Eshuura ya Kataano
Ekitambo—N’Ekiconco kya Ruhanga Ekirikukirayo
Ekitambo niki?
Ekitambo kikaheebwa kita?
Nikibaasa kukugasira kita?
Noobaasa kworeka ota ngu noosiima ekitambo?
1, 2. (a) Ni ryari obu ekiconco kirikuba eky’omuhendo ahariiwe? (b) Ahabw’enki kirikubaasa kugambwa ngu ekitambo nikyo kiconco ekirikukirayo obukuru eki waakubaasa kutunga?
EKICONCO ekirikukirayo eki oratungire ni kiiha? Ekiconco tikirikwetengyesa kuba eky’esente nyingi okuba eky’omuhendo. Buzima, omuhendo gw’ekiconco ekirungi ti kugira ngu obutoosha nigubarirwa omu sente ezi kirikugurwa. Kureka, ekiconco ekyo ku kirikukureetera okushemererwa nari kyahikiiriza ekyetengo ekyo buzima eki oine, biri n’eky’omuhendo muhango ahariiwe.
2 Omu biconco byona ebi waakubaasa kutunga, hariho kimwe ekirikubikira byona. N’ekiconco kya Ruhanga aha bantu. Yehova atuhaire ebintu bingi, kwonka ekiconco ekirikukirayo obukuru eki atuhaire n’ekitambo kya Yesu Kristo Omwana we. (Matayo 20:28) Nk’oku turaareebe omu shuura egi, ekitambo nikyo kiconco ekirikukirayo eki orikubaasa kutunga, ahakuba nikikureetera okushemererwa okutakareebwaga, kandi nikihikiiriza ebyetengo byawe ebirikukirayo obukuru. Ekitambo buzima nikyo kikorwa kya Yehova ekirikukirayo omu kworeka rukundo ye.
EKITAMBO NIKI?
3. Ekitambo nikimanyisa ki, kandi n’enki eki tushemereire kubanza kwetegyereza okubaasa kusiima ekiconco eki eky’omuhendo muhango?
3 Omu bugufu, ekitambo nigwo muhanda gwa Yehova ogw’okujuna nari kucungura abantu kuruga omu kibi n’okufa. (Abaefeso 1:7) Okubaasa kwetegyereza amakuru g’enyegyesa ya Baibuli egi, nitwetenga kweyijutsya ekyabaireho omu musiri gw’omuri Edeni. Ku turaayetegyereze eki Adamu yaafeereirwe obu yaashiisha, nibwo turikubaasa kumanya gye ahabw’enki ekitambo kiri ekiconco ky’omuhendo muhango ahariitwe.
4. Kikaba nikimanyisa ki ahari Adamu okugira amagara agahiki- riire?
4 Obu Yehova yaahanga Adamu, akamuheereza ekintu ekyabaire kiri eky’omuhendo muhango—amagara agahikiriire. Teekateeka aha ki eki kyabaire nikimanyisa ahari Adamu. Obu yaabaire ahangirwe aine omubiri n’ebiteekateeko bihikiriire, Adamu akaba atarikwija kurwara, kukaikura, nari kufa. Nk’omuntu ohikiriire, akaba aine omukago gw’omutaano na Yehova. Baibuli neegira ngu Adamu akaba ari ‘omwana wa Ruhanga.’ (Luka 3:38) N’ahabw’ekyo, Adamu akashemerererwa okugira omukago na Yehova Ruhanga, nk’ogwo ogu omwana agira ahari ishe orikumukunda. Yehova akaba agamba na Adamu, omwana we ow’omu nsi, amuheereza emirimo erikwesiimisa kandi amumanyisa ebi yaabaire amwinemu amatsiko kukora.—Okutandika 1:28-30; 2:16, 17.
5. Baibuli neeba neemanyisa ki ku erikugira ngu Adamu akahangwa “omu kushusha kwa Ruhanga”?
5 Adamu akahangwa “omu kushusha kwa Ruhanga.” (Okutandika 1:27) Ekyo tikirikumanyisa ngu Adamu akaba naashusha Ruhanga omu ndebeeka. Nk’oku twayegire omu Shuura ya 1 ey’ekitabo eki, Yehova n’omwoyo, tarikureebwa. (Yohaana 4:24) N’ahabw’ekyo, Yehova taine mubiri ogw’enyama n’eshagama. Adamu okuhangwa omu kyeshusha kya Ruhanga kikaba nikimanyisa ngu akahangwa aine emiringo nk’egyo eya Ruhanga, otwariiremu rukundo, obwengye, oburingaaniza hamwe n’amaani. Adamu akaba ari nk’Ishe omu gundi muringo mukuru ahabw’okugira ngu akaba aine obushoboorozi bw’okwecweramu eby’okukora. N’ahabw’ekyo, Adamu akaba atari nk’ekyooma ekirikukora ebyo byonka ebi kikoreirwe nari ebi kiragiirwe kukora. Kureka, we wenka akaba naabaasa kwecweramu eby’okukora, arikutooranaho ekirungi nari ekibi. Kuri yaacwiremu kworobera Ruhanga, akaabaire yaagumire omu Kibanja kya Ruhanga omu nsi ebiro byona.
