1-3. (a) Ni buremeezi ki obw’eby’entaasya obu baingi barikutunga, kandi abamwe nibateeraho kubumaraho bata? (Reeba ekishushani aha kutandika.) (b) Abarikwenda kuza aheeru, nibeerarikirira ki aha bikwatiraine n’okworora abaana?

“IBANYI James, akaba agaruka omuka buri izooba aruhire munonga, kandi esente ezi yaabaire naatunga zikaba ziri nkye kubaasa kushashurira ebi turikwetenga buri izooba,” Marilyn nikwo arikugira.a “Nkaba niinyenda kumuhwera kugira ebi naagura kandi ngire ebintu bimwe ebi naagurira Jimmy mutabani waitu, ebi bataahi be aha ishomero baabaire baine.” Marilyn akaba naayenda n’okuhwera abanyabuzaare baabo, kandi agire n’esente ezi yaabiika ahabw’ebiro by’omumaisho. Banywani be abaingi bakaba bagiire omu mahanga agandi kukora kugira ngu batunge esente nyingi. Kwonka we ku yaateekateekire aha ky’okuza omu ihanga erindi, akaba atarikumanya eky’okukora. Ahabw’enki?

² Marilyn akaba naatiina kutsigaho ab’omu ka ye n’entebeekanisa yaabo ey’eby’omwoyo. Kwonka nabwo, akateekateeka aha baabaire bagiireyo kandi okaba nooshusha oti bakaba nibakiheereza Yehova. Kwonka akaba naayebuuza oku araayorore omwana we obwo ari hare munonga nawe. Mbwenu shi, akaba naabaasa kworora omwana we kandi akamutendekyera omuri Yehova kurabira aha Intaneeti?​—Efe. 6:4.

³ Marilyn akasherura obuhabuzi. Iba akaba atarikwenda ngu Marilyn agyenda n’obu araabe yaamugizire ngu tarikwija kumuzibira kugyenda. Abareeberezi n’ab’eishe-emwe abamwe bakamuhabura ngu atagyenda, kwonka banyaanyazi-itwe baingi bakamugira ngu agyende aheeru. “Ku oraabe nookunda eka yaawe noija kugyenda,” nikwo baagizire. “Noobaasa kuguma nooheereza Yehova.” N’obu araabe yaabaire aine okubanganisa, Marilyn akasiibura James na Jimmy yaagyenda kukora omu ihanga erindi. “Tindikuza kumarayo bwire buraingwa,” nikwo yaabaraganiise.

OBUJUNAANIZIBWA BW’ABAZAIRE N’EMISINGYE YA BAIBULI

4. Ahabw’enki baingi nibaza omu mahanga agandi kukora, kandi ni baahi abu barikutsigira abaana baabo?

⁴ Yehova tarikwenda ngu abaheereza be babe abooro munonga, kandi ebyafaayo nibyoreka ngu abamwe batwire nibaza omu mahanga agandi barikuteeraho kwetambira obworo. (Zab. 37:25; Enf. 30:8) Yakobo akoohereza abaana be Misri kugura eby’okurya ahabw’okwenda ngu bataitwa enjara.b (Kut. 42:1, 2) Obunaku obu, baingi abarikuza omu mahanga agandi kukora tibarikuzayo ahabw’okugira ngu tibaine ky’okurya. Nibabaasa kuba baine amabanja g’okushashura. Abandi nibaba nibenda kuhwera eka yaabo kwongyera kuba gye. Ahabw’okwenda kuhikiiriza ebigyendererwa byabo eby’okuba gye, nibaza omu mahanga agandi ahu kyorobi kutunga sente juba. Emirundi erikukira obwingi, nibatsigaho abaana baabo bato kureebererwa omwe aha bazaire orikuba atsigaire omuka, bakuru baabo, baishenkurubo nari baanyinenkurubo, abanyabuzaare, nari abanywani. N’obu kiraabe nikikora kubi abo abarikuba nibaza aheeru kutsigaho abu bari nabo omu bushwere nari abaana baabo, nibareeba ngu nihaba hatariho ky’okukora.

5, 6. (a) Yesu akeegyesa ki aha bikwatiraine n’okushemererwa? (b) Ni bintu ki ebi Yesu yaagambiire abakuratsi be kushaba? (c) Yehova naatuha omugisha mu muringo ki?

⁵ Obu Yesu yaabaire akiri omu nsi, abantu baingi bakaba bari abooro bataine kihwera kandi nibabaasa kuba baateekateekire ngu baagira esente nyingi nibaija kugira okushemererwa. (Mak. 14:7) Kwonka Yesu akaba naayenda ngu abantu bate amatsiko gaabo omuri Yehova, obukomooko bw’obutungi obutarikuhwaho. Omu rubazo rwa Yesu orw’aha rushozi, akagira ngu okushemererwa okwabuzima tikurikuruga omu kugira ebintu nari omu kuteeraho kwaitu, kureka omu kugira omukago murungi na Tataitwe ow’omu iguru.

