Eshuura Ya Ikumi N’emwe
Rinda Obusingye omu Ka Yaanyu
1. Niki ebimwe ebirikubaasa kureetaho okutakwatanisa omu maka?
BAINE okushemererwa abo abari omu maka agarimu rukundo, okwetegyereza n’obusingye. Obundi eka yaanyu neebaasa kuba eri nk’egyo. Kwonka eky’obusaasi, amaka maingi tigarimu mitwarize nk’egyo kandi n’abagarimu tibarikukwatanisa ahabw’enshonga zitari zimwe na zimwe. Niki ekirikureeta okutakwatanisa omu maka? Omu shuura egi nituza kureeba ebintu bishatu. Amaka agamwe, abagarimu boona tibari mu diini emwe. Omu maka agandi, nooshanga buri omwe aha bazaire aine abaana abe. Kandi agandi, abagarimu tibarikukwatanisa ahabw’oburemeezi omu by’entaasya nari ahabw’okwenda kutunga ebintu bingi. Kwonka, enshonga ezirikureetera ab’omu ka emwe kutakwatanisa nizibaasa kutakwata aha b’omu ka endiijo. Niki ekirikureeta ekyo?
2. Abamwe omu maka nibasherura nkahi obuhabuzi, kwonka shi obukomooko bw’obuhabuzi oburikukirayo oburungi nibuha?
2 Eky’okubanza n’emiteekateekyere y’ab’omu ka. Waateeraho kwetegyereza gye emiteekateekyere y’abandi, nikikuhwera kureeba oku orikubaasa kurinda obumwe omu ka. Ekya kabiri n’ahu orikwiha obuhabuzi. Abantu baingi nibakuratira obuhabuzi obu barikuheebwa abu barikukora nabo, abataahi, abahandiiki b’empapura z’amakuru nari obundi buhabuzi bw’abantu. Kwonka abandi, beegire eki Ekigambo kya Ruhanga kirikugamba aha mbeera zaabo, kandi baagyendera aha bi beegire. Okukora eki nikibaasa kuhwera kita abari omu ka kurinda obusingye?—2 Timoseo 3:16, 17.
BARO YAABA ATARI MUKRISTAAYO
3. (a) Baibuli neeha buhabuzi ki aha kwetantara kushwera nari kushwerwa otari Mukristaayo? (b) Ni misingye ki emwe erikuhwera, omwe aha bashweraine ku yaakuba ari Omukristaayo ondiijo atamuri?
3 Baibuli neyehanangiriza abakristaayo okutashwera nari kushwerwa otari Mukristaayo. (Eky’Ebiragiro 7:3, 4; 1 Abakorinso 7:39) Obundi noobaasa kuba waayegire amazima g’omuri Baibuli bwanyima y’okutaaha omu bushwere kwonka baro we akanga kugeega. Mbwenu shi oine kukora ki? Buzima, ebiragaano by’obushwere nibiba nibikikora. (1 Abakorinso 7:10) Baibuli nehamiriza ngu abari omu bushwere baine kubugumamu kandi ebahiga kushoboorora okutaikirizana kwabo omu mwanya gw’okubuhungamu. (Abaefeso 5:28-31; Tito 2:4, 5) Kandi shi, omushaija waawe ku yaakuba naahakanisiza kimwe ebi orikwikiriza ebiri omuri Baibuli? Naabaasa kuteeraho kukuzibira kuza omu nteerane z’ekibiina, nari naabaasa kugira ngu tarikwenda omukazi we kugyenda enju aha nju arikugamba aha by’ediini. Noija kukora ki?
