Hurikiza Kandi Oyegye
1. Ahabw’enki nikiija kutwetengyesa kuteeraho kuhurikiza gye kandi tukeega twaba turi omu ruteerane orw’ebiro bishatu?
1 Enteerane eza 2013 ez’ebiro bishatu ziri haihi kutandika. Bingi bikozirwe omu kuteebekanisa enteerane ezo eziraahwere abantu b’emiringo yoona. Waakozire entebeekanisa kugira ngu orubemu ebiro byona bishatu? Enteerane nk’ezo nizibaasa kubamu bingi ebirikubaasa kutuhuzya, n’ahabw’ekyo twine kufayo kuta omutima aha puroguraamu. Obu ebicweka eby’enteerane nk’ezo birikutwara obwire buraingwa okukira enteerane ez’ekibiina eza butoosha, nikyetengyesa kuhurikiza kumara obwire buraingwa. Okwongyera ahari ekyo, engyendo ndaingwa n’ebindi nibibaasa kutureetera oburuhe. Niki ekiraije kutuhwera kuhurikiza gye kandi tukeega?—Bir. 31:12.
2. Nitubaasa kuteebekanisa tuta emitima yaitu ahabwa puroguraamu ey’oruteerane orw’ebiro bishatu?
2 Oruteerane Rutakabaireho: Aha mukura gwaitu, www.pr418.com, noija kushangaho puroguraamu y’oruteerane orw’ebiro bishatu erimu emitwe y’embazo zoona, na kimwe nari bibiri aha byahandiikirwe ebikuru ebya buri rubazo. Twaba nitubaasa kuza aha Intaneeti, kureeba puroguraamu egyo nikiija kutuhwera kutebeekanisa emitima yaitu. (Ezr. 7:10) Omu Kuramya okw’Eka, nimubaasa kuhikaanisa ebiteekateeko aha biri omu puroguraamu y’oruteerane orw’ebiro bishatu kibaasise buri omwe kugirira oruteerane orwo ekihika?
3. Niki ekiratuhwere kuguma tuhurikiize?
3 Waaba Ori omu Ruteerane: Kyaba nikibaasika noobaasa kusheesha kare, ebicweka by’oruteerane bitakatandikire. Ni kirungi kwihaho esimu yaawe etakakureetera kuteerera abandi nari bo kukuteerera nari bakakwoherereza obutumwa waaba ori omu ruteerane. Kyayetengyesa kugitsigaho reeba ngu tiyaahuzya abandi hagira abakuteerera. Waaba nookoresa ebirikubaasa kukwata puroguraamu reeba ngu tibyaateganisa nari kuhuzya abandi. Yetantare okurya nari okunywa puroguraamu yaaba neegyenda omu maisho. (Mub. 3:1) Guma nooreeba omugambi. Ekyahandiikirwe kyaba nikishomwa, kuratira omu Baibuli yaawe. Gira ebi waahandiika kweyijutsya.
4. Abazaire nibabaasa kuhwera bata abaana baabo kuhurikiza kandi bakeega?
4 Nitwenda ngu abaana baitu nabo bahurikiize kandi beegye. Enfumu 29:15 nihagira hati: “Omwana ou bahugaho, ahemura nyina.” N’ahabw’ekyo ni kirungi eka kushutama hamwe kibaasise abazaire kurinda abaana baabo kutahuga, kutoherereza obutumwa aha simu nari kutagyendagyenda. N’obu abaana bakuba bakiri bato batarikubaasa kwetegyereza byona ebiraabe nibigambwa, nibabaasa kutendekwa kuguma nibareeba kandi bahunami.