⁶ Yesu taratwegyeise kushaba kutunga sente kureka ebi turikwetenga buri izooba nibyo ‘by’okurya by’obutoosha.’ Akagambira abamuhurikiize ati: “Mutaryebiikira eitungo omu nsi . . . Kwonka mwebiikire eitungo omu iguru.” (Mat. 6:9, 11, 19, 20) Nitubaasa kugira obwesigye ngu Yehova naija kutuha emigisha nk’oku yaaraganiise. Yehova tarikugira ngu naija kutuha emigisha arikwikiriza ngu turi abaheereza be kwonka, kureka naagira eki yaakora arikutuha ebi turikwetenga. Buzima, omuringo gwonka ogw’okutungamu okushemererwa n’oburinzi, n’okwesiga Yehova, beitu zitari sente.​—Shoma Matayo 6:24, 25, 31-34.

7. (a) N’oha ou Yehova ahaire obujunaanizibwa bw’okworora abaana? (b) Ahabw’enki abazaire bombi baine kwejumba omu kwegyesa abaana baabo?

⁷ Okubanza kusherura okuhikiirira kwa Ruhanga nikitwariramu okureeba obujunaanizibwa bwawe omu ka nk’oku Yehova arikubureeba. Ebiragiro bya Musa birimu omusingye ogurikukwata aha abazaire Abakristaayo ngu baine kwegyesa abaana baabo omu by’omwoyo. (Shoma Eky’Ebiragiro 6:6, 7.) Ruhanga akaha abazaire obujunaanizibwa obwo, kandi tarabuhaire baishenkurubo nari baanyinenkurubo nari ondiijo muntu. Omugabe Sulemaani akagira ati: “Mwana wangye, guma ohurire ebi sho arikukuhabura, kandi otanga ebi nyoko arikukwegyesa.” (Enf. 1:8) Yehova naayenda ngu abazaire bombi babe bariho kuhwerahwerana kwegyesa abaana baabo. (Enf. 31:10, 27, 28) Bingi ebi abaana barikwegyera aha bazaire baabo, na munonga eby’omwoyo, nibabyega barikubahurira nibagamba ahari Yehova kandi barikubateeraho n’eky’okureeberaho.

EBI OTARIKUTEEKATEEKA NGU NIBIIJA KUBAHO

8, 9. (a) Nihabaho mpindahinduka ki omuzaire yaatsigaho ab’omu ka ye? (b) Abazaire n’abaana baaba batarikutuura hamwe, nikishiisha kita eka?

⁸ Baingi abarikuza omu mahanga agandi nibateekateeka aha buremeezi obu barikubaasa kutunga aheeru, kwonka abamwe tibarikuteekateeka aha buremeezi oburaabeho baatsigaho ob’omu maka gaabo. (Enf. 22:3)c Bwanyima ya Marilyn kuza omu ihanga erindi, akatandika kuhurira kubi ahabw’okutsigaho eka ye. Kandi iba n’omwana we nabo nikwo baayehuriire. Jimmy akaba abuuza nyina ati: “Ahabw’enki waantsigireho?” Marilyn akaba naayenda kumarayo ameezi makye, kwonka hakahinguraho emyaka yaatandika kureeba empindahinduka ezaabaire zitari nungi omuka ye. Jimmy akaba atakyenda kugamba nawe kandi atarikwenda n’okumugambira oku yaabaire naayehurira. Aine enaku, Marilyn naagira ati: “Rukundo ei yaabaire anyiniire ekahwaho.”

⁹ Abazaire baaba batarikutuura hamwe n’abaana baabo, enyehurira zaabo n’emitindo yaabo erikukwata aha kirungi n’ekibi nibihinduka.d Niheeyongyera kubaho oburemeezi abaana baaba bakiri bato, reero bakamara obwire buraingwa batari na bazaire baabo. Marilyn akashoboororera Jimmy ngu akaza aheeru ahabw’okwenda kumuhwera. Kwonka we Jimmy akaba naakireeba ngu nyina akaba amutsigireho atakimukunda. Omu kubanza, akamugirira ekiniga ahabw’okumutsigaho. Kwonka bwanyima, n’obu yaabaire agaruka kubataayaayira Jimmy akaba atashemererwa yaamureeba. Nk’oku kiri aha buri mwana orikutsigwaho omwe aha bazaire be, Jimmy nawe akakireeba ngu akaba atashemereire kworobera nyina n’okumukunda.​—Shoma Enfumu 29:15.

10. (a) Niki ekirikubaasa kuba aha baana, abazaire baabo baacwamu kubooherereza ebiconco omu mwanya gw’okuguma nabo? (b) Niki ekirikuba nikiburaho omuzaire yaaguma naareeberera abaana be ari hare nabo?