6. N’enki eki Adamu yaafeereirwe obu yaagomera Ruhanga, kandi eki kikakwata kita aha baijukuru be?
6 N’eky’amazima, obu Adamu yaagomera Ruhanga kandi akacwerwa orubanja rw’okufa, akafeerwa kihango munonga. Ekibi kye kikamufeereza amagara ge agahikiriire n’emigisha yaago yoona. (Okutandika 3:17-19) Eky’obusaasi, Adamu akafeerwa amagara aga ag’omuhendo, tiwe wenka kureka akagafeereza n’abaijukuru aba bwanyima. Ekigambo kya Ruhanga nikigira kiti: “N’ahabw’ekyo nk’oku ekibi kyaizire omu nsi ahabw’okushiisha kw’omuntu omwe [Adamu], kandi kikarugamu okufa, nikwo n’okufa kwabugire omu bantu boona, ahakuba boona bakashiisha.” (Abarooma 5:12) Buzima, twena tukahungura ekibi kuruga ahari Adamu. Nikyo Baibuli erikugirira ngu ‘akeeguza’ we n’abaijukuru omu buhuuku bw’ekibi n’okufa. (Abarooma 7:14) Hakaba hatakiriho matsiko ahari Adamu na Haawa ahabw’okuba bakagomera Ruhanga bakigyendereire. Kandi shi baijukuru baabo, naitwe otubariiremu?
7, 8. Ekitambo nikimanyisa bintu ki bibiri?
7 Yehova akacungura abantu arikurabira omu kitambo. Ekigambo ekitambo nikimanyisa ki? Ekitambo nikimanyisa ebintu bibiri. Eky’okubanza, ekitambo n’omuhendo ogurikushashurwa okucungura nari okugura ekintu okakyegaruriza. Eki nikibaasa kushushanisibwa n’omuhendo ogurikushashurwa okugarurirwa omusibe okwatairwe omu rutaro. Ekyakabiri, ekitambo n’omuhendo ogurikuheebwayo okushashurira ekintu. Nikishushana n’omuhendo ogurikushashurwa kushumbuusha omuntu ahabw’okusiisikarirwa nari ahabw’obuhuta obu ahikirweho. Nk’eky’okureeberaho, omuntu ku yaakureetaho butandu, naaba ashemereire kushashura esente ezirikwingana n’omuhendo gw’ebyo ebyasiisirwe.
8 Kikaba nikibaasika kita okushashurira ekyo eki Adamu yaatufeereize twena hamwe kandi tukajunwa kuruga omu buhuuku bw’ekibi n’okufa? Ka tuteekateekye aha kitambo eki Yehova yaaheereize hamwe n’oku kirikubaasa kukugasira.
OKU YEHOVA YAAHAIRE EKITAMBO
9. Ni kitambo kya muringo ki ekyabaire nikyetengwa?
9 Obu amagara agahikiriire gaabaire gatakiriho, tihariho magara g’omuntu otahikiriire agaabaire nigabaasa kugacungura. (Zaaburi 49:7, 8) Ekyabaire nikyetengwa n’omuhendo gw’ekitambo ogurikwinganaingana n’ogwabuziibwe. Eki nikiikirizana n’ekiragiro eky’oburinganiza ekirikushangwa omu Kigambo kya Ruhanga, ekirikugira kiti: “Amagara garyaguma garihwe agandi.” (Eky’Ebiragiro 19:21) Mbwenu shi, n’enki ekyabaire nikiza kwingana n’omuhendo gw’amagara agahikiriire, agu Adamu yaaburize? Amagara agandi agahikiriire nikyo ‘kitambo kirikwinganaingana’ ekyabaire nikyetengwa.—1 Timoseo 2:6.