5. Ahabw’eki n’eky’omugasho kweijutsya ebi mwegire kandi ekyo nitubaasa kukikora tuta?
5 Bwayima ya Puroguraamu Kuhwa Buri Izooba: Otakyerererwa kubyama. Obyame bukiri kare kikubaasise kuhuumura ekirikumara. Okweijutsya ebi waayega nikiija kukuhwera kuguma noobiijuka. N’ahabw’ekyo, nikiija kubahwera nk’eka, mwatunga akiire buri mwabazyo mukagaaniira aha bi mwayega. Waaza omu myanya y’okuriiramu n’abanywani baawe, ahabw’enki otarikugyendana ebi waahandiika okagaaniira nabo ahari kimwe nari bibiri aha byakushemeza? Mwagaruka omuka bwanyima y’oruteerane kuhwa, omu Kuramya okw’Eka, nimubaasa kuhikaanisa ebiteekateeko aha ku murikubaasa kugyendera aha bi mwegire nk’eka. Haaba hariho akatabo akasya aku mutungire omu ruteerane nimubaasa kutaho obwire buri saabiiti kushwijuma ebiri omu katabo ako.
6. Okubaho omu ruteerane orw’ebiro bishatu nikimara? Shoboorora.
6 Aha kihuuro, eby’okurya kubaasa kutugasira, twine kubirya. Nikyo kimwe n’eby’okurya eby’omwoyo ebi turaaheebwe aha ruteerane orw’ebiro bishatu, kubaasa kubigasirwamu twine kurubamu ebiro byona, tukahurikiza gye kandi tukagyendera aha bituraayegye.
[Akabokisi aha rupapura 2]
Eby’Okweijutsya eby’Oruteerane orw’Ebiro Bishatu Orwa 2013
◼ Eshaaha z’Oruteerane: Omwanya oguraabemu oruteerane nigwija kwigurwa shaaha 2:00 ez’akasheeshe. Obweshongoro oburikwiguraho oruteerane nibwija kutandika shaaha 3:20 ez’akasheeshe ebiro byona bishatu eby’oruteerane. Aha shaaha egyo, buri omwe ashemereire kutunga ah’okushutama kugira ngu oruteerane rutandikye omu butebeekana. Ekyeshongoro n’okushaba ebiraahendere puroguraamu nibiija kubaho shaaha 10:50 ez’omwabazyo aha Rwakataano n’Orwamukaaga kandi shaaha 9:35 ez’omwabazyo aha Sande.
◼ Ah’Okwemereza Ebiiruka: Aha myanya y’Enteerane yoona, nihaija kuba hariho ah’okwemereza ebiiruka obumwe nihaba hari hakye, abaraabanze kwija nibo baraatungye ah’okwemereza ebiiruka.
◼ Okukwata Emyanya: Noobaasa kukwatira emyanya abu waija nabo, abu orikutuura nabo nari abu orikwega nabo Baibuli. Emyanya ey’abakaikwire n’abaine amaani makye ni mikye n’ahabw’ekyo nimushabwa kugitsigira abo bonka hamwe n’abo abaraabareeberere.—1 Kor. 13:5.
◼ Kyamushana: Nooshabwa kwija n’eby’okurya omu mwanya gw’okuza kubisherura ahandi omu shaaha za kyamushana. Noobaasa kureetera eby’okurya byawe omu kintu kikye eki orikubaasa kuta ahansi y’entebe. Ebintu ebihango nari ebirikwatika, tibirikwikirizibwa aha mwanya gw’oruteerane.
◼ Okuhayo: Nitubaasa kworeka okusiima kwaitu ahabw’entebeekanisa y’enteerane ez’ebiro bishatu turikuhayo twekundiire kushagika omurimo ogurikukorwa omu nsi yoona, twaba turi omu nteerane ezo. Ceeka ezirikuheebwayo, zishemereire kuhandiikwa omu iziina rya IBSA nari ery’ekibiina eririkukoresibwa omu ihanga ryaitu.
◼ Zaabutandu: Haabaho orikwetenga obujanjabi obw’ahonaaho aha ruteerane oru, gambira omwe aha barikwakiira abantu oraagambire abarikukora aha by’obujanjabi omu ruteerane oru, kugira ngu abakugu abo babaase kwetegyereza embeera ye kandi bamuhe n’obujanjabi oburikwetengyesa. Kyaba nikyetengyesa abarikukora aha by’obujanjabi obw’ahonaaho nibaija kukora aha nshonga egyo ahonaaho.