¹⁰ N’obu Marilyn yaateireho kuguma naayohereza esente n’ebiconco, akakireeba ngu ayetaaniise aha mwana we kandi atakigyendereire akaba ariyo naamwegyesa kwebembeza okusherura eby’obutungi omu mwanya gw’okwebembeza eby’omwoyo n’omukago gw’eka ye. (Enf. 22:6) Jimmy butoosha akaba amugira ati: “Otagaruka.” Kureka “guma nooyohereza ebiconco.” Marilyn akatandika kukimanya ngu tarikubaasa kworora omwana we kurabira omu kuhandiika amabaruha, kuteera esimu, nari vidiyo y’aha Intaneeti. Naashoboorora ati: “Kurabira aha Intaneeti torikubaasa kugwa omwana waawe omu kifuba nari kumusiibura nyekiro yaaba naaza kubyama.”

11. (a) Abashweraine baaba batarikutuura hamwe, nikibaasa kukwata kita aha bushwere bwabo? (b) Munyaanyazi-itwe omwe akamanya ata ngu aine kugaruka omu ka ye?

¹¹ Omukago gwa Marilyn na Yehova n’omushaija we James nagwo gukaba guriyo nigufa. Marilyn akaba naaza omu nteerane n’omu kubuurira omurundi gumwe buri saabiiti, kandi mukama we akaba aguma naamuteganisa arikwenda kushambana nawe. Ahabw’okugira ngu Marilyn na James bakaba batarikugaaniira hamwe, bakatandika kugambira abandi enyehurira zaabo kandi bakaba bari haihi kugwa omu bushambani. Marilyn akakireeba ngu n’obu we na iba bataragwire mu bushambani, okutatuura hamwe kikabareetera kutakuratira omusingye gwa Baibuli ogw’okwigutsa ekyetengo ky’okuteerana. Bakaba batarikubaasa kugaaniira, kureebana aha maisho, kumwenya hamwe, kukwatana omu ngaro, kwegwa omu kifuba, kworekana rukundo, nari kuhaana ‘ekishemereire’ omu bushwere. (Kyesh. 1:2; 1 Kor. 7:3, 5) Kandi bakaba batarikubaasa kuramya gye Yehova bari n’omwana waabo. Marilyn naagira ati: “Aha ruteerane oruhango orw’ebiro bishatu ku naamanyire ngu okuramya kw’eka ni kikuru kubaasa kuhonokaho aha kiro kikuru kya Yehova, nkamanya ngu nyine kugaruka omuka.” Naayongyeraho ati: “Nkatandika kweyombeka omu by’omwoyo n’okwombeka eka yangye.”

OBUHABUZI OBURUNGI HAMWE N’OBUBI

12. Ni buhabuzi ki kuruga omu Byahandiikirwe oburikubaasa kuheebwa abo abarikutuura hare n’ab’omu maka gaabo?

¹² Marilyn ku yaacwiremu kugaruka omu ka, abamwe bakamuha obuhabuzi burungi kandi abandi baamuha obubi. Abareeberezi omu kibiina eki yaabaire arimu aheeru, bakamusiima ahabw’okwikiriza kwe n’obumanzi bwe bw’okucwamu kutaaha. Kwonka abandi nabo abaabaire nibatuura aheeru batari n’abu bashweraine nabo, ekyo tibaraakisiimire. Omu mwanya gw’okumutooreza, bakateeraho kumubeihabeiha ngu atataaha. Bakamugira bati: “Noija kugaruka omu bwire bukye.” Kandi bakabamubuuza bati: “Noija kwebaisaho ota ku oraagarukye omuka?” Abakristaayo omu mwanya gw’okumaramu bagyenzi baabo amaani, baine kuhiga “abakazi bato kukunda baibabo n’abaana baabo . . . bakore emirimo yaabo omu maka” gaabo, kugira ngu “ekigambo kya Ruhanga kirekye kujumwa.”​—Shoma Tito 2:3-5.

13, 14. Ahabw’enki nikyetengyesa okugira okwikiriza kubaasa kwebembeza okukora ebi Yehova arikukunda omu mwanya gw’okwebembeza ebi ab’omu ka barikukunda? Shoboorora.

¹³ Baingi abarikuza omu mahanga agandi bakuriire omu nganda ezirikuha ekitiinisa abanyabuzaare na munonga abazaire, okukira ekindi kintu kyona. N’ahabw’ekyo, Omukristaayo kwanga eki abantu omu kicweka kye barikutwara nka kikuru akacwamu kushemeza Yehova, ekyo n’ekikorwa ky’okwikiriza.

