Eby’Okweijutsya eby’Oruteerane orw’Ebiro Bishatu

Eshaaha z’Oruteerane: Omwanya oguraabemu oruteerane nigwija kwigurwa shaaha 2:00 z’akasheeshe. Ebiro bishatu byona eby’oruteerane, obweshongoro nibwija kuba nibutandika shaaha 3:20 z’akasheeshe. Aha shaaha egyo, buri omwe ashemereire kutunga ah’okushutama kugira ngu oruteerane rutandikye omu butebeekana. Entebeekanisa neija kuhendera shaaha 11:00 z’omwabazyo aha Rwakataano n’Orwamukaaga kandi shaaha 10 z’omwabazyo aha Sande.

‘Himbisa Yehova Orikweshongora’: Ira abaheereza ba Ruhanga bakaba bamuhimbisa n’ebyeshongoro, kandi n’omu bunaku obu, okweshongora n’ekicweka kikuru omu kuramya okw’amazima. (Zab. 28:7) Buri kicweka ky’oruteerane oru nikitandika n’obweshongoro. Obweshongoro obwo tibw’okuhurikiza kwonka kureka butebeekanisiibwe kugira ngu tubaase kwega ahari Yehova kandi tumuramye. N’ahabw’ekyo, ceyamaani yaaranga ngu obweshongoro bwaza kutandika, oshemereire kushutama okabuhurikiza gye omu mwanya gw’okugumizamu noogaaniira. Twakora tutyo nikyoreka ngu nitusiima abarikubutebeekanisa. Emirundi ebiri buri mwaka ab’eishe-emwe na banyaanyazi-itwe abamwe nibaza Patterson, New York, barikwepakira aha sente zaabo kuteera obweshongoro burungi obu kugira ngu butushemeze. Twaheza kuhurikiza gye obweshongoro oburikwiguraho, buri omwe aine kwejumba omu kuhimbisa Yehova arikweshongora ebyeshongoro byaitu by’Obukama.

Ah’Okwemereza Ebiiruka: Aha myanya y’Enteerane yoona, nihaija kuba hariho ah’okwemereza ebiiruka kwonka obumwe nihaba hari hakye, abaraabanze kwija nibo baraatungye ah’okwemereza ebiiruka.

Okukwata Emyanya: Omwanya gw’oruteerane gwaigurwaho buri kasheeshe murekye kutangatangana kukwata emyanya y’okushutamamu. Twaba twine omutima gw’okwefeerereza nikituhiga kufayo aha bandi, kyoreka ku turi Abakristaayo ab’amazima kandi kihiga abandi kuhimbisa Ruhanga. (Yoh. 13:34, 35; 1 Kor. 13:4, 5; 1 Pet. 2:12) Noobaasa kukwatira emyanya abu waija nabo, abu orikutuura nabo nari abu orikwegyesa Baibuli. Nimushabwa kutabiika ebintu aha ntebe ezi mutakwata. Mwakora mutyo abandi nibaija kureeba ngu hakiriho omwanya. Emyanya ey’abakaikwire n’abaine amaani makye ni mikye n’ahabw’ekyo nimushabwa kugitsigira abo bonka hamwe n’abo abaraabareeberere.

Enjwara Nungi: Ebi turikujwara omu bwire bw’enteerane biine kuba ebishemeire kandi birikuhaisa ekitiinisa, bitarikworeka emishono eriho omu nsi ebiro ebi. (1 Tim. 2:9) Bwanyima y’oruteerane twaba turi omu myanya ei turikuraaramu nabwo tushemereire kujwara ebirikuhaisa ekitiinisa. Ni kirungi kujwara baagi zaitu kandi tukareka kutiina kubuurira omuntu weena twatunga omugisha. Emireebekyere yaitu n’emitwarize yaitu mirungi twaba turi aha ruteerane oruhango neija kureetera abaine emitima eshemeire kukunda amazima kandi eshemeze na Yehova.—Zef. 3:17.

Okworeka Emitwarize Mirungi Twaba Nitukoresa Esimu, Kamera n’Ebindi: Nitworeka emitwarize mirungi twakoresa gye esimu nari ekindi kyona tutateganise abandi. Waaba nookoresa kamera, eby’okukwata vidiyo, esimu n’ebindi nk’ebyo reeba ngu tibyateganisa nari kuhuzya abandi. Kandi nitworeka emitwarize mirungi twayetantara kwoherereza abandi obutumwa oruteerane rwaba nirugyenda omumaisho.

