Hurira Eiraka rya Yehova Ahu Oraabe Ori Hoona

1, 2. Yehova naaha ata abaheereza be obuhabuzi?

EBIRI omu Baibuli nibyoreka ngu abantu bakaba batunga obuhabuzi kuruga ahari Yehova omu miringo etari emwe nʼemwe. Ira Ruhanga akaba akoresa baamaraika, okworekwa, nari ebirooto kumanyisa abantu ebirikuza kubaho omu biro by’omumaisho. Kandi Yehova akaba aha n’abantu obujunaanizibwa. (Kub. 7:89; Ezk. 1:1; Dan. 2:19) Obumwe Yehova akaba aha abantu obuhabuzi kurabira omu baheereza be ab’omu nsi. Omuringo gwona ogu abantu baabaire batungamu obuhabuzi, ku baabaire babukuratira bakaba bagasirwa munonga.

² Obunaku obu, Yehova naaha abantu be obuhabuzi kurabira omu Baibuli, omwoyo gwe ogurikwera, n’ekibiina. (Byak. 9:31; 15:28; 2 Tim. 3:16, 17) Obuhabuzi obu turikutunga kuruga ahari Yehova nibwetegyerezibwa gye munonga, nooba nooshusha ngu amatu gaitu nigahurira ekigambo nikireetwa enyima yaitu nikigira kiti: “Ogu nigwo muhanda, mube nigwo mwahamya.” (Isa. 30:21) Kandi na Yesu naatuhwera kuhurikiza eiraka rya Yehova kurabira omu “mwambari ow’okwesigwa kandi ow’obwengye.” (Mat. 24:45) Obuhabuzi obu twine kubutwara nka bukuru, ahabw’okuba okutunga amagara agatahwaho nikurugiirira aha kumworobera.​—Heb. 5:9.

3. Niki ekirikubaasa kuturemesa kworobera obuhabuzi bwa Yehova? (Reeba ekishushani aha kutandika.)

³ Sitaane Omuregi aine ekigyendererwa ky’okuturemesa kworobera obuhabuzi kuruga ahari Yehova. Kandi, n’omutima gwaitu ‘engobya’ nigubaasa kuturemesa kwikiriza obuhabuzi bwa Yehova. (Yer. 17:9) Ka tureebe oku turikubaasa kusingura ebirikubaasa kuturemesa kuhurikiza eiraka rya Ruhanga, n’oku okumushaba kurikwija kurinda omukago gwaitu nawe.

OKUSINGURA EMITEGO YA SITAANE

4. Sitaane naateeraho ata kushiisha emiteekateekyere y’abantu?

⁴ Sitaane naateeraho kushiisha emiteekateekyere y’abantu arikujanjaaza ebishuba. (Shoma 1 Yohaana 5:19.) Empapura z’amakuru, ebitabo, zaamagaziini, radiyo, tiivi, na Intaneeti, nibijanjaaza amakuru omu nsi yoona. N’obu ebi byona biraabe nibaba birimu amakuru agarikushemeza, obwire obwingi nibyoreka emitwarize n’emitindo erikutaana aha ya Yehova. (Yer. 2:13) Nk’eky’okureeberaho, eby’amakuru n’eby’okweshemeza nibigamba aha kushwerana kw’abarikushushanisa obuhangwa nk’ekirikwikirizibwa, kandi abantu baingi nibateekateeka ngu eki Baibuli erikugamba aha bitingwa n’amaremesa.​—1 Kor. 6:9, 10.

5. Nitubaasa kwetantara tuta kubeihwabeihwa Sitaane?

⁵ Abo abarikukunda okuhikiirira nibabaasa bata kwetantara ebishuba bya Sitaane? Nibabaasa kutaanisa bata ekirungi n’ekibi? Ekigambo kya Ruhanga nikyo kirikubaasa kubahwera. (Zab. 119:9) Kirimu obuhabuzi oburikutubaasisa kutaanisa ebihikire aha bishuba. (Enf. 23:23) Yesu arikujuriza Ebyahandiikirwe akagira ngu omuntu aine kutungwa ekigambo “kyona ekiruga omu kanwa ka Ruhanga.” (Mat. 4:4) Twine kwega kugyendera aha misingye ya Baibuli. Nk’eky’okureeberaho, ira Musa atakahandiikire ebiragiro ebirikukwata aha bushambani, omutsigazi muto Yosefu akaba naamanya ngu okushambana n’ekibi. Akanga kugomera Yehova obu muka Potifaari yaateeraho kumubeihabeiha ngu ashambane nawe. (Shoma Okutandika 39:7-9.) Yosefu akacwamu kuhurikiza eiraka rya Yehova omu mwanya gw’okuhurikiza ery’omukazi ogwo, n’obu araabe yaamubeihabeihire kumara obwire buraingwa. Ekikuru ekiraatuhwere kutaanisa ekirungi n’ekibi n’okuhurikiza eiraka rya Yehova kandi tuketantarira kimwe ebishuba bya Sitaane.

