Ebibuuzo Kuruga Omu Bashomi

Mbwenu shi Daudi akahandiika ekitarikubaasika omu Zaaburi 61:8, obu yaagira ngu naija kuhimbisa eiziina rya Ruhanga “ebiro byona.”?

Ngaaha. Eki Daudi yaahandiikire kihikire kandi nikibaasika.

Yetegyereze ebi yaahandiikire omu mushororongo ogwo n’endiijo erikushagika enshonga egyo: ‘Ninyija kweshongora eby’okuhimbisa eiziina ryawe ebiro byona, mpikiirize obutoosha ebi naaraganiise nimpiga.’ ‘Ninyija kuhimbisa, [Yehova] Ruhanga wangye, n’omutima gwangye gwona, mpe eiziina rye ekitiinisa ebiro byona.’ ‘Ninyija kusiima eiziina ryawe ebiro byona.’—Zab. 61:8; 86:12; 145:1, 2.

Obu Daudi yaahandiika ebigambo ebyo akaba atarikuteekateeka ngu tarikwija kufa. Daudi akaba naamanya ngu Yehova akagira ngu abantu nibaija kufa ahabw’ekibi, kandi akaba naikiriza ngu n’omusiisi. (Kut. 3:3, 17-19; Zab. 51:4, 5) Akaba yaahuriire ngu abashaija abu Ruhanga yaabaire naasiima nk’Abrahamu, Isaaka, na Yakobo, bakafa. Kandi akaba naamanya ngu nawe naija kufa. (Zab. 37:25; 39:4) Kwonka ebigambo bye ebiri omu Zaaburi 61:8 nibyoreka ngu Daudi akaba amaririire kuhimbisa Ruhanga ebiro byona eby’amagara ge.—2 Sam. 7:12.

Bimwe aha bi Daudi yaahandiikire n’ebi yaarabiremu, nk’oku kirikworekwa omu mutwe gwa Zaaburi 18, 51, na 52. Omuri Zaaburi 23, Daudi akagira ngu Yehova n’omuriisa orikuha obuhabuzi, orikuruhuura kandi orikuha oburinzi. Daudi nawe akaba ari atyo. Kandi akaba naayenda kuheereza Yehova ebiro by’amagara ge byona.—Zab. 23:6.

Ijuka ngu, Yehova niwe yaahwereire Daudi kuhandiika ebigambo ebyo. Ebi yaahandiikire bikaba birimu obunabi obwabaire nibwija kuhikiirira bwanyima y’obwire bwingi. Nk’eky’okureeberaho, omuri Zaaburi 110 Daudi akagamba aha bwire obu Mukama we yaabaire naija kushutama aha ‘rubaju rwa buryo rwa [Ruhanga]’ omu iguru kandi akaheebwa obushoboorozi. Kukora ki? Kusingura abazigu ba Ruhanga n’okucwera amahanga emanja. Daudi akaba ari ishenkuru wa Mesia, owaabaire naija kutegyekyera omu iguru kandi “omunyamurwa w’ebiro byona.” (Zab. 110:1-6) Yesu akagira ngu obunabi oburi omuri Zaaburi 110 bukaba nibugamba ahariiwe kandi bukaba nibwija kuhikiirira omu biro by’omumaisho.—Mat. 22:41-45.

Yehova akahwera Daudi kuhandiika ebyabaireho omu bwire bwe, n’ebyabaire nibiza kubaho omu biro by’omumaisho yaazooka akabaasa kuhimbisa Yehova ebiro byona. Eki nikituhwera kumanya ngu Zaaburi 37:10, 11, 29 ekaba neegamba aha mbeera ezaabaireho omuri Israeli eya ira n’eziraabeho omu nsi yoona omu biro by’omumaisho, Ruhanga yaaheza kuhikiiriza byona ebi arikuragaanisa.—Reeba ekicweka 8 ‘Noija Kuba Naanye Omuri Paradiso’ omu magaziini egi.

N’ahabw’ekyo Zaaburi 61:8 n’emishororongo endiijo neeyoreka ngu Daudi akaba naayenda kuhimbisa Yehova omuri Israeli eya ira kuhitsya yaafa. Kandi nibyoreka kyenyini eki Daudi araakore Yehova ku araamuzoore.