10. Yehova akaheereza ata ekitambo?
10 Yehova akaheereza ata ekitambo? Akoohereza omwe aha baana be ab’omwoyo abahikiriire okwija omu nsi. Kwonka Yehova tarafiire kwohereza ekihangirwe kyona. Akoohereza ekihangirwe eki yaabaire naakunda munonga, niwe Mwana we omwe nyamunegyere. (1 Yohaana 4:9, 10) Ayekundiire, Omwana ogu akatsigaho ab’omu ka ye ey’omu iguru. (Abafilipi 2:7) Nk’oku twegire omu shuura y’ekitabo eki ehweireho, Yehova akakora eky’okutangaaza obu yaafurura amagara g’Omwana ogu akagata omunda ya Mariamu. Arikuhwerwa omwoyo orikwera wa Ruhanga, Yesu akazaarwa nk’omuntu ohikiriire kandi akaba ataine kiheneso ky’ekibi, nikwo kufa.—Luka 1:35.
11. Omuntu omwe akaba naabaasa ata kuba ekitambo kya baingi?
11 Omuntu omwe akaba naabaasa ata kuba ekitambo ky’obuhumbi n’obuhumbi bw’abantu? Mbwenu shi, abantu baingi abarikubarirwa omu busiriira bakahinduka bata abasiisi? Ijuka ngu ahabw’okushiisha, Adamu akafeerwa omugisha gw’okugira amagara agahikiriire. N’ahabw’ekyo, tarabaasize kuhunguza abaijukuru be amagara agahikiriire. Omu mwanya gw’ekyo, akabahunguza ekibi n’okufa. Yesu, ou Baibuli erikweta “Adamu owa bwanyima,” akaba aine amagara agahikiriire kandi tarasiisire. (1 Abakorinso 15:45) Omu muringo ogu, Yesu akaza omu mwanya gwa Adamu okubaasa kutujuna. Arikuhayo amagara ge agataine kibi kandi arikuguma ari omuhurizi ahari Ruhanga, Yesu akashashura omuhendo gw’ekibi kya Adamu. Atyo Yesu yaareetera baijukuru ba Adamu amatsiko.—Abarooma 5:19; 1 Abakorinso 15:21, 22.
12. Okubonabonesibwa kwa Yesu kukahamya ki?
12 Baibuli neeshoborora omu bwijwire aha kubonabona oku Yesu yaayemeire atakafiire. Akateerwa eminyafu, yaahanikwa, kandi yaafeera aha muti gw’okubonaboneraho omu busaasi bwingi. (Yohaana 19:1, 16-18, 30; Ebyongyeirweho, aha rupapura 204-6) Ahabw’enki kyabaire nikyetengyesa Yesu okubonabonesibwa munonga atyo? Omu shuura emwe ey’ekitabo eki, bwanyima nitwija kwega ngu Sitaane akabuuza yaaba Yehova aine omuheereza n’omwe owaakubaasa kuguma ari omwesigwa omu kugyezesibwa. Omu kugumisiririza omu bwesigwa n’obu araabe yaabaire ari omu busaasi bwingi, Yesu akaha eky’okugarukamu okuhakanisa kwa Sitaane ekirungi munonga. Yesu akooreka ngu omuntu ohikiriire oine obushoboorozi bw’okwecweramu akaba naabaasa kuguma ari omwesigwa ahari Ruhanga n’obu Omuregi yaakukora ebirikwingana ki. Yehova ka aine kuba yaashemereirwe munonga ahabw’obwesigwa bw’Omwana we omukundwa!—Enfumu 27:11.
13. Ekitambo kikaheebwa kita?
13 Ekitambo kikaheebwa kita? Aha kiro kya 14 eky’omwezi gwa Nisani ogw’Ekiyudaaya omu gwa 33 C.E., Yehova akareka Omwana we ohikiriire kandi otaine kibi kwitwa. Yesu atyo akahayo amagara ge g’obuntu agahikiriire ‘rimwe yaaheza.’ (Abaheburaayo 10:10) Aha kiro kya kashatu Yesu aherize kufa, Yehova akamuzoora yaamuha amagara ag’omwoyo. Ari omu iguru, Yesu akaha Ruhanga omuhendo gw’amagara ge g’obuntu agahikiriire agaahairweyo nk’ekitambo ahabwa baijukuru ba Adamu. (Abaheburaayo 9:24) Yehova akaakiira omuhendo gw’ekitambo kya Yesu nk’ekitambo ekirikwetengwa okucungura abantu kuruga omu buhuuku bw’ekibi n’okufa.—Abarooma 3:23, 24.
OKU EKITAMBO KIRIKUBAASA KUKUGASHA
14, 15. Okubaasa “kusaasirwa ebibi byaitu,” n’enki eki tushemereire kukora?
14 N’obu turaabe turi abasiisi, nitubaasa kutunga emigisha mingi ahabw’ekitambo. Ka twetegyereze emwe aha migisha ei turikubaasa kutunga omu bunaku obu hamwe n’omu biro ebiriija ahabw’ekiconco kya Ruhanga eki ekirikukirayo.
