Ebiro Bishatu by’Okuriisibwa omu by’Omwoyo
1. Nitwija kutunga ki omu ruteerane oruhango orw’ebiro bishatu orw’omwaka ogu?
1 Omu nsi ya Sitaane egi eine enjara n’eiriho omu by’omwoyo, Yehova naagumizamu kureeberera abaheereza be. (Isa. 58:11) Kimwe aha bi Yehova arikukoresa kutugaruramu amaani n’oruteerane orw’ebiro bishatu orurikubaho buri mwaka. Obu oruteerane orw’ebiro bishatu orw’omwaka ogu ruri haihi kuhika, nitubaasa kutebeekanisa tuta kuriisibwa omu by’omwoyo kandi tukahwera n’abandi kugasirwa omu kuriisibwa okwo?—Enf. 21:5.
2. Ni ntebeekanisa ki ezi twine kukora?
2 Ku oraabe otakatandikire kwetebeekanisa, teeraho kukikora kugira ngu obaase kubaho ebiro byona bishatu. Noomanya obwire obu orikwetenga kuhika aha mwanya gw’oruteerane buri izooba kugira ngu obaase kutunga omwanya gw’okushutamamu puroguramu etakatandikire? Buzima titurikwenda kufeerwa na kakye eby’okurya by’omwoyo ebirikugaruramu amaani ebi Yehova atutebeekanisiize! (Isa. 65:13, 14) Waaherize kukora entebeekanisa aha bikwatiraine n’oku oraagyende n’ahu oraaraare?
3. Ni buhabuzi ki oburaatuhwere hamwe n’ab’omu maka gaitu kubaasa kugasirwa omu ruteerane orwo omu bwijwire?
3 Niki ekiraakuhwere kutahuga oruteerane rwaba nirugyenda omumaisho? Kyaba nikibaasika, guma ohuumure ekirikumara buri kiro ebiro byona eby’oruteerane. Guma nooreeba omugambi. Guma nookuratira omu Baibuli yaawe ebyahandiikirwe byaba nibishomwa. Gira enshonga ezi waahandiika. Abazaire okubaasa kuhwera abaana baabo kuhurikiza gye, ni kirungi okushutama hamwe nk’eka. (Enf. 29:15) Obundi nimubaasa kugaaniira nk’eka aha byabashemeza buri mwabazyo mwaruga aha ruteerane. Eka yaanyu kubaasa kugasirwa omu bi mwayegire omu ruteerane, obwire obumwe obw’Okuramya kw’Eka kwanyu nimubaasa kubukoresa kweijutsya enshonga ezimwe ezi murikwenda kugyenderaho omu ka yaanyu.
4. Nitubaasa kuhwera tuta abandi omu kibiina kyaitu kubaasa kugasirwa omu by’omwoyo?
4 Hwera Abandi Kugasirwa: Nitwenda ngu abandi nabo bagasirwe omu by’omwoyo. Hariho ababuurizi abakaikwire nari abandi abarikwetenga obuhwezi okubaasa kuba omu ruteerane oru? Oine ebirikukubaasisa kubahwera? (1 Yoh. 3:17, 18) Abareeberezi, okukira munonga abarikwebembera zaaguruupu bashemereire kureeba ngu ababuurizi abarikwetenga obuhwezi baabutunga.
5. Nitwija kugaba tuta obupapura bw’okweta abantu aha ruteerane oruhango orw’ebiro bishatu? (Reeba na kabokisi aha rupapura oru.)
5 Nk’oku kitwire nikiba, esaabiiti ishatu oruteerane oru rutakabaireho nitwija kwejumba omuri kampeyini y’okweta abandi kwija kurubamu. Ebibiina bishemereire kugira ekigyendererwa ky’okugaba obupapura bw’okweta abantu bwona obu biine, omu kicweka kyona eki birikubuuriramu. Kwonka, mwashanga haine obu mutsigaize omu maka gaanyu aha muheru gwa kampeyini, nyabura ’mwe mubureete aha ruteerane. Nibwija kukoresibwa kweta abo abu turikubuurira kitaraariire twaba turi omu rurembo orurimu oruteerane oru. Obu murikuteekateeka ngu timuraakorese mwaba muri omu rurembo oruraabemu oruteerane, mushemereire kubuha omwe aha barikwakiira abantu mwahika aha mwanya gw’oruteerane. Obuhabuzi nibwija kuheebwa aha ruteerane oru aha ku obupapura bw’okweta abantu obwo buraagabwe.
