Noobaasa Kuba Ota Munywani Wa Ruhanga?

1, 2. Gamba bamwe aha bantu abaabaire bari banywani ba Yehova.

N’OHA ou orikwenda ngu abe munywani waawe? N’omuntu ou orikwetegyereza kandi nawe arikukwetegyereza. Omuntu oine emitwarize ei orikukunda.

² Yehova naatoorana abantu abamwe kuba banywani be. Nk’eky’okureeberaho, Abrahamu akaba ari omwe ahari banywani ba Yehova. (Isaaya 41:8; Yakobo 2:23) Yehova akaba naakunda na Daudi. Akagira ngu Daudi akaba ari ‘omushaija ou omutima gwe gurikwenda.’ (Ebyakozirwe 13:22) Kandi Yehova akaba ‘naakunda munonga’ nabi Danieli.—Danieli 9:23.

3. Ahabw’enki Abrahamu, Daudi na Danieli baabaire banywani ba Yehova?

³ Ahabw’enki Abrahamu, Daudi na Danieli baabaire bari banywani ba Yehova? Yehova akagambira Abrahamu ati: “Oyorobeire eiraka ryangye.” (Okutandika 22:18) Yehova naaba munywani w’abo abarikumworobera. Nangwa n’Abaisraeli bakabaasa kuba banywani be. Yehova akagambira Abaisraeli ati: “Mworobere eiraka ryangye, naanye ndyaba Ruhanga waanyu, naimwe mube abantu bangye.” (Yeremia 7:23) N’ahabw’ekyo, naiwe oine kworobera Yehova waaba nooyenda kuba munywani we.

YEHOVA NAARINDA BANYWANI BE

4, 5. Yehova naarinda ata banywani be?

⁴ Yehova naayoreka ku aine ‘amaani g’okuhwera abaine emitima eshugaine ahariwe.’ (2 Obusingye 16:9) Omuri Zaaburi 32:8, Yehova naaraganisa banywani be ati: “Ndyakwegyesa, nkuhabure omuhanda ogu oritoora; ndyakuha obwengye, nkutaireho eriisho.”

⁵ Omuzigu w’amaani naayenda kuturemesa kuba banywani ba Ruhanga. Kwonka Yehova naayenda kuturinda. (Shoma Zaaburi 55:22.) Nituheereza Yehova n’omutima gwaitu gwona ahakuba turi banywani be. Nituguma turi abeesigwa kandi tumuhamiireho n’omu mbeera zigumire munonga. Kandi twine emiteekateekyere nk’ey’omuhandiiki wa zaaburi owaagizire ati: “Mukama niwe ntaho amaisho obutoosha; tinditengyetsibwa, ahakuba ari aha rubaju rwangye rwa buryo.” (Zaaburi 16:8; 63:8) Sitaane naateeraho ata kuturemesa kuba banywani ba Ruhanga?

SITAANE NAABEIHERERA ABANTU

6. Sitaane naagira ngu abantu nibaheereza Ruhanga ahabwa nshonga ki?

⁶ Omu Shuura ya 11 twegire oku Sitaane yaahakaniise Yehova kandi akagira ngu n’omubeihi ahabw’okutaikiriza Adamu na Haawa kweteeraho omutindo gw’ekibi n’ekirungi. Ekitabo kya Yobu nikyoreka ngu Sitaane naabeiherera n’abantu abarikwenda kuba banywani ba Ruhanga. Sitaane naagira ngu abantu nibaheereza Ruhanga ahabw’ebirungi ebi arikubaha beitu kutari ahabw’okumukunda. Sitaane naagira ngu naabaasa kuremesa buri omwe kuheereza Ruhanga. Ka tureebe eki turikubaasa kwega ahari Yobu n’oku Yehova yaamurinzire.

7, 8. (a) Yehova akaba naatwara ata Yobu? (b) Sitaane akagamba ki ahari Yobu?

⁷ Yobu akaba ari omushaija murungi owaabaire ariho emyaka nka 3,600 enyima. Yehova akagira ngu obwire obwo tihaine mushaija owaabaire ari nkawe omu nsi. Yobu akaba naaha Ruhanga ekitiinisa kandi arikwetantara ekibi. (Yobu 1:8) Buzima, Yobu akaba ari munywani wa Yehova owaabuzima.

⁸ Sitaane akagira ngu Yobu akaba naaheereza Yehova ahabw’okweyendeza. Sitaane akagambira Yehova ati: “Tiiwe omurinda embaju zoona, we n’enju ye n’ebi atungire byona? Okaha omugisha ebi yaakozire n’emikono ye, kandi waakanyisa ebi atungire byona. Kwonka hati gorora omukono gwawe, okore aha bintu bye byona; naija kukwehakana butunu.”—Yobu 1:10, 11.

9. Yehova akareka Sitaane kukora ki?

⁹ Sitaane akagira ngu Yobu akaba naaheereza Ruhanga ahabw’ebirungi ebi yaabaire naamuha. Kandi Sitaane akagira ngu akaba naabaasa kuremesa Yobu kuheereza Yehova. Yehova tarashagikire Sitaane, kureka akareka Sitaane yaagyeza Yobu kureeba yaaba yaabaire ari munywani wa Yehova ahabw’okumukunda.

