Ekicweka 10
Ensi Ensya Enungi Ei Ruhanga Arikutebeekanisa
1, 2. N’enki ekiribaho bwanyima y’orugamba rwa Haramagedoni?
BWANYIMA ya Haramagedoni, orugamba rwa Ruhanga, n’enki ekiribaho? Ensi ensya enungi eryatandika. Ahabw’okugira ngu abarihonokaho ahari Haramagedoni baryaba baaherize kworeka ngu n’abeesigwa aha butegyeki bwa Ruhanga, baryataaha omu nsi ensya. Obwo ka nibwija kuba obwire burungi burikushemeza omu byafaayo by’omuntu obu emigisha kuruga ahari Ruhanga eritandika kuhika aha bantu!
2 Ahansi y’obwebembezi bw’Obukama bwa Ruhanga, abarihonokaho baryatandika kuhindura ensi paradiso. Baryakora emirimo erigasira boona abariba bariho. Ensi eryatandika kuhindurwa nungi munonga, ey’obusingye kandi omwanya murungi gw’okutuurwamu abantu.
Okuhikiirira Okuza omu Mwanya gw’Obubi
3. Bwanyima ya Haramagedoni, ni kuruhuuka ki oku abantu baritunga?
3 Okucwekyerezibwa kw’ensi ya Sitaane kuryabaasisa ebi byona kubaho. Tiharigaruka kubaho ediini z’ebishuba, entebeekanisa z’abantu hamwe na zaagavumenti ebirikubaganisamu abantu. Sitaane tarigaruka kubuzabuza abantu; byona ebi arikukoresa kubeiha nibiija kucwekyerera hamwe n’obusingye bwe. Teekateeka ahari eki: byona eby’akabi ebi Sitaane yaareetsireho bitakiriho! Ka nihaija kubaho okuruhuuka!
4. Shoboorora empindahinduka eribaho omu birikwegyesibwa.
4 Enyegyesa nungi erikwombeka erikuruga ahari Ruhanga neija kuza omu mwanya gw’ebiteekateeko bibi eby’abantu abarikutegyeka. “Batabani baawe boona baryayegyesibwa [Yehova].” (Isaaya 54:13) Ahabw’okwegyesa kurungi oku okuribaho buri mwaka, “okumanya [Yehova] kuryabuga ensi yoona, nk’oku amaizi gabuga hoona omu nyanja.” (Isaaya 11:9) Abantu tibarigaruka kwega kukora bibi, kureka ‘okuhikiirira nikwo abariba batwire omuri egyo nsi nungi baryega.’ (Isaaya 26:9, NW) Ebikorwa n’ebigambo ebirikwombeka biryaba ebintu bya buri izooba.—Ebyakozirwe 17:31; Abafilipi 4:8.
5. N’enki ekirihika aha bikorwa bibi hamwe n’abantu ababi boona?
5 N’ahabw’ekyo, tiharigaruka kubaho obwitsi, obushaarizi, okuhamba, obushuma nari ekindi kikorwa kyona eky’obugomi. Tihaine origaruka kubonabona ahabw’ebikorwa bibi by’abandi. Enfumu 10:30 nihagira hati: “Ohikiriire tarihwaho na kakye, kwonka omubi tariguma mu nsi.”
Amagara Agahikiriire Kugarurwaho
6, 7. (a) N’enki eki obutegyeki bw’Obukama buraije kumaraho? (b) Yesu akooreka ata eki obu yaabaire ari omu nsi?
6 Omu nsi ensya, ebibi byona ebyareetsirweho obugomi biryarugaho. Nk’eky’okureeberaho, obutegyeki bw’Obukama nibwija kumaraho endwara na bukuru. Omu bunaku obu, n’obu waakuba oine amagara marungi, amazima gari ngu ku orikugyenda nookaikura, oba otakihweza gye, amaino gaawe gajunda, oba otakihurira gye, ogira emifunya aha mubiri, ebicweka byawe eby’omunda nibihwa amaani, aha muheru ofa.