¹⁴ Teekateeka aha byahikire ahari Carin: “Obu naazaara Don mutabani waitu, nyowe na ibanyi tukaba nitukorera aheeru, kandi nkaba ntandikire kwega Baibuli. Buri omwe omu ka yaitu akaba naamanya ngu ninza kwohereza Don omu ka, ayororwe abazaire bangye kuhitsya twatunga esente ezirikumara.” Kwonka Carin ku yaagizire ngu aine kureeberera Don, abanyabuzaare be otwariiremu na iba bakagira ngu Carin n’omunafu otarikwenda kukora. Carin naagira ati: “Mazima, naanye obumwe nkaba nteekateeka ngu tikiine nshonga kwohereza Don akaguma n’abazaire bangye kumara emyaka mikye.” Kwonka, “nkaba nimmanya ngu itwe abazaire, Yehova akatuha omurimo gw’okureeberera mutabani waitu.” Carin ku yaagizire enda endiijo, iba otari mu mazima akamugira ngu enda egyo agiihemu. Carin ahabw’okugira ngu akaba yaacwiremu gye enyima, ekyo kikaba kyahamize okwikiriza kwe, n’aha murundi ogu akabaasa kuhamira ahari Yehova. Hati we na iba hamwe n’abaana baabo omwojo n’omwishiki baine okushemererwa ahabw’okutuura hamwe. Ku ogire ngu Carin akacwamu ngu abaana be bakuzibwe abandi, obundi ebyakurugiremu bikaabaire bibi.

15, 16. (a) Ha eky’okureeberaho kya munyaanyazi-itwe owaatsigirweho omuzaire we akiri muto. (b) Ahabw’enki Vicky yaayangire kutsigira nyina muhare we?

¹⁵ Omujurizi wa Yehova orikwetwa Vicky naagira ati: “Kumara emyaka mikye, nkaba ntuura na maawenkuru, reero abazaire bangye barikutuura na munyaanyazi omuto. Obwire ku bwahikire naaza kutuura nabo, nkaba ntakibainiire rukundo. Munyaanyazi kikaba nikimworobera kugaaniira nabo, kubagwa omu kifuba, n’okuba hamwe nabo. Nkaba ntari haihi n’abazaire bangye, nangwa n’obu naakuzire, kikaba nikiingumira kubooreka enyehurira zangye. Nyowe na munyaanyazi tuhamiize abazaire baitu ngu nitwija kubareeberera ku baraakaikure. Nyowe ninyija kukikora ahabw’okugira ngu nyine kukikora, kwonka munyaanyazi we naija kukikora ahabw’okubakunda.”

¹⁶ Vicky naagira ati: “Maawe akaba naayenda ngu muhe muhara wangye amworore, nk’oku yaampaire nyina kunyorora. Omu muringo gw’obwengye nkanga.” Naagumizamu agira ati: “Nyowe na ibanyi nitwenda kworora omwana waitu arikumanya Yehova. Kandi tindikwenda ngu omu biro by’omumaisho omukago gwangye na muhara wangye gusiisikare.” Vicky areebire ngu omuringo gumwe gw’okuba omusinguzi, n’okwebembeza okukora ebi Yehova arikukunda hamwe n’emisingye ye, omu mwanya gw’okwebembeza okusherura sente hamwe n’ebi ab’omuka barikukunda. Yesu akagamba butunu ati: “Tihariho omuntu orikubaasa kuheereza abakama babiri,” Ruhanga hamwe n’eby’obutungi.​—Mat. 6:24; Kur. 23:2.

YEHOVA NAATUHWERA KUBA ABASINGUZI

17, 18. (a) Abakristaayo nibaba baine kucwamu aha bikwatiraine na nshonga ki? (b) Ni bibuuzo ki ebi turikuza kushwijuma omu kicweka ekirikukurataho?

¹⁷ Tataitwe Yehova, naaturaganisa kutuhwera kutunga ebi turikwetenga ku turaayebembeze okusherura eby’Obukama n’okuhikiirira kwe. (Mat. 6:33) N’ahabw’ekyo, Abakristaayo butoosha nibaba baine kucwamu kumuheereza. Kandi Yehova naaturaganisa kutuha “oburyo bw’okuhunga” twaba tutahenzire misingye ya Baibuli n’obu twakuba twine enshonga zigumire ez’okucwamu. (Shoma 1 Abakorinso 10:13.) Twategyereza Yehova twine amatsiko, kandi ‘tukamwesiga’ turikumushaba kutuha obwengye n’obuhabuzi, tukoorobera ebiragiro bye n’emisingye ye, naija kutuhwera. (Zab. 37:5, 7) Naija kutuha emigisha twaba niwe wenka ou twaheereza nka Mukama waitu. Twayebembeza obuheereza bwe, naija kutuhwera kuba abasinguzi.​—Gyeragyeranisa na Okutandika 39:3.

¹⁸ Niki ekirikubaasa kukorwa kugaruraho omukago ogwasiisikaire ahabw’okutatuura hamwe? Nitubaasa kukora ki kubaasa kureeberera ab’omu maka gaitu tutagiire kukorera hare nabo? Omu muringo gwa rukundo nitubaasa kuhiga tuta abandi kucwamu gye aha bikwatiraine n’okukorera aheeru? Omu kicweka ekirikukurataho nitwija kushwijuma enshonga ezi.

1, 2. Abarikuza aheeru ku barikugaruka omu maka gaabo nibashangayo mbeera ki ezigumire? (Reeba ekishushani aha kutandika.)