SITAANE OKUGYEZA YOBU

10. Sitaane akagyeza ata Yobu, kandi Yobu akatwaza ata?

¹⁰ Omu kubanza Sitaane akaita amatungo ga Yobu goona. Ekyakuratsireho Sitaane akaita baingi aha bakozi ba Yobu. Yobu akafeerwa ebintu bye byona. Aha muheru Sitaane akareetera abaana ba Yobu ikumi kufeera omu ihunga. Kwonka Yobu akaguma ahamiire ahari Yehova. “Omuri ebyo byona, Yobu tarakozire kibi n’obu kwakuba okubarira Ruhanga okushobya.”—Yobu 1:12-19, 22.

11. (a) Niki ekindi eki Sitaane yaakozire Yobu? (b) Yobu akatwaza ata?

¹¹ Sitaane taragarukiire aho. Akoongyera yaagambira Ruhanga ati: “Gorora omukono gwawe, okore aha magufa ge n’aha mubiri gwe, naija kukwehakana butunu.” N’ahabw’ekyo, Sitaane akarwaza Yobu endwara arikureeta obusaasi bwingi. (Yobu 2:5, 7) Nabwo Yobu akaguma ahamiire ahari Yehova. Akagira ati: “Okuhitsya obu ndifa, tindireka kuguma ndi omwesigwa.”—Yobu 27:5.

12. Yobu akooreka ata ngu Sitaane n’omubeihi?

¹² Yobu akaba atarikumanya ebi Sitaane yaabaire amugambireho n’enshonga ahabw’enki yaabaire naabonabona munonga. Yobu akaba naateekateeka ngu Yehova niwe yaabaire naamureetera oburemeezi. (Yobu 6:4; 16:11-14) Kwonka nabwo, akaguma ahamiire ahari Yehova. Buzima kikeeyoreka gye ngu Yobu akaba atarikweyendeza. Akaba ari munywani wa Ruhanga ahakuba akaba naamukunda. Ebi Sitaane yaagambire byona bikaba biri ebishuba.

13. Yobu okuguma ari omwesigwa kikooreka ki?

¹³ N’obu Yobu araabe yaabaire atarikumanya ekyabaire nikibaho omu iguru, akahamira ahari Ruhanga kandi yaayoreka ngu Sitaane ni mubi. Yehova akashumbuusha Yobu ahabw’okuba omunywani owaabuzima.—Yobu 42:12-17.

OKU SITAANE ARIKUKUBEIHERERA

14, 15. Sitaane naabeiherera abantu boona mu muringo ki?

¹⁴ Noobaasa kwega eishomo rikuru aha byabaire ahari Yobu. Obunaku obu, Sitaane naagira ngu nituheereza Yehova ahabw’ebirungi ebi arikutuha. Nk’oku kirikworekwa omuri Yobu 2:4, Sitaane akagira ati: ‘Ebi omuntu atungire byona, naija kubihayo ahabw’amagara ge.’ N’ahabw’ekyo, Sitaane naagira ngu Yobu tiwe wenka owaabaire naayeyendeza beitu ngu abantu boona nibeyendeza. Bwanyima y’emyaka mingi Yobu aherize kufa, Sitaane atwire naahakanisa Yehova kandi arikubeiherera n’abaheereza be. Nk’eky’okureeberaho omu Enfumu 27:11, nihagira hati: “Mwana wangye, gira obwengye oshemeze omutima gwangye, mbone kugarukamu ogwo otuura nanjuma.”

¹⁵ Noobaasa kucwamu kworobera Yehova obe munywani we omwesigwa, oyorekye ngu Sitaane n’omubeihi. N’obu kiraabe nikyetengyesa kukora empindahinduka z’amaani kubaasa kuba munywani wa Ruhanga, waazikora nooba waacwamu gye. Kandi okucwamu oku ni kukuru munonga. Sitaane naagira ngu waatunga oburemeezi torikubaasa kuguma ohamiire ahari Ruhanga. Naateeraho kutubeihabeiha ngu turugye ahari Ruhanga. Ata shi?

16. (a) Sitaane naakoresa miringo ki kuremesa abantu kuheereza Yehova? (b) Omuregi naabaasa kukuremesa ata kuheereza Yehova?

¹⁶ Sitaane naakoresa emiringo mingi kuteeraho kuturemesa kuguma turi banywani ba Ruhanga. Naataahirira “nk’entare erikutsinda, naasherura ou araarye.” (1 Petero 5:8) Kitakutangaaza banywani baawe, abanyabuzaare, nari abandi baateeraho kukuremesa kwega Baibuli n’okukora ekihikire. Noobaasa kwehurira ori nk’owaataahirirwa.a (Yohaana 15:19, 20) Kandi Sitaane naaguma ‘naayehindura nka maraika w’omushana.’ N’ahabw’ekyo, naabaasa kuteeraho kutureetera kugomera Yehova. (2 Abakorinso 11:14) Omuringo ogundi ogu Sitaane arikukoresa kuturemesa, n’okutureetera kuteekateeka ngu titurikubaasa kuheereza Ruhanga omu muringo ogu arikusiima.—Enfumu 24:10.

