Ruhanga Naakuteekateekaho?

Mbwenu shi kikaba kihikire Daudi kugira ngu Ruhanga naamuteekateekaho? Kwonka shi iwe Ruhanga naakuteekateekaho? Abantu baingi nikibagumira kwikiriza ngu Ruhanga ow’obushoboorozi bwona naabafaho. Ahabw’enki?

Enshonga y’okubanza, Ruhanga n’ow’ahaiguru munonga kukira abantu. Ruhanga ku arikuba ari omu mwanya gwe ogw’ekitiinisa akareeba amahanga, nigaba gari “nk’eitondo ry’omu ndobo, kandi nigagyeranisibwa n’omucuucu gw’aha minzaani.” (Isaaya 40:15) Omuhandiiki omwe orikuhakanisa ediini akahika n’aha kugira ngu “tiky’obwengye kwikiriza ngu hariho Ruhanga orikukufaho kandi akafayo n’aha bi orikukora.”

Kwonka, abandi nibateekateeka ngu emitwarize yaabo neebareetera kutasiimwa Ruhanga. Nk’eky’okureeberaho, omushaija orikwetwa Jim naagira ati: “Nkaba nkira kushaba kutunga obusingye n’okwezibira, kwonka ku haabaire hahinguraho obwire, ngaruka ngira ekiniga. Ekyarugiremu, nkateekateeka ngu ndi mubi munonga kandi ngu Ruhanga akaba atarikubaasa kumpwera.”

Mbwenu shi Ruhanga ari hare n’abantu kugira ngu tarikubaasa kubateekateekaho? Abantu be abatahikiriire naabareeba ata? Ruhanga yaaba atatuhwereire kumanya ebirikumukwataho, tihariho orikubaasa kumugambirira akagarukamu n’ebibuuzo ebyo. Kwonka Baibuli Ekigambo kye eki yaahandiikiire abantu, nikituhamiza ngu tari hare n’abantu kandi ngu naabateekateekaho. Baibuli neegira ngu, ‘tari hare n’omuntu weena omuriitwe.’ (Ebyakozirwe 17:27) Omu bicweka bina ebirikukurataho, nituza kureeba eki Ruhanga arikutugambira aha ku arikufayo aha bantu n’abo abu ayorekire ngu naabafaho.