EISHOMO 34
Nitubaasa Kworeka Tuta ngu Nitukunda Yehova?
Kuruga obu waatandika kwega Baibuli nooreeba ngu oyongyeire kukunda Ruhanga? Nooyenda kugumizamu noohamya omukago gwawe nawe? Kyaba nikwo kiri, ijuka ngu Yehova yaareeba nooyongyera kumukunda, nawe naayongyera kukukunda n’okukufaho. Noobaasa kworeka ota ngu noomukunda?
1. Nitworeka tuta ngu nitukunda Yehova?
Nitworeka ngu nitukunda Yehova turikumworobera. (Shoma 1 Yohaana 5:3.) Tarikugyema muntu weena kumworobera. Kureka, naaha buri omwe ahariitwe omugisha gw’okwecweramu kumworobera nari kwanga. Ahabw’enki? Yehova naayenda ngu ‘tumworobere omu mitima yaitu.’ (Abarooma 6:17) Ekirikumanyisa ngu, tarikwenda omworobere ahabw’okugyemwa, beitu ahabw’okumukunda. Ekicweka 3 na 4 eby’ekitabo eki bitebeekanisiibwe kukuhwera kworeka ngu nookunda Yehova orikukora ebirikumushemeza, kandi orikwetantara ebirikumugwisa kubi.
2. Ahabw’enki kirikubaasa kuguma kworeka ngu nitukunda Yehova?
“Ebibonabono by’ohikiriire ni bingi.” (Zaaburi 34:19) Twena nituteganisibwa obutahikiirira bwaitu. Kandi hariho oburemeezi bw’eby’entaatsya, obutari buringaaniza, n’obundi buremeezi. Twaba twine oburemeezi, nikibaasa kutugumira kukora ebi Yehova arikwenda. Eki nikibaho ahabw’okugira ngu nikibaasa kworoba kukora ekigwire. Kwonka waaba omwesigwa okakora eki Yehova arikukugambira, nooyoreka ngu noomukunda kukira ekindi kintu kyona. Kandi noohamya ngu omuhamiireho. N’ekirikurugamu, nawe naija kukuhamiraho. Tarikwija kukutsigaho.—Shoma Zaaburi 4:3.
SHWIJUMA GYE
Shwijuma oreebe ahabw’enki ni kikuru kworobera Yehova, kandi omanye n’ekirikubaasa kukuhwera kuguma ori omwesigwa.
3. Enshonga erikutwariramu naiwe
Kurugiirira aha kitabo kya Yobu, Sitaane akoomesereza Yobu n’abantu boona abarikwenda kuheereza Yehova. Shoma Yobu 1:1, 6–2:10, kubaasa kugarukamu ebibuuzo ebi:
Sitaane akagira ngu Yobu akaba naayorobera Yehova ahabwa nshonga ki?—Reeba Yobu 1:9-11.
Sitaane naabeiherera ata abantu boona, otwariiremu naiwe?—Reeba Yobu 2:4.
Shoma Yobu 27:5b, kubaasa kugarukamu ekibuuzo eki:
Yobu akahamya ata ngu buzima naakunda Yehova?
Yobu akooreka ngu naakunda Yehova arikuguma amuhamiireho
Nitworeka ngu nitukunda Yehova turikuguma tumuhamiireho
4. Reetera omutima gwa Yehova kushemererwa
Shoma Enfumu 27:11, kubaasa kugarukamu ebibuuzo ebi:
Yehova naayehurira ata waaba omunyabwengye kandi okamworobera? Ahabw’enki naayehurira atyo?
5. Noobaasa kuguma ohamiire ahari Yehova
Rukundo ei twiniire Yehova neetuhiga kugambira abandi ebirikumukwataho. Okumuhamiraho kwaitu nikutuhiga kukikora n’obu kirikuba kitoorobi. Zaana VIDIYO, kubaasa kugarukamu ebibuuzo ebirikukurataho.
Hariho shi obu orikugumirwa kugambira abandi ebirikukwata ahari Yehova?
Omu vidiyo, niki ekyahweraire Grayson kusingura okutiina?
Twaba nitukunda ebi Yehova arikukunda kandi tukanga ebi arikwanga nikiija kutworobera kumuhamiraho. Shoma Zaaburi 97:10, kubaasa kugarukamu ebibuuzo ebi:
Kurugiirira aha bi waayega, ni bintu ki ebindi ebi Yehova arikukunda? Ni bintu ki ebi arikwanga?
Noobaasa kwega ota kukunda ebirungi kandi okanga ebibi?
6. Nitugasirwa twayorobera Yehova
Okworobera Yehova butoosha ni kirungi. Shoma Isaaya 48:17, 18, reero ogarukyemu ebibuuzo ebi:
Ahabw’enki turikubaasa kuhamya ngu Yehova butoosha naamanya ebirikutugasira?
Ogasiirwe ota omu kwega Baibuli n’ebirikukwata ahari Yehova Ruhanga ow’amazima?
ABAMWE NIBAGIRA NGU: “Ebi ndikukora tibirikukwata ahari Ruhanga.”
Noobaasa kukoresa kyahandiikirwe ki kworeka ngu Yehova naafayo aha bi turikukora?
OMU BUGUFU
Noobaasa kworeka ngu nookunda Yehova orikumworobera, kandi orikuguma omuhamiireho n’obu waakuba oine oburemeezi.
Okweijutsya
Waayegyera ki ahari Yobu?
Noija kworeka ota ngu nookunda Yehova?
Niki ekirikwija kukuhwera kuguma ohamiire ahari Yehova?
JUMBURA EBINDI
Manya oku orikubaasa kuguma ohamiire ahari Yehova n’ekibiina eki orimu.
Yongyera kumanya oku Sitaane arikwomesereza abantu.
“Yobu Akarinda Obwesigwa” (Baibuli Erimu Butumwa Ki? ekicweka 6)
Reeba n’oku abato barikubaasa kworeka ngu nibakunda Yehova.
Omunyeeto orikugyemeserezibwa ab’orwingano rwe naabaasa kuguma ahamiire ata ahari Ruhanga?