Koresa Bwaturakiti Kujanjaaza Amakuru Marungi
1. Abajurizi ba Yehova batwire nibakoresa bata bwaturakiti?
1 Abajurizi ba Yehova batwire nibakoresa bwaturakiti omu kujanjaaza amakuru marungi. Omuri 1880, C. T. Russell na bagyenzi be bakatandika kuteera bwaturakiti oburikwetwa Bible Students’ Tracts, baabuha abaabaire nibakunda kushoma Watch Tower kubugabira abandi. Bwaturakiti bukaba nibutwarwa nka bukuru munonga ahakuba omuri 1884 obu C. T. Russell yaahandiikisa ekibiina ekitagyendereire kukora magoba eky’okujanjaaza amakuru g’Obukama, ekigambo “turakiti” kikateebwa omu iziina ry’ekibiina Zion’s Watch Tower Tract Society, hati ekirikwetwa Watch Tower Bible and Tract Society of Pennsylvania. Omwaka 1918, abeegi ba Baibuli bakaba baagabire bwaturakiti oburikurenga omu bukaikuru 300. Bwaturakiti bukiri obw’omugasho omu kubuurira.
2. Ahabw’enki bwaturakiti nibukora gye?
2 Enshonga Ahabw’Enki Nibukora Gye: Bwaturakiti nibureetera abantu kugira ekihika ky’okwenda kushoma. Buhandiikirwe omu bugufu, burimu ebirikwegyesa kandi ebirikushemeza. Nibubaasa kushemeza abantu abu kitarikworobera kushoma magaziini nari ebitabo. Ababuurizi abasya n’abato nikiboorobera kubugaba. Kandi ahabw’okugira ngu ti buhango kyorobi kubutwara omu kubuurira.
3. Gamba eky’okureeberaho eki orikumanya nari ekiri omu bitabo byaitu ekirikworeka obukuru bw’okukoresa bwaturakiti.
3 Baingi bazoire amazima barikutandikira ahari bwaturakiti. Nk’eky’okureeberaho, omukazi omwe omuri Haiti akareeba katurakiti aha ruguuto. Yaakatorotoora, yaakashoma, reero yaagira ati: “Ka naazoora amazima!” Bwanyima akaza aha Kyombeko ky’Obukama, yaatandika kwega Baibuli kandi akaija yaabatizibwa ahabw’okuhwerwa katurakiti akaabaire karimu ebirikuruga omu Kigambo kya Ruhanga.
4. Omu kwezi oku turikuba nitugaba bwaturakiti tushemereire kugira kigyendererwa ki?
4 Enju aha Nju: Ahabw’okugira ngu bwaturakiti nibuhwera munonga omu kubuurira, nibwija kuba nibugabwa omu meezi gatari gamwe kutandika na Novemba. Ekigyendererwa kyaitu tikubugaba kwonka, beitu n’okubukoresa kutandika kubuurira abantu. Aha murundi gw’okubanza nari twaba tugarukireyo, omuntu yaayenda kumanya ebirikukiraho nitubaasa kumworeka oku arikubaasa kwega Baibuli turikukoresa akatabo Eki Baibuli Erikwegyesa. Nitubaasa kugaba tuta bwaturakiti twaba nitubuurira enju aha nju? Bwaturakiti tiburikushushana, n’ahabw’ekyo twine kuba nitwetegyereza gye obu turikuza kugaba.
