Nitugumizamu Kuba Abahuriire Bwanyima y’Okufa?

NK’OKU orikumanya, abantu ebiro ebi nibakura, nibarwara, kandi bafa. N’abaana abamwe nabo nibafa. Mbwenu shi oshemereire kutiina okufa nari omuntu weena ofiire?— Noomanya embeera ei turikuba turimu twafa?—

Tihaine muntu oriho ohuriire hati oraafiire akagaruka akaba ohuriire kugitugambira. Kwonka obu Yesu, Omwegyesa Mukuru, yaabaire ari omu nsi, hariho omushaija owaafiire akazooka. Nitubaasa kumanya ebirikukwata aha mbeera y’abafu turikumushomaho. Omushaija ogwo akaba ari munywani wa Yesu kandi akaba naatuura Besania, etauni nkye eri haihi na Yerusaalemu. Akaba naayetwa Laazaaro, kandi akaba aine banyaanya babiri, Mariza na Mariamu. Ka tureebe eki Baibuli erikugamba ekyabaireho.

Eizooba rimwe Laazaaro akarwara munonga. Obwire obwo, Yesu akaba ari hare. N’ahabw’ekyo Mariza na Mariamu baayohereza entumwa kugambira Yesu ngu munyaanyabo, Laazaaro arwaire. Bakakora ekyo ahabw’okuba bakaba nibamanya ngu Yesu akaba naabaasa kwija atambire munyaanyabo. Yesu ti mushaho, kwonka aine amaani kuruga ahari Ruhanga agarikumubaasisa kutamba endwara z’emiringo yoona.​—Matayo 15:30, 31.

Kwonka Yesu atakagiire kureeba Laazaaro, Laazaaro akarwara munonga yaafa. Kwonka Yesu akagambira abeegi be ngu Laazaaro agwejegyeire ngu naija kuzayo kumusisiimura. Abeegi tibarayeetegyereize eki Yesu yaabaire naamanyisa. Yesu yaabagambira butunu ati: “Laazaaro afiire.” Eki nikyoreka ki aha bikwatiraine n’okufa?— Buzima ni nk’okugwejegyerera kimwe okutarimu n’okuroota.

Yesu atyo aza kutaayaayira Mariza na Mariamu. Banywani b’eka yaabo baingi bakaba baahikireyo. Bakaba baizire kuhuumuriza Mariza na Mariamu ahabw’okuba munyaanyabo akaba afiire. Mariza ku yaahuriire ngu Yesu ariyo naija, yaaza kumubugana. Bwanyima Mariamu nawe akashohora kureeba Yesu. Akaba aine enaku nyingi kandi ariyo naarira, yaagwa aha bigyere bya Yesu. Banywani baabo abandi abaabaire bakuratiire Mariamu nabo bakaba nibarira.

Omwegyesa Mukuru akabuuza ahu baziikire Laazaaro. Ahonaaho, abantu bakatwara Yesu aha nyanga ahu Laazaaro yaabaire aziikirwe. Yesu ku yaareebire abantu boona nibarira, nawe yaatandika kurira. Naamanya oku kirikushaasha okufeerwa omukundwa.

Enyanga ekaba ekingirweho eibaare, n’ahabw’ekyo Yesu akagira ati: “Mwiheho eibaare.” Bakaba bashemereire kukikora?— Mariza akaba naateekateeka ngu okukora ekyo tikihikire. Akagira ati: “Mukama wangye, hati yaanuukire, ahabw’okuba amazire kana afiire.”

Kwonka Yesu yaamugira ati: “Tinaakugira nti, ku oraikirize, noija kureeba ekitiinisa kya Ruhanga?” Yesu akaba naamanyisa ngu Mariza akaba naija kureeba ekintu ekyabaire nikiza kuhaisa Ruhanga ekitiinisa. Yesu akaba naaza kukora ki? Eibaare ku rihirweho, Yesu yaashaba Yehova n’eiraka rihango. Bwanyima Yesu yaagamba n’eiraka rihango ati: “Laazaaro, shohora, oije.” Mbwenu shi akaba naabaasa kurugamu?—

Noobaasa kusisiimura omuntu ogwejegyeire?— Eego, waayeta n’eiraka rihango, naasisiimuka. Kwonka shi noobaasa kusisiimura omuntu ogwejegyereire omu kufa?— Ngaaha. N’obu waakweta n’eiraka rihango rita, omuntu ofiire tarikubaasa kuhurira. Tihaine eki iwe nari nyowe nari omuntu ondiijo weena omu nsi ebiro ebi arikubaasa kukora okusisiimura abafiire.