4. Ni mu muringo ki ogu omukazi arikubaasa kworeka okufayo ahari iba yaaba atari Mukristaayo?
4 Yebuuze oti: ‘Ahabw’enki ibanyi atarikwenda ngu nze omu nteerane nari omu kubuurira?’ (Enfumu 16:20, 23) Buzima yaaba atarikwetegyereza gye eki orikukora, naabaasa kwerarikirira. Nari naabaasa kuba naagyemeserezibwa abanyabuzaare ahabw’okugira ngu tokyejumba omu mikoro emwe eri mikuru aharibo. Omushaija omwe akagira ati: “Omukazi wangye ku arikuntsiga omu nju nyenka, oshusha oti anyangire.” Aha mushaija ogwo okaba nooshusha oti ediini ekaba neeza kumwihaho omukazi we. Kwonka nabwe akanga kukigamba ngu aine eihamba ahabw’amaryo. Oshemereire kuhamiza baro ngu okukunda Yehova kwawe tikirikumanyisa ngu tokimukunda munonga. Teeraho kugira obwire bw’okuba hamwe nawe oburikumara.
5. Omukazi aine kutwaza ata iba yaaba ari omu diini endiijo?
5 Kwonka, hariho ekintu kikuru munonga eki oine kumanya waaba ori ow’okusingura embeera nk’egyo. Ekigambo kya Ruhanga nikyehanangiriza abakazi kiti: “Mworobere baabaroimwe nk’oku kishemereire omuri Mukama.” (Abakolosai 3:18) N’ahabw’ekyo, nikirabura aha bugomi. Kandi, omu kugira ngu “nk’oku kishemereire omuri Mukama,” ekyahandiikirwe eki nikyoreka ngu omukazi omu kworobera iba, aine kwijuka ngu aine n’okworobera Mukama. Omukazi aine kuringaaniza byombi.
6. Ni misingye ki ei omukazi Omukristaayo aine kuguma naijuka?
6 Okuza omu nteerane, n’okubuurira abandi aha bi orikwikiriza kuruga omuri Baibuli n’ebintu bikuru ebi Omukristaayo aine kukora omu kuramya okw’amazima. (Abarooma 10:9, 10, 14; Abaheburaayo 10:24, 25) Mbwenu okaakora ki, omuntu yaakuragiira butunu kutoorobera kimwe aha biragiro bya Ruhanga? Entumwa za Yesu Kristo zikagira ziti: “Tushemereire kworobera Ruhanga okukira abantu.” (Ebyakozirwe 5:29) Entumwa zikataho eky’okureeberaho kirungi ekirikuhwera omu mbeera nyingi. Rukundo ei oyiniire Yehova neija kukuhiga kumuha ekitiinisa ekimushemereire? Kandi, oku orikukunda baro n’ekitiinisa eki orikumuha, nibikubaasisa kworobera Yehova omu muringo ogutarikugwisa kubi baro?—Matayo 4:10; 1 Yohaana 5:3.
7. Ni kumariirira ki oku abakazi Abakristaayo baine kugira?
7 Yesu akagira ngu butoosha eki tikirikwija kubaasika. Akagira ngu ahabw’okuhakanisibwa okuriba aha kuramya okw’amazima, abakristaayo abari omu maka agamwe nibaija kuba nk’abataanisiibwe, babe nk’abu rurara egiire ahagati yaabo n’abandi omu ka. (Matayo 10:34-36) Omukazi omuri Japani akahikwaho embeera nk’egyo. Akahiiganisibwa iba kumara emyaka 11. Akaba amutwariza omu muringo mubi kandi emirundi mingi akaba amukingira aheeru. Kwonka akagumisiriza. Banywani be omu kibiina Ekikristaayo bakamuhwera. Akaguma naashaba obutoosha kandi akatunga okuhuumurizibwa kuruga omuri 1 Petero 2:20. Omukazi Omukristaayo ogu akaba naahamya ngu yaaguma aine obumanzi, eizooba rimwe iba araamwegaitaho omu kuheereza Yehova. Kandi kwo buzima akamwegaitaho.
8, 9. Omukazi ashemereire kutwaza ata okwetantara kureetera iba kwetomboita?
