Hindura Ebi Yehova Arikutwijutsya Okushemererwa Kw’omutima Gwawe

1. (a) Ni miringo ki ei abantu barikutwazamu baaheebwa obuhabuzi, kandi ahabw’enki? (b) Amaryo nigareetera omuntu kutwara ata obuhabuzi?

ABANTU nibatwaza omu miringo etarikushushana baatunga obuhabuzi. Omuntu orikukukira yaakuha obuhabuzi noobaasa kubugyenderaho, kwonka ou orikwingana nawe nari ou orikureeba nk’ow’ahansi yaakuhabura noobaasa kwanga. Kandi baahanwa, nabwo nibatwaza omu miringo etarikushushana. Nibabaasa kugira amaganya, kuguubwa kubi, kuhemuka, kutamanya eky’okukora kandi abandi nibabaasa kubugyenderaho. Ahabw’enki abantu nibatwaza omu miringo etarikushushana? Enshonga emwe erikureeta ekyo, n’amaryo. Buzima amaryo nigabaasa kureetera omuntu kucwamu kubi, ayange obuhabuzi obwakubaire nibumugasira.​—Enf. 16:18.

2. Ahabw’enki Abakristaayo nibasiima obuhabuzi oburikuruga omu Kigambo kya Ruhanga?

² Kwonka, Abakristaayo ab’amazima nibasiima obuhabuzi burungi, na munonga bwaba niburuga omu Kigambo kya Ruhanga. Ebi Yehova arikutwijutsya nibituhwera kwetegyereza, bitwegyesa, kandi bituhwera kwetantara emitego nk’okusherura eby’obutungi, obushambani, okukoresa emibazi y’ekitabura bwongo n’okukoresa kubi amaarwa. (Enf. 20:1; 2 Kor. 7:1; 1 Tes. 4:3-5; 1 Tim. 6:6-11) Kandi nitushemererwa “ahabw’obunanukye bw’omu mutima” obu turikutunga ahabw’okworobera obuhabuzi bwa Ruhanga.​—Isa. 65:14.

3. Ni miteekateekyere ki nk’ey’omuhandiiki wa Zaaburi ei turikubaasa kutooreza?

³ Kubaasa kuguma twine omukago murungi na Yehova, twine kugumizamu nitugyendera aha buhabuzi bwe. Ka nikiba kirungi twagira emiteekateekyere nk’ey’omuhandiiki wa Zaaburi owaagizire ati: “Ebi waahamize nibwo buhunguzi bwangye ebiro byona; buzima nibyo omutima gwangye gushemerererwa”! (Zab. 119:111) Mbwenu shi naitwe nitusiima ebiragiro bya Yehova, nari obumwe nitubireeba nk’ebigumire? Ku turaabe obumwe nituguubwa kubi ahabw’obuhabuzi obu turikutunga, titushemereire kuhwamu amaani. Twayorobera ebiragiro bya Ruhanga, butoosha niharugamu ebirungi! Ka tureebe emiringo eshatu.

HAMYA OBWESIGYE BWAWE KURABIRA OMU KUSHABA

4. N’obu Daudi araabe yaatungire oburemeezi, niki eki yaagumire naakora?

⁴ Omugabe Daudi akaba atunga oburemeezi, kwonka akaguma naayesiga Yehova. Akagira ati: “Ai MUKAMA, niiwe nyimukiza omutima. Ai Ruhanga wangye, niiwe nyesiga.” (Zab. 25:1, 2) Niki ekyahwereire Daudi kugira obwesigye nk’obwo omuri Yehova?

5, 6. Baibuli neegamba ki aha mukago gwa Daudi na Yehova?

