Omukura Gwaitu gwa Intaneeti Gutebeekanisiibwe Kutuhwera Hamwe n’Abandi

Yesu akaturagiira kubuurira amakuru marungi g’Obukama ‘omu nsi yoona okuba eky’okuhamya aha mahanga goona.’ (Mat. 24:14) Okubaasa kutuhwera ‘kuhikiiriza gye obuheereza bwaitu,’ emikura yaitu eya watchtower.org, jw-media.org, na jw.org egaitsirwe hamwe yaaba omukura gumwe ogurikwetwa jw.org.​—2 Tim. 4:5.

‘Omu Nsi Yoona’: Nka kimwe kya kashatu ky’abantu omu nsi yoona nibakoresa Intaneeti. Nigwo muringo mukuru agu abantu baingi na munonga eminyeeto barikukoresa kwohereza n’okutunga obutumwa. Omukura gwaitu niguhwera abarikukoresa Intaneeti kutunga eby’okugarukamu by’ebibuuzo ebirikukwata aha Baibuli. Nigubahwera kumanya ekibiina kya Yehova kandi n’abarikwenda kushaba kwegyesibwa Baibuli nikiboorobera. Nikibaasisa amakuru marungi g’Obukama kuhika aha bantu abari omu mahanga agagumire kubuuriramu.

‘Amahanga Goona’: Kubaasa kuhika aha bantu omu “mahanga goona,” twine kubuurira amazima omu ndimi zitari zimwe na zimwe. Abarikuza aha jw.org nibabaasa kutunga ebi barikwenda omu ndimi nka 400, okukira emikura endiijo yoona eya Intaneeti.

Teeraho Kugukoresa Gye: Omukura gwaitu jw.org tigw’okukoresibwa omu kubuurira abantu honka, beitu gutebeekanisiibwe kukoresibwa n’Abajurizi ba Yehova. Ku oraabe nookoresa Intaneeti, nitukuhiga kumanya kukoresa gye jw.org. Noobaasa kugukoresa nk’oku kirikworekwa ahaifo.

[Ekishushani aha rupapura 3]

(Okureeba oku birikushoboororwa omu bigambo, reeba ekatabo)

Teeraho Kugukoresa

1 Handiika www.jw.org ahu orikutandikira kukoresa Intaneeti aha kompyuta yaawe obonee kutandika.

2 Tunga ebi orikwenda aha mukura gwaitu orikwimata aha mitwe, eby’okutooranaho nari aha links.

3 Teeraho kukoresa jw.org aha birikukubaasisa kukoresa Intaneeti. Ebi orikushanga aha mukura tibirikuhinduka ahabw’okugira ngu tiwaakoresa kompyuta.