8 Hariho ebintu bingi ebi orikubaasa kukora okuhindura emiteekateekyere y’ou ori nawe omu bushwere. Nk’eky’okureeberaho, baro yaayanga ediini yaawe, otaakaakora ebirikubaasa kumureetera kwetomboita n’omu nshonga ezindi. Guma ocume gye eka yaanyu. Teeraho kwereeberera gye omu by’omubiri. Teeraho kworeka baro rukundo kandi ogume omusiime. Omu mwanya gw’okujumirira ebi arikukora, teeraho kumushagika omu birungi ebi arikukora. Kyoreke ngu noomusheruraho obuhwezi nk’omutwe gw’eka. Yaakushobeza otateeraho kweshashuza. (1 Petero 2:21, 23) Kimanye ngu muri abantu abatahikiriire, kandi haabaho okutaikirizana, n’obucureezi ba naiwe waabanza kushaba okusaasirwa.—Abaefeso 4:26.
9 Okuza omu nteerane etakaba rwekwatso y’okukyerererwa kumutebeekanisiza eby’okurya. Kandi noobaasa kucwamu kuza kubuurira obu baro arikuba atari muka. N’eky’obwengye omukazi Omukristaayo kutaguma naabuurira iba, ekyo kyaba nikigwisa kubi iba. Kureka, naakuratira obuhabuzi bw’entumwa Petero obu: “Naimwe abakazi, mworobere mutyo baabaroimwe; ku haraabe hariho abatarikworobera kigambo kya Ruhanga, bahindurwe emitwarize y’abakazi baabo, bataine kigambo kyona eki babagambiire, ahabw’okureeba emitwarize yaanyu mirungi ey’okutiina Ruhanga.” (1 Petero 3:1, 2) Abakazi Abakristaayo nibateeraho kworeka emitwarize ei omwoyo gwa Ruhanga gurikutuhwera kugira.—Abagalatia 5:22, 23.
OMUKAZI WAAWE YAABA ATARI MUKRISTAAYO
10. Omushaija ashemereire kutwariza ata omukazi we yaaba ari omu nyikiriza erikutaana n’eye?
10 Kandi shi omushaija ku yaakuba ari Omukristaayo kandi omukazi we atamuri? Baibuli neeha obuhabuzi oburikukwata aha mbeera nk’egyo. Neegira eti: “Ow’eishe-emwe weena, ku araabe aine omukazi otarikwikiriza, omukazi ogwo yaakunda kuguma nawe, arekye kumushenda.” (1 Abakorinso 7:12) Kandi Baibuli neyehanangiriza abashaija eti: ‘Mugumizemu nimukunda abakazi baanyu.’—Abakolosai 3:19.
11. Omushaija naabaasa kworeka ata okwetegyereza kandi akeebembera n’obwengye omukazi we otari Mukristaayo?
11 Waaba oine omukazi ori omu nyikiriza erikutaana n’eyaawe, oine kumuha ekitiinisa kandi okamufaho. Nk’omuntu mukuru, omukazi waawe aine obugabe kukora ebi arikwega omu diini ye, n’obu waakuba otarikwikirizana nabyo. Omurundi gw’okubanza kumubuurira aha nyikiriza yaawe, otateekateeka ngu naaza kureka ebi atwire naikiriza reero aikirize ebisya ebi waamubuurira. Omu mwanya gw’okurahuka kumugira ngu ebi atwire naikiriza n’eka yaabo bigwire, n’okugumisiriza teeraho kuhikaanisa nawe ebiteekateeko aha Byahandiikirwe. Naabaasa kuteekateeka ngu torikumufaho waaba noomara obwire bwingi orikukora emirimo eine akakwate n’ekibiina. Naabaasa kukuhakanisa omu kuteeraho kwawe kuheereza Yehova, kandi oshangye ngu ekirikureeta ekyo n’okugira ngu torikuba nawe obwire burikumara. Gira okugumisiriza. Waamukunda kandi okamufaho, nikibaasa kumuhwera kwija omu kuramya okw’amazima.—Abakolosai 3:12-14; 1 Petero 3:8, 9.
