Ku barikwega aha kigyendererwa kya Yehova Ruhanga n’aha mitwarize ye, nibagira ekihika ky’okwenda kumanya eki arikubenza. Ekyetengo kyabo ni nk’eky’omuhandiiki wa zaaburi owaagizire ati: “Onyegyese kukora ebi okunda, ahakuba niiwe Ruhanga wangye.”—Zaaburi 143:10.
6 Nooyereeba ori omwe omu bantu nyamwingi abu Yehova hati ariyo naateeranira hamwe omu kuramya okw’amazima? Oku orikwakiiramu obuhabuzi obu orikutunga kuruga omu Kigambo kye nikworeka ngu buzima noomanya ku Yehova niwe Burugo bwabwo? Noija “kugyendera omu mihanda ye” okuhitsya ryari?
Oku Barikuhika aha Kugira Obumwe
7. (a) Noogira ngu abantu boona nibaija kugira obumwe omu kuramya? (b) Ahabw’enki omuntu hati atashemereire kweziringa kuhinduka omuramya wa Yehova, kandi tukaahwera tuta abandi nabo okuba abaramya be?
7 Yehova aine ekigyendererwa ky’okureeba ebihangirwe bye byona ebiine obwengye biine obumwe omu kuramya. Ka twine ekihika ky’okureeba izooba eri boona abahuriire bariramya Ruhanga omwe ow’amazima! (Zaaburi 103:19-22) Kwonka ekyo kitakabaireho, Yehova aine kubanza kucwekyereza abo boona abarikwanga kukora ebi akunda. N’embabazi, naabamanyisa ebi arikuba naayenda kukora bukiri kare kugira ngu buri hantu, abantu batungye omugisha gw’okuhindura aha mitwarize yaabo. (Isaaya 55:6, 7) N’ahabw’ekyo, omu bunaku bwaitu obu, abantu ‘b’amahanga goona n’enganda zoona n’endimi zoona’ nibashabwa bati: “Mutiine Ruhanga, mumuhe ekitiinisa, ahakuba obunaku bwe bw’okucweramu orubanja buhikire; muramye Ogwo owaahangire eiguru n’ensi n’enyanja n’enshuro z’amaizi.” (Okushuuruurwa 14:6, 7) Iwe ekyo nikyo orikukora? Ku kiraabe nikwo kiri, oine omugisha gw’okweta n’abandi ngu bamanye kandi baramye Ruhanga ow’amazima.
8. Bwanyima y’okwega enyegyesa za Baibuli ezirikutandikirwaho, n’enki ekindi eki tushemereire kweyongyera kukora?
8 Ti kigyendererwa kya Yehova kuramibwa abantu abarikugira ngu nibamwikiririzamu kwonka abarikuguma nibeesherurira ebyabo. Ruhanga naayenda ngu abantu ‘bamanyire kimwe ebi akunda’ kandi babikore. (Abakolosai 1:9, 10) N’ahabw’ekyo, abantu abarikusiima enyegyesa za Baibuli ezirikutandikirwaho nibetenga kukura omu by’omwoyo. Ekyetengo kyabo n’okweyongyera kumanya Yehova, kuhamya okwetegyereza kwabo okw’Ekigambo kye hamwe n’okwongyera kukigyenderaho. Nibateeraho kutooreza emitwarize ya Tataitwe ow’omu iguru hamwe n’okugira emiteekateekyere nk’eye aha bintu. Eki nikibareetera kusherura emiringo ei baakwejumba omu murimo gw’okukiza amagara ogurikukorwa omu nsi omu bunaku obu. Naiwe ekyo nikyo kyetengo kyawe?—Mako 13:10; Abaheburaayo 5:12–6:3.