6. Okugira emicwe mirungi kwaitu nikugasira kuta abandi?
6 Emicwe Mirungi Neegasira Abandi: Obu abantu baingi ‘barikwekunda’ bonka kandi batarikufayo aha nyehurira z’abandi, ka nikigaruramu amaani kuba n’Abakristaayo bagyenzi baitu abarikuguma nibateeraho kugira emicwe mirungi! (2 Tim. 3:2) Nitworeka ngu twine emicwe mirungi turikutaaha omu mwanya gw’oruteerane omu bucureezi n’obuteeka emiryango yaaheza kwigurwa shaaha 2:00 omu kasheeshe kandi tukakwatira emyanya abo bonka abu turikutuura nabo, abu twija nabo omu motoka nari abu turikwega nabo Baibuli. Tushemereire kukuratira obuhabuzi bwa ceeyamaani yaatushaba ngu tushutame kubaasa kuhurikiza obweshongoro oburikwanjura ekicweka eky’omu kasheeshe n’eky’omu ihangwe. Nitworeka emicwe mirungi twatebeekanisa gye amasimu gaitu kugira ngu gatateganisa abandi oruteerane rwaba nirugyenda omumaisho. Kandi nitworeka emicwe mirungi turikwetantara kugamba, kurya, kutsindika obutumwa aha simu nari okushohorashohora kyaba kitarikwetengyesa.
7. Nitubaasa kukora ki kubaasa kwombekana twaba turi n’ab’eishe-emwe?
7 Okumanyana n’Ab’eishe-emwe: Omu ruteerane oru nitutunga omugisha gw’amaani gw’okuba hamwe n’Abakristaayo bagyenzi baitu. (Zab. 133:1-3) Noobaasa kuteeraho ‘kushashaanuka’ orikuhika aha b’eishe-emwe n’abanyaanyazi-itwe kuruga omu bibiina ebindi. (2 Kor. 6:13) Noobaasa kugira ekigyendererwa ky’okumanya omuntu omwe nari eka emwe buri izooba. Obwire bw’okuhuumuramu nibwo burungi bw’okukora ekyo. N’ahabw’ekyo omu mwanya gw’okuruga aha ruteerane omu bwire bwa kyamushana kuza kusherura eky’okurya, nituhigwa kwija n’ak’okurya kakye kugira ngu tubaase kugaaniira n’abandi. Eki nikibaasa kutuhwera kutunga abanywani basya kandi ab’obutwire.
8. Ahabw’enki tushemereire kuhwera aha ruteerane oruhango orw’ebiro bishatu, kandi nitubaasa kukikora tuta?
8 Ka nikigaruramu amaani kukorera hamwe n’ab’eishe-emwe omu buheereza oburikwera! Noobaasa kwehayo kukorera hamwe n’ekibiina kyanyu kyaba nikiboneza? (Zab. 110:3) Waaba nooyenda kuhwera noobaasa kugambira abo abarikukora aha by’okuhwera aha ruteerane oru. Omurimo gw’abantu baingi tigurikuhenda kandi nigureeta okushemererwa.
9. Ahabw’enki tushemereire kufayo munonga aha mitwarize yaitu n’endeebeka yaitu omu bwire bw’oruteerane oruhango orw’ebiro bishatu?