6, 7. Twine kukora ki kubaasa kwetantara obuhabuzi bubi bwa Sitaane?

⁶ Ahabw’okugira ngu ensi eijwiremu enyegyesa z’ediini ezitahikire, abantu baingi nibateekateeka ngu tikiine mugasho kusherura ediini ehikire. Kwonka, abo abaine ekihika ky’okumanya amazima, Yehova naabahwera kugamanya. Twine kucwamu ou turahurikize. Ahabw’okugira ngu tikirikubaasika kuhurukiza amaraka abiri omurundi gumwe, twine ‘kumanya eiraka’ rya Yesu kandi tukamuhurikiza. Niwe ou Yehova atooraine kwebembera entaama ze.​—Shoma Yohaana 10:3-5.

⁷ Yesu akagira ati: “Mwerinde eki muhurira.” (Mak. 4:24) Obuhabuzi bwa Yehova buhikire kandi bworobi kwetegyereza, kwonka twine kutebeekanisa omutima gwaitu kubaasa kubwikiriza. Twaba tutegyendesereize, nitubaasa kuhurikiza obuhabuzi bubi bwa Sitaane omu mwanya gw’okuhurikiza obwa Ruhanga. Otaikiriza ebyeshongoro bibi by’ensi, vidiyo, ebirikworekwa aha tiivi, ebitabo, abanywani, abeegyesa, nari abarikwetwa abahangu kutegyeka amagara gaawe.​—Kol. 2:8.

8. (a) Emiteekateekyere yaitu neebaasa kutureetera eta kubeihwabeihwa Sitaane? (b) Niki ekirikubaasa kubaho twayehuzya obumanyiso oburikworeka ngu titwakihurikiza eiraka rya Yehova?

⁸ Sitaane naakimanya ngu obumwe nitugira emiteekateekyere etahikire kandi naateeraho kutureetera kugikuratira. Sitaane ku arikutureetera kukuratira emiteekateekyere yaitu etahikire, nikitugumira kuba abeesigwa. (Yoh. 8:44-47) Nitubaasa kusingura tuta oburemeezi obwo? Nk’eky’okureeberaho, omuntu naabaasa kwejumbira kimwe omu by’okweshemeza ahendere akozire ekibi eki yaabaire naateekateeka ngu tarikubaasa kukora. (Rom. 7:15) Niki ekirikuba kireetaire omuntu ogwo oburemeezi? Naabaasa kuba yaatandikire mporampora kutahurikiza eiraka rya Yehova. Naabaasa kuba yaayehugize obumanyiso oburikworeka ngu takihurikiza eiraka rya Yehova. Naabaasa kuba arekyeire aho kushaba, atakibuurira n’omujinya, nari atandikire kwosha enteerane. Ekirikurugamu, naabaasa kukuratira ebyetengo bye, kandi akore eki arikumanya ngu ni kibi. Nitubaasa kwetantara enshobe nk’egyo twamanya obumanyiso oburikworeka ngu titwakihurikiza eiraka rya Yehova kandi tukateeraho kushoboorora oburemeezi ahonaaho. Twaba nituhurikiza eiraka rya Yehova, buzima nitwija kwetantara enyegyesa zoona ez’ebishuba.​—Enf. 11:9.

9. Ahabw’enki ni kikuru kumanya kare emiteekateekyere yaitu etahikire?

⁹ Omuntu yaamanya endwara ye bukiri kare, ekyo nikibaasa kukiza amagara ge. Nikyo kimwe, nitubaasa kwetantara akabi twamanya kare emiteekateekyere yaitu etahikire erikubaasa kutureetera kwohibwa. Ahonaaho twaheza kumanya obweremwa bwaitu, nikiba kiri eky’obwengye kugira eki twakora tutakagwire “omu mutego gwa Sitaane.” (2 Tim. 2:26) Twine kukora ki twamanya ngu ebiteekateeko byaitu n’ebyetengo byaitu tibirikuhikaana n’ebi Yehova arikwenda ngu tukore? Ahonaaho, twine kumugarukira, tukaigura amatu gaitu kuhurikiza obuhabuzi bwe n’omutima gwaitu gwona. (Isa. 44:22) Twine kukimanya ngu okucwamu kubi nikubaasa kututaho enkojo z’amaani tugume nitubonabona omu busingye obu. Ka nikiba kiri kirungi kwetantara kuruga ahari Yehova!