OKUTEENDEKA ABAANA
12. N’obu omushaija n’omukazi we baakuba batari mu nyikiriza emwe, bashemereire kugyendera bata aha misingye y’omu Byahandiikirwe omu kutendeka abaana baabo?
12 Omu ka ei omushaija n’omukazi we batari omu kuramya kumwe, okwegyesa abaana eby’omwoyo obumwe nikiguma. Omu nshonga egyo emisingye y’omu Baibuli eine kugyenderwaho eta? Baibuli neegira ngu ishe abaana niwe aine obujunaanizibwa bw’okutendeka abaana, kwonka na nyinabo nawe aine kikuru eki arikubaasa kukora omu kubatendeka. (Enfumu 1:8; Gyeragyeranisa Okutandika 18:19; Eky’Ebiragiro 11:18, 19.) N’obu omushaija ogwo yaakuba atarikwikiriza bwebembezi bwa Kristo, nabwe naaguma ari omutwe gw’eka.
13, 14. Omushaija yaaba naazibira omukazi we kutwara abaana omu nteerane z’Ekikristaayo nari kwega nabo, omukazi ogwo naabaasa kukora ki?
13 Baishe abaana abamwe abatari Bakristaayo tibarikuzibira abakazi baabo kwegyesa abaana baabo eby’ediini. Kwonka abamwe nibabazibira. Kandi shi omushaija waawe ku yaakukuzibira kutwara abaana omu nteerane z’ekibiina nari yaakuzibira kwega nabo Baibuli omuka? Obwo oine kuringaaniza enshonga ezi—obujunaanizibwa bwawe bw’okuheereza Yehova Ruhanga, obw’okworobera obwebembezi bw’omushaija waawe, n’obw’okworora abaana baanyu. Noobaasa kuringaaniza ota enshonga ezo?
14 Buzima nikiija kukwetengyesa kushaba Ruhanga omu nshonga egyo. (Abafilipi 4:6, 7; 1 Yohaana 5:14) Kwonka, niiwe oine kwecweramu eki oraakore. Waakora ebintu n’obwengye, okooreka butunu ngu noikiriza obwebembezi bw’omushaija waawe, naabaasa kurekyeraho kukuhakanisa. N’obu omushaija waawe yaakuba atarikwenda ngu otware abaana baanyu omu nteerane nari ngu obeegyese Baibuli, nabwe noobaasa kubeegyesa omu muringo ogundi. Omu kugamba kwawe buri izooba n’eky’okureeberaho kyawe kirungi, teeraho kubahwera kukunda Yehova, kwikiririza omu Kigambo kye, kuha abazaire ekitiinisa otwariiremu na ishebo, okufa aha bantu abandi, n’okukunda kukora emirimo. Haahinguraho obwire, omushaija waawe naabaasa kureeba ebirungi ebirugiremu kandi naabaasa n’okusiima ebi orikukora.—Enfumu 23:24.
15. Ishe abaana Omukristaayo aine bujunaanizibwa ki omu kwega kw’abaana?
15 Ku oraabe ori Omukristaayo kandi omukazi waawe atamuri, niiwe oine obujunaanizibwa bw’okworora abaana baanyu ‘omu kuhana kwa Yehova kandi orikubatamu emiteekateekyere ye.’ (Abaefeso 6:4, NW) Kwonka omu kukora ekyo, oine kworeka embabazi, rukundo, n’okwetegyereza omu kukwatanisa n’omukazi waawe.
ABAZAIRE BAAWE BAABA BATARI BAKRISTAAYO
16, 17. Abaana baine kuguma nibaijuka misingye ki ya Baibuli baaza omu ediini erikutaana n’ey’abazaire baabo?