⁵ Abantu baingi nibashaba Ruhanga obu barikuba baine oburemeezi. Ni nk’oku waakuba oine munywani waawe orikugamba naiwe yaaba naayenda ngu omuhe sente nari yaaba naayenda ngu ogire eki waamukorera. Haahinguraho obwire, noobaasa kutandika kubangaanisa yaaba naakukunda. Kwonka Daudi akaba atari atyo. Ebiro by’amagara ge byona, omu bwire burungi n’obubi, akooreka ngu naakundira kimwe Ruhanga kandi ngu naamwesiga.​—Zab. 40:8.

⁶ Daudi akahimbisa kandi yaasiima Yehova ati: “Ai MUKAMA, Mukama waitu, eiziina ryawe ka ni rirungi omu nsi yoona! Okata ekitiinisa kyawe ahaiguru y’eiguru.” (Zab. 8:1) Kuruga omu bigambo bya Daudi nitubaasa kuhamya ngu akaba aine omukago murungi na Ruhanga. Amaani ga Ruhanga n’ekitiinisa kye bikashemeza Daudi kyamureetera kuguma naamuhimbisa “eizooba ryona.”​—Zab. 35:28.

7. Nitugasirwa tuta twirira haihi Ruhanga kurabira omu kushaba?

⁷ Nka Daudi, twine kushaba Yehova obutoosha kubaasa kwongyera kumwesiga. Baibuli neegira eti: “Mwirire haihi Ruhanga, nawe abone kubairira haihi.” (Yak. 4:8) Okwirira haihi Ruhanga kurabira omu kushaba n’omuringo mukuru gw’okutungamu omwoyo gurikwera.​—Shoma 1 Yohaana 3:22.

8. Ahabw’enki twine kwetantara okugarukagaruka omu bigambo twaba nitushaba?

⁸ Ku orikuba nooshaba noogarukagaruka omu bigambo? Ku kiraabe nikwo kiri, waaba nooza kushaba, gira obwire oteekateekye aha bi orikwenda kugamba. Mbwenu shi waaguma noogarukagaruka omu bigambo orikugamba na munywani waawe, ekyo kikamushemeza? Naabaasa kutandika kutakuhurikiza. Buzima, Yehova tarikubaasa kwanga kugarukamu okushaba kw’abaheereza be abeesigwa. Kwonka twaba nitumushaba, twine kwetantara omuze gw’okugarukagaruka omu bigambo.

9, 10. (a) Ni bintu ki ebi turikubaasa kushaba? (b) Niki ekirikubaasa kutuhwera kushaba twihire aha mutima?

⁹ Hatariho kubanganisa, twaba nitwenda kwirira haihi Ruhanga titushemereire kuguma nitukoresa ebigambo nibyo bimwe buri kushaba. Oku turaayeyongyere kugambira Yehova ebi turi aha mutima, nikwo turaayeyongyere kumwirira haihi kandi tukeeyongyera kumwesiga. Ni bintu ki ebi turikubaasa kushaba? Ekigambo kya Ruhanga nikigarukamu kiti: “Omuri byona mumanyise Ruhanga ebi murikwetenga omu kushaba n’okweshengyereza, kandi musiime.” (Fil. 4:6) Buri kintu kyona ekirikukwata aha mukago gwaitu na Ruhanga, nari ahariitwe nk’abaheereza be nikiba kihikire kukimushaba.

¹⁰ Ni kikuru kushwijuma ebigambo by’abashaija n’abakazi abeesigwa abu okushaba kwabo kwahandiikirwe omu Baibuli. (1 Sam. 1:10, 11; Byak. 4:24-31) Ekitabo kya Zaaburi kirimu okushaba n’ebyeshongoro by’abantu baingi abaabaire bagambira Yehova enyehurira zaabo. Enyehurira ezi, nizitwariramu okushemererwa n’obusaasi. Okushwijuma ebigambo ebyagambirwe abantu nk’abo abeesigwa, nikibaasa kutuhwera kushaba Yehova omu muringo ogu arikusiima.

