Ebibuuzo Kuruga Omu Bashomi

Baibuli neegamba ki aha kurahira endahiro?

Endahiro neeshoboororwa “nk’okumariirira, okugamba oine obuhame, nari okuraganisa kuhikiiriza eki ocwiremu kukora, na munonga orikugamba ahari Ruhanga . . . nk’omujurizi.” Endahiro neebaasa kugambwa nari kuhandiikwa.

Abamwe nibabaasa kugira ngu kigwire kurahira, ahakuba Yesu akagira ati: ‘Otarirahira na kakye. Kwonka ebigambo byawe Eego, bibe eego nari Ngaaha [ebe], ngaaha, ahakuba ebirikukira ahari ebyo nibiruga aha Mubi.’ (Mat. 5:33-37) Buzima, Yesu akaba naamanya ngu Ebiragiro bya Musa nibiikiriza endahiro ezimwe, kandi ngu n’abaheereza ba Ruhanga abeesigwa bakarahira endahiro. (Kut. 14:22, 23; Kur. 22:10, 11) Kandi akaba naamanya ngu na Yehova haine endahiro ezi yaakozire. (Heb. 6:13-17) N’ahabw’ekyo, Yesu akaba atarikumanyisa ngu titurikubaasa kurahira endahiro na kakye. Kureka, akaba naarabura aha bikwatiraine n’okurahira aha buntu bukye, nari okurahira okutaine makuru. Tushemereire kukimanya ngu Yehova naayenda ngu tuhikiirize okuraganisa kwaitu. Twine kuba nitumanyisa eki turikugamba.

Mbwenu shi oshemeire kukora ki waashabwa kurahira? Eky’okubanza, hamya ngu noobaasa kukora eki orikuraganisa. Waaba otarikuhamya, ni kirungi kutarahira. Ekigambo kya Ruhanga nikirabura kiti: “Okuraganisa otahikiirize nikikirwa okutaraganisa.” (Mub. 5:5) Kandi, yetegyereze emisingye y’Ebyahandiikirwe eine akakwate n’okurahira, reero okore kurugiirira aha muntu waawe w’omunda otendekirwe. Emwe aha misingye y’Ebyahandiikirwe egyo n’eha?

Endahiro ezimwe nizihikaana n’ekigyendererwa kya Ruhanga. Nk’eky’okureeberaho, Abajurizi ba Yehova nibaraganisana baaba nibaza omu bushwere. Ebiragaano ebi n’omuringo gumwe gw’okurahira. Omu maisho ga Ruhanga n’abajurizi abarikuba bariho, abagore nibaraganisa kukundana, kutwarana nk’ab’omuhendo, n’okuhaana ekitiinisa, kandi nibaraganisa kukikora “obwire bwona obu barikuba bariho bahuriire.” (Abagore abamwe nibabaasa kutagamba ebigambo ebi byenyini baaba nibagaitwa, kwonka nabwo nibaragaana omu maisho ga Ruhanga.) Bwanyima obushwere bwabo nibutongozibwa, kandi nibuba bwine kuba obw’obutwire. (Kut. 2:24; 1 Kor. 7:39) Entebeekanisa egi eshemeire, ehikire, kandi neehikaana n’ekigyendererwa kya Ruhanga.

Endahiro ezimwe tizirikuhikaana n’ekigyendererwa kya Ruhanga. Omukristaayo ow’amazima tarikubaasa kurahira endahiro nk’ezi, okurinda eihanga arikukoresa ebirwaniso, nari kurahira arikwehakana Ruhanga. Yaakora atyo naaba yaahenda ebiragiro bya Ruhanga. Abakristaayo ‘tituri b’ensi,’ n’ahabw’ekyo titurikwejwanzya omu rwanju rw’ensi egi n’endwano zaayo.—Yoh. 15:19; Isa. 2:4; Yak. 1:27.

Endahiro ezimwe nizirugiirira aha muntu w’omunda. Obumwe, nituba twine kushwijuma gye endahiro kuhikaana n’obuhabuzi bwa Yesu ngu “ebya Kaisaari mubihe Kaisaari, n’ebya Ruhanga mubihe Ruhanga.”—Luk. 20:25.

Nk’eky’okureeberaho, ka tugire ngu Omukristaayo naayenda kutunga obutuuze nari paasipoota, kwonka naamanya ngu nikimwetengyesa kurahira kuhamira aha ihanga rye. Omu ihanga eryo endahiro egi yaaba neetwariramu okutwaza omu muringo ogurikuhakanisa ekiragiro kya Ruhanga, omuntu we ow’omunda otendekirwe Baibuli tarikumwikiriza kurahira endahiro egyo. Kwonka gavumenti neebaasa kumwikiriza kuhindura omu bigambo by’endahiro kuhikaana n’omuntu we ow’omunda.

Endahiro y’okuhamira aha ihanga neebaasa kuba neehikaana n’omusingye oguri omu Abarooma 13:1, ogurikugira ngu, “omuntu weena ayorobere abakama abarikutegyeka.” N’ahabw’ekyo Omukristaayo naabaasa kureeba ngu ti kigwire kurahira kukora ekintu eki Ruhanga yaikiriize kare Abakristaayo kukora.

Omuntu waawe w’omunda naija kukuhwera baakushaba kukoresa ekintu, nari kugira omuringo ogu waayekwatamu waaba noorahira. Abarooma aba ira n’Abaasisia bakaba nibarahira rurara zaabo, ekirikumanyisa ngu bakaba nibeesiga Ruhanga w’entaro kubahwera. Abagriika bakaba nibaimutsya emikono ahaiguru baaba nibarahira. Bakaba nibamanya ngu hariho ruhanga ow’amaani orikureeba ebyagambwa n’ebyakorwa ou abantu barikujunaanwaho.

Buzima, omuheereza wa Yehova tarikubaasa kurahira akwaitse ekintu kyona ekiine akakwate n’okuramya kw’ebishuba. Kwonka shi omu icwero ry’emanja ku waakushabwa kuta omukono ahari Baibuli kurahira kuha obujurizi obuhikire? Obwo, noobaasa kucwamu kukikora, ahakuba Ebyahandiikirwe nibitugambira aha bantu abeesigwa abaarahiire bakwatsire aha mibiri yaabo. (Kut. 24:2, 3, 9; 47:29-31) Ni kikuru kwijuka ngu waarahira, nooba noorahira omu maisho ga Ruhanga ngu noija kugamba amazima. Oine kuba oyeteekateekire kugarukamu omu mazima buri kibuuzo eki oraabuuzibwe.

Ahabw’okugira ngu omukago gwaitu na Yehova n’ogw’omuhendo, twine kushaba kandi tukateekateeka n’obwegyendesereza aha ndahiro ei turikushabwa kurahira, turikuhamya ngu tituraayeshinje nari tituraahende emisingye ya Baibuli. Waacwamu kurahira, hamya ngu noija kuhikiiriza endahiro yaawe.—1 Pet. 2:12.