9. Okugira obumwe omu bunaku obu nikubaasika kuta?
9 Baibuli neeyoreka ngu abo abarikuheereza Yehova bashemereire kuba baine obumwe. (Abaefeso 4:1-3) Na hati obumwe obu bushemereire kuba buriho n’obu turaabe turi omu nsi etarimu kukwatanisa kandi turikwitana n’obweremwa bw’omubiri. Yesu akashabira abeegi be ngu boona babe bamwe kandi ngu buzima bashemererwe. Eki kikaba nikiija kumanyisa ki? Eky’okubanza, ngu bagire omukago murungi na Yehova hamwe n’Omwana we. Ekyakabiri, ngu bo nk’abeegi be babe bamwe. (Yohaana 17:20, 21) Ahabw’enshonga egyo, ekibiina Ekikristaayo nikyo Yehova arikurabiramu kuheereza abantu be obuhabuzi.
Ni Nshonga Ki Ezirikureetaho Obumwe?
10. (a) N’enki eki turikweyongyera kugira twakoresa Baibuli okuzoora eby’okugarukamu by’ebibuuzo ebirikutukwataho? (b) Shwijuma ebintu ebirikureeta obumwe omu Bakristaayo orikugarukamu ebibuuzo ebiri omu kacweka aka.
10 Enshonga mushanju enkuru ezirikureeta obumwe omu kuramya nizo ezi ahaifo. Omu kugarukamu ebibuuzo ebi ahaifo, teekateeka munonga aha ku buri nshonga erikukwata aha mukago gwawe na Yehova hamwe n’Abakristaayo bataahi baawe. Okushwijuma enshonga ezi hamwe n’okusherura ebyahandiikirwe ebyayorekwa haza bitajurizibwe, nikukuhwera kweyongyera omu bwengye bw’okutiina Ruhanga, omu kumanya n’omu kwetegyereza—emitwarize ei twena turikwetenga. (Enfumu 5:1, 2; Abafilipi 1:9-11) Shwijuma enshonga ezi buri emwe okwayo.
(1) Nitwikiriza ku Yehova niwe aine obugabe bw’okututeeraho emitindo y’okugyenderaho. “Yesigye MUKAMA n’omutima gwawe gwona, orekye kwegamira okwetegyereza kwawe ahabwawe; omwemere omu mitwarize yaawe yoona, nawe aryaguma naatebeekanisa emihanda yaawe yoona.”—Enfumu 3:5, 6.
Ahabw’enki tushemereire kusherura obuhabuzi bwa Yehova twaba twine eby’okucwamu? (Zaaburi 146:3-5; Isaaya 48:17)
(2) Twine Ekigambo kya Ruhanga kutwebembera. “Ku mwahuriire ekigambo ky’engiri ya Ruhanga eki twabagambiire, mwakyakiira; kandi timwakyakiira nk’ekigambo ky’abantu, kureka nk’ekigambo kya Ruhanga ekirikukora omuriimwe abarikwikiriza; kandi omu mazima nikwo kiri.”—1 Abatesalonika 2:13.
Ni kabi ki akari omu kufa kukora eki itwe “turikuteekateeka” ngu kihikire? (Enfumu 14:12; Yeremia 10:23, 24; 17:9)
N’enki eki tushemereire kukora twaba tutarikumanya obuhabuzi obu Baibuli erikuha aha nshonga nanka? (Enfumu 2:3-5; 2 Timoseo 3:16, 17)
(3) Twena nitugasirwa enteekateeka emwe ey’okutungiramu eby’omwoyo. “Batabani baawe boona baryayegyesibwa Yehova.” (Isaaya 54:13, NW) “Kandi ka tuteekateekye oku twakwezirikisana kukundana n’okukora ebirungi, tutarikureka kuteeranira hamwe, nk’oku abamwe bagira, kureka tugumyane, kandi nk’oku murikureeba ngu ekiro ekyo kiri haihi n’okuhika, mweyongyere kutwaza mutyo.”—Abaheburaayo 10:24, 25.