9 Emitwarize Mirungi Yaitu Neekwata n’Aha Bandi: Okutwaza gye kwaitu n’endeebeka tibishemereire kugarukira aha mwanya gw’oruteerane honka. Abo abarikutureeba twaba turi omu rurembo orurimu oruteerane oru, bashemereire kureeba entaaniso eri ahagati yaitu n’abatari Bajurizi ba Yehova. (1 Pet. 2:12) Oku tujwaire n’endeebeka yaitu twaba turi omu mwanya gw’oruteerane, ahu turikuraara n’ahu turikuriira bishemereire kuhaisa Yehova ekitiinisa. (1 Tim. 2:9, 10) Okujwara baagi zaitu nikiija kubaasisa abarikutureeba kutumanya obundi kituhe omugisha gw’okubagambira ebirikukwata aha ruteerane orwo n’okubabuurira.
10. Nitubaasa kureetera tuta abarikukora ahu turikuriira n’ahu turikuraara kugira emiteekateekyere mirungi aha ruteerane rwaitu?
10 Nitubaasa kutwariza gye tuta abarikukora ahu turikuraara n’ahu turikuriira? Titushemereire kukwatisa ebishengye ebi tutaraakorese, obu eki kirikuremesa abandi kutunga oburaaro kandi obundi ekirikubaasa kurugirwaho bakama b’oburaaro obwo kufeerwa. Ahu turikuza kuraara twashanga baine bingi eby’okukora, tushemereire kworeka okugumisiriza n’embabazi. (Kol. 4:6) Tushemereire kutsigira akasiimo abo abarikugabura eby’okurya ahu turikuriira n’abarikukora ahu turikuraara baatuhwera kukiriza ebintu byaitu, abarikuboneza ebishengye byaitu n’abarikutuha obundi buheereza.
11. Ni by’okureeberaho ki ebirikworeka ngu emitwarize yaitu mirungi y’Ekikristaayo neebaasa kureetera abandi kutugambaho gye?
11 Emitwarize yaitu mirungi omu bwire bw’oruteerane neekwata eta aha bandi? Omu rupapura rumwe rw’amakuru, mukuru w’omwanya ogwabaire gurimu oruteerane akagira ati: “Abantu boona nibatwaza gye. Nituba twine ekihika ky’okuba nabo buri mwaka.” Omwaka oguhweire omwe otari Mujurizi wa Yehova akaburwaho akashaho ke omu hoteeri ei abaabaire baizire aha ruteerane baabaire nibaraaramu. Akashaho ako ku baakatorotoire n’ebyabaire birimu byona bakakaha mukuru w’omwanya ogwo, akagira mukama waako ati: “Kyaba kirungi ahariwe ahabw’okugira ngu Abajurizi ba Yehova baaba baine oruteerane haihi kandi nibo baijwire omu hoteeri egi. Ku kyaba kitari ekyo obundi tiwaakutungire kashaho kaawe.”
12. Obu oruteerane oruhango orw’ebiro bishatu ruri haihi kuhika, nitubaasa kugira kigyendererwa ki kandi n’ahabw’enki?
12 Enteerane empango ez’ebiro bishatu ez’omwaka ogu ziri haihi kuhika. Okutebeekanisa oruteerane oru kitwire obwire bwingi n’amaani kugira ngu tubaase kurugasirwamu. Gira ekigyendererwa ky’okubaho ebiro byona bishatu, kandi ba oyetebeekaniise kugasirwa omu bi Yehova akutebeekanisiize hamwe n’ekibiina kye. Mariirira kugaruramu abandi amaani orikugira emicwe mirungi, emitwarize mirungi kandi orikugaaniira nabo. Iwe n’abandi nimubaasa kuhurira nk’omwe aha baabaire bari aha ruteerane orw’omwaka oguhweire owaahandiikire ati: “Tindikwijuka ekiraandeteire okumarwa okukira oruteerane oru!”
[Ebigambo aha kishushani aha rupapura 4]
Nk’oku kitwire nikiba, esaabiiti ishatu oruteerane oru rutakabaireho nitwija kwejumba omuri kampeyini y’okweta abandi kwija kurubamu
[Ebigambo ebirikworeka enshonga eri nkuri aha rupapura 5]
Nitwija kugaba tuta obupapura bw’okweta abantu aha ruteerane oruhango orw’ebiro bishatu?
