EISHOMO 38
Siima Ekiconco ky’Amagara
Twaba twine amagara nitubaasa kukora ebintu bingi. N’obu twakuba twine oburemeezi, nabwo hariho ebirikushemeza ebi turikubaasa kukora. Nitubaasa kworeka tuta ngu nitusiima ekiconco ky’amagara? Kandi ni nshonga ki enkuru erikutureetera kusiima ekiconco eki?
1. Ahabw’enki twine kutwara amagara nk’ag’omuhendo?
Twine kutwara amagara nk’ag’omuhendo ahakuba n’ekiconco kuruga ahari Tataitwe ow’omu iguru Yehova. Niwe ‘nshuro y’amagara,’ ekirikumanyisa ngu niwe yaagahangire. (Zaaburi 36:9) ‘Niwe wenka orikuha abantu boona amagara n’omwitsyo na buri kintu kyona.’ (Ebyakozirwe 17:25, 28) Yehova naatuha ebirikutubaasisa kuba abahuriire. Kwonka okukira ahari ekyo, naatubaasisa kwesiimira omu kugira amagara.—Shoma Ebyakozirwe 14:17.
2. Nitubaasa kworeka Yehova tuta ngu nitusiima ekiconco ky’amagara?
Kuruga obu waabaire ori omunda, Yehova akakureeberera. Daudi omwe aha baheereza be, akagira ati: ‘Amaisho gaawe gakandeebera omunda, nkiri amaizi.’ (Zaaburi 139:16) Amagara gaawe n’ag’omuhendo ahari Yehova. (Shoma Matayo 10:29-31.) Nikimureetera obusaasi bwingi omuntu yaita nkana mugyenzi we, nari yaayeita.a (Okuruga 20:13) Kandi nabwo nikimureetera obusaasi twata amagara gaitu omu kabi, nari twaba tutagizire eki twakora kurinda amagara g’abandi. Twareeberera gye amagara gaitu kandi tukafayo n’aha g’abandi, nitworeka ngu nitusiima ekiconco ky’omuhendo eki.
SHWIJUMA GYE
Reeba oku orikubaasa kworeka ngu noosiima ekiconco ky’amagara.
3. Reeberera gye amagara gaawe
Abakristaayo abeehaireyo ahari Yehova nibakoresa buri mugisha gwona kumuheereza. Nibaba bari nk’abarikuhayo emibiri yaabo nk’ekitambo ahari Ruhanga. Shoma Abarooma 12:1, 2, kubaasa kugarukamu ebibuuzo ebi:
Niki ekishemereire kukuhiga kureeberera gye amagara gaawe?
Ni miringo ki emwe ei orikubaasa kukikoramu?
4. Teeraho kwerinda obuhuta nari okufa
Baibuli neetuhiga kwetantara ebikorwa by’akabi. Zaana VIDIYO kumanya ebintu ebimwe ebi orikubaasa kukora kuguma ori buhooro.
Shoma Enfumu 22:3, reero oreebe oku iwe n’abandi murikubaasa kwerinda . . .
omu ka yaanyu.
aha murimo.
omu kuzaana emizaano.
omu kuvuga emotoka nari omu kugigyenderamu.
5. Fayo aha magara g’omwana otakazairwe
Daudi akagamba nk’orikutongyerera kworeka oku Yehova arikufayo aha magara, n’oku omwana arikukurira omunda. Shoma Zaaburi 139:13-17, kubaasa kugarukamu ekibuuzo eki:
Kurugiirira ahari Yehova, amagara g’omuntu nigatandikira aha kutwara enda, nari aha kuzaarwa?
Ebiragiro ebi Yehova yaahaire Abaisraeli ira bikaba nibirinda abakazi n’abaana baabo abakiri omunda. Shoma Okuruga 21:22, 23, kubaasa kugarukamu ebibuuzo ebi:
Yehova akaba naareeba ata omuntu owaareetera omukazi kurugwamu enda atakigyendereire?
Akaba naayehurira ata omuntu yaakikora akigyendereire?b
Nooreeba ota emiteekateekyere ya Yehova egyo?
Nangwa n’omukazi orikumanya ngu amagara n’ag’omuhendo naabaasa kuteekateeka ngu taine kindi ky’okukora kureka okwihamu enda. Shoma Isaaya 41:10, kubaasa kugarukamu ebibuuzo ebi:
Omukazi yaaba naagyemeserezibwa kwihamu enda, n’oha ou aine kushaba obuhwezi? Ahabw’enki?
ABAMWE NIBAGIRA NGU: “Omukazi aine obugabe bw’okucwamu kwihamu enda, ahakuba omubiri n’ogwe.”
Niki ekirikukuhamiza ngu Yehova naafayo aha magara g’omukazi n’omwana we otakazairwe?
OMU BUGUFU
Baibuli neetwegyesa kukunda ekiconco eki Yehova yaatuhaire eky’amagara, okugaha ekitiinisa, n’okugarinda. Eki nikitwariramu amagara agaitu n’ag’abandi.
Okweijutsya
Ahabw’enki amagara g’omuntu n’ag’omuhendo ahari Yehova?
Yehova naayehurira ata omuntu yaita mugyenzi we akigyendereire?
Niki eki orikusiima aha kiconco ky’amagara?
JUMBURA EBINDI
Nitubaasa kwebaza tuta Yehova ahabw’ekiconco ky’amagara?
Tunga eky’okugarukamu ky’ekibuuzo eki: Ruhanga shi naabaasa kusaasira omukazi owaihiremu enda ira?
Eki Ruhanga arikugamba aha magara kishemereire kukureetera kutoorana eby’okweshemeza ebirungi.
“Oine Kwejumba omu Mizaano y’Okurengyesereza ey’Akabi?” (Awake!, Okitoba 8, 2000)
Omuntu shi ku yaakuba aine ebiteekateeko by’okwenda kweita? Yetegyereze oku Baibuli erikubaasa kumuhwera.
“Baibuli shi Neebaasa Kumpwera Naaba Niinyenda Kweita?” (Eky’aha mukura)
a Yehova naafayo munonga aha baine omutima oguhendekire. (Zaaburi 34:18) Naayetegyereza obusaasi bwabo oburikubareetera kugira ebiteekateeko by’okwenda kweita, kandi naaba naayenda kubahwera. Kureeba oku orikubaasa kugasirwa omu buhwezi bwe, shoma ekicweka “Baibuli shi Neebaasa Kumpwera Naaba Niinyenda Kweita?” ekiri omuri Jumbura Ebindi omu ishomo eri.
b Abaihiremu enda tibaine kweshinja ekirenga, Yehova naabaasa kubasaasira. Kumanya ebirikukiraho, reeba ekicweka “Baibuli Neegamba ki aha Kwihamu Enda?” omuri Jumbura Ebindi omu ishomo eri.