Mugume Mwine “Emicwe Mirungi omu Banyamahanga”

1. Ahabw’enki ni kikuru kuguma twine emitwarize mirungi twaba turi omu nteerane empango?

¹ Buri mwaka ku turikuba turi aha nteerane empango abantu nibarahuka kutumanya, n’ahabw’ekyo ni kikuru kutwaza omu muringo ogurikuhaisa Ruhanga ekitiinisa. (Lev. 20:26) Emitwarize yaitu hamwe n’oku turikujwara bishemereire kworeka ku turi abakuratsi ba Kristo aba buzima. Mbwenu shi twaba turi aha ruteerane oruhango orw’ebiro bishatu, nitubaasa tuta kuguma twine “emicwe mirungi omu Banyamahanga” tukahaisa tataitwe ow’omu iguru ekitiinisa?—1 Pet. 2:12.

2. Twaba turi omu ruteerane oruhango ni miringo ki ei turikubaasa kworekamu emitwarize mirungi?

² Yoreka Emitwarize y’Ekikristaayo: Oku turikutwariza ‘ab’aheeru y’ekibiina’ hamwe n’oku turikukunda ab’eishe-emwe’ nikutaana n’oku abantu b’ensi barikutwaza. (Kol. 3:10; 4:5; 2 Tim. 3:1-5) Twaba nitukoragana n’abakozi b’omu hoteeri hamwe n’ab’omu myanya endiijo ei turikuba nituraaramu, tushemereire kubatwariza omu muringo gw’embabazi kandi tukagira okugumisiriza n’obu haakubaho oburemeezi. Okworeka emicwe mirungi nikibaasa kutwariramu okuha akasiimo abarikukora omu myanya ei turaabe nituraaramu.

3. Abazaire nibaheebwa buhabuzi ki kandi n’ahabw’enki?

³ Abazaire baine kuguma nibareeberera abaana baabo baaba bari aha mwanya gw’oruteerane hamwe n’ei barikuba nibaraara. (Enf. 29:15) Owaabaire naakurira hoteeri emwe akagambira omushaija n’omukazi we ati: “Imwe bantu mwe nitubakunda. Mwena hamwe n’abaana baanyu mwine emicwe mirungi kandi nimugamba gye. Abakozi boona nibabagambaho gye kandi tukaayenzire ngu mube muri aha buri wiikenda.”

4. Tushemereire kujwara tuta twaba turi omu rurembo oruraabemu oruteerane oruhango?

⁴ Enjwara Nungi: Ebi turikujwara omu bwire bw’enteerane biine kuba ebishemeire kandi birikuhaisa ekitiinisa, bitarikworeka emishono eriho omu nsi ebiro ebi. (1 Tim. 2:9) Bwanyima y’oruteerane twaba turi omu myanya ei turikuraaramu nabwo tushemereire kujwara ebirikuhaisa ekitiinisa. Ni kirungi kujwara baagi zaitu kandi tukareka kutiina kubuurira omuntu weena twatunga omugisha. Emireebekyere yaitu n’emitwarize yaitu mirungi twaba turi aha ruteerane oruhango neija kureetera abaine emitima eshemeire kukunda amazima kandi eshemeze na Yehova.—Zef. 3:17.

Eby’Okweijutsya eby’Oruteerane orw’Ebiro Bishatu Orwa 2014

◼ Eshaaha z’Oruteerane: Omwanya oguraabemu oruteerane nigwija kwigurwa shaaha 2:00 z’akasheeshe. Ebiro bishatu byona eby’oruteerane, obweshongoro nibwija kuba nibutandika shaaha 3:40 z’akasheeshe. Aha shaaha egyo, buri omwe ashemereire kutunga ah’okushutama kugira ngu oruteerane rutandikye omu butebeekana. Ekyeshongoro n’okushaba ebiraahendere puroguraamu nibiija kubaho shaaha 10:55 z’omwabazyo aha Rwakataano n’Orwamukaaga kandi shaaha 9:50 z’omwabazyo aha Sande.

◼ Ah’Okwemereza Ebiiruka: Aha myanya y’Enteerane yoona, nihaija kuba hariho ah’okwemereza ebiiruka kwonka obumwe nihaba hari hakye, abaraabanze kwija nibo baraatungye ah’okwemereza ebiiruka.

◼ Okukwata Emyanya: Omwanya gw’oruteerane gwaigurwaho buri kasheeshe murekye kutangatangana kukwata emyanya y’okushutamamu. Twaba twine omutima gw’okwefeerereza nikituhiga kufayo aha bandi, kyoreka ku turi Abakristaayo ab’amazima kandi kihiga abandi kuhimbisa Ruhanga. (Yoh. 13:34, 35; 1 Kor. 13:4, 5; 1 Pet. 2:12) Noobaasa kukwatira emyanya abu waija nabo, abu orikutuura nabo nari abu orikwega nabo Baibuli. Emyanya ey’abakaikwire n’abaine amaani makye ni mikye n’ahabw’ekyo nimushabwa kugitsigira abo bonka hamwe n’abo abaraabareeberere.

