Baatatenkuriitwe Abaafiire Baryazooka?

ENYIMAHO, orupapura rw’amakuru orwa Korea orurikwetwa Chosun Ilbo, rukashohoreramu omutwe gw’amakuru agarikutangaaza. Omutwe gukaba nigugira guti: “Shim Cheong Owaabaire Ataine Ki Arikumanya Ahari Yesu Mbwenu shi Akaza omu Muriro Ogutaraara?”

Omutwe ogwo gukareetera abantu baingi kugira ekiniga, ahabw’okuba Shim Cheong akaba ari omukazi muto owaabaire naakundwa abantu ba Korea owaayehaireyo kureeberera ishe empumi. Abantu bakaba batwire nibamugambaho ebirungi bingi. Buzima, abantu omuri Korea bakaba nibareeba Shim Cheong nk’eky’okureeberaho aha bandi ahabw’okuba omwishiki w’omutima.

Okugira ngu omuntu nk’ogwo naija kufubirwa omu muriro ogutaraara ahabw’okugira ngu tabatiziibwe nk’Omukristaayo, baingi nibakireeba nk’ekitari ky’oburingaaniza kandi ekirikugwisa kubi. Ahakuba, ekitebyo ekirikukwata aha mwishiki ogwo kishemereire kuba kyabaireho ira munonga amakuru agarikukwata ahari Kristo gatakahikire omu kyaro kyabo.

Omu rupapura rw’amakuru orwo bakahandiikamu n’ebi baabuurize omwebembezi w’ediini aha bikwatiraine n’omwishiki ogwo. Bakamubuuza yaaba boona abaafiire batatungire mugisha gw’okwega ebirikukwata ahari Kristo baagiire omu muriro ogutaraara. Akagarukamu ati: “Titurikumanya. Nituteekateeka ngu Ruhanga ashemereire kuba ataireho entebeekanisa y’abantu nk’abo.”

EKIRIKWETENGYESA KUBAASA KUJUNWA

Ekitabo The New Catholic Encyclopedia nikigira kiti: “Okubatizibwa nikwetengyesa kubaasa kujunwa. Kristo akagira ngu omuntu, ku aba atazairwe amaizi n’omwoyo, tabaasa kutaaha mu bukama bwa Ruhanga. (Jn 3.5).” Ahabw’enshonga egi, abamwe nibaikiriza ngu abo abaafiire batakabatiziibwe nibanagwa omu muriro ogutaraara nari hariho omuringo ogu barikubonabonamu bwanyima y’okufa.

Kwonka hariho abandi baingi abarikugira ngu enyikiriza egyo egwire. Abantu baingi munonga bakafa batarikumanya Baibuli. Mbwenu shi bashemereire kubonabonesibwa ebiro n’ebiro? Baibuli neegamba ki aha nshonga egyo?

AMATSIKO AGARIKURAGANISIBWA OMU BAIBULI

Baibuli neeyoreka oku Ruhanga arikureeba abo abaafiire batarikumanya ebirikumukwataho. Ebyakozirwe 17:30 nihatuhamiza hati: “Ebiro ebyo eby’okutamanya, Ruhanga akabirenzya amaisho.” Abo abaafiire batakatungire mugisha gw’okwega ebirikukwata ahari Ruhanga, Baibuli neeyoreka ngu baine matsiko ki?

Eky’okugarukamu nitubaasa kukiiha omu bi Yesu yaagarukiremu emwe aha nkozi z’ebibi ezi yaabaire ahanikirwe nazo. Omushaija ogwo akagira Yesu ati: “Ku oriija omu bukama bwawe, onyijukye.” Yesu akamugarukamu ata? ‘Buzimazima ninkugambira eri izooba nti: Noija kuguma naanye omuri Paradiso.’​—Luka 23:39-43.

Mbwenu shi Yesu akaba naaraganisa omushaija ogwo ngu naija kutaaha omu iguru? Ngaaha. Akaba “atazairwe bwa kabiri” omu maizi n’omwoyo, ekyabaire nikyetengyesa kubaasa kutaaha omu Bukama bw’omu iguru. (Yohaana 3:3-6) Kureka, Yesu akaba naamuraganisa ngu naija kuzooka atuure omu Paradiso. Ahabw’okugira ngu akaba ari Omuyudaaya, akaba naamanya gye ebirikukwata aha Paradiso eyaabaireho omu nsi, ey’omusiri Edeni ogurikugambwaho omu kitabo kya Baibuli ekirikubanza. (Okutandika 2:8) Eki Yesu yaamuraganiise, kikamuhwera kugira amatsiko g’okuzooka akatuura omu Paradiso omu nsi ku eraagarurweho.

