Ruhanga Akaijuka Omwana We

YESU akarira obu munywani we Laazaaro yaafa. Nooteekateeka ngu Yehova akagira obusaasi Yesu ku yaabonaboine kandi akafa?— Baibuli neegira ngu Ruhanga naabaasa ‘kuguubwa kubi’ kandi agire obusaasi ahabw’ebintu ebirikubaho.​—Zaaburi 78:40, 41; Yohaana 11:35.

Noobaasa kuteekateeka aha busaasi obu Yehova yaagizire ku yaareebire Omwana we omukundwa naafa?— Yesu akaba naamanya gye ngu Ruhanga naija kumwijuka arikumuzoora. Niyo nshonga ahabw’enki yaagambire ebigambo ebi atakafiire: “Taata, naata [amagara] gangye omu mikono yaawe.”—Luka 23:46.

Yesu akaba naamanya gye ngu naija kuzoorwa, ngu tarikwija kurekwa “kuzimu” nari omu kituuro. Yesu ku yaaherize kuzoorwa omu bafu, entumwa Petero akajuriza ebihandiikirwe omuri Baibuli ebirikukwata ahari Yesu, ku “ataratsigirwe kuzimu, kandi n’omubiri gwe ku gutarajunzire.” (Ebyakozirwe 2:31; Zaaburi 16:10) Buzima, omubiri gwa Yesu tiguramazire bwire bwingi kuzimu kubaasa kujunda kandi gukanuuka.

Yesu obu yaabaire ari omu nsi, akagambira abeegi be ngu tarikwija kumara bwire buraingwa afiire. Akabagira ngu akaba naija ‘kwitwa, kandi azoorwe aha kiro kya kashatu.’ (Luka 9:22) N’ahabw’ekyo, Yesu ku yaazookire abeegi bakaba batashemereire kutangaara. Kwonka shi bakatangaara?— Ka tureebe.

Zikaba ziri nka shaaha mwenda z’eihangwe orwakataano obu Omwegyesa Mukuru yaafeera aha muti. Yosefu omugaiga, omwe aha b’Ishengyero, nawe akaba naikiririza omuri Yesu bweshereekye. Ku yaamanyire ngu Yesu afiire, yaaza owa Pilaato, omutegyeki w’Abarooma. Yaashaba kwiha omutumbi gwa Yesu aha muti kugutwara kuguziika. Bwanyima, Yosefu akatwara omutumbi gwa Yesu omu musiri, omu mwanya ogwabaire guziikwamu abafu.

Omutumbi ku baaherize kuguta omu kituuro, baataho eibaare rihango. Aha kituuro bakakiingaho. Aha kiro kya kashatu, aha Sande, butakasheesire hakiriho omwirima, abashaija bakaba barinzire ekituuro. Kandi abanyamurwa abakuru nibo baabaire babataireho kukirinda. Noomanya ahabw’enki?—

Abanyamurwa nabo bakaba baahuriire ngu Yesu akagira ngu naija kuzoorwa. N’ahabw’ekyo okwenda ngu abeegi be bataiba omutumbi kandi bakagira ngu Yesu azoirwe, abanyamurwa bakataho abarinzi. Bwanyima ensi ekatandika kutengyeta. Haareebeka ekyererezi omu mwirima. Akaba ari maraika wa Yehova. Abaserukare bakatiina munonga baaremwa n’okugyenda. Maraika akaza aha kituuro yaakumbagaza eibaare. Ekituuro kikaba kirimu busha.

Buzima, kikaba nk’oku entumwa Petero bwanyima yaagambire: “Yesu ogwo Ruhanga akamuzoora.” (Ebyakozirwe 2:32) Ruhanga akahindura Yesu ohurire kandi yaamuha omubiri nk’ogu yaabaire aine atakaizire omu nsi. Akazoorwa aine omubiri gw’omwoyo nk’ogu baamaraika baine. (1 Petero 3:18) N’ahabw’ekyo abantu kubaasa kureeba Yesu, akaba aine kujwara omubiri gw’abantu. Ekyo shi nikyo yaakozire?— Ka tureebe.

Bukaba buri omu kasheeshe abaserukare baaheerize kugyenda. Mariamu Magadaleene hamwe n’abandi bakazi abeegi ba Yesu bakaba bari omu muhanda barikuza aha kituuro. Bakaba nibeebuuza bati: ‘N’oha oraatukumbagarize eibaare rihango eryo?’ (Mako 16:3) Kwonka ku baahikire aha kituuro, eibaare rikaba ryakumbagaziibwe. Kandi ekituuro kikaba kirimu busha. Omutumbi gwa Yesu gukaba gutarimu. Ahonaaho, Mariamu Magadaleene akairuka yaaza kusherura bamwe aha ntumwa za Yesu.

