Ezekiyeli
19 “Imba nyimbo yakulira thangwe ra akulu-akulu wa Jirayeri. 2 Lewa kuti:
‘Kodi mai wako akhali mbani? Akhali mphondolo ikazi pakati pa mphondolo zimuna.
Iyo idagona pakati pa mphondolo zamphanvu ndipo idafuwa wana wace.
3 Iyo yafuwa m’bodzi mwa wana wace ndipo mwanayo wakula acikhala mphondolo yamphanvu.
Iyo yapfunza kuphata nyama,
Mpaka kudya wanthu.
4 Wanthu wa mitundu inango adabva bza mphondoloyo ndipo adaiphata m’dindi,
Iwo adaimanga m’mphuno mwace na ngoloweko aciyenda nayo ku dziko la Edjipito.
5 Mphondolo ikaziyo idadikhirira kubwera kwa mwana waceyo, mpaka pomwe idatsimikizira kuti mwanayo angadabwerera lini pomwe.
Na tenepo, iyo idatenga mwana munango icimulera mpaka kukhala mphondolo yamphanvu.
6 Mwanayo adafamba pakati pa mphondolo zinango, acikhala mphondolo yamphanvu.
Iyo yapfunza kuphata nyama mpaka kudya wanthu.
7 Idazungulira nyumba zakulimba za ntsanza icipfudza mizinda,
Ndipo kulira kwace kudabvekera dziko lentse lomwe likhali matere.
8 Wanthu wa m’bzigawo bzinango adabwera kudzaiteyera msampha,
Ndipo adaiphata m’dindi.
9 Adamanga mphuno yace na ngoloweko, ndipo adaiikha m’thanga aciyenda nayo kuna mambo wa ku Babiloniya.
Adaifungira kumweko kuti baludya lace lileke kubvekera pomwe m’mapiri ya Jirayeri.
10 Mai wako akhali ninga muti wa uva m’mulopa wako, wakubzalidwa pafupi na madzi.
Iwo akhabala bzisapo ndipo akhana mthambi zizinji thangwe akhali pafupi na madzi mazinji.
11 Mthambi zace zidakula zicikhala zakulimba, zicikhala zakuthemera kukonzera mpsimbo za amambo.
Mutiyo wakula ucikhala utali kwene-kwene kuposa miti inango,
Iwo ungadawoneka na patali thangwe ra kutalimpha kwace pabodzi na masamba yace mazinji.
12 Thangwe ra ciya, mutiyo udazulidwa na mizi kubodzi ucithusidwa pantsi,
Ndipo mphepo ya kumabvadzuwa idaumisa bzisapo bzace.
Mthambi zace zakulimba zidakhwadzulidwa ziciuma ndipo zidapsa na moto.
13 Tsapano udabzalidwa m’dambo,
M’dziko lakuuma na lakusaya madzi.
14 Motoyo udamwazika kucokera ku mthambi zace ucinyekesa mthambi zitete pabodzi na bzisapo bzace.
Palibe mthambi yomwe idasala, ne mpsimbo yakutongera.*
“‘Imweyi ni nyimbo yakulira, ndipo in’dzaimbidwa na wanthu pakulira.’”