Kubaasa kugaba obupapura obu omu kicweka kyaitu kyona, titwine kukoresa ebigambo bingi. Nitubaasa kugira tuti: “Turiyo nitwejumba omu murimo gw’okugaba obupapura obu oguriyo nigugyenda omumaisho omu nsi yoona. Aka n’akaawe. Ebirikukiraho biri aha kapapura aka.” Akapapura aka kariho ebirikushemeza abantu, n’ahabw’ekyo kahe omuntu kugira ngu areebe ebiri aha mutwe gwako. Kagabe n’omuhimbo. Mwaba nimugaba obupapura obu ahari wiikenda, mubugabe hamwe na zaamagaziini kyaba nikyetengyesa.
[Ebigambo ebirikworeka enshonga eri nkuri aha rupapura 6]
Oku tujwaire n’endeebeka yaitu twaba turi omu mwanya gw’oruteerane, ahu turikuraara n’ahu turikuriira bishemereire kuhaisa Yehova ekitiinisa
[Ebigambo ebirikworeka enshonga eri nkuri aha rupapura 7]
Mariirira kugaruramu abandi amaani orikugira emicwe mirungi, emitwarize mirungi kandi orikugaaniira nabo
[Akabokisi aha rupapura 4]
Eby’okweijutsya Ebirikukwata Aha Ruteerane Oruhango Orw’ebiro Bishatu Orwa 2011
◼ Eshaaha za Puroguramu: Puroguramu neija kuba neetandika shaaha 3:20 ez’omu kasheeshe ebiro byona bishatu. Emyanya y’oruteerane neija kuba neigurwa shaaha 2:00 ez’omu kasheeshe. Obweshongoro ku buraatandike, buri omwe ashemereire kutunga ah’okushutama kugira ngu puroguramu etandikye hatabaireho kuteganisibwa. Orwakataano n’Orwamukaaga puroguramu neija kuhendera shaaha 10:55 ez’omu mwabazyo reero aha Sande ehendere shaaha 9:40 ez’omu mwabazyo.
◼ Ah’Okwemereza Ebiiruka: Aha myanya y’Enteerane yoona, ah’okwemereza ebiiruka, abaraabanze kwija nibo barabyemerezeho. Abamuga nibabaasa kuheebwa omugisha gw’omutaano.
◼ Okukwata Emyanya: Noobaasa kukwatira emyanya abu waija nabo, abu orikutuura nabo nari abu orikwega nabo Baibuli.—1 Kor. 13:5.
◼ Kyamushana: Nooshabwa kwija n’eby’okurya omu mwanya gw’okuza kubisherura ahandi omu shaaha za kyamushana. Noobaasa kureetera eby’okurya byawe omu kintu kikye eki orikubaasa kuta ahansi y’entebe. Ebintu ebihango, ebirikwatika, tibirikwikirizibwa aha mwanya gw’oruteerane.
◼ Okuhayo: Nitubaasa kworeka okusiima kwaitu ahabw’entebeekanisa y’enteerane empango ez’ebiro bishatu turikuhayo twekundiire kushagika omurimo ogurikukorwa omu nsi yoona, twaba turi omu Kyombeko ky’Obukama nari omu nteerane ezo empango. Ceeka ezirikuheebwayo omu nteerane empango, zishemereire kuhandiikwa omu eiziina rya “International Bible Students Association” nari ery’ekibiina eririkukoresibwa omu eihanga ryanyu.
◼ Zaabutandu: Haabaho orikwetenga obujanjabi obw’ahonaaho aha ruteerane oruhango, gambira omwe aha barikwakiira abantu oraagambire abarikukora aha by’obujanjabi omu ruteerane kugira ngu abakugu abo babaase kwetegyereza embeera ye kandi bamuhe n’obujanjabi oburikwetengyesa. Abarikukora aha by’obujanjabi obw’ahonaaho nibaija kureeba oku baraatware enshonga egi omumaisho.
