Kampeyini y’Okumanyisa Abantu omu Nsi Yoona Oruteerane Oruhango Orwine Omutwe “Kuratira Kristo!” Ababuurizi Nibaza Kugaruka Bagabe Akapapura ak’Okweta Abantu
1 Omwaka oguhweire, kampeyini y’okweta abantu omu nsi yoona kwija omu Ruteerane Oruhango orwabaire rwine omutwe “Okucungurwa Kuri Haihi!” ekakora kihango aha barikwenda kumanya. Abo abaikiriize akapapura ako kandi bakaija, bakariira hamwe ekihuuro ky’eby’omwoyo n’Abajurizi ba Yehova omurundi gw’okubanza. (Isa. 65:13) Kikabashemeza okuba hamwe n’ab’eishe-emwe abaine okushemererwa kandi abarikukwatanisa. (Zab. 133:1) Okubaasa kuhwera baingi nk’oku kirikubaasika kwija omu Ruteerane Oruhango orwine omutwe “Kuratira Kristo!” nituza kagaruka twejumbe omu kagaba akapapura ak’okweta abantu omu nsi yoona.
2 Ebyarugiremu Omwaka Oguhweire: Turikwihikirira ahari ripoota y’ensi yoona, ebyarugire omu kugaba akapapura k’okweta abantu aha Ruteerane Oruhango orwine omutwe “Okucungurwa Kuri Haihi!” bikaba biri burungi. Omu myanya mingi, abantu baingi bakatumanya. Nk’eky’okureeberaho, omuri tauni emwe, orupapura rw’amakuru rukahandiika ruti ahari kampeyini egyo: “Okubaasa kuhika ahari buri omwe omu bwire, Abajurizi babaire nibateeraho n’agaabo goona kuhika aha bataahi—bakora eshaaha nyingiho, baza hareho, kandi bateeraho n’okugamba nibarahuka.” Okugaba akapapura ako okwabaire kutebeekanisiibwe kurungi kukareetera abashaki b’amakuru omu tauni endiijo kuhandiika bingi ahari kampeyini egyo. Empapura z’amakuru ishatu zikagamba gye aha murimo gwaitu oruteerane oruhango rutakabaireho. Omu rupapura rw’amakuru orwa Sande, omunyamakuru omwe akahandiikamu bingi ahari kampeyini egyo. Rukooreka omu bwijwire ebirikukwata aha bi turikwikiriza, aha ku turikukwatanisa, aha kugaba akapapura ako, n’aha ruteerane orwo oruhango. Omubuurizi omwe ku yaatwire akapapura ako aha nju emwe, ou yaashangiremu akagira ati: “Buzimazima, naaba ninshoma ebirikukwata aha kapapura ako!” Ondiijo we akagira ati: “Naaba nimbashomaho, mbwenu hati reeba mwaija! Ako n’akangye?” Akongyeraho ati: “Ni kirungi okureeba ngu Abajurizi ba Yehova nibakora ekintu nk’eki.”
3 Abantu baingi basya bakaija aha myanya y’oruteerane baine obupapura bwabo omu ngaro. Bamwe ahari abo bakaruga omu tauni za hare okubaasa kubaho omu ruteerane. Okuteeraho kwaitu kweta abandi kukatuma omubaro gw’abaizire gwakira aha gwa butoosha, omu nsi emwe hayeyongyeraho ebicweka 27 ahari 100 eby’abantu abaabaire baijire omwaka ogw’enyima.
4 Okuheza Ekicweka Eki Murikubuuriramu: Nimubaasa kutandika kugaba akapapura ako harikuburayo saabiiti eshatu oruteerane rukahika. Hashemereire kukorwa kyona ekirikubaasika kureeba ngu ekicweka kyona kyabuurirwamu. Omu bibiina ebiine ekicweka kihango eki birikubuuriramu, ababuurizi nibabaasa kureka akapapura omu maju agu bataraashangemu bantu omuri saabiiti erikukuhererukayo oruteerane rukabona kubaho. Ebibiina bishemereire kuteeraho kugaba obupapura bwona obu bihairwe kandi bikabuurira ekicweka kihango nk’oku kirikubaasika. Bwona oburaashaageho nibubaasa kuheebwa baapayoniya abari omu kibiina ekyo.
5 Eby’Okugamba: Noobaasa kugira oti: “Turi omuri kampeyini y’okugaba akapapura aka ak’okweta abantu aha mukoro mukuru oguri haihi kubaho. Aka n’akaawe. Nooza kushanga ebirikukiraho aha kapapura aka.” Okukoresa ebigambo bikye nikiija kukubaasisa kugaba bwingi. Kwonka beitu ou waashanga omu ka yaaba aine ebibuuzo, twara akiire obigarukemu. Ahu oraashange orikwenda kumanya ebirikukiraho, teeraho kugarukayo juba nk’oku kirikubaasika.
6 Ka ni kikuru okuteeraho kukuratira Kristo! (Yoh. 3:36) Oruteerane oruhango oruraakurateho niruza kuhwera boona abaraarwijemu, kukora ekyo. Buzimazima twine amatsiko ngu obujurizi bw’amaani nibwija kuheebwa abantu ahabw’okuteeraho n’agaitu kubamanyisa Oruteerane Oruhango orwine omutwe “Kuratira Kristo!” N’ahabw’ekyo, ba omweziriki oyete baingi nk’oku kirikubaasika. Ka tukwendeze emigisha ya Yehova omu kuteeraho kwawe kwejumba omuri kampeyini egi erikukorwa omu nsi yoona.