TEEKATEEKA MUNONGA AHA BI RUHANGA ARIKUTWIJUTSYA

11. Ahabw’enki twine kuteekateeka aha buhabuzi bwa Ruhanga?

¹¹ Daudi akagira ati: “Ebi MUKAMA yaahamize n’eby’okwesigwa, biha obwengye otabwine.” (Zab. 19:7) Buzima n’obu twakuba tutarikumanya bingi, nitubaasa kuhinduka abanyabwengye twayorobera ebiragiro bya Ruhanga. Twaba turi ab’okugasirwa gye omu buhabuzi kuruga omu Byahandiikirwe, twine kubuteekateekaho. Eki nikibaasa kutuhwera kuguma turi abeesigwa aha murimo, aha ishomero, kworobera omutindo ogurikukwata aha shagama, okutejwanzya omu by’obutegyeki n’okworobera emitindo erikukwata aha by’enjwara n’okweboneza. Okuteekateeka aha buhabuzi bwa Ruhanga nikiija kutubaasisa kwetebeekanisiza oburemeezi oburikubaasa kubaho. Eki nikiija kutuhwera kucwamu kare eki turaakore oburemeezi nk’obwo butakabaireho. Okwetebeekanisa nk’okwo nikubaasa kutuhwera kwetantara oburemeezi bwingi.​—Enf. 15:28.

12. Niki ekirikubaasa kutuhwera kuguma nitwijuka obuhabuzi bwa Ruhanga?

¹² Obu tutegyereize ebiraganiso bya Ruhanga, nitukyoreka ngu omukago gwaitu nawe, nigwo mukuru munonga? Nk’eky’okureeberaho, buzima nitwikiriza ngu Babulooni Orukuru ruri haihi kucwekyerezibwa? Emigisha eraabeho omu biro by’omumaisho nk’okutunga amagara agatahwaho omu nsi, ekiri eyaabuzima ahariiwe nk’obu waagyega? Tukiine omujinya omu kubuurira nari nitwebembeza ebi turikwetenga? Kandi shi amatsiko g’okuzooka, okweza eiziina rya Ruhanga, n’okuguma nitumanya ngu niwe ahikire kutegyeka byona? Ebyo byona nitukibitwara nka bikuru? Okuteekateeka aha bibuuzo nk’ebyo, nikibaasa kutuhwera kugamba nk’oku omuhandiiki wa Zaaburi yaagambire ahari Ruhanga ati: “Ebi waahamize nibwo buhunguzi bwangye ebiro byona.”​—Zab. 119:111.

13. Ahabw’enki Abakristaayo omu kyasha ky’okubanza baashangire ebintu ebimwe bigumire kwetegyereza? Ha eky’okureeberaho.

¹³ Ebimwe ebiri omu Baibuli nitubaasa kuba tutarikubyetegyereza gye ahabw’okugira ngu Ruhanga takabitushoboororeire. Emirundi mingi Yesu akaba agambira entumwa ze ngu aine kubonabonesibwa kandi akaitwa. (Shoma Matayo 12:40; 16:21.) Kwonka bakaba bateetegyereza eki arikumanyisa. Bakaija kukyetegyereza yaaheza kuzooka akabeeyoreka, ‘akashuuruura obwengye bwabo, ngu bashoborokyerwe Ebyahandiikirwe.’ (Luk. 24:44-46; Byak. 1:3) Nikyo kimwe, Pentekoote 33 gutakahikire obu abakuratsi ba Kristo baashukwaho omwoyo gurikwera, bakaba batarikwetegyereza ngu Obukama bwa Ruhanga nibwija kutandika kutegyekyera omu iguru.​—Byak. 1:6-8.

14. Aha kutandika kw’ekyasha kya 20, ab’eishe-emwe baingi bakataho ky’okureeberaho ki ekirungi, n’obu baraabe baabaire batarikwetegyereza gye ebirikukukwata aha biro by’emperu?

