Kampeyini Erikurugamu Ebirungi

Harikuburayo esaabiiti ishatu oruteerane orw’ebiro bishatu rukabaho, ebibiina nibiija kugaruka kwejumba omu kampeyini y’okweta abantu ab’omu kicweka kyabo kurwijamu. Hariho enshonga nkuru ahabw’enki nitwejumba omu kampeyini egi. Abo abu turikweta kandi bakaija nibashemezibwa embazo kuruga omu Byahandiikirwe, obutebeekana,obumwe n’emitwarize mirungi y’ab’eishe-emwe omu ruteerane. (Zab. 110:3; 133:1; Isa. 65:13, 14) Mbwenu shi hariho ebirungi ebirikuruga omu kampeyini yaitu, n’obu abu turikweta baakuba baine kugyenda engyendo ndaingwa kuza aha ruteerane orwo?

Bwanyima y’oruteerane orw’ebiro bishatu orwa 2011, ofiisi y’eitaagi ekatunga ebaruha kuruga aha mukazi owaashangire akapapura k’okweta abantu kwija aha ruteerane orw’ebiro bishatu ahansi y’orwigi rwe. Butoosha akaba naakira kweshereka Abajurizi ba Yehova. Akahandiika naagira ati: “Nkaba nyine eka nungi, omushaija murungi kandi ndikuteekateeka ngu nyine buri kimwe ekirikubaasa kundeetera okushemererwa. Kwonka eky’obusaasi nkaguma ntaine kushemererwa kandi ntaine kigyendererwa. N’ahabw’ekyo nkacwamu kuvuga mailo  200 kubaho omu ruteerane orwo aha Rwamukaaga.” Oruteerane rukamushemeza munonga yaateerera iba esimu kumugambira ngu naija kuraarayo ahurikize na puroguraamu ya Sande. “Nkahurikiza embazo zoona naareeba Abajurizi ba Yehova baingi kandi buzima nkaba ntarikwenda ngu oruteerane ruhendere.” Ku yaagarukire omuka, akatandika kwega Baibuli kandi bwanyima y’ameezi ana akaba omubuurizi otabatiziibwe. “Nyine okushemererwa kureeba ngu nkashanga akapapura ako ahansi y’orwigi rwangye ahabw’okuba amagara gangye hati gaine ekigyendererwa!”

Abamwe abu turaahe obupapura obwo nibaija kwija. N’ahabw’ekyo, yeejumbire kimwe omu kampeyini egi. Obupapura bw’okweta abantu oburaatsigareho, bwijane aha ruteerane reero obukorese kweta abantu kitaaraarire.

[Akabokisi aha rupapura 4]

Nitwija Kugaba Tuta Obupapura bw’Okweta Abantu?

Kubaasa kuheza ekicweka kyaitu, titwine kukoresa ebigambo bingi. Nitubaasa kugira tuti: “Turiyo nitwejumba omu kampeyini y’okugaba obupapura obu okuriyo nikugyenda omu maisho omu nsi yoona. Aka n’akaawe. Ebirikukiraho biri aha kapapura aka.” Gira omuhimbo omu kubugaba. Mwaba nimugaba obupapura obu omu wiikenda, mubugabe na magaziini kyaba nikibaasika.