“OBU naabaire ninkorera omu ihanga erindi, nkaba nyine omurimo murungi kandi nkaba nintunga esente nyingi,” nikwo Eduardo arikugira.a “Kwonka ku naatandikire kwega Baibuli n’Abajurizi ba Yehova, nkareeba ngu obujunaanizibwa bwangye obukuru ti kureeberera eka yangye mu by’omubiri, kureka omu by’omwoyo. N’ahabw’ekyo, nkagaruka omuka.”​—Efe. 6:4.

² Eduardo akaba naakimanya ngu okugarukayo kutuura n’eka ye, nikishemeza Yehova. Nka Marilyn, ogambirweho omu kicweka ekihweire, Eduardo nawe akaba aine kugaruka kuteeraho kugira omukago murungi n’eka ye. Akaba aine kureeberera omukazi n’abaana be, kandi akaba aine kukora kubaasa kutunga esente z’okubareeberera. Ekyo akaba naija kukikora ata? Abandi omu kibiina bakamuhwera bata?

OKUGARURAHO OMUKAGO GWAWE NA YEHOVA N’EKA YAAWE

3. Abaana nibakwatwaho bata abazaire baabo baabatsigaho?

³ “Nkeetegyereza ngu nkaba ntarikubaasa kuha bahara bangye bashatu obuhabuzi n’okubooreka rukundo,” nikwo Eduardo arikugira. “Nkaba ntarikubaasa kushoma nabo ebitebyo by’omu Baibuli, kushaba nabo, kubagwa omu kifuba, n’okuzaana nabo.” (Bir. 6:7) Muhara we omukuru, Anna, naagira ati: “Ahabw’okugira ngu tata akaba atari muka nkehurira nk’otarikukundwa. Tukaba nitumanya eiraka rye n’oku arikushusha aha maisho kwonka. Ku yaagarukire akangwa omu kifuba, tikiraambereire kya butoosha.”

4. Ahabw’enki nikibaasa kugumira omutwe gw’eka kuhikiiriza obujunaanizibwa bwe yaaba atari n’ab’omu ka ye?

⁴ Ishe abaana yaaba atari muka tarikubaasa kuhikiiriza obujunaanizibwa bwe nk’omutwe gw’eka. Muka Eduardo, orikwetwa Ruby, naagira ati: “Nkaba nyine kukora emirimo ebiri, ogw’okuba Maama na Taata , nkaba nyine kucwamu aha nshonga zoona omu ka. Eduardo ku yaagarukire omu ka, nkaba nyine kwega eki okworoba okw’Ekikristaayo kirikumanyisa. Na hati, obumwe nimba nyine kweijutsya ngu ibanyi ariho.” (Efe. 5:22, 23) Eduardo naayongyera agira ati: “Bahara baitu bakaba bamanyiriire kuza owa nyinabo kumushaba orusa baaba baine eki barikwenda kukora. Nk’abazaire, tukakyetegyereza ngu twine kworeka abaana baitu ngu nitucwamu hamwe nk’eka kandi naanye nkaba nyine kwebembera eka omu muringo gw’Ekikristaayo.”

5. Ishe abaana omwe akagaruraho ata omukago gwe na Yehova hamwe n’eka ye, kandi hakarugamu ki?

⁵ Eduardo akaba amaririire kukora kyona eki arikubaasa kugaruraho omukago gwe n’ab’omu ka ye, n’okubombeka omu by’omwoyo. “Ekigyendererwa kyangye kikaba kiri eky’okwegyesa abaana bangye amazima omu bigambo n’eky’okureeberaho kyangye, ntarikubagira ngu ninkunda Yehova kwonka, beitu ndikukyoreka.” (1 Yoh. 3:18) Mbwenu shi Yehova akaha Eduardo omugisha ahabw’okworeka okwikiriza? “Okureeba tata arikuteeraho kugira omukago murungi naitwe kikatukwataho munonga,” nikwo Anna yaagizire. “Ku twabaire tumureeba naatunguuka omu kibiina, kikaba kitwesiimisa. Ensi ekaba neetugyemesereza kuruga ahari Yehova. Kwonka tukareeba abazaire baitu bataire omutima aha mazima naitwe twateeraho kubatooreza. Tata akaraganisa kutagaruka kututsigaho, kandi buzima taratutsigireho. Ku ogire ngu akatutsigaho, obundi nkabaire ntari mu kibiina kya Yehova hati.”

OKWIKIRIZA ENSHOBE YAAWE

6. Abazaire abamwe bakeega ki omu bwire bw’orutaro?

⁶ Obu haabaho orutaro omu Balkans, abaana b’Abajurizi ba Yehova bakaba bashemereirwe n’obu embeera zaabaire zigumire. Ahabw’enki? Abazaire bakaba batarikubaasa kuza kukora, bakaba baguma omuka, beega n’abaana baabo, bazaana nabo, kandi bagaaniira nabo. Eki nikitwegyesa ki? Abaana nibeetenga kuba bari n’abazaire baabo kukira okubaha ebiconco nari sente. Buzima nk’oku Ekigambo kya Ruhanga kirikugira, abaana nibagasirwa, abazaire baabo baaba nibabafaho kandi bakabatendeka.​—Enf. 22:6.