16 Obunaku obu, tikirikutangaaza okushanga n’abaana nibaza omu diini erikutaana n’ey’abazaire baabo. Naiwe ekyo nikyo okozire? Ku kiraabe nikwo kiri, Baibuli neekuha obuhabuzi obu ahaifo.
17 Ekigambo kya Ruhanga nikigira kiti: ‘Yorobera abazaire baawe omuri Mukama, ahakuba nikyo kihikire. Tiina sho na nyoko.’ (Abaefeso 6:1, 2) Eki nikitwariramu okuha abazaire ekitiinisa. Kwonka, n’obu okworobera abazaire kiraabe kiri kikuru, tushemereire kuborobera omu muringo ogutarikuhenda biragiro bya Ruhanga ow’amazima. Omwana yaaheza kukura akatandika kwecweramu, naaba naajunaanizibwa ahabw’ebi arikucwamu kukora. Eki nikwo kiri omu biragiro by’abantu kwonka okukira munonga omu biragiro bya Ruhanga. Baibuli neegira eti: “Buri omwe omuriitwe aryayegambira, naayetonganira ahari Ruhanga.”—Abarooma 14:12.
18, 19. Abaana baaba bari omu diini erikutaana n’eya abazaire baabo, nibabaasa kuhwera bata abazaire baabo kumanya gye ediini yaabo?
18 Ediini yaawe yaaba nekwetengyesa kukora empindahinduka omu magara gaawe, teeraho kumanya oku abazaire baawe baraakireebe. Nikibaasa kubashemeza bwanyima y’okwega enyegyesa za Baibuli kandi okazigyenderaho, waatandika kubaha ekitiinisa, okaborobera, kandi okakora n’obweziriki ebi barikukushaba kukora. Kwonka, ediini yaawe ensya yaakureetera kwetantara emigyenzo ei barikukunda, nibabaasa kuteekateeka ngu oriyo nooyanga eky’obuhunguzi eki babaire nibateekateeka kukuha. Nibabaasa n’okutiina ngu torikwija kuba gye, na munonga eki orikukora omu kicweka kyanyu baingi baaba nibakireeba nk’ekitaine mugasho nari kyaba nikikuremesa kwemarira aha kukora ebi bo barikuteekateeka ngu nibiza kukuhwera kuba omutungi. Okwemanya nakwo nikubaasa kuba oburemeezi. Nibabaasa kuteekateeka ngu nootwara ebyabo nk’ebigwire.
19 N’ahabw’ekyo, ahonaaho teeraho kukora entebeekanisa kugira ngu abazaire baawe bagaaniireho na bamwe aha bareeberezi nari ab’eishe-emwe abakuzire omu by’omwoyo ab’omu kibiina kyanyu. Higa abazaire baawe kuza omu Kyombeko ky’Obukama kubaasa kwereebera ebirikwegyesibwa n’okweyongyera kwetegyereza Abajurizi ba Yehova. Haahinguraho obwire, abazaire baawe nibabaasa kuhindura aha miteekateekyere yaabo. N’obu abazaire baawe baakuba nibakuhakanisiza kimwe, barikutaagura n’ebitabo ebirikushoboorora ahari Baibuli kandi batarikwenda ngu oze omu nteerane z’Ekikristaayo, ebitabo nk’ebyo noobaasa kuguma noobishomera ahandi, noogaaniira n’Abakristaayo bagyenzi baawe kandi noobaasa n’okubuurira kitaraariire. Kandi oine n’okushaba Yehova. Eminyeeto abamwe nibategyereza kubanza baakura kubaasa kutuura bonka reero bakabona kugira obugabe kukora ebirikukira ahari ebyo. N’obu haakuba hariyo mbeera ki omuka, otakaayebwa ‘kutiina sho na nyoko.’ Teeraho kukora ebirikureeta obusingye omu ka yaanyu. (Abarooma 12:17, 18) Okukira byona, gira omukago murungi na Ruhanga.
