Enteerane Zaitu ez’Ebiro Bishatu Nizituhwera Gye Kwetegyereza Amazima
1. Enteerane z’Abaisraeli empango zikaba zibabaasisa kuteekateeka munonga n’okugaaniira ahari ki?
1 Abaisraeli aba ira bakaba bagira enteerane empango emirundi eshatu buri mwaka. N’obu abashaija bonka nibo baabaire baba baine kuzizamu, obumwe bakaba bagyenda n’ab’omu maka gaabo kuza Yerusaalemu omu nteerane ezi. (Bir. 16:15, 16) Enteerane ezi zikaba zibahwera kuteekateeka munonga aha mazima n’okugagaaniiraho. Eky’okubanza, bakaba bamanya ngu Yehova n’efura orikubaha ebi barikwetenga. (Bir. 15:4, 5) Ekindi, bakaba bamanya ngu Yehova naabaha obuhabuzi n’oburinzi. (Bir. 32:9, 10) Kandi Abaisraeli bakaba bateekateeka munonga aha mugisha gwabo ogw’okwetererwa eiziina rya Yehova kibabaasisa kworeka emitwarize ye ey’okuhikiirira. (Bir. 7:6, 11) Naitwe obunaku obu nikwo turikugasirwa omu nteerane empango ez’ebiro bishatu.
2. Oruteerane orw’ebiro bishatu nirwija kutuhwera ruta kwetegyereza amazima?
2 Oruteerane Oru Nirutuhwera Gye Kwetegyereza Amazima: Aha ruteerane orw’ebiro bishatu, nihabaho emizaano, embazo n’eby’okureeberaho ebirikutuhwera gye kwetegyereza amazima ga Baibuli. (Yoh. 17:17) Ni bingi ebiriyo nibikorwa ahabw’oruteerane orw’ebiro bishatu orw’omwaka ogu. Ekibiina kya Yehova kiriyo nikitebeekanisa oruteerane oruraahwere abantu b’emiringo yoona. (Mat. 24:45-47) Oine ekihika ky’okurubamu okareeba kandi okahurikiza ebiraagambwe?
3. Tushemereire kukora ki kubaasa kugasirwa omu ruteerane orw’ebiro bishatu?
3 Kubaasa kurugasirwamu, twine kubaho ebiro byona bishatu kandi tukahurikiza gye. Ku oraabe otakashabire rusa ou orikukorera, noobaasa kukikora. Teeraho kuguma nobyama kare ebiro byona bishatu kikubaasise kuhurikiza gye waaba ori omu ruteerane. Baingi bashangire ngu okuguma nibareeba omugambi kandi bakagira n’ebi baahandiika nikibahwera kutahuga. Tebeekanisa gye esimu yaawe kugira ngu etakuteganisa nari ekateganisa abandi. Oruteerane rwaba nirugyenda omu maisho, yetantare kugamba, kutsindika obutumwa aha simu, kurya, nari kunywa.
4. Abazaire nibabaasa kuhwera bata abaana baabo kugasirwa omu ruteerane orw’ebiro bishatu?
4 Omu bwire bw’obugyenyi bw’Ensiisira, obu Abaisraeli baabaire bateeranira hamwe kuhurikiza ebiragiro birikushomwa, bakaba baba bari “n’abaana” baabo kugira ngu boona ‘bahurire kandi beegye.’ (Bir. 31:12) Ka ni kirungi kureeba abazaire bashutami n’abaana baabo omu ruteerane orw’ebiro bishatu, n’abaana barikuhurikiza gye batarikuhuga! Buri mwabazyo nimubaasa kuguma nimweijutsya ebi mwahandiika reero mugaaniire aha byabashemeza munonga. “Obushema bubohirwe omu mutima gw’omwana,” n’ahabw’ekyo abazaire omu bwire bwa kyamushana nari baaba bari ahu barikuraara baine kuguma nibafayo aha baana baabo, otwariiremu n’eminyeeto, omu mwanya ‘gw’okubahugaho.’—Enf. 22:15; 29:15.
5. Twaba turi aha hoteeri, emitwarize yaitu mirungi neija kusiimisa eta amazima?
5 Emitwarize Yaitu Mirungi Neesiimisa Amazima: Twaba turi omu rurembo ahu oruteerane ruri emitwarize yaitu mirungi neesiimisa amazima. (Tit. 2:10) Twayorobera ebiragiro bya hoteeri kandi tukatwariza abarikuzikurira omu muringo gw’embabazi, nikibakwataho. (Kol. 4:6) Omwaka oguhweire ab’eishe-emwe kuruga aha ofiisi emwe y’eitaagi ku baabaire nibarondera ab’eishe-emwe abandi oburaaro, orikukurira hoteeri akagira ati: “Nituba nitwenda ngu abantu baanyu baije aha hoteeri yaitu ahabw’okuba n’abantu barungi. Baine emicwe mirungi kandi nibatwariza gye abakozi baitu.”
