Amakuru Marungi ag’Abantu Boona

Okuzooka kwa Yesu kukahwera abeegi be kubuurira baine omujinya n’obuhame. Entumwa Paulo akagyenda omuri Asia na Mediterranean, arikutandikaho ebibiina arikuhwera n’Abakristaayo kwemera okuhiiganisibwa. N’obu haraabe haabaire hariho okuhiiganisibwa, Abakristaayo bakeyongyera kukanya.

Bwanyima Paulo bakamuta omu kihome. Kwonka nabwo, akahandiika amabaruha arikugumya ebibiina kandi arikubiha n’obuhabuzi. Akarabura ngu hakaba nihaija kubaho abaraayehagure aha mazima. Paulo arikuhwerwa omwoyo gwa Ruhanga ogurikwera, akeetegyereza ngu “emishega eshuugire” nibo bantu “abarikugamba eby’obuhabe”, bakaataahire omu kibiina Ekikristaayo kuhabisa “abeegi ngu babakurate.”​—Ebyakozirwe 20:29, 30.

Aha muheru gw’ekyasha ky’okubanza, abamwe nibwo baatandika kwehagura aha mazima. Haihi obwire nibwo bumwe Yesu aherize kuzoorwa, akashuuruurira Yohaana ebyabaire nibiija kubaho omu biro by’omumaisho. Nk’oku Yohaana yaahandiikire, tihariho bahakanisa nari abarikwegyesa ebishuba abarikubaasa kuremesa ekigyendererwa kya Ruhanga ahabw’ensi n’abantu. “Amahanga goona n’enganda zoona n’endimi n’abantu” nibaija kuhurira amakuru marungi g’Obukama bwa Ruhanga. (Okushuuruurwa 14:6) Ensi neija kugaruka ebe paradiso, kandi buri omwe orikwenda kukora ebi Ruhanga akunda naija kuba omwe ahari abo abaraagasirwe!

Ago shi n’amakuru marungi ahariiwe? Ku kiraabe nikwo kiri, yeyongyere kwega ebirikukwata aha birungi ebi Ruhanga ainiire abantu n’oku orikubaasa kugasirwa hati n’omu biro by’omumaisho.

Noobaasa kushomera Baibuli aha www.jw.org omu ndimi ezirikurenga 50. Aha mukura ogwo, noobaasa kushangaho akatabo Amakuru Marungi Kuruga Ahari Ruhanga! na Niki Eki Baibuli Buzima Erikwegyesa? n’ebindi bitabo ebirikushoboorora ahabw’enki twine kwesiga ebiri omu Baibuli n’oku turikubaasa kugyendera aha buhabuzi bwayo omu maka gaitu. Nari buuza omwe aha Bajurizi ba Yehova kubaasa kumanya ebirikukiraho.

​​—Nibiihwa omu Ebyakozirwe, Abaefeso, Abafilipi, Abakolosai, Filemooni, 1 Yohaana, Okushuuruurwa.