Ruhanga Naakuhuumuriza

ENSHONGA AHABW’ENKI ABAMWE NIBABANGANISA: Abamwe n’obu barikuba nibeetenga kuhuumurizibwa, nibateekateeka ngu n’ekikorwa ky’okweyendeza kushaba Ruhanga kubahwera omu buremeezi bwabo. Omukazi orikwetwa Raquel naagira ati: “Ku ndikureeba omuhendo gw’abantu abari omu nsi, n’oburemeezi bw’amaani obu baine, ebirikunyerarikiriza bireebeka nka bikye munonga ekyo kindeetera kutafayo kushaba Ruhanga kumpwera.”

EKI EKIGAMBO KYA RUHANGA KIRIKWEGYESA: Omu muringo gw’omutaano, Ruhanga ataireho entebeekanisa y’okuhwera n’okuhuumuriza abantu. Buri omwe ori omu nsi akahungura ekibi, ekirikuremesa abantu kuhikiiriza gye ebi Ruhanga arikwenda ngu bakore. Kwonka, Ruhanga akatukunda yaatuma “omwana we [Yesu Kristo] kuba ekarabo ahabw’ebibi byaitu.” (1 Yohaana 4:10) Kurabira omu kitambo kya Yesu, Ruhanga naatubaasisa kusaasirwa ebibi byaitu, kugira omuntu w’omunda omurungi, n’amatsiko g’okutunga amagara agatahwaho omu nsi ensya ey’obusingye.a Mbwenu shi eki n’ekitambo ky’abantu boona, nari nikyoreka ngu Ruhanga naakufaho iwe nk’omuntu?

Teekateeka ahari Paulo. Okusiima ekitambo kya Yesu kukamuhiga kuhandiika ati: ‘Niinyikiriza Omwana wa Ruhanga, owankunzire akeehayo ahabwangye.’ (Abagalatia 2:20) N’amazima, Yesu akafa ira Paulo atakabaire Mukristaayo. Kwonka, Paulo akareeba ekitambo ekyo nk’ekiconco eki yaahairwe Ruhanga.

Ekitambo kya Yesu n’ekiconco eki Ruhanga naiwe akuhaire. Ekiconco eki n’obuhame ngu ori ow’omuhendo ahari Ruhanga. Nikibaasa kukuha “okuhuumura okutahwaho n’amatsiko marungi,” kandi nikibaasa kukugumya “omu mirimo yoona emirungi n’ebigambo byona ebirungi.”​—2 Abatesalonika 2:16, 17.

Kwonka, Yesu akahayo amagara ge nk’ekitambo emyaka nka 2,000 ehingwire. Ni buhame ki oburiho oburikworeka ngu Ruhanga naayenda kugira omukago naiwe obunaku obu?