◼ Eby’Emibazi: Ku oraabe oine emibazi ei orikukoresa, nyabura ‘we ija neerikumara obu haraabe nihaija kuba hatariho emibazi egyo aha ruteerane oru.
◼ Eby’Okujwara omu Bigyere: Buri mwaka ni baingi abarikuhutaara ahabw’okujwara enkaito zitashemeire. N’ahabw’ekyo ni kirungi okujwara enkaito ezishemeire kandi ezirikukuhika gye ezirikukubaasisa kugyenda gye aha matembero n’ahandi.
◼ Eby’Emigaju: Enteerane ezi enyingi niziba omu byombeko. N’ahabw’ekyo, nikiba kiri kirungi okutakoresa emigaju ey’amaani, erikubaasa kukora kubi abaine oburemeezi omu kwitsya.—1 Kor. 10:24.
◼ Foomu Erikwetwa Please Follow Up (S-43): Foomu egi eshemereire kukoresibwa kubaasa kuhandiika ebirikukwata aha muntu ogwo owaayoreka ngu naayenda kumanya ebirikukiraho bwanyima y’okumubuurira kitaraariire omu bwire bw’oruteerane. Ababuurizi bashemereire kwija na foomu egyo emwe nari ibiri aha ruteerane. Foomu ezijuziibwe gye nizibaasa kuheebwa abarikukora aha by’Ebitabo nari omuhandiiki w’ekibiina kyawe waaheza kugarukayo.—Reeba Obuheereza Bwaitu obw’Obukama aka Novemba 2009, rup. 4.
◼ Emyanya y’Okuriiramu: Haisa eiziina rya Yehova ekitiinisa orikutwaza gye omu myanya y’okuriiramu. Hayo akasiimo ku muraabe nikwo murikutwaza omu kicweka kyanyu.
◼ Oburaaro:
(1) Nooshabwa kutakwatisa ebishengye ebi otaraakorese, kandi otakaarenzya aha mubaro ogurikwikirizibwa kuraara omu kishengye ekyo.
(2) Waaba nooyenda kushazamu okushaba kwawe, manyisa aba hoteeri bukiri kare.—Mat. 5:37.
(3) Waakoresa akagaari k’emigugu kagarure ahonaaho kugira ngu abandi bakakorese.
(4) Otakaateekyera omu bishengye ebitarikwikirizibwa kuteekyerwamu.
(5) Tsigira abakozi ba hoteeri akasiimo baakuhwera aha kukiriza ebintu byawe hamwe n’ogwo orikuboneza ekishengye buri eizooba.
(6) Otakaatwara eby’okurya ebirengire ahari ebyo ebi oshemereire kutwara ka tugire nka kyantsya n’ebindi ebirikuba biteereirweho abarikuraara omu hoteeri egyo.
(7) Obwire bwona yoreka ebyana by’omwoyo orikukoragana gye n’abakozi ba hoteeri. Nibareeberera abagyenyi baingi n’ahabw’ekyo nibashemererwa twayoreka embabazi, okugumisiriza n’obwengye.
(8) Emihendo erikworekwa ahari Recommended Lodging List neeba eri ey’ekiro kimwe otabariiremu mushoro. Ku barakushashuze ebintu ebi otarashabire nari otakoreise otabishashurira kandi manyisa abarikukora aha by’oburaaro ahonaaho.
(9) Ku oraatungye oburemeezi omu kishengye omu orikuraara, manyisa abarikukora aha by’Oburaaro mwaba muri aha mwanya gw’oruteerane.
◼ Abahwezi: Okushemererwa oku turikutunga ahabw’okwija omu ruteerane oru nikwija kweyongyera ku turaahwere aha mirimo eraabe eriho. (Byak. 20:35) Ogwo weena orikwenda kuhwera ashemereire kumanyisa abo abarikukora aha by’okuboneza aha ruteerane oru. Abaana abari ahansi y’emyaka 16 nabo nibabaasa kwejumba omu murimo ogu ogw’okuboneza barikworekyererwa abazaire baabo nari abandi bantu bakuru abatoorainwe.