◼ Kyamushana: Nooshabwa kwija n’eby’okurya omu mwanya gw’okuza kubisherura ahandi omu shaaha za kyamushana. Noobaasa kureetera eby’okurya byawe omu kintu kikye eki orikubaasa kuta ahansi y’entebe. Ebintu ebihango nari ebirikwatika, tibirikwikirizibwa aha mwanya gw’oruteerane.

◼ Okuhayo: Nitubaasa kworeka okusiima kwaitu ahabw’entebeekanisa y’enteerane ez’ebiro bishatu turikuhayo twekundiire kushagika omurimo ogurikukorwa omu nsi yoona, twaba turi omu nteerane ezo. Ceeka ezirikuheebwayo, zishemereire kuhandiikwa omu iziina rya IBSA nari ery’ekibiina eririkukoresibwa omu ihanga ryaitu.

◼ Eby’Emibazi: Ku oraabe oine emibazi ei orikukoresa, nyabura ‘we ija neerikumara ahakuba aha ruteerane oru nihaija kuba hatariho mibazi egyo. Empitirizo ezirikukoresibwa abarwaire shukaari, tizishemereire kuteebwa omu bintu ebi turikutamu ebisasiro aha ruteerane nari ahu turikuraara.

◼ Eby’Okujwara omu Bigyere: Buri mwaka ni baingi abarikuhutaara ahabw’okujwara enkaito ezakakondo endaingwa munonga. N’ahabw’ekyo ni kirungi okujwara enkaito ezishemeire kandi ezirikukuhika gye, ezirikukubaasisa kugyenda gye aha matembero n’ahandi.

◼ Eby’emigaju: Enteerane ezi enyingi niziba omu byombeko. N’ahabw’ekyo, nikiba kiri kirungi okutakoresa eby’emigaju ey’amaani, erikubaasa kukora kubi bamwe baagitsya.—1 Kor. 10:24.

◼ Foomu Erikwetwa Please Follow Up (S-43): Foomu egi eshemereire kukoresibwa kuhandiika ebirikukwata aha muntu owaayoreka ngu naayenda kumanya ebirikukiraho bwanyima y’okumubuurira kitaraariire aha ruteerane. Foomu ezijuziibwe gye nizibaasa kuheebwa abarikukora aha by’Ebitabo nari omuhandiiki w’ekibiina kyawe.

◼ Emyanya y’Okuriiramu: Haisa eiziina rya Yehova ekitiinisa orikutwaza gye omu myanya y’okuriiramu. Jwaara omu muringo ogushemereire Abakristaayo. Hayo akasiimo ku muraabe nikwo murikutwaza omu kicweka kyanyu.

◼ Oburaaro:

Nooshabwa kutakwatisa ebishengye ebi otaraakorese, kandi otakaarenzya aha mubaro ogurikwikirizibwa kuraara omu kishengye ekyo.
Waaba nooyenda kushazamu okushaba kwawe, manyisa aba hoteeri bukiri kare. (Mat. 5:37)
Waakoresa akagaari k’emigugu kagarure ahonaaho kugira ngu abandi bakakorese
Ha abakozi ba hoteeri akasiimo baakuhwera aha kukiriza ebintu byawe hamwe n’ogwo orikuboneza ekishengye buri izooba ku muraabe nikwo murikutwaza omu kicweka kyanyu.
Nooshabwa kutateekyera omu bishengye ebitarikwikirizibwa kuteekyerwamu.
Otakaatwara eby’okurya ebirengire ahari ebyo ebi oshemereire kutwara, nka kyantsya n’ebindi ebirikuba biteereirweho abarikuraara omu hoteeri egyo.
Obwire bwona yoreka emitwarize mirungi orikukoragana gye n’abakozi ba hoteeri. Nibareeberera abagyenyi baingi n’ahabw’ekyo nibashemererwa twayoreka embabazi, okugumisiriza n’okwetegyereza.
Abazaire tibashemereire kuhuga aha baana baabo baaba bari ahu barikuraara.
Ku oraatungye oburemeezi ahu orikuraara, manyisa Abarikukora aha by’Oburaaro mwaba muri aha mwanya gw’oruteerane.

◼ Abahwezi: Ogwo weena orikwenda kuhwera ashemereire kumanyisa abo abarikukora aha by’okuboneza aha ruteerane oru. Abaana abari ahansi y’emyaka 16 nabo nibabaasa kwejumba omu kuboneza barikworekyererwa abazaire baabo nari abandi abatoorainwe.