6. Twaba turi omu rurembo orurimu oruteerane, emijwarire yaitu neebaasa kusiimisa eta amazima?
6 Twajwara baagi zaitu nikibaasisa ab’eishe-emwe abandi kutumanya, kimanyisa abandi ngu hariho oruteerane, kituha n’omugisha gw’okubuurira abarikutureeba. Abantu abari omu rurembo ahu oruteerane ruri nibaija kureeba ngu abo abaine baagi bajwaire gye kandi ngu tibajwaire omu muringo ogurikworeka emishono y’ensi egi. (1 Tim. 2:9, 10) N’ahabw’ekyo twine kuteeraho kujwara gye twaba turi omu rurembo orurimu oruteerane, na twaba nituza ahu turikuza kuraara. Okuhika omu rurembo orwo tujwaire empare ngufu nari ebi tutashemereire kujwara omu nteerane, tikirikuhaisa kitiinisa. N’obu oruteerane rwakuba ruri omu bishayi, tushemereire kujwara gye. Twacwamu kuhindura emyenda bwanyima y’oruteerane turikuza kurya, nabwo twine kujwara gye.
7. Nitubaasa kukora ki okugasirwa omu bumwe bwaitu aha ruteerane orw’ebiro bishatu?
7 Aha nteerane empango, Abaisraeli bakaba bagaaniira ebirikwombeka n’abaramya bagyenzi baabo kuruga omu ihanga ryabo ryona n’ahandi, kibabaasisa kugira obumwe. (Byak. 2:1, 5) Obumwe bwaitu nibureeberwa kimwe aha nteerane ez’ebiro bishatu. Obumwe obu nibukwata aha barikutureeba. (Zab. 133:1) Omu mwanya gw’okuruga aha ruteerane omu bwire bwa kyamushana kuza kugura eby’okurya, nikiba kiri kirungi kwija n’eby’okurya kugira ngu tubaase kugaaniira n’abandi abari haihi naitwe.
8. Ahabw’enki oshemereire kwejumba omu kuhwera kyaba nikibaasika?
8 Abarikutureeba nibasiima omuringo murungi ogu enteerane zaitu zirikuba zitebeekanisiibwemu na munonga ku barikukimanya ngu abarikuzitebeekanisa tibarikushashurwa. Noobaasa ‘kwehayo oyekundiire’ kugira eki waakora aha ruteerane oru? (Zab. 110:3) Obumwe ab’eka yoona nibeehayo kuhwera, omu kukora ekyo nibaba nibatendeka abaana baabo kuhwera abandi. Ku oraabe oine enshoni, okuhwera aha ruteerane orw’ebiro bishatu n’omuringo murungi ogurakuhwere kumanya abandi. Munyaanyazi-itwe omwe akagira ati: “Oyihireho ab’omu ka yaitu na banywani bangye bakye, baingi abu naashangireyo nkaba ntarikubamanya. Kwonka ku naayejumbire omu kuboneza, nkabaasa kumanya ab’eishe-emwe baingi. Eki kikanshemeza munonga!” Ku turaashashaanukye tukongyera aha banywani abu twine turikuhwera aha ruteerane orw’ebiro bishatu, nitwija kushemererwa munonga. (2 Kor. 6:12, 13) Ku oraabe otakejumbaga omu kuhwera nk’okwo, buuza abareeberezi bakugambire ebirikwetengyesa.
9. Nitwija kugaba tuta obupapura bw’okweta abantu aha ruteerane orw’ebiro bishatu?
9 Yeta Abandi Kurwijamu: Harikuburayo esaabiiti ishatu oruteerane orw’ebiro bishatu rukahika, nitwija kwejumba omu kampeyini y’okweta abantu kurwijamu. Ebibiina nibiija kuteeraho kugaba obupapura bw’okweta abantu omu kicweka kyona eki birikubuuriramu. (Reeba akabokisi “Nitwija Kugaba Tuta Obupapura bw’Okweta Abantu?”) Oburaatsigareho bushemereire kureetwa aha ruteerane. Nibwija kukoresibwa kweta abo abu turikubuurira kitaraariire, twaba turi omu rurembo orurimu oruteerane orw’ebiro bishatu.