7, 8. (a) Abazaire abarikugaruka kuruga aheeru nibakira kukora nshobe ki? (b) Abazaire nibabaasa kukora ki kugaruraho omukago gwabo n’abaana baabo?

⁷ Eky’obusaasi, abazaire abamwe ku barikugaruka omuka, abaana baabo bakabagambira kubi, nibabagarukamu n’ekiniga bati: “Noobaasa ota kuba entasiima ahabw’ebi nyefeerereize byona ahabwawe?” Kwonka abaana nibabaasa kugira emiteekateekyere egwire ahabw’okutsigwaho abazaire baabo. Mbwenu shi abazaire nibabaasa kuhwera bata abaana baabo?

⁸ Shaba Yehova kukuhwera kwongyera kwetegyereza oku ab’omu ka yaawe barikwehurira. Kandi orikugamba nabo, ikiriza ngu niiwe omwe aha baareetsire oburemeezi oburi omuka. Noobaasa kubashaba okusaasirwa. Ou ori nawe omu bushwere n’abaana baawe baakureeba ngu nooteeraho kushoboorora ebyashobire, nibaija kukireeba ngu nikiruga omu mutima. Waayoreka okumariirira kandi okagumisiriza, ab’omu ka yaawe nibaija kugaruka bakukunde kandi bakuhe ekitiinisa.

OKUREEBERERA ‘AB’OMU KA YAAWE’

9. Ahabw’enki okureeberera ‘ab’omu ka yaawe’ kitarikumanyisa kuteeraho kusherura ebintu bingi?

⁹ Entumwa Paulo akagira ngu Abakristaayo abakaikwire baaba batarikubaasa kwereeberera, abaana na baijukuru baabo baine kwihura “ebi abazaire baabo baabakoreire.” Kwonka Paulo akagumizamu yaahiga Abakristaayo boona ngu beegye kumarwa n’ebikuru ebirikwetengyesa nk’eby’okurya, eby’okujwara n’oburaaro. Titushemereire kuba nitusherura ebintu bingi turikuteekateeka ngu nibiija kutuhwera omu bwire bw’omumaisho. (Shoma 1 Timoseo 5:4, 8; 6:6-10.) Omukristaayo kubaasa kureeberera “ab’omu ka ye,” tikirikumanyisa okusherura eby’obutungi omu nsi egi eri haihi kuhwaho. (1 Yoh. 2:15-17) Titushemereire kwikiriza “amaganya g’ensi, n’okubeihwabeihwa kw’obutungi bwayo,” kuremesa ab’omu maka gaitu “kutunga amagara aga buzima” omu nsi ensya.​—Mak. 4:19; Luk. 21:34-36; 1 Tim. 6:19.

10. Ahabw’enki n’eky’obwengye kwetantara amabanja?

¹⁰ Yehova naakimanya ngu nitwetenga esente eziringaniire. Kwonka esente tizirikubaasa kuturinda n’okutuhwera nk’oku okumanya n’obwengye birikuturinda. (Mub. 7:12; Luk. 12:15) Abarikuza aheeru tibarikukira kuteekateeka aha sente ezirikwetengyesa kuza aheeru, kandi obwo nibaba batarikuhamya yaaba nibaija kutunga sente baaheza kuhikayo. Nangwa n’okukora ekyo nikibaasa kuba eky’akabi. Baingi abarikuza aheeru nibagaruka baine amabanja maingi. Omu mwanya gw’okugira obwire burikumara obw’okuheereza Ruhanga, nibahinduka abahuuku b’abarikubabanja. (Shoma Enfumu 22:7.) Eky’obwengye eki twine kukora n’okwetantara amabanja.

11. Okugira embaririra nikibaasa kuhwera kita eka?

¹¹ Eduardo akakimanya ngu ekiramuhwere kumariirira kuguma n’eka ye, n’okuteeraho kukoresa gye sente. We n’omukazi we bakakora embaririra y’okugura ebi barikwetenga byonka. Embaririra ei baakozire ekaba etarikubabaasisa kugura buri kimwe nk’oku baabaire bamanyiriire kukora. Kwonka boona bakakwatanisa kandi bakaba batarikugura ebitari bikuru.b “Nk’eky’okureeberaho,” Eduardo naagira ati: “Abaana bangye nkabaiha omu mashomero ag’abantu buntu naabatwara omu mashomero ga gavumenti.” We n’eka ye bakaguma nibashaba ngu atunge omurimo ogwabaire nigwija kumubaasisa kugumizamu n’entebeekanisa yaabo ey’eby’omwoyo. Yehova akagarukamu ata okushaba kwabo?

12, 13. Nyineeka omwe akakora ki kubaasa kureeberera eka ye, kandi Yehova akamuha ata omugisha ahabw’okumariirira kwe kuguma aine eriisho eririkureeba hamwe?