OBUREMEEZI BW’OKWORORA ABAANA BA BARO NARI B’OMUKAZI WAAWE
20. Abaana nibabaasa kugira mitwarize ki baaba nibatuura na muka ishebo nari iba nyinabo?
20 Ekirikukira kureeta oburemeezi omu maka maingi ti by’ediini kureka n’eby’obuzaare. Amaka maingi obunaku obu nigaba garimu abaana abu omushaija nari omukazi yaazaire atakataahire omu bushwere obu arimu hati. Omu ka nk’egyo, abaana nibabaasa kugira eihari nari eitima. Ekirikurugamu, abaana nibabaasa kugaya muka ishebo nari iba nyinabo omu bi arikuteeraho kubakorera. Niki ekirikubaasa kuhwera eka nk’egyo kusingura?
21. N’obu embeera zaabo ziraabe ziri ez’omutaano, ahabw’enki muka ishe abaana nari iba nyina abaana aine kugyendera aha misingye eri omuri Baibuli?
21 N’obu embeera ziraabe ziri ez’omutaano, emisingye ya Baibuli erikubaasisa amaka agandi kusingura, neehwera n’omu ka ey’omuringo nk’ogwo. Okwehuzya emisingye egyo nikibaasa kureebeka nk’ekitaine nshonga kwonka nikiija kirugamu oburemeezi. (Zaaburi 127:1; Enfumu 29:15) Teeraho kugira obwengye oburaakuhwere kugyendera aha misingye ya Ruhanga erikurugamu ebirungi eby’obutwire kandi ogire n’okwetegyereza okuraakuhwere kumanya ahabw’enki ab’omu ka yaanyu barikugamba nari barikukora ebintu ebimwe. Kandi nabwe nikyetengyesa okugira embabazi.—Enfumu 16:21; 24:3; 1 Petero 3:8.
22. Ahabw’enki nikibaasa kugumira abaana kutuura na muka ishebo nari iba nyinabo?
22 Ku oraabe ori omu ka nk’egyo ijuka ngu nk’omunywani w’eka egyo abaana bakakwakiira. Kwonka ku waabaire muka ishebo nari iba nyinabo emiteekateekyere yaabo neebaasa kuba yaahindukire. Barikwijuka omuzaire waabo wenyini otakituura nabo, abaana nibabaasa kugira eihari obundi barikuteekateeka ngu nooyenda kubaremesa kukunda omuzaire waabo ogwo otakiri nabo. Obumwe, nibabaasa kukugambira butunu ngu tori nyina waabo nari ishe waabo. Ebigambo nk’ebyo nibisaasa. Kwonka, “otarahuka kugira ekiniga.” (Omubuurizi 7:9) Okwetegyereza n’embabazi nibyetengyesa kubaasa kuhwera abaana nk’abo.
23. Omu ka ei buri omwe aha bazaire aine abaana abe, abaana abo nibabaasa kuhanwa bata?
23 Emitwarize nk’egyo ni mikuru omu kuhana abaana. Okuhana abaana obutoosha ni kikuru. (Enfumu 6:20; 13:1) Kandi obu abaana batarikushushana omu mitwarize, oine kubahana omu miringo etarikushushana. Abazaire ab’omu maka nk’ago, nibagira ngu nikihwera omu kutandika, omuzaire orikuba naazaara abaana abo yaaba niwe yaabahana. Kwonka nikiba kiri kikuru abazaire bombi kwikirizana aha muringo ogu baarahanemu abaana baabo boona hamwe batarikushoroora. (Enfumu 24:23) Ni kikuru abaana kworobera abazaire baabo, kwonka abazaire baine kwijuka ngu abaana tibahikiirire. Otakabagambira kubi beitu bahane omu muringo gwa rukundo.—Abakolosai 3:21.