¹⁴ Aha kutandika kw’ekyasha kya 20, Abakristaayo ab’amazima bakaba nibabangaanisa aha bikwatiraine ‘n’ebiro by’emperu.’ (2 Tim. 3:1) Nk’eky’okureeberaho, abamwe bakaba nibamanya ngu omuri 1914, hatariho kubangaanisa nibaija kutwarwa omu iguru. Ahabw’okugira ngu ekigyendererwa kyabo tikirahikiriire nk’oku baabaire nibateekateeka, bakagaruka baashwijuma Ebyahandiikirwe kyabahwera kumanya ngu bakaba bakiine omurimo muhango gw’okubuurira. (Mak. 13:10) N’ahabw’ekyo, omuri 1922, J. F. Rutherford, owaabaire naayebembera okubuurira obwire obwo, akagambira abaabaire bari aha ruteerane oruhango omuri U.S.A. Ohio, Cedar Point, ati: “Mureebe, Omugabe naategyeka! Niimwe mutoorainwe kuranga ebirikumukwataho. N’ahabw’ekyo murangye, murangye, murangye, omugabe n’obugabe bwe.” Kuruga obwo, okubuurira amakuru marungi g’obukama niko katwire kari akamanyiso kakuru k’Abajurizi ba Yehova.​—Mat. 4:23; 24:14.

15. Nitugasirwa tuta twateekateeka aha muringo murungi ogu Yehova atwire naakoraganamu n’abaheereza be?

¹⁵ Twateekateeka aha muringo murungi ogu Yehova atwire naakoraganamu n’abaheereza be, nitweyongyera kumwesiga ngu naija kuhikiiriza ekigyendererwa kye aha biro by’omumaisho. Kandi ebi Ruhanga arikutwijutsya, nibituhwera kuguma nitwijuka obunabi bwe oburi haihi kuhikiirizibwa. Twakora ekyo, nitwija kwesiga ebiraganiso bye.

HAMYA OKWIKIRIZA KWAWE KURABIRA OMU KURAMYA

16. Ni birungi ki ebirikuruga omu kuba abeeziriki omu buheereza?

¹⁶ Yehova ni Ruhanga oine amaani maingi kandi naagooreka omu bi arikukora. Omuhandiiki wa Zaaburi arikugamba ahari Yehova akabuuza ati: “N’oha ow’obushoboorozi nkaiwe?” Akongyeraho ati: “Omukono gwawe n’ogw’amaani, omukono gwa buryo gubangirwe.” (Zab. 89:8, 13) Yehova naatusiima kandi atuha omugisha omu kuteeraho kwaitu kwebembeza eby’Obukama. Naareeba ngu abaheereza be abato n’abakuru abashaija n’abakazi ‘tibaariira koya.’ (Enf. 31:27) Nitutooreza Omuhangi waitu, turikuguma twine bingi by’okukora omu buheereza. Twaheereza Ruhanga n’omutima gwaitu gwona, nitwija kushemererwa kandi tumushemeze.​—Shoma Zaaburi 62:12.

17, 18. Ahabw’enki turikubaasa kugira ngu okwikiriza nikubaasa kutuhwera kwesiga obuhabuzi bwa Yehova? Ha eky’okureeberaho.

¹⁷ Ni mu muringo ki ogu okwikiriza kurikutuhwera kwesiga Yehova? Teekateeka aha byabaire aha Baisraeli barikutaaha omu nsi Eyaaraganisiibwe. Yehova akaba aragiire abanyamurwa abaabaire nibaheeka eshanduukye y’endagaano kuribata omu Mugyera Yorudaani. Kwonka ku baahikire aha mugyera, baareeba amaizi gaijuriire kimwe ahabw’enjura nyingi eyaabaire neegwa. Abaisraeli bakaba baine kukora ki? Mbwenu shi bakaba baine kushutama aha nkungu y’omugyera kumara obwire buraingwa kugira ngu amaizi gabanze gatuube? Ngaaha, bakeesiga Yehova kandi baakuratira obuhabuzi bwe. Niki ekyarugiremu? Ekyahandiikirwe nikigira kiti: ‘Abanyamurwa abaheekire eshanduukye y’endagaano ku baahikire ahari Yorudani, baahitsya ebigyere byabo omu maizi, gaayemerera, gaayerunda hamwe . . . abantu baayambuka bagyemire Yeriko.’ (Yos. 3:12-17) Teekateeka aha ku kyabaire nikishemeza kureeba amaizi agaabaire nigairuka, garikwemerera ahonaaho! Buzima, Abaisraeli bakeyongyera kwikiririza omuri Yehova ahabw’okugira ngu bakakuratira obuhabuzi bwe.