¹² “Emyaka ebiri eyabaandize, esente zikaba zitarikutumara gye,” nikwo Eduardo arikugira. “Esente ezi naabaire nintunga zikaba zitarikubaasa kumara kugura byona ebyabaire nibyetengyesa. Kwonka tukaba nitubaasa kuza omu nteerane zoona n’omu kubuurira.” Eduardo akacwamu kwanga emirimo yoona eyaabaire neija kumureetera kuba atari n’eka ye, kumara ameezi nari emyaka. “Omu mwanya gw’ekyo,” naagira ati: “Nkega kukora emirimo etari emwe n’emwe kugira ngu gumwe gwaba gutariho, mbaase kukora ogundi.”

¹³ Ahabw’okugira ngu Eduardo akaba aine kushashura amabanja ge mporampora kumara obwire, esente ezi yaayegurize akaba aine kutamu amagoba. Kwonka eki tarakireebire nka kikuru, ahabw’okugira ngu akaba naayenda kuba hamwe n’eka ye omu buri kimwe, nk’oku Yehova arikwenda ngu abazaire bakore. Eduardo naagira ati: “Esente ezi ndikukora hati zikatuubaho ebicweka 10 ahari igana aha zi naabaire ninkora aheeru,” kwonka “titurikubura ky’okurya. Omukono gwa Yehova ti mugufu. Kandi tukacwamu kuba baapayoniya. Bwanyima y’ekyo, entaasya ekabamu haakiri, kandi eki kikampwera kureeberera eka yangye ntagumiirwe.”​—Isa. 59:1.

OKUGYEMESEREZIBWA ABANYABUZAARE

14, 15. Amaka nigabaasa kwemera gata okugyemeserezibwa kwebembeza eby’obutungi omu mwanya gw’eby’omwoyo, kandi nihabaasa kurugamu ki gaataho eky’okureeberaho kirungi?

¹⁴ Omu myanya mingi, abantu nibateekateeka ngu baine obujunaanizibwa bw’okuha abanyabuzaare n’abanywani esente n’ebiconco. “Ogu n’omucwe gwaitu kandi nitukunda kugaba,” nikwo Eduardo arikushoboorora, kwonka naayongyeraho ati: “Ekyo kiine kugira obugarukiro. Omu muringo gw’obwengye ninshoboororera abanyabuzaare bangye ngu ninyija kubahwera nk’oku ndikubaasa kwonka tiinyine kunagiirira eka yangye omu by’omwoyo.”

¹⁵ Abo abarikugaruka kuruga aheeru n’abo abarikwanga kuza aheeru ahabw’okutenda kutsigaho amaka gaabo, nibakira kujumwa n’okushekyererwa abanyabuzaare baabo abarikubareeba nk’abaine obujunaanizibwa bw’okubareeberera. Abamwe nibagira ngu nibaba batarikubakunda. (Enf. 19:6, 7) Kwonka nabwo, Anna muhara wa Eduardo naagira ati: “Ku turikuguma nitwebembeza eby’omwoyo omu mwanya gw’eby’obutungi, abanyabuzaare abamwe nibabaasa kukireeba ngu okuba Omukristaayo nitukitwara nka kikuru. Ekyo tibaakubaasize kukimanya ku ogire ngu nitwikiriza kukora ebi barikwenda.”​—Gyeragyeranisa na 1 Petero 3:1, 2.

IKIRIRIZA OMURI RUHANGA

16. (a) Omuntu naabaasa kwebeiha ata arikugira emiteekateekyere egwire? (Yak. 1:22) (b) Ni kucwamu kwa muringo ki oku Yehova arikuha omugisha?

¹⁶ Bwanyima y’okuhika omu ihanga erindi atari na iba n’abaana be, munyaanyazi-itwe omwe akagambira abareeberezi ati: “Tukaba twine kugira ebi twayefeerereza kumbaasisa kwija aha. Ibanyi akabanza yaarekyera aho kuheereza nk’omureeberezi. N’ahabw’ekyo ninteekateeka ngu Yehova naija kutuha omugisha.” Abo abarikwesiga Yehova baaba baine eky’okucwamu naabaha omugisha. Kwonka shi naabaasa kuha omugisha abo abarikucwamu ebirikutaana n’ebi arikukunda na munonga byaba nibitwariramu obuheereza oburikwera?​—Shoma Abaheburaayo 11:6; 1 Yohaana 5:13-15.

