Ekicweka 4
Ruhanga Naatumanyisa Ebigyendererwa Bye
1, 2. Nitumanya tuta ngu Ruhanga naagarukamu abantu ab’emitima mirungi abarikubuuza?
RUHANGA oine rukundo buzima naamanyisa abantu ab’emitima mirungi kandi abarikumusherura ebigyendererwa bye. Ruhanga naaha eby’okugarukamu abantu abarikwebuuza ebibuuzo nka, ahabw’enki akirekireho okubonabona?
2 Baibuli neegira eti: “Ku orimusherura [Ruhanga], oryamubona.” “Hariho Ruhanga omu iguru, [O]shuuruura ebitarikumanywa.” “Mukama RUHANGA takora kintu kyona atabandize kukishuuruurira bairu be baanabi.”—1 Obusingye 28:9; Danieli 2:28; Amosi 3:7.
Eby’Okugarukamu Nibishangwa Hi?
3. N’enki ekirikubaasa kutumanyisa enshonga ahabw’enki Ruhanga arekireho okubonabona?
3 Eby’okugarukamu by’ebibuuzo nka, ahabw’enki Ruhanga naareka okubonabona kubaho n’eki arikwija kukukorera nibishangwa omu kitabo eki yaahandiikiise okutugasira. Ekitabo ekyo n’Ekigambo kye, Baibuli Erikwera. “Ebyahandiikirwe byona, ebihandiikisiibwe omwoyo wa Ruhanga, biine omugasho gw’okwegyesa omuntu, n’okumuhana, n’okumuhabura, n’okumutendeka omu by’okuhikiirira, ngu omuntu wa Ruhanga abone kuba ohikire buzima, oine byona ebishemereire omurimo gwona omurungi.”—2 Timoseo 3:16, 17.
4, 5. N’enki ekirikureetera Baibuli kuba ekitabo ky’omutaano?
4 Buzima Baibuli n’ekitabo ky’omutaano. Ebigihandiikirwemu ebirikukwata aha muntu nibyo birikukirayo kuba ebihikire kandi neegamba n’aha byabaireho omuntu atakahangirwe. Ekindi, neehikaana n’obwire bwaitu, ahakuba obunabi bwayo nibukwata aha birikubaho omu bwire obu hamwe n’aha biri haihi kubaho.
5 Tihariho kitabo ekindi ekirimu ebyabaireho ebihikire ekiri nka Baibuli. Nk’eky’okureeberaho, ebihandiiko bikye eby’abahandiiki aba ira nibyo bikiriho. Kwonka ebihandiiko bingi, ebimwe omu bucweka, ebindi omu bwijwire, ebya Baibuli bikiriho: ebihandiiko nka 6,000 aha Byahandiikirwe eby’Oruheburaayo (ebitabo 39 ‘eby’Endagaano eya Ira’) hamwe na 13,000 aha Byahandiikirwe eby’Orugriika eby’Ekikristaayo ebirikuhika nka (ebitabo 27 ‘eby’Endagaano Ensya’).
6. Ahabw’enki nitubaasa kugira obwesigye ngu ebiri omu Baibuli ey’omu bunaku obu bikiri nk’oku byabaire biri obu Ruhanga yaabihandiikisa?
6 Ruhanga ow’Obushoboorozi bwona, owaahandiikiise Baibuli, akahamya ngu amazima gaayo gaarindwa gye omu bihandiiko ebyo. N’ahabw’ekyo, ebiri omu Baibuli ey’omu bunaku obu nikyo kimwe n’ebyahandiikirwe ebi Ruhanga yaahandiikiise ebyabandize. Ekindi ekirikutuhwera kwetegyereza eki n’okugira ngu Ebihandiiko ebimwe ebyakoporoirwe aha Byahandiikirwe by’Ekikristaayo eby’Orugriika nibigaruka enyima nk’emyaka igana okuruga omu bwire obu byahandiikirwe. Bikye ebyakoporoirwe aha bihandiiko by’abahandiiki ba ira abaabaire batari banyadiini ebikiriho hati tibimazire byasha bingi eby’emyaka okuruga aha bahandiiki abaabandize okubihandiika.
Ekiconco kya Ruhanga
7. Baibuli ejanjaire kwingana ki?
7 Omu byafaayo by’omuntu, Baibuli nikyo kitabo ekikizireyo kujanjaazibwa. Baibuli nk’obuhumbi bushatu nizo zaateirwe. Tihariho kindi kitabo ekirikwehanga omubaro ogu. Kandi Baibuli nari ebicweka byayo bihindwirwe omu ndimi ezindi ezirikuhika 2,250. N’ahabw’ekyo, nikiteeberezibwa ngu ebicweka ebirikurenga 90 ahari 100 eby’abantu abari omu nsi egi nibabaasa kuba baine Baibuli.
8-10. Ni nshonga ki zimwe ezishemereire kutureetera kushwijuma Baibuli?
8 Ekitabo ekirikwegambaho kuba nikiruga ahari Ruhanga kandi ekiine obuhame bwona obwakyo n’obw’ebindi bitabo buzima kishemereire kushwijumwa.a Nikishoborora ekigyendererwa ky’amagara, ebirikubaho omu nsi eki birikumanyisa, hamwe n’ebiraije kubaho omu maisho. Tihariho kitabo ekindi kyona ekirikubaasa kushoboorora ebintu ebyo nka Baibuli.
9 Buzima, Baibuli niyo Ruhanga arikurabiramu kugamba n’abantu. Akakoresa abashaija 40 kuhandika Baibuli arikubahwera n’amaani ge nari shi omwoyo gwe. N’ahabw’ekyo, Ruhanga naagamba naitwe kurabira omu Kigambo kye, Baibuli Erikwera. Entumwa Paulo akahandiika ati: “Ku mwahuriire ekigambo ky’engiri ya Ruhanga eki twabagambiire, mwakyakiira; kandi timwakyakiira nk’ekigambo ky’abantu, kureka nk’ekigambo kya Ruhanga.”—1 Abatesalonika 2:13.
10 Omwebembezi w’eihanga rya Amerika owa 16, orikwetwa Abraham Lincoln, akeeta Baibuli “ekiconco ekirikukirayo oburungi eki Ruhanga arahaire omuntu . . . Kuri etariho, titwakumanyire ekibi n’ekirungi.” Mbwenu hati, ekiconco eki ekirungi munonga nikigamba ki aha ku okubonabona kwatandikire, enshonga ahabw’enki Ruhanga akirekireho okubonabona, hamwe n’eki arikwija kukukorera?
[Ebigambo aha Kanyonyoozi]
a Okubaasa kumanya ebirikukiraho ebirikworeka ngu Baibuli ehikire, reeba akatabo, The Bible—God’s Word or Man’s?, akaateirwe Abajurizi ba Yehova omu gwa 1989.
[Ekishushani ekiri aha rupapura 10]
Baibuli ekahandiikisibwa Ruhanga, kandi nigwo muhanda ogu Ruhanga arikurabiramu kugamba n’abantu