7 Kwonka ebintu ebyo ebibi, ebi twahungwire aha bazaire baitu ab’okubanza omu biro bitari bya hare nibiija kuba bitakiriho. Noijuka eki Yesu yaayorekire aha bikwatiraine n’amagara obu yaabaire akiri omu nsi? Baibuli neegira eti: ‘Emitwe y’abantu baingi baamushangayo, bamureeteire ebirema n’empumi n’ebiteta n’ebimuga n’abandi baingi, baabata aha bigyere bye, yaabatambira; n’ahabw’ekyo abantu baatangaara, ku baareebire ebiteta nibigamba, ebimuga nibikira, ebirema nibigyenda, n’empumi nizireeba.’—Matayo 15:30, 31.
8, 9. Gamba aha kushemererwa okuraije kuba omu nsi ensya obu turiba twine amagara agahikiriire.
8 Ka nihaija kubaho okushemererwa kwingi omu nsi ensya obu ebibi byona biriba byahweireho! Okubonabona okurikureetwa amagara mabi tikurigaruka kutunyangaraza. “Tihaine mutuuzi waayo origira ati: Ndwaire.” “Obwo amaisho g’empumi garyahumuurwa, n’amatu g’ebifa-matu gaaryaigurwa; ekirema kiryaguruka nk’empara, n’orurimi rw’ekiteta rweshongore ahabw’okushemererwa.”—Isaaya 33:24; 35:5, 6.
9 Tikirikwija kuba nikishemeza buri kasheeshe okwimuka oine amagara marungi buzima? Tikirikwija kuba nikishemeza abakaikwire okumanya ngu bagaruriirwe amagara g’obunyeeto kandi ngu nibaija kuba abahikiriire nk’oku Adamu na Haawa baabaire bari omu kubanza? Eki Baibuli erikuraganisa n’eki: “Omubiri gwe gugarukye gube muto nk’ogw’omwana, agire amaani nk’agu yaabaire aine omu butsigazi bwe.” (Yobu 33:25) Ka nikiija kuba nikishemeza okunaga ebirahure by’amaisho, ebirikukoresibwa kuhurira, ebihimbo, obugaari bw’abarema, hamwe n’emibazi! Amarwariro, abashaho ab’amaino hamwe n’abandi bashaho boona nibaija kuba batakyetengwa.
10. N’enki ekirihika ahari rufu?
10 Abantu abariba baine amagara marungi nk’ago baryaba batarikwenda kufa. Kandi kwo tibarifa, ahakuba okutahikiirira n’okufa nibiija kuba bitakiibaineho bushoboorozi. Kristo “ashemereire kutegyeka okuhitsya obu arita abazigu be boona ahansi y’ebigyere bye. Omuzigu orihererukayo kwihwaho ni rufu.” “Ekiconco kya Ruhanga n’amagara agatahwaho.”—1 Abakorinso 15:25, 26; Abarooma 6:23; reeba na Isaaya 25:8.
11. Ekitabo kya Okushuuruurwa nikigamba kita aha birungi ebiriba omu nsi ensya?
11 Kirikugamba aha migisha ei Ruhanga araije kuha abantu omuri Paradiso, ekitabo ekirikuhererukayo omuri Baibuli nikigira kiti: “[Ruhanga] aryaragaza amarira goona aha maisho gaabo; tiharibaho kufa bundi n’obu kwakuba okucura nari okurira nari obusaasi, ahakuba ebya ira biryaba bihweireho.”—Okushuuruurwa 21:3, 4.