5. Nitubaasa kugaba bwaturakiti tuta twaba nitubuurira enju aha nju?
5 Enyanjura yaitu eshemereire kuba neehikaana n’ekicweka eki turikubuuriramu na kaaturakiti aku turikukoresa. Nitubaasa kutandika kubuurira omuntu turikumuha kaaturakiti. Ebiri aha mutwe gwako nibibaasa kumushemeza. Nari ou turikubuurira nitubaasa kumworeka bwaturakiti bwingi reero atooraneho aku araakunde. Twaba nitubuurira omu kicweka ahu barikwanga kutwigurira, nitubaasa kukwata gye bwaturakiti kugira ngu omuntu areebe ebiri aha mutwe gwa kaaturakiti nari nitubaasa kumushaba kugira eki twamuteera ahansi y’orwigi reero tumubuuze atugambire eki arikuteekateeka. Omutwe gwa turakiti gwaba guri ekibuuzo, nitubaasa kumushaba kutugambira oku arikubaasa kukigarukamu. Nari nitubaasa kumubuuza ekibuuzo ekiraamureetere kwenda kugaaniira naitwe n’okumanya ebirikukiraho. Ou turikubuurira nitubaasa kumushomera bimwe aha biri aha kaaturakiti, reero twahika aha kibuuzo tumushabe kugira eki yaagarukamu. Nimubaasa kushoma ebyahandiikirwe ebirikushagika enshonga enkuru. Twaheza kuhikaanisa ebiteekateeko, nitubaasa kukora nawe entebeekanisa kugarukayo. Omu maka agu turaabe tutashangiremu abantu, nitubaasa kutsiga bwaturakiti ahu abandi batarikubureeba.
6. Nitubaasa kukoresa tuta bwaturakiti twaba nitubuurira aha nguuto?
6 Okubuurira aha Nguuto: Waakoreise bwaturakiti omu kubuurira aha nguuto? Abamwe abarikuba nibahingura nibaba nibarahuka bataine bwire bw’okuhurikiza. Nikibaasa kuguma kumanya yaaba nibenda kumanya ebirikukwata ahari Baibuli. Omu mwanya gw’okubaha magaziini otarikumanya yaaba nibaija kuzishoma, noobaasa kubaha bwaturakiti. Ahabw’okugira ngu ebiri aha mutwe gwa bwaturakiti nibishemeza kandi buhandiikirwe omu bugufu, nikibaasa kureetera abantu kwenda kubushoma baaba baine obwire bukye. Kwonka baaba batari aha bwira, nitubaasa kugaaniira nabo bimwe aha biri omu kaaturakiti.
7. Gamba eky’okureeberaho ekirikworeka oku turikubaasa kukoresa bwaturakiti kubuurira kitaraariire.
7 Okubuurira Kitaraariire: Kyorobi kukoresa bwaturakiti kubuurira kitaraariire. Ow’eishe-emwe omwe ku arikuza kuruga omu ka, naata bwaturakiti omu nshaho. Ku arikushanga abantu nk’abo abarikuguza omu duuka naabashaba kubaha eky’okushoma reero abaha kaaturakiti. Omushaija n’omukazi we ku baabaire nibaza kurambura omu rurembo New York, bakamanya ngu nibabaasa kushangayo abantu kuruga omu mahanga gatari gamwe. N’ahabw’ekyo bakatwara akatabo Nations na bwaturakiti bw’endimi nyingi obutarikushushana. Ku baabaire bahurira omuntu orikugamba orurimi orundi orikuguza ebintu aha rubaju rw’omuhanda nari oshutami haihi nabo omu hoteeri, bakaba bamuha kaaturakiti k’orurimi rwe.
8. Ni mu muringo ki ogu bwaturakiti buri nk’embibo?
8 “Ogume Obibe Embibo”: Bwaturakiti nibubaasa kugyeragyeranisibwa n’embibo. Omuhingi naabiba embibo nyingi ahakuba naaba atarikumanya eziraamere zikakura. Omubuurizi 11:6 nihagira hati: “Omu kasheeshe ogume obibe embibo, kandi n’omu mwabazyo orekye kugwisa omukono; ahabw’okuba torikumanya ekiryera, yaaba eki nari kiriya, nari shi yaaba byombi biriba birungi.” N’ahabw’ekyo ka tuteeraho kuguma ‘nitubuzya okumanya’ turikukoresa bwaturakiti omu kubuurira.—Enf. 15:7.
[Ebigambo ebirikworeka enshonga eri nkuru aha rupapura 3]
Ahabw’okugira ngu bwaturakiti nibuhwera munonga omu kubuurira, nibwija kuba nibugabwa omu meezi gatari gamwe kutandika na Novemba