Kwonka Yesu n’ow’omutaano. Aine amaani g’omutaano kuruga ahari Ruhanga. N’ahabw’ekyo Yesu ku yaayetsire Laazaaro, hakabaho ekintu ekirikutangaaza. Omushaija owaabaire amazire ebiro bina afiire akaruga omu nyanga! Yaagaruka yaaba ohurire! Akabaasa kwitsya, yaagyenda kandi yaagamba! Buzima Yesu akazoora Laazaaro kuruga omu bafu.​—Yohaana 11:1-44.

Hati kiteekateekeho: Laazaaro akaba ari mu mbeera ki obu yaabaire afiire? Mbwenu shi haine ekyamurugiremu kikaza kutuura omu mwanya ogundi? Laazaaro shi akaba agiire omu iguru? Mbwenu shi omu biro bina ebyo akaba ari omu iguru na Ruhanga na baamaraika abarikwera ahuriire?—

Ngaaha, akaba atahuriire. Ijuka, Yesu akagira ngu Laazaaro akaba agwejegyeire. Waaba ogwejegyeire nooba ori mu mbeera ki? Waaba ogwejegyereire kimwe, nooba otarikumanya ebiriyo nibibaho, tikwo?— Kandi waasisiimuka, nooba otarikumanya obwire obu wamaara ogwejegyeire okuhitsya waareeba aha shaaha.

Nikyo kimwe n’abantu abafiire. Tihaine eki barikumanya. Tibaine nyehurira yoona. Kandi tihaine eki barikubaasa kukora. Okwo nikwo Laazaaro yaabaire ari obu yaabaire afiire. Okufa nikushushana n’okugwejegyerera kimwe, omuntu atarikubaasa kwijuka ekintu kyona. Baibuli neegira eti: “Abafiire tibagira ki bamanya.”​—Omubuurizi 9:5, 10.

Teekateeka n’ahari eki: Kuri Laazaaro yaabaire ari omu iguru ebiro bina ebyo, takaabaire aine eki yaakigambireho?— Kandi kuri yaabaire ari omu iguru, Yesu akaamugarwire omu nsi kuruga omu mwanya ogwo omurungi munonga?— Buzima takaakikozire!

Kwonka, abantu baingi nibagira ngu haine ekintu ekiri omuriitwe ekirikuguma kihuriire bwanyima y’okufa kw’omubiri. Nibagira ngu Laazaaro akaba akihuriire omu mwanya ogundi. Kwonka Baibuli tikwo erikugira. Neegira ngu Ruhanga akakora omuntu w’okubanza Adamu “yaaba ohuriire.” Kandi Baibuli neegira ngu Adamu ku yaasiisire, akafa. Akaba afiire kandi tihaine eki yaabaire naamanya. Akagaruka omu itaka omu yaihirwe. Kandi Baibuli neegira ngu baijukuru ba Adamu boona bakahungura ekibi n’okufa.​—Okutandika 2:7; 3:17-19; Abarooma 5:12.

Abantu abamwe nibatiina abafu. Tibarikubaasa kuhika haihi n’ebituuro ahabw’okuba nibateekateeka ngu abafu haine ekintu ekirikubarugamu ekirikubaasa kukora kubi abahuriire. Kwonka shi omuntu ofiire naabaasa kukora kubi ohuriire?— Ngaaha, tarikubaasa.

Abantu abamwe nibaikiriza ngu abafiire nibabaasa kugaruka nk’emizimu bataayaayire abahuriire. N’ahabw’ekyo nibatebeekanisiza abafu eby’okurya. Kwonka abantu abarikukora ekyo buzima tibarikwikiriza eki Ruhanga arikugamba aha mbeera y’abafu. Twikiriza eki Ruhanga arikugamba, titurikwija kutiina abafu. Kandi buzima twaba nitusiima Ruhanga ahabw’okutuha amagara, nitwija kukyoreka turikukora ebi Ruhanga arikusiima.

Kwonka noobaasa kwebuza: ‘Ruhanga naija n’okuzoora abaana abaafiire? Buzima naayenda kubazoora?’ Nitwija kugamba ahari ekyo omu Shuura eraakurateho.