Eshuura ya Makumi Abiri n’Emwe
Ekigyendererwa kya Yehova Okuhikiirira
1, 2. (a) Ni kigyendererwa ki eki Yehova ainiire ebihangirwe bye ebiine obwengye? (b) Ni baahi abaabaire bari omu ka ya Ruhanga barikumuramya omu bumwe?
OKUREEBA ebihangirwe byona ebiine obwengye nibiramya Ruhanga omwe ow’amazima omu bumwe kandi byona biine obusingye bw’abaana ba Ruhanga—nikyo kigyendererwa kya Yehova. Eki kandi nikyo kyetengo ky’abarikukunda okuhikiirira.
2 Yehova akatandika kuhikiiriza ekigyendererwa eki obu yaatandika kuhanga. Akabanza kuhanga Omwana owaizire kuba ‘okumurinkana kw’ekitiinisa kya Ruhanga kandi ekishushani Kye’ okwiha aha kuzooka kwe. (Abaheburaayo 1:1-3) Ogu Mwana akaba ari ow’omutaano, ahabw’okugira ngu niwe wenka ou Ruhanga yaayehangiire. Abandi boona bakahangwa kurabira omu Mwana ogu; haabanza baamaraika omu iguru, na bwanyima abantu omu nsi. (Yobu 38:7; Luka 3:38) Boona bakaba bari eka emwe y’abaana ba Ruhanga. Boona Yehova akaba naabakunda, ari Ishebo kandi Omutegyeki wa byona.
3. (a) N’enki eki twena twahungwire aha bazaire baitu ab’okubanza? (b) Yehova akateeraho baijukuru ba Adamu buryo ki?
3 Obu abazaire baitu ab’okubanza baacwerwa orubanja rw’okufa ahabw’okushiisha nkana, Ruhanga akababinga omuri Edeni kandi yaabacwa. Tibaragarukire kuba bamwe aha b’omu ka ya Ruhanga. (Okutandika 3:22-24; Eky’Ebiragiro 32:4, 5) Ahabw’okugira ngu twena turi baijukuru baabo, nituzaarwa twine ekibi. Kwonka Yehova akaba naamanya ngu bamwe omuri baijukuru ba Adamu na Haawa bakaba nibaija kukunda eby’okuhikiirira. N’ahabw’ekyo, Yehova akabateeraho oburyo bw’okutunga “obusingye bw’abaana ba Ruhanga.”—Abarooma 8:20, 21.
Israeli Okufeerwa Kusiimwa Ruhanga
4. Ni mugisha ki ogu Yehova yaahaire Israeli eya ira?
4 Emyaka 2,500 bwanyima y’okuhangwa kwa Adamu, Yehova akaha abantu bamwe omugisha gw’okugira omukago gw’omutaano Nawe. Akatoorana Israeli eya ira okuba abantu be kandi yaabaha Ebiragiro bye. (Okutandika 12:1, 2) Akabahindura eihanga kandi yaabakoresa omu kuhikiiriza ekigyendererwa kye. (Eky’Ebiragiro 14:1, 2; Isaaya 43:1) Kwonka baitu, bakaba bakiri abuhuuku b’ekibi n’okufa, n’ahabw’ekyo bakaba bataine busingye nk’obu Adamu na Haawa baabaire baine omukubanza.
5. Abaisraeli bakafeerwa bata omukago gwabo gw’omutaano na Ruhanga?
5 Kwonka nabwe, Ruhanga akaba naakunda Abaisraeli. Bakaba baine kutiina Yehova Ishebo kandi bakahikaanisa amagara gaabo n’ekigyendererwa kye. Yesu akahamya obukuru bw’okukora ekyo. (Matayo 5:43-48) Kwonka Abaisraeli bakaremwa kukora ekyo. N’obu Abayudaaya abo baraabe baagizire bati: “Twine Tataitwe omwe, Ruhanga,” Yesu akooreka ngu ebikorwa byabo bikaba nibitaana n’ekyo. (Yohaana 8:41, 44, 47) Omu mwaka gwa 33 C.E., Ruhanga akaihaho Ebiragiro, n’omukago gwe n’Abaisraeli gwahwaho. Kwonka shi eki kikamanyisa ngu abantu bakaba batakibaasa kugira omukago murungi na Ruhanga?
Okuteeranira Hamwe “Eby’omu Iguru”
6. ‘Entebeekanisa’ ei Paulo yaagambireho omu kitabo kya Abaefeso 1:9,10 n’ey’enki?
6 Entumwa Paulo akooreka ngu bamwe omu bantu bakaba nibabaasa kugira omukago gw’omutaano na Ruhanga. Nk’eky’okureeberaho, aha bikwatiraine n’entebeekanisa ya Yehova ey’okugira ngu abarikworeka okwikiriza bahindukye ab’omu nju Ye, Paulo akahandiika ati: “[Ruhanga] akatumanyisa enaama y’okukunda kwe omu bwengye bwona n’okwetegyereza kwona, nk’ebi yaagyendereire kworeka omuri Kristo oku biri, ngu atebeekanise ebintu, kandi obunaku ku burihika, abone kuteeranira atyo byona omuriwe nk’Omutwe, eby’omu iguru n’eby’omu nsi.” (Abaefeso 1:9, 10) ‘Entebeekanisa’ egi eyegami ahari Yesu Kristo. Kurabira omuriwe, abantu nibagira omukago na Ruhanga. Bakye aharibo baine amatsiko g’okuza omu iguru. Abaingi n’ab’okutuura omu nsi ebiro byona.