15 Okusaasirwa ebibi. Ahabw’obutahikiirira obu twahungwire, niturwana munonga kukora ekihikire. Twena nitushiisha yaaba mu kugamba nari omu bikorwa. Kwonka okurabira omu kitambo kya Yesu, nitubaasa “kusaasirwa ebibi byaitu.” (Abakolosai 1:13, 14) Okubaasa kusaasirwa, nitwetenga kweteisa twihiire kimwe aha mutima. Tushemereire kweshengyereza Yehova, turikumushaba kutusaasira turikwihirira aha kwikiriza kwaitu omu kitambo ky’Omwana we.—1 Yohaana 1:8, 9.
16. N’enki ekirikutubaasisa kuramya Ruhanga twine omutima ogutarikweshinja, kandi omutima ogutarikweshinja nk’ogwo n’ogw’omuhendo guta?
16 Omutima ogutarikweshinja omu maisho ga Ruhanga. Omutima ogurikweshinja nigubaasa kutureetera okwehwa amatsiko n’okwehurira turi nk’abataine mugasho. Kurabira omu kusaasirwa okurikubaasika ahabw’ekitambo, na rukundo, Yehova naatwikiriza kumuramya twine omuntu ow’omunda omurungi hoona n’obu turaabe tutahikiriire. (Abaheburaayo 9:13, 14) Eki nikitubaasisa kuhikiirira Yehova omu kushaba tutaine bwoba. N’ahabw’ekyo, nitubaasa kumwirira haihi turikurabira omu kushaba. (Abaheburaayo 4:14-16) Okuguma twine omuntu ow’omunda omurungi nikireeta obusingye bw’omu mutima, kuhurira oine ekitiinisa, kandi kyongyera aha kushemererwa.
17. Ni migisha ki ei turikubaasa kutunga ahabwa Yesu okutufeera?
17 Amatsiko g’amagara agatahwaho omu kibanja kya Ruhanga omu nsi. “Ebihembo by’ekibi n’okufa,” nikwo ekitabo kya Abarooma 6:23 kirikugira. Orunyiriri nirwongyera rugira ruti: “Kwonka ekiconco kya Ruhanga n’amagara agatahwaho omuri Kristo Yesu Mukama waitu.” Omu Shuura ya 3 ey’ekitabo eki, tukagamba aha migisha ey’omu Kibanja kya Ruhanga ekirikwija omu nsi. (Okushuuruurwa 21:3, 4) Emigisha y’omu maisho egyo yoona, erimu amagara agatahwaho omu kuhikiirira, neebaasika ahabw’okuba Yesu akatufeera. Okubaasa kutunga emigisha egyo, nitwetenga kworeka ngu nitusiima ekiconco ky’ekitambo.
NOOBAASA KWOREKA OTA OKUSIIMA KWAWE?
18. Ahabw’enki tushemereire kusiima Yehova ahabw’okutuha ekiconco ky’ekitambo?
18 Ahabw’enki tushemereire kusiima Yehova munonga ahabw’ekitambo? Buzima ekiconco nikiba eky’omuhendo namunonga orikukiheereza ku arikwefeereza obwire, amaani nari empiiha. Nikitushemeza ku turikumanya ngu ekiconco ekyo nikitworeka rukundo eya buzima ei owaakituha atwiniire. Ekitambo nikyo kiconco ekirikukirayo kuba eky’omuhendo omu biconco byona, ahakuba Ruhanga akeefeereza kihango omu kukituheereza. “Oku nikwo Ruhanga yaakunzire atyo ensi, akahayo Omwana we omwe nyamunegyere,” nikwo Yohaana 3:16 rurikugira. Okutuha ekitambo nikyo kikorwa ekirikukirayo kworeka rukundo ya Yehova ahariitwe. Kandi n’obuhame bwa rukundo ya Yesu, ahabw’okwekundira akahayo amagara ge ahabwaitu. (Yohaana 15:13) Ekiconco ky’ekitambo kishemereire kutuhamiza ngu Yehova hamwe n’Omwana we nibakunda buri omwe omuriitwe.—Abagalatia 2:20, NW.
19, 20. Ni mu miringo ki ei turikubaasa kworekamu ngu nitusiima ekiconco kya Ruhanga eky’ekitambo?