¹⁸ N’eky’amazima, Yehova tarikukora by’okutangaaza nk’ebyo obunaku obu, kwonka naaha abaheereza be emigisha ahabw’okwikiriza kwabo. Omwoyo gwa Ruhanga ogurikwera nigubaha amaani g’okubuurira amakuru g’Obukama omu nsi yoona. Kandi Yesu Kristo omujurizi wa Yehova omukuru yaaheza kuzooka, akahamiza abeegi be ngu naija kuguma naabashagika omu murimo mukuru ogu. Akagira ati: “Mugyende omu mahanga goona, muhindure abantu abeegi . . . ndi hamwe naimwe ebiro byona okuhitsya obu ensi egi erihwaho.” (Mat. 28:19, 20) Abajurizi ba Yehova baingi abaabaire baine enshoni nari barikutiina nibabaasa kutuhamiza oku omwoyo gwa Ruhanga ogurikwera gwababaasiise kugira obumanzi kubuurira abantu.​—Shoma Zaaburi 119:46; 2 Abakorinso 4:7.

19. N’obu embeera zaitu zaakuba zitarikutubaasisa kukora bingi, twine buhame ki?

¹⁹ Ab’eishe-emwe abamwe na banyaanyazi-itwe tibarikubaasa kukora bingi ahabwa bukuru nari endwara ezi baine. Kwonka nibabaasa kuhamya ngu “tataitwe ow’okusaasira, kandi Ruhanga ow’okuhuumuza kwona” naamanya embeera ya buri Mukristaayo. (2 Kor. 1:3) Naasiima byona ebi turikukora kushagika Obukama. Twena twine kuguma nitwijuka ngu okwikiririza omu kitambo kya Kristo, nikituhwera kugira amatsiko g’amagara agatahwaho, turikukora kyona eki embeera zaitu zirikutubaasisa.​—Heb. 10:39.

20, 21. Nitubaasa kworeka tuta ngu nitwesiga Yehova?

²⁰ Okuramya kwaitu nikutwariramu okukoresa obwire bwaitu, amaani n’ebintu byaitu nk’oku kirikubaasika. Nitwenda ‘kukora omurimo gw’omubuurizi w’engiri’ n’omutima gwaitu gwona. (2 Tim. 4:5) Buzima nituba twine ekihika ky’okukora omurimo ogwo, ahakuba niguhwera abandi ‘kumanyira kimwe amazima.’ (1 Tim. 2:4) Okuha Yehova ekitiinisa n’okumuhimbisa nikitureetera kutunga emigisha omu by’omwoyo. (Enf. 10:22) Kandi nikituhwera kwongyera kugira omukago guhami n’Omuhangi waitu n’okumwesiga.​—Rom. 8:35-39.

²¹ Nk’oku twaheza kureeba, okwesiga obuhabuzi bwa Yehova nikyetengyesa okukora n’amaani. N’ahabw’ekyo, yesigye Yehova kurabira omu kushaba. Teekateeka aha ku Yehova yaahikiriize ekigyendererwa kye ira, n’oku arikwija kukihikiiriza omu biro by’omumaisho. Kandi yeyongyere kwesiga Yehova kurabira omu kumuramya. Hatariho kubangaanisa, obuhabuzi bwa Yehova nibwija kugumaho ebiro byona. Naiwe waaguma noobugyenderaho, noija kugumaho ebiro byona!