OKUSINGURA AMARYO N’OMURURU

10, 11. (a) Amaryo nigabaasa kweyoreka gata? (b) Nitwega ki aha ky’okureeberaho kibi kya Kora, Dasani, na Abiraamu?

¹⁰ Twine kukimanya ngu omutima gwaitu nagwo nigubaasa kutuhabisa. Teekateeka aha maryo n’omururu. Nibibaasa kuturemesa kuhurikiza eiraka rya Yehova kandi kiturugiremu oburemeezi. Omuntu ow’amaryo naayetwara nk’ow’ahaiguru. Naabaasa kuteekateeka ngu aine obugabe bw’okukora kyona eki arikwenda, kandi ngu tihaine oshemereire kumugambira eky’okukora. N’ahabw’ekyo, naabaasa kuteekateeka ngu tihaine oshemereire kumuha obuhabuzi n’obu baakuba Abakristaayo bagyenzi be, abareeberezi, nari ekibiina kya Yehova. Naabaasa kwetanisiza kimwe ahari Yehova kimuremese kuhurira eiraka rye.

¹¹ Obu Abaisraeli baabaire nibaraba omu ihamba, Kora, Dasani, na Abiraamu bakagomera Musa na Arooni. Ahabw’amaryo, bakataho entebeekanisa eyaabo ey’okuramya Yehova. Yehova akabakorera ki? Akabafubira. (Kub. 26:8-10) Ebyahikire aha bagomi abo ka nitubyegaho ekintu kikuru! Okugomera Yehova nikurugamu oburemeezi. Kandi ka tugume nitwijuka ngu “amaryo gakuratwa okucwekyerera.”​—Enf. 16:18; Isa. 13:11.

12, 13. (a) Ha eky’okureeberaho kworeka oku omururu gurikubaasa kuba ogw’akabi. (b) Shoboorora oku omururu gurikubaasa kukura ahonaaho twaba tutagurwaniise.

¹² Teekateeka n’aha mururu. Omuntu ow’omururu naakora ekintu atarikufayo aha bandi, kandi tarikufayo kukuratira emitwarize ehikire. Bwanyima ya Naamani omukuru w’amahe g’Abasiria kutambirwa ebibembe, akaha nabi Elisa ebiconco, kwonka Elisa yaabyanga. Kwonka omuheereza wa Elisa orikwetwa Gehazi akeetenga ebiconco ebyo. Gehazi akagira ati: “Nindahira MUKAMA, naaza kwiruka, ngire eki naamwihaho.” Gehazi akanga kugambira Elisa, yairuka yaakurata Naamani yaamubeiha arikumushaba “etalanta y’efeeza kandi n’ebijwaro bibiri by’okwihaihanisa.” Niki ekyabaireho Gehazi ku yaakozire eki, kandi akabeiherera na nabi wa Yehova? Ebibembe bya Naamani bikaza ahari Gehazi.​—2 Bag. 5:20-27.

¹³ Omururu nigubaasa kutandika mporampora, kwonka omuntu yaaba atagizire eki yaakora nigubaasa kumusingura. Eky’okureeberaho kya Akani nikyoreka gye amaani g’omururu. Yetegyereze oku omururu gwa Akani gwagumire nigukura. Akagira ati: ‘Ku ndeebire omu minyago ekijwaro kirungi kya Shinaari na shekeli magana abiri z’efeeza kandi n’omuhimba gw’ezaabu ogwine oburemeezi bwa shekeli makumi ataano, naabyetenga, naabitwara.’ Akani omu mwanya gw’okwangira okwetenga kubi, omururu gukamureetera kwiba ebintu kandi yaabishereka omu ihema rye. Yoshua ku yaakimanyire, akamugira ngu Yehova akaba naija kumufubira. Eizooba eryo Akani n’eka ye bakateerwa amabaare baafa. (Yos. 7:11, 21, 24, 25) Omururu n’omuze gw’akabi ogurikubaasa kutusingura. N’ahabw’ekyo ka tuteereho kwerinda “okwetenga kwona.” (Luk. 12:15) N’obu obumwe turaabe nitubaasa kugira ebiteekateeko bibi, tushemereire kubirwanisa kugira ngu bitatureetera kukora ekibi.​—Shoma Yakobo 1:14, 15.