10. Ni by’okureeberaho ki ebirikworeka ngu kampeyini zaitu ez’okweta abantu nizirugamu ebirungi?
10 Mbwenu shi abantu ku turikubeeta nibaija? Aha ruteerane rumwe orw’ebiro bishatu, orikwakiira abantu akahwera omushaija n’omukazi we kutunga ah’okushutama. Bakamugira ngu bakatunga akapapura k’okweta abantu kandi ngu “baareeba ebiriho birikushemeza.” Bakavuga mailo 200 kuhika aha ruteerane orwo! Kandi munyaanyazi-itwe ku yaabaire naabugaba enju aha nju, akaha omushaija akapapura owaayenzire kumanya ebirikukwata aha ruteerane orwo. Akamushoboororera ebiri aha kapapura ako. Bwanyima y’ebiro bikye ku baabaire bari aha ruteerane, munyaanyazi-itwe akareeba omushaija ogwo ari na munywani we, kandi bakaba baine na kimwe aha bitabo ebisya eki baatungiire aha ruteerane orwo!
11. Ahabw’enki kiri kikuru kubaho buri mwaka aha ruteerane orw’ebiro bishatu?
11 Enteerane empango Yehova akaba azikoresa kuhwera Abaisraeli ‘kumuheereza omu mazima batarikuryarya.’ (Yos. 24:14) Naitwe ku turikubaho aha nteerane empango ez’ebiro bishatu, nizituhwera kuguma nitugyendera omu mazima kandi ni nkuru omu kuramya kwaitu. (3 Yoh. 3) Nitushaba Yehova ngu ahwere boona abarikukunda amazima bazibemu kandi bazigasirwemu omu bwijwire!
[Ebigambo ebirikworeka enshonga eri nkuru eri aha rupapura 3]
Twaba turi omu rurembo ahu oruteerane ruri emitwarize yaitu mirungi neesiimisa amazima
[Ebigambo ebirikworeka enshonga eri nkuru eri aha kishushani aha rupapura 4]
Harikuburayo esaabiiti ishatu oruteerane orw’ebiro bishatu rukahika, nitwija kwejumba omu kampeyini y’okweta abantu kurwijamu
[Akabokisi aha rupapura 3-6]
Eby’okweijutsya Eby’oruteerane Orw’ebiro Bishatu Orwa 2012
◼ Eshaaha z’Oruteerane: Oruteerane nirwija kuba nirutandika shaaha 3:20 ez’akasheeshe ebiro byona bishatu. Obweshongoro ku buraatandike, buri omwe ashemereire kutunga ah’okushutama kugira ngu oruteerane rutandike hatabaireho kuteganisibwa. Orwakataano n’Orwamukaaga oruteerane nirwija kuhendera shaaha 10:55 ez’omwabazyo reero aha Sande ruhendere shaaha 9:40 ez’omwabazyo.
◼ Ah’Okwemereza Ebiiruka: Aha myanya y’Enteerane yoona, nihaija kuba hariho ah’okwemereza ebiiruka.
◼ Okukwata Emyanya: Noobaasa kukwatira emyanya abu waija nabo, abu orikutuura nabo nari abu orikwega nabo Baibuli.—1 Kor. 13:5.
◼ Kyamushana: Nooshabwa kwija n’eby’okurya omu mwanya gw’okuza kubisherura ahandi omu shaaha za kyamushana. Noobaasa kureetera eby’okurya byawe omu kintu kikye eki orikubaasa kuta ahansi y’entebe. Ebintu ebihango nari ebirikwatika, tibirikwikirizibwa aha mwanya gw’oruteerane.
◼ Okuhayo: Nitubaasa kworeka okusiima kwaitu ahabw’entebeekanisa y’enteerane ez’ebiro bishatu turikuhayo twekundiire kushagika omurimo ogurikukorwa omu nsi yoona, twaba turi omu nteerane ezo. Ceeka ezirikuheebwayo, zishemereire kuhandiikwa omu iziina rya “International Bible Students Association” nari ery’ekibiina eririkukoresibwa omu ihanga ryaitu.
◼ Zaabutandu: Haabaho orikwetenga obujanjabi obw’ahonaaho aha ruteerane oru, gambira omwe aha barikwakiira abantu oraagambire abarikukora aha by’obujanjabi omu ruteerane oru kugira ngu abakugu abo babaase kwetegyereza embeera ye kandi bamuhe n’obujanjabi oburikwetengyesa. Abarikukora aha by’obujanjabi obw’ahonaaho nibaija kureeba oku baraatware enshonga egi omumaisho.