7. Ebintu “eby’omu iguru” ni baahi?
7 Eky’okubanza, okutandika na Pentekoote ey’omu gwa 33 C.E., hakabanza kurundaanwa “eby’omu iguru,” nari shi abo ab’okutegyeka na Kristo omu Bukama bw’omu iguru. Ahabw’okwikiriza kwabo omu kitambo kya Yesu, bakabarwa Ruhanga nk’abahikiriire. (Abarooma 5:1, 2) Bwanyima, Abayudaaya n’Abanyamahanga bakongyerwaho, haza omubaro gw’ebintu “eby’omu iguru” byona hamwe ni 144,000. (Abagalatia 3:26-29; Okushuuruurwa 14:1) Entsigarira z’abo nibo bakiri omu nsi.
Okuteeranira Hamwe “Eby’omu Nsi”
8. Ebintu “eby’omu nsi” ni baahi, kandi baine mukago ki na Yehova?
8 Entebeekanisa niyo emwe eriyo neeteeranira hamwe ebintu “eby’omu nsi.” Obukaikuru bw’abantu hati nibateeranirwa hamwe kandi baine amatsiko g’okutuura omu nsi ebiro byona. Boona hamwe, n’entsigarira z’ab’okuhungura Obukama, nibahaisa eiziina rya Yehova ekitiinisa kandi beebembeza okuramya kwe. (Isaaya 2:2, 3; Zefania 3:9) Kandi nibeeta Yehova ‘Ishebo’ ahabw’okuba nibamanya ngu niwe burugo bw’amagara. Kandi baine omukago murungi nawe ahabw’okwikiriza kwabo omu shagama ya Yesu eyaasheeshekire. (Okushuuruurwa 7:9, 14) Kwonka obu bakyaine ekibi, nibaija kuhinduka abaana ba Ruhanga omu biro by’omu maisho.
9. Abarooma 8:21 niruraganisa ki abantu?
9 Aba abaine amatsiko g’okutuura omu nsi, hati bategyereize n’ekihika obunaku obu abantu ‘baricungurwa kuruga omu buhuuku bw’ekibi.’ (Abarooma 8:21) Okucungurwa oku kuryatandika bwanyima ya Kristo n’amahe ge ag’omu iguru kuhendera okubonabona kwingi omuri Haramagedoni. Ekyo kiryamanyisa okucwekyerezibwa kw’obusingye bwa Sitaane bwona, bwanyima habeho emigisha ei Obutegyeki bwa Kristo obw’Emyaka Rukumi omu Bukama burireeta.—Okushuuruurwa 19:17-21; 20:6.
10. Abaheereza ba Yehova baryayeshongora kyeshongoro ki eky’okumuhimbisa?
10 Ka nihaija kubaho okushemererwa kwingi obu abaheereza ba Yehova boona ab’omu nsi barigarukamu ebigambo eby’abaheereza be ab’omu iguru, n’okushemererwa, abarikugira bati: “Mukama Ruhanga ow’obushoboorozi bwona, ebi waakozire ni bikuru kandi n’eby’okutangaaza; Emihanda yaawe ehikiriire kandi n’ey’amazima, Nyakusinga Mukama w’amahanga. Mukama waitu, n’oha otaritiina, akahimbisa eiziina ryawe? Ahakuba niiwe wenka [orikwesigwa]; amahanga goona garyaija gakuramye, ahakuba emitwarize yaawe y’oburyo eyorekirwe.” (Okushuuruurwa 15:3, 4) Buzima, abaheereza ba Yehova boona baryayegaita hamwe omu kuramya Ruhanga omwe ow’amazima. Nangwa n’abafu baryazoorwa baheebwe omugisha gw’okwegaita aha bandi omu kwimutsya amaraka gaabo nibahimbisa Yehova.—Ebyakozirwe 24:15.
Obusingye bw’Omutaano omu Biro by’Omu maisho
11. Abarikira okubonabona kwingi baryagira busingye ki obw’omutaano?
11 Haramagedoni ku eriheza kumaraho obubi omu nsi aha muheru gw’okubonabona kwingi, Sitaane Omuregi tarigaruka kuba “ruhanga w’ensi egi.” Abaramya ba Yehova nibaija kuba batakiteganisibwa Sitaane. (2 Abakorinso 4:4; Okushuuruurwa 20:1, 2) Ediini z’ebishuba ziryaba zitariho okwegyesa ebitahikire ahari Yehova nari okutaanisamu abantu. Abaheereza ba Ruhanga ow’amazima tibarigaruka kunyangarazibwa abaine obushoboorozi bw’okutegyeka. Obwo ka nibwija kuba obusingye bw’omutaano!