19 Nitubaasa kworeka tuta ngu nitusiima ekiconco kya Ruhanga eky’ekitambo? Eky’okubanza kya byona, teeraho kwega ebirikukiraho ebirikukwata ahari Yehova, owaatuhaire ekitambo. (Yohaana 17:3) Okwega Baibuli orikwejunisa ekitabo eki nikwija kukuhwera kukora eki. Oku oraayeyongyere kutunguuka omu kumanya kwa Yehova, nikwo na rukundo yaawe ahariwe eraayeyongyere kuhama. Bwanyima, rukundo egyo neija kukureetera kwenda kukora ebirikumushemeza.—1 Yohaana 5:3.
20 Yoreka ngu oine okwikiriza omu kitambo kya Yesu. Yesu we wenka akagira ati: “Orikwikiriza Omwana aine amagara agatahwaho.” (Yohaana 3:36) Nitubaasa kworeka tuta ngu twine okwikiriza omuri Yesu? Okwikiriza nk’okwo tikurikworekyerwa mu bigambo byonka. ‘Okwikiriza okutaine bikorwa kuba kufiire,’ Yakobo 2:26 nikwo rurikugira. Eego buzima, okwikiriza okwa buzima nikuhamibwa ‘ebikorwa,’ ebyo ebi turikukora. Omuringo gumwe ogw’okworekamu ngu twine okwikiriza omuri Yesu n’okukora kyona eki turikubaasa okumutooreza ti mu bi turikugamba byonka, kureka n’omu bi turikukora.—Yohaana 13:15.
21, 22. (a) Ahabw’enki tushemereire kubaho aha mukoro gw’Ekiihuro kya Mukama waitu ogurikubaho buri mwaka? (b) N’enki ekirikuza kushobororwaho omu Shuura eya 6 na 7?
21 Baho aha mukoro gw’okwijuka Okufa kwa Mukama waitu ogurikubaho buri mwaka. Omu mwabazyo gwa Nisani 14, 33 C.E., Yesu akatandikaho omukoro gw’omutaano ogu Baibuli erikweta ‘Ekihuuro kya Mukama waitu.’ (1 Abakorinso 11:20; Matayo 26:26-28) Omukoro ogu kandi nigwetwa Ekiijutsyo ky’okufa kwa Kristo. Yesu akatandikaho omukoro ogu okuhwera abeegi be hamwe n’abandi Bakristaayo boona ab’amazima aba bwanyima okwijuka ngu ahabw’okufa kwe nk’omuntu ohikiriire, akahayo amagara ge nk’ekitambo. Ebirikukwata aha kiijutsyo eki, Yesu akaragiira ati: “Mugume mukore mutyo okuunyijukiraho.” (Luka 22:19) Ku turikubaho aha mukoro gw’Ekiijutsyo nikitwijutsya rukundo mpango ei Yehova na Yesu baayorekire ekwatiraine n’ekitambo. Nitubaasa kworeka okusiima kwaitu okw’ekitambo turikubaho buri mwaka aha mukoro gw’Okwijuka okufa kwa Yesu.a
22 Ekitambo eki Yehova yaataireho buzimazima n’ekiconco ky’omuhendo munonga. (2 Abakorinso 9:14, 15) Ekiconco eki eky’omuhendo nikigasira n’abo abafiire. Eshuura ya 6 hamwe n’eya 7 niziija kushoborora oku eki kirikubaasika.
[Obugambo obw’Ahansi]
a Okumanya ebindi ebirikukiraho aha makuru g’Ekiihuro kya Mukama Waitu, reeba Ebyongyeirweho, aha rupapura 206-8.
EBI BAIBULI ERIKWEGYESA
▪ Ekitambo n’omuhanda ogu Yehova arikurabiramu okucungura abantu kuruga omu kibi n’okufa.—Abaefeso 1:7.
▪ Yehova akaha ekitambo arikwohereza Omwana we omwe nyamunegyere omu nsi okutufeera.—1 Yohaana 4:9, 10.
▪ Ahabw’ekitambo, nitusaasirwa ebibi, tugira omutima ogutarikweshinja hamwe n’amatsiko g’amagara agatahwaho. —1 Yohaana 1:8, 9.
▪ Nitworeka ngu nitusiima ekitambo turikweyongyera kwega ebindi ebirikukwata ahari Yehova, turikworeka okwikiriza omu kitambo kya Yesu, kandi turikubaho aha mukoro gw’Ekihuuro kya Mukama waitu.—Yohaana 3:16.
[Ekishushani ekiri aha rupapura 52]
Yehova akahayo Omwana we omwe nyamunegyere nk’ekitambo ahabwaitu
[Ekishushani ekiri aha rupapura 54]
Okweyongyera kwega ebindi ebirikukwata ahari Yehova n’omuringo gumwe ogu orikworekamu ngu noosiima ekiconco kye eky’ekitambo