Abandi abakazi bakaguma aha kituuro. Bakaba nibebuuza bati: ‘Omutumbi gwa Yesu gugire hi?’ Ahonaaho abashaija babiri bajwaire ebijwaro birikumurinkana bakemerera haihi nabo. Bakaba bari baamaraika. Bakagira abakazi abo bati: ‘Ahabw’enki nimurondera aha Yesu? Tari aha; ahabw’okuba azookire. Mwehuute, mugambire abeegi be.’ Noobaasa kuteekateeka oku abakazi bairukire! Ku baabaire bari omu muhanda, omushaija yaababugana. Omushaija ogwo noomumanya?—

Akaba ari Yesu, ajwire omubiri gw’abantu. Nawe akagambira abakazi abo ati: ‘Mugyende mugambire abeegi bangye.’ Abakazi abo bakashemererwa munonga. Bakahika abeegi kandi baabagambira bati: ‘Yesu ariho ahuriire twamureeba.’ Mariamu akaba yaaherize kugambira Petero na Yohaana ngu ekituuro kirimu busha. Bakaza aha kituuro, nk’oku orikureeba omu kishushani. Bakareeba emyenda ei Yesu yaabaire azingirwemu, baashoberwa. Bakaba nibabangaanisa yaaba azookire.

Bwanyima aha Sande egyo, Yesu akabonekyera abeegi be babiri abaabaire nibaza omu kyaro kya Emau. Yesu akagyenda nabo kandi yaagaaniira nabo, kwonka tibaamumanya ahakuba akaba ataine omubiri nk’ogu yaabaire aine atakafiire. Ku yaashabire arikuza kurya nabo nibwo baamumanya. Abeegi abo bakashemererwa munonga baagyenda orugyendo ruraingwa barikwehuuta nibagaruka Yerusaalemu. Bwanyima y’ekyo, Yesu naabaasa kuba nibwo yaayeyorekire Petero kumuhamiza ngu azookire.

Sande egyo omu mwabazyo, abeegi baingi bakaba beerundaniire omu kishengye. Kandi enyigi zikaba zikingire. Omuri ako kaanya, Yesu akaija omu kishengye eki baabaire barimu. Obwo nibwo baamanya gye ngu Omwegyesa Mukuru azookire. Teekateeka aha ku baashemereirwe!​—Matayo 28:1-15; Luka 24:1-49; Yohaana 19:38–20:21.

Kumara ebiro 40 Yesu akaba naayeyoreka omu mibiri etari emwe n’emwe kubaasa kworeka abeegi be ngu azookire. Bwanyima akaruga omu nsi, yaagaruka ow’Ishe omu iguru. (Ebyakozirwe 1:9-11) Ahonaaho abeegi be bakatandika kugambira buri omwe ngu Ruhanga azoire Yesu omu bafu. N’obu abanyamurwa baabateire kandi bamwe aharibo bakabaita, bakagumizamu nibabuurira. Bakaba nibamanya ngu n’obu baakufa, Ruhanga naija kubaijuka abazoore nk’oku yaazoire Omwana we.

Abakuratsi ba Yesu ab’omu kyasha ky’okubanza ka baabaire nibataana aha bantu baingi obwire obu! Omu mahanga agamwe, abantu abo ku barikuba nibaijuka okuzooka kwa Yesu ahari Paasika nibata omutima aha bumi n’amahuri gaahuugire. Kwonka Baibuli terikugamba aha bumi obwo n’amahuri ago. Kureka neegamba aha kuheereza Ruhanga.

Nitubaasa kutooreza abeegi ba Yesu turikugambira abantu ngu Ruhanga akakora eky’okutangaaza obu yaazoora Omwana we. Titushemereire kutiina, n’obu abantu baakugira ngu nibaza kutwita. N’obu twakufa, Yehova naija kutwijuka atuzoore, nk’oku yaazoire Yesu.

Tikirikutushemeza kumanya ngu Ruhanga naijuka abo abarikumuheereza kandi ngu naija kubazoora omu bafu?— Okumanya ekyo kiine kutureetera kwenda kumanya oku twakubaasa kushemeza Ruhanga. Noomanya ngu buzima nitubaasa kushemeza Ruhanga?— Ekyo nikyo turagambeho omu Shuura eraakurateho.