24. Niki ekirikubaasa kurinda eka ei buri omwe aha bazaire aine abaana abe aboojo n’abaishiki kutabamu emicwe mibi?
24 Okugaaniira aha nshonga ezo nk’eka nikubaasa kuhezaho oburemeezi. Okugaaniira nk’okwo nikubaasa kuhwera eka kuguma neeyebembeza ebintu ebikuru omu magara. (Gyeragyeranisa Abafilipi 1:9-11.) Kandi nikubaasa n’okuhwera buri omwe kureeba eki arikubaasa kukora kuhikiiriza ebigyendererwa by’eka. Kandi okugaaniira nk’okwo, nikubaasa kurinda eka kutabamu emicwe mibi. Abaishiki baine kumanya oku baine kujwara n’oku baine kutwaza bari na iba nyinabo na banyaanyabo ba muka ishebo, n’aboojo baine kuheebwa obuhabuzi aha ku baine kutwaza baaba bari na muka ishebo na banyaanyabo ba muka ishebo.—1 Abatesalonika 4:3-8.
25. Ni mitwarize ki erikubaasa kukuhwera kurinda obusingye omu ka ei ori muka ishe abaana nari iba nyinabo?
25 Okubaasa kusingura oburemeezi bw’okworora abaana abu ori muka ishebo nari iba nyinabo oine kugira okugumisiriza. Nikitwara obwire okugira omukago nabo. Ti kintu kyorobi okureetera abaana abu otari muzaire waabo wenyine kukukunda nari kukuha ekitiinisa. Kwonka nikibaasika. Okugira omutima gw’obwengye n’okwetegyereza hamwe n’okugira ekyetengo ky’okushemeza Yehova, ni bikuru omu kureeta obusingye omu ka erimu omushaija n’omukazi we buri omwe oine abaana abe. (Enfumu 16:20) Emitwarize nk’egyo neebaasa n’okukuhwera kusingura n’omu mbeera ezindi.
OKUSHERURA EBY’OBUTUNGI KUBAGANIISEMU EKA YAANYU?
26. Ni mu miringo ki ei oburemeezi n’okusherura eby’obutungi birikubaasa kubaganisamu eka?
26 Oburemeezi hamwe n’okusherura eby’obutungi nibibaasa kubaganisamu eka omu miringo mingi. Eky’obusaasi, amaka agamwe nigabaganisibwamu entongane z’eby’empiiha n’okwenda kweyongyera kuba abatungi. Okwebaganisamu nikubaasa kubaho omushaija n’omukazi bombi baaba nibakora kandi ‘buri omwe akenda ngu empiiha ze zimuhwere wenka.’ Nangwa n’obu haakuba hatabaireho ntongane, omushaija n’omukazi bombi baaba nibakora nibabaasa kutatunga bwire bw’okuba kumwe oburikumara. Omu nsi, abashaija baingi batandikire kutuura hare n’amaka gaabo kumara ameezi nari emyaka kubaasa kukora bakatunga empiiha nyingi kukira aha zi barikubaasa kutunga barikukorera haihi n’amaka gaaba. Ekyo nikibaasa kurugamu oburemeezi bw’amaani.
27. Ni misingye ki emwe erikubaasa kuhwera eka eine oburemeezi bw’eby’empiiha?
27 Tihariho biragiro ebirikubaasa kuteebwaho omu kushoboorora embeera ezi, obu amaka gaine oburemeezi n’ebyetengo bitarikushushana. Kwonka, obuhabuzi bwa Baibuli nibubaasa kuhwera. Nk’eky’okureeberaho, Enfumu 13:10 nihooreka ngu oburemeezi nibubaasa kwetantarwa omuntu ‘yaikiriza kuhaburwa.’ Ekyo tikirikutwariramu okugamba eki orikuteekateeka kwonka, beitu n’okusherura obuhabuzi kandi okamanya n’eki mugyenzi waawe arikukiteekateekaho. Kandi okubariirira entaasya hamwe n’enshohoza nikibaasa kuhwera eka kukwatanisa. Obumwe nikibaasa kwetengyesa omushaija n’omukazi we kukora emirimo aheeru y’eka kumara obwire bukye ahabw’enshohoza endiijo ebaireho na munonga baaba baine abaana nari abandi abu baine kureeberera. Omu mbeera nk’egyo, omushaija naabaasa kworeka omukazi we ngu akimwiniire obwire. Omushaija n’abaana nibabaasa kuhwera omu kukora emirimo ei omukazi obumwe abaire naakora wenka.—Abafilipi 2:1-4.