12. Abantu baryacungurwa bata kuruga omu kibi n’ebi kirikureeta?
12 ‘Nk’Omwana gw’entaama wa Ruhanga orikwihaho ekibi ky’ensi,’ Yesu aryakoresa ekitambo kye okwiha aha bantu ebibi. (Yohaana 1:29) Obu Yesu yaabaire ari omu nsi, akaba atambira omuntu ku yaabaire amusaasira ebibi bye. (Matayo 9:1-7; 15:30, 31) Omu muringo nigwo gumwe, Kristo Yesu nk’Omugabe w’Obukama bwa Ruhanga aryakiza empumi, ebiteta, ebifa-matu, ebimuga, abahungutukire, n’abo boona abaine endwara z’emiringo etari emwe n’emwe. (Okushuuruurwa 21:3, 4) ‘Ebiragiro by’ekibi’ biryahindurwa busha omu bantu boona abahurizi kugira ngu ebiteekateeko n’ebikorwa byabo bishemeze, ti bo bonka, kureka na Ruhanga. (Abarooma 7:21-23) Ahu emyaka rukumi erihwera, abantu baryaba batakyaine kibi; baryaba bari omu ‘muringo n’eshusha’ ya Ruhanga omwe ow’amazima.—Okutandika 1:26.
13. Aha muheru gw’Obutegyeki bw’Emyaka Rukumi, Kristo aryakora ki, kandi ekyo kiryarugamu ki?
13 Kristo ku ariheza kuhitsya abantu omu kuhikiirira, aryagarurira Ishe obushoboorozi obwabaire bumuhairwe ahabw’omurimo ogwo: ‘Aryakwatsa Ruhanga Isheboona obukama, yaaheza kumaraho obutegyeki bwona n’obushoboorozi bwona n’amaani goona. Ahakuba ashemereire kutegyeka okuhitsya obu arita abazigu be boona ahansi y’ebigyere bye.’ (1 Abakorinso 15:24, 25) Obutegyeki bw’Emyaka Rukumi obw’Obukama buryaba buhikiiririize kimwe ekigyendererwa kyabwo; n’ahabw’ekyo gavumenti egi eryaba etakyetengyesa ahagati ya Yehova n’abantu. Ekindi, abantu baryaba batakyetenga Yesu nk’Omucunguzi waabo ahabw’okuba baryaba baacungwirwe kuruga omu kibi n’okufa. Baibuli neeshoborora eti: “Obwo Omwana nawe aryateebwa omu butegyeki bw’Ogwo owaataire byona ahansi ye, Ruhanga abone kuba byona ahari boona.”—1 Abakorinso 15:28.
14. N’enki ekirihika aha bantu boona abahikiriire, kandi n’ahabw’eki?
14 Bwanyima y’ebyo, abantu abahikiriire baryaheebwa omugisha gw’okworeka ngu bacwiremu kuheereza Ruhanga omwe ow’amazima ebiro byona. N’ahabw’ekyo, batakaikiriziibwe nk’abaana be, Yehova aryaikiriza abantu abahikiriire boona kuhikwaho ekigyezo eky’aha muheru. Sitaane na baadaimoni be baryarekurwa. Eki tikirikwija kuba eky’akabi ahari abo abarikukunda Yehova buzima. Kwonka abo boona abarigomera Yehova baryacwekyererezibwa kimwe, otwariiremu omugomi owaabandize hamwe na baadaimoni be.—Okushuuruurwa 20:7-10.
15. N’enki eki ebihangirwe bya Yehova byona ebiine obwengye birigaruka kugira?
15 Abantu abahikiriire boona, abarishagika obutegyeki bwa Yehova omu kigyezo eky’aha muheru, aryabahindura abaana be. Okuruga obwo, baryagira obusingye obw’abaana ba Ruhanga obw’ekitiinisa nka bamwe aha b’omu ka ye ey’ebihangirwe bye byona. Ebihangirwe byona ebiine obwengye, eby’omu iguru n’eby’omu nsi biryagaruka bibe hamwe omu kuramya Ruhanga omwe ow’amazima. Ekigyendererwa kya Yehova kiryahikiirira! Nooyenda kuba omwe aha b’omu ka mpango egyo etarihwaho, erimu okushemererwa? Ku kiraabe nikwo kiri, nitukuhiga kuta omutima aha bigambo bya Baibuli ebiri omuri 1 Yohaana 2:17, ebirikugira biti: “Ensi egi neehwaho n’okwetenga kwayo; kwonka okora ebi Ruhanga akunda, agumaho ebiro byona.”
Eby’Okweijutsya
• Obugomi butakabaireho omuri Edeni, abaramya ba Yehova boona bakaba baine mukago ki nawe?
• Abaheereza ba Ruhanga boona baine bujunaanizibwa ki?
• Ni baahi abarihinduka abaana ba Ruhanga, kandi eki kiine kakwate ki n’ekigyendererwa kya Yehova eky’okugira obumwe omu kuramya?
[Ekishushani ekiri aha rupapura 190]
Abantu abahurizi baryagira amagara murungi omuri paradiso