14. Tushemereire kukora ki twamanya ngu tutandikire kugira amaryo nari omururu?

¹⁴ Amaryo n’omururu nibibaasa kurugamu akabi. Twateekateeka aha biraarugye omu kukora ekibi, nikiija kutuhwera kutaikiriza emiteekateekyere egwire kuturemesa kuhurikiza eiraka rya Yehova. (Bir. 32:29) Kurabira omu Baibuli, Ruhanga naatugambira ebirungi ebi twine kukora n’oku turikugasirwa twabikora n’oburemeezi obu turikutunga twakora ekibi. Omutima gwaitu gwatureetera kugira amaryo nari omururu, nikiba kiri eky’obwengye kuteekateeka aha birikubaasa kurugamu. Twine kuteekateeka aha ku ekibi kirikubaasa kutukwataho, abakundwa baitu, kandi okukira munonga omukago gwaitu na Yehova.

GUMA NOOSHABA YEHOVA KURUGA AHA MUTIMA

15. Nitubaasa kwega ki aha ky’okureeberaho kya Yesu?

¹⁵ Yehova natwendeza ebirungi. (Zab. 1:1-3) Naatuha obuhabuzi bwingi obu turikuba nitwetenga. (Shoma Abaheburaayo 4:16.) N’obu Yesu araabe yaabaire ahikiriire, butoosha akaba ahurikiza eiraka rya Yehova kandi amushaba. Yehova akaba ashagika Yesu kandi amuha obuhabuzi omu miringo y’omutaano. Yehova akaba ayohereza baamaraika kuheereza Yesu, amuha omwoyo gurikwera kumuhwera, kandi akamuhwera n’obu yaabaire naza kutoorana entumwa ze 12. Eiraka rya Yehova rikahurirwa kuruga omu iguru arikworeka ngu naashagika Yesu kandi ngu naamusiima. (Mat. 3:17; 17:5; Mak. 1:12, 13; Luk. 6:12, 13; Yoh. 12:28) Nka Yesu, twine kushaba Ruhanga kuruga aha mutima. (Zab. 62:7, 8; Heb. 5:7) Kurabira omu kushaba, nitubaasa kuhurira eiraka rya Yehova kandi tutwaze omu muringo ogurikumuhaisa ekitiinisa.

16. Yehova naatuhwera ata kuhurira eiraka rye?

¹⁶ N’obu Yehova araabe naatuheera busha obuhabuzi bwe, tarikugyema muntu weena kubukuratira. Twine kumushaba kutuha omwoyo gwe gurikwera, kandi naija kugutuha omu bwijwire. (Shoma Luka 11:10-13.) Ni kikuru ngu ‘omu kuhurira twerinde.’ (Luk. 8:18) Nk’eky’okureeberaho, nikiba kiri ekikorwa ky’oburyarya kushaba Yehova kukuhwera kusingura ebiteekateeko bibi, kwonka okaguma nooreeba ebirikwitsa enshoni nari vidiyo ezirikukwata aha bushambani. Tushemereire kuba turi omu myanya n’embeera ezirikutubaasisa kutunga omwoyo gurikwera, nk’omu nteerane z’ekibiina. Abaheereza ba Yehova baingi nibetantara oburemeezi barikuza omu nteerane kuhurikiza Yehova. Ekirugiremu, babaasize kumanya emiteekateekyere mibi ei barikubaasa kuba baine kandi baahindura aha mitwarize yaabo.​—Zab. 73:12-17; 143:10.

GUMIZAMU ORIKUHURIKIZA EIRAKA RYA YEHOVA

17. Ahabw’enki kiri eky’akabi kweyesiga ekirenga?

¹⁷ Teekateeka aha ky’okureeberaho kya Daudi owa Israeli eya ira. Akiri muto, akasingura Goliasi Omufilistia ekikaaka. Daudi bwanyima akaba omuserukare, kandi omugabe. Omurimo gwe gukaba guri okurinda n’okucwamu ebirikukwata aha ihanga rya Israeli. Kwonka Daudi ku yaayesigire munonga omutima gwe, akabeihwabeihwa yaakora ekibi ky’amaani yaashambana na Batisheba, kandi yaacwa n’orukwe rw’okwita iba Uriya. Daudi ku yaahanirwe, akaikiriza enshobe ye, kandi yaagaruka yaagira omukago murungi na Yehova.​—Zab. 51:4, 6, 10, 11.

18. Niki ekirikubaasa kutuhwera kugumizamu nituhurikiza eiraka rya Yehova?

¹⁸ Ka tuteereho kugyendera aha buhabuzi oburi 1 Abakorinso 10:12 twetantare kweyesiga ekirenga. Obu tutarikubaasa “kwehabura,” nikimanyisa ngu nitubaasa kuhurikiza eiraka rya Yehova nari ery’omuzigu we Sitaane. (Yer. 10:23) Ka tugume nitushaba, turikukuratira obuhabuzi bw’omwoyo gurikwera, kandi butoosha tuhurikize eiraka rya Yehova.