28. Ni buhabuzi ki oburikubaasa kuhwera eka kugira okukwatanisa?
28 Kwonka, guma noijuka ngu n’obu obunaku obu empiiha ziraabe nizetengwa, tizirikureeta kushemererwa. Kandi tizirikuha abantu amagara aga buzima. (Omubuurizi 7:12) Buzima, okwemarira aha kusherura eby’obutungi nikubaasa kureetera omuntu kugaruka enyima omu by’omwoyo n’omu micwe. (1 Timoseo 6:9-12) Ka ni kikuru kubanza kusherura Obukama bwa Ruhanga n’okuhikiirira kwe, twine amatsiko g’okutunga emigisha ye hamwe n’okutunga ebi turikwetenga omu magara! (Matayo 6:25-33; Abaheburaayo 13:5) Waayebembeza eby’omwoyo kandi okagira omukago murungi na Ruhanga, eka yaawe n’obu yaakuba ebaganisiibwemu embeera ezindi, neija kuba nekwatanisa omu nshonga nkuru.
EMISINGYE YA BAIBULI EGI NEEBAASA KUHWERA ETA . . . AB’EKA EMWE KURINDA OBUSINGYE?
Abakristaayo muteereho kugira omutwarize gw’okwetegyereza.—Enfumu 16:21; 24:3.
Abashweraine okubaasa kuhaana ekitiinisa n’okworekana rukundo tikirikurugiirira aha kuba omu diini emwe.—Abaefeso 5:23, 25.
Omukristaayo tashemereire kuhenda ebiragiro bya Ruhanga nkana.—Ebyakozirwe 5:29.
Abakristaayo nibateeraho kureeta obusingye.—Abarooma 12:18.
Otarirahuka kugira ekiniga.—Omubuurizi 7:9.
[Akabokisi aha rupapura 139]
OBUSHWERE OBUHIKIRE NIBUREETA EKITINIISA N’OBUSINGYE
Omu bunaku obu abashaija n’abakazi baingi nibatuura hamwe nk’abari omu bushwere kwonka obutarikwikirizibwa omu biragiro. Obumwe noobaasa kushanga ngu omuntu orikwega Baibuli niwe ari omu mbeera nk’egi. Obumwe abamwe nibaba baikiriziibwe ab’ekika, kwonka obushwere bwabo nibuba butarikwikirizibwa omu biragiro. Emitindo ya Baibuli, neyetengyesa ngu omuntu abe ari omu bushwere oburikwikirizibwa omu biragiro. (Tito 3:1; Abaheburaayo 13:4) Aha bantu abari omu kibiina Ekikristaayo, Baibuli neeragiira ngu omushaija ashemereire kuba aine omukazi omwe. (1 Abakorinso; 7:2; 1 Timoseo 3:2, 12) Okuhikaana n’omutindo ogu, nikiija kukubaasisa kugira obusingye omu ka yaawe. (Zaaburi 119:165) Ebi Yehova arikutwenza n’ebirikwesigwa kandi tibigumire kworobera. Ebi arikutwegyesa n’eby’okutugasira.—Isaaya 48:17, 18.
[Ekishushani ekiri aha rupapura 130]
Teeraho kwetegyereza emiteekateekyere ya mugyenzi waawe
[Ekishushani ekiri aha rupapura 138]
Yaaba ori omuzaire w’abaana wenyine nari ori muka ishebo nari iba nyinabo, yesigye obuhabuzi bwa Baibuli