Abaafiire Baryazooka
12. Yesu akooreka ata amaani ge ag’okuzoora abafu agu Ruhanga yaamuhaire?
12 Yesu tarakirize barwaire kandi akatambira ebimuga kwonka. Akazoora n’abafiire kuruga omu bituuro. Omu muringo ogwo akooreka amaani g’omutaano ag’okuzoora abafu agu Ruhanga yaamuhaire. Noijuka obu Yesu yaija omu nju y’omushaija owaabaire afeereirwe omuhara? Yesu akagambira omwishiki ogwo owaabaire afiire ati: “Mwishiki ’we, ninkugambira nti: Imuka.” N’enki ekyabaireho? “Ahonaaho omwishiki ogwo akaimuka, yaagyenda.” Abantu ku baareebire eki, “baagira okutangaara kwingi munonga.” Ka baagizire amashemererwa maingi munonga!—Mako 5:41, 42; reeba na Luka 7:11-16; Yohaana 11:1-45.
13. Ni bantu ba muringo ki abarikwija kuzoorwa?
13 Omu nsi ensya, “haryabaho okuzooka kw’abahikiriire n’abatahikiriire.” (Ebyakozirwe 24:15) Omu bwire obwo Yesu naija kukoresa amaani g’okuzoora abafiire agu yaahairwe Ruhanga ahakuba akagira ati: “Niinye kuzooka n’amagara; orikunyikiriza n’obu yaakufa, aryaba ohuriire.” (Yohaana 11:25) Kandi akagira ati: ‘Abari omu bituuro boona [abu Ruhanga arikwijuka] baryahurira eiraka rya Yesu, barugemu.’—Yohaana 5:28, 29.
14. Ahabw’okugira ngu okufa nikwija kuba kutakiriho, ni bintu ki ebiraije kuhwaho?
14 Okushemererwa omu nsi yoona ka nikwija kuba kwingi munonga bwanyima y’abantu abaafiire kuzooka bakagaruka bakaba n’abakundwa baabo! Tiharibaho okugaruka kushoma omu mpapura z’amakuru aha bafiire, ekintu ekirikureetera abarikuba batsigaireho enaku. Kureka, nihaija kubaho ebirango by’abantu abazoirwe ebirireetera abakundwa baabo okushemererwa. N’ahabw’ekyo tiharigaruka kubaho kuziika, amarimbo nari emyanya ei barikwokyezaho emitumbi!
Ensi ey’Obusingye Buzima
15. Obunabi bwa Miika nibwija kuhikiirira buta omu bwijwire?
15 Haryabaho obusingye obwa buzima omu bintu byona. Entaro, abarikuzireeta, n’okukora eby’okurwanisa biryaba bitakiriho. Ahabw’enki? N’ahabw’okuba ebirikubaganisamu abantu omu mahanga, omu nganda, n’omu rangi biryahwaho. Obwo, omu bwijwire, “eihanga tiriribangira rindi rurara, kandi tibarigaruka kwega by’engamba.”—Miika 4:3.
16. Ruhanga naija kuhamya ata ngu entaro tizagaruka kubaho?
16 Eki nikibaasa kureebeka nk’ekirikutangaaza ahabw’okugira ngu hatwire hariho okusheesha eshagama okurikureetwa entaro zitahweire. Kwonka ekyo kitwire nikibaho ahabw’okugira ngu abantu bari ahansi y’obutegyeki bw’abantu n’obwa baadaimoni. Omu nsi ensya, ahansi y’Obutegyeki bw’Obukama, eki nikyo kiribaho: “Mwije mureebe emirimo ya MUKAMA. . . Amaraho engamba okuhika aha muheru gw’ensi; ahenda amata, amacumu agatemamu kabiri; n’ebigaari [by’orugamba] abyotsya n’omuriro.”—Zaaburi 46:8, 9.
17, 18. Omu nsi ensya, n’enki ekiribaho ahagati y’abantu n’enyamaishwa?
17 Haryabaho obusingye ahagati y’abantu n’enyamaishwa nk’oku kyabaire kiri omuri Edeni. (Okutandika 1:28; 2:19) Ruhanga naagira ati: “Eryo izooba ndyabaragaanira endagaano n’enyamaishwa z’omu ishwa n’amahungu g’omu mwanya kandi n’ebirikwekurura ahansi, kandi . . . mbareetere kubyama baine oburinzi.”—Hosea 2:18, NW.
