Yehova Akatusaasirira Kimwe

“Omuntu otarikusaasira abandi naahenda orutindo oru arikuba aine kurabaho.” Ebi n’ebigambo bya Edward Herbert owa Bungyereza owaabaire ariho omu kyasha kya 17, owaayorekire enshonga ahabw’enki twine kusaasira abandi. Ahabw’okuba naitwe obumwe nikibaasa kutwetengyesa kushaba okusaasirwa. (Matayo 7:12) Kwonka, hariho enshonga nkuru ahabw’enki twine kusaasira abandi. Yetegyereze ebigambo by’entumwa Paulo ebiri omu Abakolosai 3:13.​—Kishome.

Ahabw’okugira ngu tituhikiriire, obumwe nitugwisa kubi abandi, kandi nabo obume nibatugwisa kubi. (Abarooma 3:23) Obu tutahikiriire, nitubaasa kuguma twine obusingye tuta n’abandi? Paulo arikuhwerwa Ruhanga, naatuhiga kugumisiririza abandi kandi tukabasaasira. Obuhabuzi obwo na hati nibukikora. Ka tushwijume ebigambo bya Paulo.

Mugumizemu “nimugumisiririzana.” Ekitabo kimwe nikigira ngu Abakristaayo nibooreka omutwarize ogu barikuba “beeteekateekire kugumisiririza abo abarikubashagiza nari abaine emitwarize ei batarikukunda.” Ebigambo mugumisiririzane nibyoreka ngu tushemereire kuguma twine obumwe. Okuguma nitwijuka ngu naitwe twine emitwarize erikubaasa kugwisa kubi abandi, nikituhwera kutaikiriza emitwarize y’abandi ei tutarikukunda, kushiisha obusingye bwaitu n’abo. Kwonka shi omuntu ku yaakukukora ekintu kibi?

Mugumizemu ‘nimusaasirana.’ Kurugiirira aha muhandiiki omwe, ekigambo ky’Orugriika ekirikuvunuurwa nk’okusaasirana, nikyoreka obukuru bw’okugirira abandi embabazi turikubasaasira. Ekitabo ekindi nikigira ngu ekigambo ekyo nikimanyisa okugirira omuntu esaasi nari okakora ekirikumugasira. Nitugirira abandi embabazi turikuba tweteekateekire kubasaasira n’obu haakuba hariho eki turikufa nabo. Mbwenu shi ahabw’enki tushemereire kuba tweteekateekire kusaasira abandi? N’ahabw’okugira ngu hatakahingwireho obwire bwingi, naitwe nitubaasa kwenda ngu ou twashagiza atusaasire.

“Nk’oku Mukama yaabasaasiire, mube nikwo mwatwaza.” Enshonga nkuru ahabw’enki twine kusaasira abandi eri ngu: Yehova akatusaasirira kimwe. (Miika 7:18) Teekateeka aha mbabazi ezi Yehova agiriire abantu abarikweteisa. Yehova we tarikushiisha. Kwonka naasaasirira kimwe abarikweteisa n’obu araabe naamanya ngu we taribaasa kubashaba ngu bamusaasire. Buzima Yehova niwe arikusaasirira kimwe abantu abarikweteisa!

Embabazi za Yehova nizitureetera kumwirira haihi kandi zituhiga kumutooreza. (Abaefeso 4:32–5:1) Nitubaasa kwebuuza tuti, ‘Obu Yehova arikunsaasirira kimwe, niki ekishemereire kundetera kutasaasira abandi abarikunshobeza kwonka bakanshaba okusaasirwa?’​—Luka 17:3, 4.