17. Ahabw’enki twine kushaba Yehova obuhabuzi tutakacwiremu, kandi nitubaasa kukikora tuta?

¹⁷ Sherura obuhabuzi bwa Yehova otakacwiremu nari otakaikiriize kugira eki waakora, beitu kutari kubanza waacwamu. Mushabe kukuha omwoyo gwe gurikwera, obwengye, n’obuhabuzi. (2 Tim. 1:7) Yebuuze oti: ‘Mbwenu shi nyetebeekaniise kwefeerereza ekintu kyona kugira ngu mbaase kuheereza Yehova? Nimbaasa kukora ekyo, n’obu naakuba nimpiiganisibwa?’ Kyaba nikwo kiri, oyetebeekaniise n’okumworobera n’obu kyakuba nikyetengyesa okukora emirimo ey’ahansi? (Luk. 14:33) Shaba abareeberezi bakuhe obuhabuzi kuruga omu Byahandiikirwe, kandi oyorekye ngu nooyesiga Yehova kukuhwera orikugyendera aha buhabuzi bwe. Abareeberezi tibarikubaasa kukucweramu, kwonka nibabaasa kukuhwera kucwamu ebiraakureetere kushemererwa.​—2 Kor. 1:24.

18. N’oha oine obujunaanizibwa bw’okureeberera eka, kandi abandi nibabaasa kuhwera bata?

¹⁸ Yehova naayenda ngu emitwe y’eka bareeberere amaka gaabo. Tushemereire kusiima kandi tukashabira abo abarikuhikiiriza obujunaanizibwa obwo batarikutsigaho abu bari nabo omu bushwere nari abaana baabo, n’obu baraabe nibagyemeserezibwa kukikora. Haabaho ebihikiirizi nari omuntu orikwetenga obujanjabi ahonaaho, omu mbeera nk’ezo nituba twine omugisha gw’okworekana rukundo. (Gal. 6:2, 5; 1 Pet. 3:8) Mbwenu shi noobaasa kugira esente ezi waahayo kuhwera, nari noobaasa kugira ow’eishe-emwe ou waahwera kutunga omurimo omu kicweka kyanyu? Kyaba kityo, nikiija kumuhwera kutuubya aha kugyemeserezibwa oku arikubaasa kuba aine ngu atsigyeho eka ye aze kusherura omurimo ahandi.​—Enf. 3:27, 28; 1 Yoh. 3:17.

IJUKA NGU YEHOVA NIWE MUHWEZI WAAWE!

19, 20. Ahabw’enki Abakristaayo nibabaasa kugira obuhame ngu Yehova naija kubahwera?

¹⁹ Ekyahandiikirwe nikituhiga kiti: “Mutarigira omutima ogurikukunda empiiha, ebi mwine bibe nibyo byabamara; ahakuba We akagira ati: Tindikutsigaho, kandi tindikuhemukaho na kakye. Nikyo turikugambira, tutarikubanganisa, tuti: Mukama niwe muhwezi wangye, tinditiina; omuntu naabaasa kungira ata?” (Heb. 13:5, 6) Mbwenu shi obuhabuzi obu noobaasa kubugyenderaho ota?

²⁰ “Abantu nibakira kugira ngu Abajurizi ba Yehova n’abantu abaine okushemererwa,” nikwo omureeberezi omwe kuruga omu ihanga erikirikutunguuka arikugira. “Kandi nibareeba ngu n’Abajurizi ba Yehova abooro, nibaba bajwaire gye kandi barikureebeka gye kukira abandi bantu.” Eki nikihikaana n’eki Yesu yaaraganiise abo abarikwebembeza eby’Obukama. (Mat. 6:28-30, 33) Buzima Yehova Tataitwe ow’omu iguru naakukunda kandi naakwendeza ebirungi hamwe n’abaana baawe. “Ahabw’okuba amaisho ga MUKAMA gairuka oku n’oku nigabuga ensi yoona, okweyoreka ku ari ow’amaani kuhwera abaine emitima eshugaine ahariwe.” (2 Bus.16:9) Atuhaire ebiragiro bye, otwariiremu ebirikukwata aha maka n’ebintu ebirikwetengyesa ahabw’oburungi bwaitu. Twabikuratira, nitworeka ngu nitumukunda kandi ngu nitumwesiga. “Oku nikwo kukunda Ruhanga, itwe okworobera ebiragiro bye; kandi ebiragiro bye tibirusya.”​—1 Yoh. 5:3.

21, 22. Ahabw’enki omaririire kwesiga Yehova?

²¹ Eduardo naagira ati: “Ninkimanya ngu obwire obu naamazire ndi hare n’omukazi wangye n’abaana bangye tindibugaruraho,” kwonka “tindikuguma ninyefuuza. Baingi ahari banywani bangye n’abagaiga kwonka tibashemereirwe. Amaka gaabo garimu oburemeezi bw’amaani. Kwonka eka yaitu eshemereirwe munonga. Kandi ninshemererwa munonga kureeba ab’eishe-emwe omu ihanga eri n’obu baraabe bari abooro, barikwebembeza eby’omwoyo. Twena nitureeba okuhikiirira kw’ebi Yesu yaaraganiise.”​—Shoma Matayo 6:33.

²² Gira obumanzi. Cwamu kworobera Yehova kandi omwesigye. Yeyongyere kukunda Ruhanga, ou ori nawe omu bushwere, n’abaana baawe kikubaasise kuhikiiriza obujunaanizibwa bwawe obw’eby’omwoyo. N’ekiraarugyemu, noija kureeba ngu Yehova n’omuhwezi waawe.