Emitwarize Erikuhaisa Ruhanga Ekitiinisa
1. Ahabw’enki Abajurizi ba Yehova nibarahuka kumanywa baaba bari omu ndembo eziraabemu enteerane ez’ebiro bishatu?
1 Twaza omu nteerane empango abantu nibarahuka kukimanya. Omu ndembo ezirikwija kubamu enteerane nk’ezo, ab’amakuru nibakira kumanyisa abantu b’omu kicweka aha kubaho kwaitu. Emyanya y’okuraaramu n’okuriiramu neijuramu Abajurizi ba Yehova kuruga omu myanya endiijo, kandi abarikutuura omu myanya egyo nibareeba abagyenyi baingi abajwaire baagi z’oruteerane. Eby’okweijutsya ebiri ahaifo, nibiija kutuhwera kuhaisa Ruhanga ekitiinisa omu mitwarize yaitu twaba turi omu rurembo oruraabemu oruteerane.—1 Pet. 2:12.
2. Emijwarire yaitu mirungi neehaisa eta Ruhanga ekitiinisa twaba turi omu rurembo ahu oruteerane ruraabe?
2 Enjwara nungi: Emijwarire yaitu mirungi kaingi neeshemeza abarikutureeba. Kandi emijwarire yaitu—twaba nituza kuronda ah’okuraara, twaba turi omu myanya y’okuriiramu, twaba twine ebi turikugura n’ebindi—eine oku erikukwata ahari abo abarikutureeba. Ebi turikujwara twaba tutari omu nteerane bishemereire kuba nibihaisa ekitiinisa. Abarikutureeba bashemereire kureeba entaaniso eriho ahagati yaitu n’abo abatarikuheereza Yehova. (Rom. 12:2) Kandi twajwara baagi zaitu, nikimanyisa abandi ngu hariho oruteerane, kituha n’omugisha gw’okubuurira kandi kibaasisa ab’eishe-emwe abandi kutumanya.
3. Nitubaasa kworeka tuta okugumisiriza n’okufayo aha bandi?
3 Okugumisiriza n’Okworeka Okufayo: Obu baingi omu nsi barikweyendeza kandi batarikusiima, twayoreka okugumisiriza n’okufayo ahari abo abarikukora omu myanya y’okuraaramu n’okuriiramu ka nikiija kubashemeza! (2 Tim. 3:1-5) Waaba nookwata emyanya y’okushutamamu nari orikwakiira ebitabo ebisya omu ruteerane orwo, turekye kwefaho twenka kureka tufe aha bandi. (1 Kor. 10:23, 24) Bwanyima y’okuba omu ruteerane omurundi gw’okubanza, omushaija omwe akagira ati: “Tindikwijuka orubazo na rumwe orwahairwe eizooba eryo, kwonka emitwarize mirungi ey’Abajurizi ba Yehova ekankwataho munonga.”
4. Ahabw’enki tushemereire kuteekateeka oku turikubaasa kuhwera aha ruteerane rw’ebiro bishatu?
4 Abahwezi Abekundiire: Abakristaayo ab’amazima nibamanywa ahabw’okukunda kuhwera. (Zab. 110:3) Noobaasa kwehayo kuhwera omu ruteerane orwo? Aha ruteerane rumwe ab’eishe-emwe na banyaanyaziitwe nka 600 bakeehayo kuboneza omwanya ogwabaire niguza kubamu oruteerane. Abarikukora omu mwanya ogwo bakagira bati: “Ka nikitangaaza kureeba ngu abantu abo boona behaireyo kuboneza omwanya!” N’ekihika tutegyereize oruteerane orw’ebiro bishatu orwa 2013 tikuhurikiza kandi tukega ahari Ruhanga kwonka baitu n’okumuhimbisa.