Ni birungi ki ebi abo abarikukoresa omu bwijwire eby’omwoyo ebi Yehova arikutuha barikutunga? (Isaaya 65:13, 14)
(4) Yesu Kristo, atari muntu ondiijo weena, niwe Mwebembezi waitu. “Mutaryetwa Rabi, ahabw’okuba Omwegyesa waanyu n’omwe, kandi naimwe mwena muri eishe-emwe. Kandi mutaryeta omuntu weena ow’omu nsi Shoimwe; ahabw’okuba mwine Shoimwe omwe ori omu iguru. Kandi mutaryetwa abakama, ahabw’okuba mwine Omukama omwe, niwe Kristo.”—Matayo 23:8-10.
Haine omuriitwe oshemereire kuteekateeka ngu naakira abandi? (Abarooma 3:23, 24; 12:3)
(5) Nituhanga obutegyeki bw’Obukama bwa Ruhanga amaisho nk’amatsiko gonka ag’abantu. “N’ahabw’ekyo, mushabe muti: Tataitwe ow’omu iguru, eiziina ryawe ryezibwe, Obukama bwawe bwije; eby’okunda bikorwe omu nsi nk’oku bikorwa omu iguru. Kwonka mubanze musherure obukama bwe n’okuhikiirira kwe; n’ebyo byona muryabyongyerwaho.”—Matayo 6:9, 10, 33.
‘Okubanza kusherura obukama’ nikutuhwera kuta kurinda obumwe bwaitu? (Miika 4:3; 1 Yohaana 3:10-12)
(6) Omwoyo orikwera naahwera abaramya ba Yehova okugira emitwarize erikureeta obumwe omu Bakristaayo. “Ebyana by’[o]mwoyo nibyo ebi: okukunda, okushemererwa, obusingye, okugumisiriza, embabazi, oburungi, obwesigwa, obucureezi n’okwerinda.”—Abagalatia 5:22, 23.
Tushemereire kukora ki kugira ngu omwoyo wa Ruhanga abaase kutuhwera kugira emitwarize mirungi? (Ebyakozirwe 5:32)
Okugira omwoyo wa Ruhanga kwine kakwate ki n’enkorengana yaitu n’Abakristaayo bataahi baitu? (Yohaana 13:35; 1 Yohaana 4:8, 20, 21)
(7) Abaramya ba Ruhanga ab’amazima boona nibabuurira amakuru marungi ag’Obukama bwe. “Engiri egi ey’obukama eryagambwa omu nsi zoona okuba eky’okuhamya aha mahanga goona; obwo nibwo emperu erihika.”—Matayo 24:14.
N’enki ekirikutuha omujinya gw’okwenda kwejumba omu murimo ogu ogw’okubuurira omu bwijwire? (Matayo 22:37-39; Abarooma 10:10)
11. Nitugasirwa tuta twagyendera aha mazima g’omu Baibuli?
11 Okuramya Yehova omu bumwe nikutwiriza haihi nawe kandi kutuhwera kukunda kuba hamwe n’abaikiriza bataahi baitu. Zaaburi 133:1 nirugira ruti: “Reeba, ku kiri kirungi kandi ekirikushemeza, ab’eishe-emwe kutuura hamwe nibakwatanisa!” Ka nikihuumuriza okureka ensi n’okweyendeza kwayo, obushambani n’obushaarizi bwayo bwona, tukateeranira hamwe n’abo buzima abarikukunda kandi bakoorobera ebiragiro bya Yehova!