YOROBERA EBIRAGIRO BYA YEHOVA

17. Ahabw’enki nitworobera Yehova?

¹⁷ Ku turikworobera Yehova, nitworeka ngu Sitaane n’omubeihi. Niki ekiraatuhwere kworobera Yehova? Baibuli neegira eti: “Okunde Mukama Ruhanga waawe n’omutima gwawe gwona, n’amagara gaawe goona n’amaani gaawe goona.” (Eky’Ebiragiro 6:5) Nitworobera Yehova ahabw’okuba nitumukunda. Ku turikweyongyera kukunda Yehova, nitugira ekyetengo ky’okukora buri kimwe eki arikutushaba kukora. Entumwa Yohaana akahandiika ati: “Ahakuba oku nikwo kukunda Ruhanga, itwe okworobera ebiragiro bye; kandi ebiragiro bye tibirusya.”—1 Yohaana 5:3.

18, 19. (a) Ni bintu ki ebi Yehova arikugira ngu tibihikire? (b) Nitumanya tuta ngu Ruhanga tarikutushaba kukora ebi tutarikubaasa?

¹⁸ Ni bintu ki ebi Yehova arikutugambira ngu tibihikire? Bimwe aharibyo biri omu kabokisi “Yetantare Ebi Yehova Arikwanga.” Noobaasa kuteekateeka ngu bimwe aharibyo tibiri bibi munonga. Kwonka waashoma gye Ebyahandiikirwe kandi okabiteekateekaho, noija kwetegyereza obwengye oburi omu kworobera ebiragiro bya Yehova. Noobaasa kwetegyereza ngu oine kuhindura omu mitwarize yaawe. N’obu eki kiraabe nikibaasa kukugumira, waakora empindahinduka nk’ezo, noija kugira obusingye n’okushemererwa ebirikuruga omu kuba munywani wa Ruhanga owaabuzima. (Isaaya 48:17, 18) Nitumanya tuta ngu okukora empindahinduka ezo nikibaasika?

¹⁹ Yehova tarikubaasa kutushaba kukora ebi tutarikubaasa. (Eky’Ebiragiro 30:11-14) Ahabw’okugira ngu ni munywani waitu owaabuzima, naatumanya gye okukira oku turikwemanya. Naamanya okubaasa kwaitu n’obweremwa bwaitu. (Zaaburi 103:14) Entumwa Paulo akahandiika ati: “Ruhanga n’ow’okwesigwa; taribaikiriza kugyezibwa ekigyezo eki mutarikubaasa; kureka omu kigyezo ekyo aryabateeraho oburyo bw’okuhunga ngu mubaase kukigumisiririza.” (1 Abakorinso 10:13) Nitubaasa kugira obuhame ngu Yehova naija kuguma naatubaasisa kukora ebihikire. Naija kutuha ‘amaani agarikukirirayo kimwe’ kutuhwera kugumisiriza omu mbeera ezigumire.—2 Abakorinso 4:7.

KUNDA EBI YEHOVA ARIKUKUNDA

20. Ni mitwarize ki ei oshemereire kugira, kandi n’ahabw’enki?

²⁰ Twaba nitwenda kuba banywani ba Yehova twine kwetantara kukora ebitahikire, kandi tukakora ebi arikukunda. (Abarooma 12:9) Banywani ba Ruhanga nibakunda ebi arikukunda. Banywani ba Yehova nibashoboororwaho omu Zaaburi 15:1-5. (Kishome.) Banywani ba Yehova nibaba baine emitwarize nk’eye, otwariiremu “okukunda, okushemererwa, obusingye, okugumisiriza, embabazi, oburungi, obwesigwa, obucureezi, n’okwerinda.”—Abagalatia 5:22, 23.

21. Noobaasa kwega ota kugira emitwarize ei Ruhanga arikukunda?

²¹ Noobaasa kugira ota emitwarize mirungi egyo? Oine kwega ebi Yehova arikukunda orikushoma Baibuli kandi okagyega butoosha. (Isaaya 30:20, 21) Waakora ekyo, rukundo ei oiniire Yehova neeza kweyongyera, kandi ogire ekihika ky’okumworobera.

22. Waayorobera Yehova nihaija kurugamu ki?

²² Empindahinduka ezi oine kukora nizibaasa kugyeragyeranisibwa n’okujuura ebijwaro ebikuzire okajwara ebisya. Baibuli neegira ngu oine ‘kujuura omuntu owa ira’ reero okajwara “omuntu omusya.” (Abakolosai 3:9, 10) N’obu ekyo kiraabe kitoorobi, twakora empindahinduka ezo tukoorobera Yehova, naaraganisa ngu naija kutuha “ebihembo bingi.” (Zaaburi 19:11) Cwamu kworobera Yehova oyorekye ngu Sitaane n’omubeihi. Otaheereza Yehova ahabw’ebirungi ebi orikwija kutunga omu biro by’omumaisho, beitu ahabw’okumukunda. Reero noija kuba munywani wa Ruhanga owaabuzima!