◼ Eby’Emibazi: Ku oraabe oine emibazi ei orikukoresa, nyabura ‘we ija neerikumara ahakuba aha ruteerane oru nihaija kuba hatariho mibazi egyo. Empitirizo ezirikukoresibwa abarwaire shukaari, tizishemereire kuteebwa omu bintu ebi turikutamu ebisasiro aha ruteerane nari ahu turikuraara.
◼ Eby’Okujwara omu Bigyere: Buri mwaka ni baingi abarikuhutaara ahabw’okujwara enkaito ezakakondo endaingwa munonga. N’ahabw’ekyo ni kirungi okujwara enkaito ezishemeire kandi ezirikukuhika gye, ezirikukubaasisa kugyenda gye aha matembero n’ahandi.
◼ Eby’emigaju: Enteerane ezi enyingi niziba omu byombeko. N’ahabw’ekyo, nikiba kiri kirungi okutakoresa eby’emigaju ey’amaani, erikubaasa kukora kubi bamwe baagitsya.—1 Kor. 10:24.
◼ Foomu Erikwetwa Please Follow Up (S-43): Foomu egi eshemereire kukoresibwa kuhandiika ebirikukwata aha muntu owaayoreka ngu naayenda kumanya ebirikukiraho bwanyima y’okumubuurira kitaraariire aha ruteerane. Foomu ezijuziibwe gye nizibaasa kuheebwa abarikukora aha by’Ebitabo nari omuhandiiki w’ekibiina kyawe.
◼ Emyanya y’Okuriiramu: Haisa eiziina rya Yehova ekitiinisa orikutwaza gye omu myanya y’okuriiramu. Jwaara omu muringo ogushemereire Abakristaayo. Hayo akasiimo ku muraabe nikwo murikutwaza omu kicweka kyanyu.
◼ Oburaaro:
(1) Nooshabwa kutakwatisa ebishengye ebi otaraakorese, kandi otakaarenzya aha mubaro ogurikwikirizibwa kuraara omu kishengye ekyo.
(2) Waaba nooyenda kushazamu okushaba kwawe, manyisa aba hoteeri bukiri kare. (Mat. 5:37)
(3) Waakoresa akagaari k’emigugu kagarure ahonaaho kugira ngu abandi bakakorese.
(4) Ha abakozi ba hoteeri akasiimo baakuhwera aha kukiriza ebintu byawe hamwe n’ogwo orikuboneza ekishengye buri izooba ku muraabe nikwo murikutwaza omu kicweka kyanyu.
(5) Nooshabwa kutateekyera omu bishengye ebitarikwikirizibwa kuteekyerwamu.
(6) Otakaatwara eby’okurya ebirengire ahari ebyo ebi oshemereire kutwara, nka kyantsya n’ebindi ebirikuba biteereirweho abarikuraara omu hoteeri egyo.
(7) Obwire bwona yoreka emitwarize mirungi orikukoragana gye n’abakozi ba hoteeri. Nibareeberera abagyenyi baingi n’ahabw’ekyo nibashemererwa twayoreka embabazi, okugumisiriza n’okwetegyereza.
(8) Abazaire tibashemereire kuhuga aha baana baabo baaba bari ahu barikuraara.
(9) Ku oraatungye oburemeezi ahu orikuraara, manyisa abarikukora aha by’Oburaaro mwaba muri aha mwanya gw’oruteerane.
◼ Abahwezi: Ogwo weena orikwenda kuhwera ashemereire kumanyisa abo abarikukora aha by’okuboneza aha ruteerane oru. Abaana abari ahansi y’emyaka 16 nabo nibabaasa kwejumba omu kuboneza barikworekyererwa abazaire baabo nari abandi abatoorainwe.