Yetantare Ebirikubaasa Kututaanisa
12. Ahabw’enki tushemereire kurwanisa emiteekateekyere etarimu kutiina Ruhanga?
12 Okubaasa kutashiisha obumwe bwaitu omu nsi yoona, nituragiirwa kwetantara ebirikubaasa kututaanisa. Kimwe ahari ebi n’emiteekateekyere y’okwenda kwekorera ebyaitu tuteetaire ahari Ruhanga n’ebiragiro bye. Yehova naatuhwera okwetantara ekyo arikutworeka ngu Sitaane Omuregi niwe arikureeta emiteekateekyere egyo. (2 Abakorinso 4:4; Okushuuruurwa 12:9) Sitaane niwe yaabeihabeihire Adamu na Haawa bakanga eki Ruhanga yaabaire agambire kandi bakacwamu ebitarikwikirizana n’ebya Ruhanga. Ebyarugiremu bikaba bibi aharibo n’ahariitwe. (Okutandika 3:1-6, 17-19) Ensi egi eijwire emiteekateekyere y’okwenda kwetegyeka kuruga ahari Ruhanga n’ebiragiro bye. N’ahabw’ekyo tushemereire kwanga emiteekateekyere egyo.
13. N’enki ekiraije kworeka yaaba buzima turiyo nitwetebeekanisa kutuura omu nsi ya Ruhanga ensya ey’okuhikiirira?
13 Nk’eky’okureeberaho, teekateeka aha kiraganiso kya Yehova eky’okureeta ensi ensya n’eiguru erisya “ebituurwamu okuhikiirira” omu mwanya gw’obusingye obu obubi. (2 Petero 3:13) Ekyo tikishemereire kutuhiga kutandika kukora kyona eki turikubaasa okubaho omu bwire obwo obu hariba hariho okuhikiirira? Eki nikimanyisa okugyendera aha buhabuzi bwa Baibuli obu: “Mutarikunda ensi n’obu byakuba ebintu ebigirimu. Omuntu weena ku akunda ensi, okukunda Isheboona kuba kutamurimu.” (1 Yohaana 2:15) N’ahabw’ekyo nitwanga emiteekateekyere y’ensi egi—niyo miteekateekyere etarimu kutiina Ruhanga, okwekunda ekirengyesereize n’obushambani bwayo. Nituguhindura omucwe okworobera Yehova kuruga aha mitima yaitu, n’obu turaabe tutahikiriire. Emitwarize yaitu neeyoreka ngu emiteekateekyere n’ebigyendererwa byaitu byegami aha kukora ebi Ruhanga akunda.—Zaaburi 40:8.
14. (a) Ahabw’enki nikikuru hati okukoresa buri mugisha gwona okwega ahari Yehova n’okugyendera omu mihanda ye? (b) Ebyahandiikirwe ebyayorekwa omu kacweka aka iwe bikwiniire makuru ki?
14 Obwire bwa Yehova obw’okucwekyererezamu ensi egi embi n’abo boona abarikukunda emitwarize yaayo ku burihika, tarikyerererwa. Tarikuza kwongyera obunaku obwo omu maisho n’obu kwakuba okuhindura emitindo ye kugira ngu akaakiza abo abakirikweziringa omu nsi obwo kunu barikuheereza Ruhanga baine emitima ebiri. Obu nibwo bunaku bw’okutaho omutima! (Luka 13:23, 24; 17:32; 21:34-36) Mbwenu ka nikishemeza munonga okureeba omutwe muhango gw’abantu nibaakiira omugisha ogu ogw’omutaano, n’ekihika nibasherura obuhabuzi obu Yehova arikuheereza kurabira omu Kigambo kye n’omu kibiina kye, kandi nibagyendera omu mihanda ye okuza omu nsi ensya baine obumwe! Oku turayeyongyere kwega ahari Yehova, nikwo turayeyongyere kumukunda n’okwenda kumuheereza.
Eby’Okweijutsya
• Yehova aine kigyendererwa ki aha bikwatiraine n’okuramya?
• Twaheza kwega enyegyesa za Baibuli ezirikutandikirwaho, n’enki ekindi eki tushemereire kweyongyera kukora?
• N’enki eki tushemereire kukora, itwe okubaasa kuba omu bumwe n’abandi baramya ba Yehova?
[Ekishushani ekiri aha rupapura 4]
‘Abacureezi baryahungura ensi, kandi beesiime ahabw’okugira obusingye bwingi’