18 Obusingye obwo buryagarukira nkahi? ‘Omushega guryataaha n’omwana gw’entaama, n’engwe eryabyama n’omwana gw’embuzi, enyana n’entare n’enimi y’ekimasha ekigomokire biryaguma hamwe, kandi omwana muto niwe aribifunya.’ Enyamaishwa tizirigaruka kutiinisa bantu nari zo okutiina ngyenzi zaazo. Kandi “entare eryarya obunyaatsi nk’ente.”—Isaaya 11:6-9; 65:25.
Ensi Ehindwirwe Paradiso
19. Ensi neija kuhindurwa ki?
19 Ensi yoona eryahindurwa omwanya murungi munonga gw’okutuurwamu abantu. Egi niyo nshonga ahabw’enki Yesu yaaraganiise omushaija owamwikiriize ati: ‘Noija kuba naanye omuri Paradiso.’ Baibuli neegira eti: “Eihamba n’ensi eyomire biryashemererwa, eihamba ry’omusheenyi riryashemererwa, rirabye ebirabyo nk’esheko y’ensi. . . . Ahabw’okuba amaizi garyafumuka omu ihamba n’emigyera omu ihamba ry’omusheenyi.”—Luka 23:43; Isaaya 35:1, 6.
20. Ahabw’enki enjara etarigaruka kuteganisa abantu?
20 Ahansi y’Obukama bwa Ruhanga, enjara terigaruka kuteganisa obukaikuru bw’abantu. “Haryabaho omweru mwingi omu nsi, emyaka eryakondakonda omu misiri omu bibungo.” ‘Ebiti by’omu ishwa biryayera ebijuma byabyo, n’eitaka ryeze emyaka yaaryo; bagume omu nsi yaabo bari buhooro.’—Zaaburi 72:16; Ezekieli 34:27.
21. N’enki ekirihika aha ibura ry’oburaaro, obuju bubi, n’abataahi babi?
21 Tiharigaruka kubaho abataine buraaro, obuju bubi, nari abataahi babi. “Baryayombeka amaju bagatuuremu; baryabyara emizaabibu, barye ebijuma byayo. Tibaryombeka maju, abandi bakagataahamu; tibaribyara mizaabibu, ekariibwa abandi.” “Buri muntu aryashutama ahansi y’omuzaabibu gwe n’ahansi y’omutiini gwe, kandi tihaine oribakangisa.”—Isaaya 65:21, 22; Miika 4:4.
22. Baibuli neeshoboorora eta aha migisha y’obutegyeki bwa Ruhanga?
22 Abantu nibaija kutunga ebintu ebi byona, hamwe n’ebindi bingi omuri Paradiso. Zaaburi 145:16 nihagira hati: “[Ruhanga] oshashaanura engaro zaawe, ohaazya ekintu kyona ekihuriire ebi kirikwetenga.” Nikyo obunabi bwa Baibuli burikugirira buti: “Abacureezi baryahungura ensi, beesiime ahabw’okugira obusingye bwingi. . . . Abahikiriire baryahungura ensi, bagituuremu ebiro byona.”—Zaaburi 37:11, 29.
Okuhezaho Ebya Ira
23. Obukama bwa Ruhanga nibwija kumaraho buta okubonabona kwona oku turabiremu?
23 Obutegyeki bw’Obukama bwa Ruhanga nibwija kuhezaho obubi bwona obuhikire aha bantu okumara emyaka enkumi mukaaga ehingwire. Okushemererwa okuribaho omu bwire obwo nikwija kukirira kimwe okubonabona oku abantu barabiremu. Abantu tibariteganisibwa biteekateeko bibi eby’okubonabona oku barabiremu. Ebiteekateeko ebirikwombeka n’emirimo mirungi ebiriba biriho buri izooba mporampora nibiija kubeebesa okubonabona kwona okw’enyima.
