Okushaba n’Okuteekateeka Munonga Nikwetengyesa aha Babuurizi Abeeziriki
1. Niki ekyahwereire Yesu kutahugibwa kuruga aha murimo gwe omukuru?
1 Yesu akaba amazire omwabazyo gwona arikukiza abantu kandi arikubinga na baadaimoni. Abeegi be ku baamuboine aha kiro ekyakuratsireho bakamweshengyereza kugumizamu arikukora eby’okutangaaza barikumugira bati: “Abantu boona nibakusherura.” Kwonka, Yesu akaba atarikubaasa kuhugibwa kuruga aha murimo gwe omukuru ogw’okubuurira amakuru marungi. Akabagarukamu ati: ‘Ka tugyende ahandi omuri tauni eziri haihi, nayo mbuurireyo; ahakuba nikyo naiziriire.’ Niki ekyahwereire Yesu kutahugibwa? Akaba aimukire kare kushaba n’okuteekateeka munonga. (Mak. 1:32-39) Okushaba n’okuteekateeka munonga naitwe nikubaasa kutuhwera kuta kuba ababuurizi abeeziriki?
2. Nitubaasa kuteekateeka munonga ahari ki ebirikubaasa kutuhwera kuguma twine obweziriki omu kubuurira?
2 Twine Kuteekateeka Munonga Ahari Ki? Yesu aketegyereza ngu abantu bakaba “baburaburiirwe, bashobeirwe nk’entaama ezitaine muriisa.” (Mat. 9:36) Naitwe, nitubaasa kuteekateeka munonga aha ku abantu barikwetenga amakuru marungi. Nitubaasa n’okuteekateeka aha bukuru bw’obwire obu turimu. (1 Kor. 7:29) Kandi nitubaasa n’okuteekateeka munonga aha mitwarize ya Yehova n’ebi yaakozire, omugisha gwaitu gw’okuba Abajurizi ba Yehova, n’ebintu by’omuhendo eby’omwoyo ebi twegire kuruga omu Kigambo kya Ruhanga ebi abantu abari omu kicweka eki turikubuuriramu batarikumanya.—Zab. 77:11-13; Isa. 43:10-12; Mat. 13:52.
3. Ni ryari obu turikubaasa kuteekateeka munonga?
3 Ni Ryari Obu Turikubaasa Kuteekateeka Munonga? Nk’oku Yesu yaakozire, abamwe nibaimuka kare obu harikuba hatariho birikuyomba. Abandi nibashanga kiri kirungi kuteekateeka munonga batakagiire kubyama. (Kut. 24:63) N’obu twakuba twine bingi by’okukora, nitubaasa kutunga obwire bw’okuteekateeka munonga. Abamwe nibakora ekyo baaba nibagyendera omu biiruka kwonka batarikwevuga. Abandi nibakoresa obwire bwabo bwa kyamushana kubaasa kuteekateeka munonga hatariho kirikubateganisa. Baingi nibashanga ngu okuteekateeka munonga batakagiire kubuurira, n’obu kakuba akiire kakye nikibahwera kwongyera kubuurira baine obweziriki n’obumanzi.
4. Ahabw’enki tushemereire kuteekateeka munonga?
4 Okushaba n’okuteekateeka munonga nikwija kwongyera aha kyetengo kyaitu ky’okuheereza Yehova, kituhwere kutwara okuramya kwaitu nka kikuru munonga omu magara gaitu kandi kitureetere kumariirira kugumizamu nitubuurira. Omuheereza wa Ruhanga Omukuru Yesu akagasirwa omu kuteekateeka munonga kandi naitwe nitwija kugasirwa.