Ahabw’Enki Baingi Batarikwikiriza Ruhanga?

“Ori omwe aha batarikwikiririza omuri Ruhanga? Baingi tibarikumwikiririzamu.” Ekyapa ekyahandiikirwe abatarikwikiririza omuri Ruhanga nikwo kyagizire. Nibateekateeka ngu tibarikwetenga Ruhanga.

Kwonka n’abarikugira ngu nibaikiririza omuri Ruhanga, ebi barikucwamu nibyoreka ngu tibarikumwikiririzamu. Salvatore Fisichella, akibishopu omwe w’abakaturiki, arikugamba aha bu arikwebembera akagira ati: “Orikutureeba obunaku obu tarikubaasa kugira ngu turi Abakristaayo ahabw’okuba emitwarize yaitu neshushana n’ey’abatarikwikiriza.”

Bamwe tibarikuteekateeka ahari Ruhanga ahabw’okugira bingi eby’okukora. Nibamureeba nk’ori hare munonga otarikubaasa kugira eki yaabagasira. Abantu nk’abo nibamusherura baaba baine oburemeezi kandi nibamutwara nk’omuhuuku waabo ou barikweta baaba baine eki barikwenda.

Abandi tibarikugyendera aha bi ediini zaabo zirikubeegyesa, ahabw’okuba nibateekateeka ngu tibirikubagasira. Nk’eky’okureeberaho, Abakaturiki ebicweka 76 ahari igana omuri Germany nibaikiriza ngu tikiine nshonga omushaija kutuura n’omukazi batagaitsirwe kandi eki tikirikuhikaana n’enyegyesa za Baibuli. (1 Abakorinso 6:18; Abaheburaayo 13:4) Abakaturiki tibo bonka abatarikugyendera aha bi ediini yaabo erikwegyesa. Abeebembezi b’amadiini maingi nibagira ngu abu barikwebembera nibatwaza “nk’abatarikwikiriza ngu hariho Ruhanga.”

Eby’okureeberaho ebi nibireetaho ekibuuzo eki: Buzima nitwetenga Ruhanga? Enshonga egi ti nsya. Neeyorekwa omu kitabo kya Baibuli eky’okubanza. Kubaasa kutunga eky’okugarukamu eky’ekibuuzo ekyo, ka tureebe enshonga ezaimukireho eziri omu Baibuli omu kitabo kya Okutandika.