Ekitebyo 90
Ari n’Omukazi Aha Iziba
YESU yaayemerera kuhuumuraho aha iziba rya Samaria. Abeegi be baaza omu rurembo kugura eby’okurya. Omukazi ou Yesu arikugamba nawe yaija kutaha amaizi. Yaamugira ati: ‘Mpa amaizi nyweho.’
Eki kyatangaaza omukazi munonga. Noomanya ahabw’enki? N’ahabw’okuba Yesu n’Omuyudaaya, kandi we n’Omusamariakazi. Kandi Abayudaaya abaingi tibarikwenda Abasamaria. Tibarikubaasa n’okugamba nabo! Kwonka Yesu naakunda abantu b’emiringo yoona. Atyo agira ati: ‘Kuri noomanya omuntu orikukushaba amaizi g’okunywa, okaamushabire kandi nawe akaakuhaire amaizi g’amagara.’
Omukazi yaagira ati: ‘Mukama wangye, eiziba niriraingwa, kandi toine ky’okutahisa. Iwe noija kwiha nkahi amaizi g’amagara?’
‘Ku orikunywa amaizi g’omwiziba eri noija kugaruka ogire eiriho,’ Yesu amushobororera. ‘Kwonka agu ndikuha nigaha omuntu amagara agatahwaho.’
Omukazi agira ati: ‘Mukama wangye, mpa amaizi ago! Ntarigaruka kugira eiriho obundi. Kandi ntarigaruka aha kutaha amaizi omurundi ogundi.’
Omukazi naatekyereza ngu Yesu naagamba aha amaizi genyine. Kwonka naagamba aha mazima agarikukwata ahari Ruhanga n’obukama bwe. Amazima aga ni nka amaizi agarikuheereza amagara. Nigabaasa kuheereza omuntu amagara agatahwaho.
Yesu hati agambira omukazi ati: ‘Irooko oyete baro ogarukye aha.’
Omukazi agarukamu ati: ‘Tiinyine mushaija.’
Yesu amugarukamu ati: ‘Waagamba gye okugira ngu toine mushaija ahabw’okuba okashwerwa abashaija bataano n’ogwo ou oine hati ti baro.’
Omukazi atangaara munonga, ahabw’okuba ebi byona n’amazima. Ebi byona Yesu akabimanya ata? Eego, n’ahabw’okuba Yesu niwe ogwo Owaaraganisiibwe, Oyohereziibwe Ruhanga, kandi Ruhanga naamuha amakuru aga. Omu kaanya ako, abeegi ba Yesu bagaruka, kandi batangaara okureeba naagamba n’Omusamariakazi.
Nitwega ki omuri ebi byona? Nikyoreka ngu Yesu n’omunyambabazi aha bantu b’enganda zoona. Kandi naitwe nikwo tushemereire kuba. Titushemereire kuteekateeka ngu abantu abamwe ni babi ahabw’okuba n’ab’oruganda nanka. Yesu naayenda abantu boona okumanya amazima agarikuhitsya omu magara agatahwaho. Kandi naitwe tushemereire kukunda kuhwera abantu okwega amazima.
Yohaana 4:5-43; 17:3.