Buzima, Baibuli neeraganisa ngu nihaija kubaho “okuzooka kw’abahikiriire n’abatahikiriire.” (Ebyakozirwe 24:15) ‘Abatahikiriire’ n’abo abatarabaasize kukuratira emitindo ya Ruhanga ey’okuhikiirira ahabw’okugira ngu bakaba batarikumanya ebi Ruhanga arikukunda. Yesu naija kuzoora enkozi y’ebibi ei yaagaaniire nayo obu baabaire bahanikirwe, hamwe n’abandi baingi munonga abaafiire batakamanyire mazima. Omu Paradiso, nibaija kwegyesibwa ebi Ruhanga arikubeetengyesa, reero beecweremu kworeka ngu nibakunda Ruhanga barikworobera ebiragiro bye.

OKUZOORWA KW’ABATAHIKIRIIRE

Mbwenu shi abatahikiriire ku baraazoorwe, nibaija kucwerwa orubanja ahabw’ebibi byabo ebi baakozire batakafiire? Ngaaha. Abarooma 6:7 nihagira hati: “Ofiire aba atakitegyekwa kibi.” Abatahikiriire nibaija kuba bashashuriire ebibi byabo bwanyima y’okufa. N’ahabw’ekyo, nibaija kucwerwa orubanja kurugiirira aha bi baraabe bakozire bwanyima y’okuzooka, beitu bitari ebi baakozire ahabw’obutamanya batakafiire. Nibaija kugasirwa bata?

Bwanyima y’okuzooka, abatahikiriire nibaija kutunga omugisha gw’okwega ebiragiro bya Ruhanga, emizingo ey’akamanyiso ku eraashuuruurwe. Bwanyima nibaija kucwerwa orubanja “nk’ebi baakozire oku biri,” ekirikumanyisa ngu nibaija kuba boorobeire Ruhanga nari bangire kumworobera. (Okushuuruurwa 20:12, 13) Baingi aha batahikiriire, ogu nigwija kuba omurundi gwabo gw’okubanza kwega ebi Ruhanga arikukunda ekiraababaasise kutunga amagara agatahwaho omu nsi.

Enyegyesa ya Baibuli egi ehwereire abantu baingi kwikiririza omuri Ruhanga. Yeong Sug akaba ari omwe aharibo. Akakuzibwa ari Omukaturiki. Omu ka yaabo hakaba harimu abeebembezi b’ediini y’abakaturiki. Ahabw’okugira ngu akaba naayenda kuba omusisita, akaza omu kigo. Bwanyima, akarugayo ahabw’ebi yaareebire birikukorwayo bikamugwisa kubi. Kandi, akanga kwikiriza enyegyesa y’omuriro ogutaraara ahabw’okugira ngu akateekateeka ngu okubonabonesa abantu omu muriro tiky’oburingaaniza kandi ti kikorwa kya rukundo.

Bwanyima, omwe aha Bajurizi ba Yehova akooreka Yeong Sug ebigambo ebiri omu Baibuli ebi: “Abahuriire bamanya ku barifa; kwonka abafiire tibagira ki bamanya, kandi baba batakiine bindi bihembo.” (Omubuurizi 9:5) Omujurizi wa Yehova akamuhwera kwetegyereza ngu baishenkuru abaafiire tibarikubonabonesibwa omu muriro ogutaraara. Kureka, ngu bari nk’abagwejegyeire bategyereize okuzooka.

Yeong Sug ku yaaherize kumanya ngu baingi tibakamanyire amazima agari omu Baibuli, akacwamu kukuratira ebigambo bya Yesu ebiri omu Matayo 24:14 ebirikugira biti: “Engiri egi ey’obukama eryagambwa omu nsi zoona okuba eky’okuhamya aha mahanga goona; obwo nibwo emperu erihika.” Yeong Sug hati naayejumba omu kubuurira abandi amakuru marungi n’okubooreka amatsiko g’omutaano agu aine.

‘RUHANGA TASHOROORA MU BANTU’

Baibuli neegira ngu ‘Ruhanga tashoroora mu bantu; kureka omu mahanga goona orikumutiina, akakora eby’okuhikiirira, ogwo niwe arikusiimwa.’ (Ebyakozirwe 10:34, 35) Buzima Ruhanga ‘okunda okuhikiirira’ n’oburingaaniza nikwo arikutwaza.​—Zaaburi 33:5.