24, 25. (a) N’enki eki nabi Isaaya yaarangire ngu kiryabaho? (b) Ahabw’enki nitubaasa kugira obwesigye ngu tituriguma nitwijuka okubonabona oku twarabiremu?
24 Ruhanga orikutufaho naagira ati: ‘Nimpanga eiguru [gavumenti y’omu iguru ensya erikutegyeka abantu] risya n’ensi nsya [abantu abahikiriire]; ebya ira tibiriijukwa, n’obu kwakuba okuteebwaho omutima. Kwonka mushemererwe, munanukye ebiro byona ahabw’eki eki ndikuhanga.’ “Ensi yoona ehuumwire, etuurize; abantu nibateera akaari nibeeshongora.”—Isaaya 14:7; 65:17, 18.
25 N’ahabw’ekyo, arikukoresa Obukama bwe, Ruhanga naija kwihiraho kimwe emituurire mibi etwireho okumara emyaka mingi. Ebiro byona, naija kworeka ngu naatufaho arikutuha emigisha erikirira kimwe okubonabona kwona oku turiba turabiremu enyima. Oburemeezi obw’enyima obu turiba turabiremu tituriguma nitubwijuka.
26. Ahabw’enki Ruhanga araije kutushumbuusha ahabw’okubonabona kwona oku turaije kuba turabiremu?
26 Okwo nikwo Ruhanga aritushumbuusha ahabw’okubonabona oku twakuba twarabiremu omu nsi egi. Naamanya ngu ekaba etari nshobe yaitu okuzaarwa tutahikiriire, ahakuba tukahungura okutahikiirira aha bazaire baitu abaabandize. Ti nshobe yaitu okuzaarirwa omu nsi ya Sitaane egi, ahakuba kuri Adamu na Haawa baagumire bari abeesigwa, tukaabaire twazaariirwe omuri paradiso. N’ahabw’ekyo, ahabw’embabazi ze nyingi, Ruhanga naija kutushumbuusha ahabw’ebibi ebyatuhikireho.
27. Ni bunabi ki oburaije kuhikiiririra kimwe omu nsi ensya?
27 Omu nsi ensya, abantu nibaija kugira obusingye oburikugambwaho omu Abarooma 8:21, 22: “Ebihangirwe ebyo nabyo biryacungurwa, birekye kuba eby’okujunda, kureka biheebwe obusingye bw’abaana ba Ruhanga obw’ekitiinisa. Nitumanya ngu ebihangirwe byona bituura nibitsinda, nibisaasira hamwe n’okuhitsya hati.” Abantu obwo baryareeba okuhikiiririra kimwe kw’ebiri omu shaara egi: “Obukama bwawe bwije; eby’okunda bikorwe omu nsi nk’oku bikorwa omu iguru.” (Matayo 6:10) Embeera nungi eriba eri omu Paradiso omu nsi neija kuba neeyoreka eri omu iguru.
[Ekishushani ekiri aha rupapura 23]
Omu nsi ensya, abakaikwire baryagaruka bagire amaani g’obunyeeto
[Ekishushani ekiri aha rupapura 24]
Endwara zoona n’obumuga bwona biryahwaho omu nsi ensya
[Ekishushani ekiri aha rupapura 25]
Omu nsi ensya, abafiire baryazoorwa bagire amagara
[Ekishushani ekiri aha rupapura 26]
‘Tibarigaruka kwega by’engamba’
[Ekishushani ekiri aha rupapura 27]
Haryabaho obusingye obwa buzima ahagati y’abantu n’enyamaishwa omuri Paradiso
[Ekishushani ekiri aha rupapura 27]
‘Ruhanga aryashashaanura engaro ze ahaazye ekintu kyona ekihuriire ebi kirikwetenga’
[Ekishushani ekiri aha rupapura 28]
Obukama bwa Ruhanga nibwija kutushumbuusha ahabw’okubonabona kwona oku turiba tugumisiririize