◼ Eby’Emibazi: Ku oraabe oine emibazi ei orikukoresa, nyabura ‘we ija neerikumara ahakuba aha ruteerane oru nihaija kuba hatariho emibazi egyo. Empitirizo ezirikukoresibwa abarwaire shukaari, tizishemereire kuteebwa omu bintu ebi turikutamu ebisasiro aha ruteerane nari ahu turikuraara.
◼ Eby’Okujwara omu Bigyere: Buri mwaka ni baingi abarikuhutaara ahabw’okujwara enkaito zitashemeire. N’ahabw’ekyo ni kirungi okujwara enkaito ezishemeire kandi ezirikukuhika gye ezirikukubaasisa kugyenda gye aha matembero n’ahandi.
◼ Eby’Emigaju: Enteerane ezi enyingi niziba omu byombeko. N’ahabw’ekyo, nikiba kiri kirungi okutakoresa emigaju ey’amaani, erikubaasa kukora kubi abaine oburemeezi omu kwitsya.—1 Kor. 10:24.
◼ Foomu Erikwetwa Please Follow Up (S-43): Foomu egi eshemereire kukoresibwa kuhandiika ebirikukwata aha muntu owaayoreka ngu naayenda kumanya ebirikukiraho bwanyima y’okumubuurira kitaraariire aha ruteerane. Ababuurizi bashemereire kwija na foomu emwe nari ibiri aha ruteerane. Foomu ezijuziibwe gye nizibaasa kuheebwa abarikukora aha by’Ebitabo nari omuhandiiki w’ekibiina kyawe.—Reeba Obuheereza Bwaitu obw’Obukama aka Mei 2011, orupapura 3.
◼ Emyanya y’Okuriiramu: Haisa eiziina rya Yehova ekitiinisa orikutwaza gye omu myanya y’okuriiramu. Hayo akasiimo ku muraabe nikwo murikutwaza omu kicweka kyanyu.
◼ Oburaaro:
(1) Nooshabwa kutakwatisa ebishengye ebi otaraakorese, kandi otakaarenzya aha mubaro ogurikwikirizibwa kuraara omu kishengye ekyo.
(2) Waaba nooyenda kushazamu okushaba kwawe, manyisa aba hoteeri bukiri kare.—Mat. 5:37.
(3) Waakoresa akagaari k’emigugu kagarure ahonaaho kugira ngu abandi bakakorese.
(4) Nooshabwa kutateekyera omu bishengye ebitarikwikirizibwa kuteekyerwamu.
(5) Tsigira abakozi ba hoteeri akasiimo baakuhwera aha kukiriza ebintu byawe hamwe n’ogwo orikuboneza ekishengye buri izooba.
(6) Otakaatwara eby’okurya ebirengire ahari ebyo ebi oshemereire kutwara, nka kyantsya n’ebindi ebirikuba biteereirweho abarikuraara omu hoteeri egyo.
(7) Obwire bwona yoreka emitwarize mirungi orikukoragana gye n’abakozi ba hoteeri. Nibareeberera abagyenyi baingi n’ahabw’ekyo nibashemererwa twayoreka embabazi, okugumisiriza n’okwetegyereza.
(8) Abazaire tibashemereire kuhuga aha baana baabo baaba bari ahu barikuraara.
(9) Ku oraatungye oburemeezi ahu orikuraara, manyisa abarikukora aha by’Oburaaro mwaba muri aha mwanya gw’oruteerane.
◼ Abahwezi: Ogwo weena orikwenda kuhwera ashemereire kumanyisa abo abarikukora aha by’okuboneza aha ruteerane oru. Abaana abari ahansi y’emyaka 16 nabo nibabaasa kwejumba omu kuboneza barikworekyererwa abazaire baabo nari abandi abatoorainwe.
[Akabokisi Akali aha rupapura 6]
Nitwija Kugaba Tuta Obupapura bw’Okweta Abantu?
Kubaasa kuheza ekicweka kyaitu, titwine kukoresa ebigambo bingi. Nitubaasa kugira tuti: “Turiyo nitwejumba omu kampeyini y’okugaba obupapura obu eriyo neegyenda omu maisho omu nsi yoona. Aka n’akaawe. Ebirikukiraho biri aha kapapura aka.” Gira omuhimbo omu kubugaba. Mwaba nimugaba obupapura obu omu wiikenda, mubugabe hamwe na zaamagaziini kyaba nikibaasika.