Kyamushana: Nooshabwa kwija n’eby’okurya omu mwanya gw’okuza kubisherura ahandi omu shaaha za kyamushana. Noobaasa kureetera eby’okurya byawe omu kintu kikye eki orikubaasa kuta ahansi y’entebe. Ebintu ebihango nari ebirikwatika, tibirikwikirizibwa aha mwanya gw’oruteerane.

Okuhayo: Nitubaasa kworeka okusiima kwaitu ahabw’entebeekanisa y’enteerane ez’ebiro bishatu turikuhayo twekundiire kushagika omurimo ogurikukorwa omu nsi yoona, twaba turi omu nteerane ezo. Ceeka ezirikuheebwayo, zishemereire kuhandiikwa omu iziina rya IBSA nari ery’ekibiina eririkukoresibwa omu ihanga ryaitu. Noobaasa n’okuhayo orikukoresa kaada erikwetwa debit nari credit

Eby’Emibazi: Ku oraabe oine emibazi ei orikukoresa, nyabura ‘we ija neerikumara ahakuba aha ruteerane oru nihaija kuba hatariho mibazi egyo. Empitirizo ezirikukoresibwa abarwaire shukaari, tizishemereire kuteebwa omu bintu ebi turikutamu ebisasiro aha ruteerane nari ahu turikuraara.

Okwetantara Kuhutaara: Nimushabwa kuteeraho kwetantara butandu ezirikureetwa okuteera entsibo n’obuterezi. Buri mwaka ni baingi abarikuhutaara ahabw’okujwara enkaito zitashemeire. N’ahabw’ekyo ni kirungi okujwara enkaito ezishemeire kandi ezirikukuhika gye ezirikukubaasisa kugyenda gye aha matembero n’ahandi.

Eby’emigaju: Enteerane ezi enyingi niziba omu byombeko. N’ahabw’ekyo, nikiba kiri kirungi okutakoresa eby’emigaju ey’amaani, erikubaasa kukora kubi bamwe baagitsya.—1 Kor. 10:24.

Foomu Erikwetwa Please Follow Up (S-43): Foomu egi eshemereire kukoresibwa kuhandiika ebirikukwata aha muntu owaayoreka ngu naayenda kumanya ebirikukiraho bwanyima y’okumubuurira kitaraariire aha ruteerane. Foomu ezijuziibwe gye nizibaasa kuheebwa abarikukora aha by’Ebitabo nari omuhandiiki w’ekibiina kyawe.

Emyanya y’Okuriiramu: Haisa eiziina rya Yehova ekitiinisa orikutwaza gye omu myanya y’okuriiramu. Jwara omu muringo ogushemereire Abakristaayo. Hayo akasiimo ku muraabe nikwo murikutwaza omu kicweka kyanyu.

Oburaaro:

Nooshabwa kutakwatisa ebishengye ebi otaraakorese, kandi otakaarenzya aha mubaro ogurikwikirizibwa kuraara omu kishengye ekyo.

Waaba nooyenda kushazamu okushaba kwawe, manyisa aba hoteeri bukiri kare. (Mat. 5:37)

Waakoresa akagaari k’emigugu kagarure ahonaaho kugira ngu abandi bakakorese.

Ha abakozi ba hoteeri akasiimo baakuhwera aha kukiriza ebintu byawe hamwe n’ogwo orikuboneza ekishengye buri izooba ku muraabe nikwo murikutwaza omu kicweka kyanyu.

Nooshabwa kutateekyera omu bishengye ebitarikwikirizibwa kuteekyerwamu.

Otakaatwara eby’okurya ebirengire ahari ebyo ebi oshemereire kutwara, nka kyantsya n’ebindi ebirikuba biteereirweho abarikuraara omu hoteeri egyo.

Obwire bwona yoreka emitwarize mirungi orikukoragana gye n’abakozi ba hoteeri. Nibareeberera abagyenyi baingi n’ahabw’ekyo nibashemererwa twayoreka embabazi, okugumisiriza n’okwetegyereza.

Abazaire tibashemereire kuhuga aha baana baabo baaba bari ahu barikuraara.

Ku oraatungye oburemeezi ahu orikuraara, manyisa Abarikukora aha by’Oburaaro mwaba muri aha mwanya gw’oruteerane.

Abahwezi: Ogwo weena orikwenda kuhwera ashemereire kumanyisa abo abarikukora aha by’okuboneza aha ruteerane oru. Abaana abari ahansi y’emyaka 16 nabo nibabaasa kwejumba omu kuboneza barikworekyererwa abazaire baabo nari abandi abatoorainwe.