Guma Nootunguuka omu Kubuurira
1. Hariho by’okureeberaho ki eby’omu kyasha ky’okubanza ebirikworeka ngu tushemereire kwongyera kutunguuka omu kubuurira?
1 Abakristaayo baine kwongyera kutunguuka omu kubuurira. Egi niyo nshonga ahabw’enki Yesu yaagumire naatendeka abeegi be kuba ababuurizi barungi. (Luk. 9:1-5; 10:1-11) Kandi niyo nshonga ahabw’enki Akula na Priskila baatwaire Apollo owaabo ‘baakongyera kumushobororera gye omuhanda gwa Ruhanga.’ (Byak. 18:24-26) Ahabw’enshonga niyo emwe, Paulo akahiga Timoseo owaabaire naamanya gye kubuurira kwezirikira okwegyesa kugira ngu ‘boona bareebe ku arikweyongyera’ kutunguuka. (1 Tim. 4:13-15) N’obu twakuba tumazire obwire burikwingana ki turikukorera Mukama nk’ababuurizi b’amakuru marungi, twine kugumizamu kwongyera kutunguuka omu kubuurira.
2. Nitubaasa kwegyera tuta aha bandi?
2 Yegyera aha Bandi: Omuringo gumwe ogu turikubaasa kukoresa kwongyera kutunguuka omu kubuurira n’okwegyera aha bandi. (Enf. 27:17) N’ahabw’ekyo, teeraho kuta omutima aha nyanjura z’ababuurizi bagyenzi baawe. Shaba abarikumanya kubuurira gye obuhwezi ahu kirikwetengyesa kandi ohurikize gye ebi barikukugambira. (Enf. 1:5) Torikumanya oku orikubaasa kugarukayo aha muntu orikwenda kumanya ebirikukiraho, kutandika kwegyesa omuntu Baibuli, nari hariho omuringo gw’okubuurira ogu otarikumanya kukoresa? Ba niwe waashaba orikwebembera guruupu y’okubuurira ei orimu nari omubuurizi orikumanya kubuurira gye kukuhwera. Kandi, ijuka ngu n’omwoyo gurikwera gwa Yehova nigubaasa kukuhwera, n’ahabw’ekyo mushabe obutoosha kukuha omwoyo gwe.—Luk. 11:13.
3. Tushemereire kutwaza tuta twaheebwa obuhabuzi obu tutashabire?
3 Otakagubwa kubi waatunga obuhabuzi aha ku orikubaasa kwongyera kubuurira gye, n’obu baakukuha obuhabuzi obu otashabire. (Mub. 7:9) Ikiriza obuhabuzi omu bucureezi kandi oyorekye ngu noosiima, nka Apollo. Waakora ekyo nikyoreka obwengye.—Enf. 12:15.
4. Hariho nshonga ki y’amaani ei Yesu yaahaire eshemereire kutuhiga kutunguuka omu kubuurira?
4 Okutunguuka Nikuhimbisisa Ruhanga: Yesu arikukoresa eky’okureeberaho, akahiga abeegi be kwongyera kutunguuka omu kubuurira. Akegyeragyeranisa n’omuzaabibu kandi abeegi be abashukirweho amajuta yaabagyeragyeranisa n’amataagi. Yaagira ngu taata asharira buri itaagi eririkwana ebyana “ngu rikizeho kwana.” (Yoh. 15:2) Nk’oku mukama w’omuzaabibu arikuba naayenda ngu amataagi gaane, Yehova nawe naayenda ngu tweyongyere kutunguuka, turikwana ebyana. (Heb. 13:15) Ku turikutunguuka omu kubuurira, ni kirungi ki ekirikurugamu? Yesu naatuha eky’okugarukamu: “Ekihimbisisa Tata, . . . niimwe okwana ebyana bingi.”—Yoh. 15:8.