Marko

14 Tsapano, zikhadasala ntsiku ziwiri kuti Paskwa pabodzi na Phwando la Pau Zakusaya Cakufufumisa bzicitike. Ndipo atsogoleri wa antsembe na anembi akhanyang’ana njira yakuti aphate* Jezu mwa kucenjera kuti amuphe; 2 pakuti iwo akhambalewa kuti: “Mbatileke kumuphata pa nthawe ya phwandolo, thangwe pinango wanthu angacite phiringu.”

3 Pomwe Jezu akhadya kumui kwa Simau nyamapere, ku Betaniya, kudabwera mkazi munango omwe akhana kagarafa ka alabasto komwe kakhana mafuta yakununtcira kwene-kwene, nardo caiye ndipo yakhali yakuumira. Iye adafungula kagarafa komwe kakhana mafutako, aciyamba kuthululira mu msolo mwa Jezuyo. 4 Pomwe adawona bzimwebzi, winango wa iwo adaipidwa aciyamba kumbauzana kuti: “Thangwe ranyi akudzonga mafuta yakununtciraya? 5 Pakuti mafuta yakununtciraya yangadagulisidwa na kobiri zakupitirira madinario 300, ticikaperaka kobirizo kwa anyakusauka!” Iwo adabva ciya kwene-kwene na mkaziyo.* 6 Tsono Jezu adati: “Musiyeni. Thangwe ranyi mukumulewa bzimwebzi mkaziyu? Iye wacita cinthu cabwino kwa ine. 7 Thangwe anyakusauka mun’khala nawo nthawe zentse, ndipo mungawacitire bzabwino nthawe iri-yentse yomwe mungafuneyo, tsono ine mun’dzakhala lini nande nthawe zentse. 8 Mkaziyu wacita bzomwe angadakwanisa, iye waikha mafuta yakununtciraya m’thupi mwangu pakukonzekera kuikhidwa kwangu m’thenje. 9 Cadidi ndikukuuzani kuti, kuli-kwentse komwe mafala yabwino yan’paliziridwa pa dziko lentse la pantsi, bzomwe mkaziyu wacita, bzin’dzalewedwambo pakumukumbukira.”

10 Ndipo Djuda Sikaliyoti omwe akhali m’bodzi wa apostolo 12 wa Jezu, adayenda kwa atsogoleri wa antsembe na cakulinga cakuti apereke Jezuyo kwa iwo. 11 Pomwe iwo adabva bzimwebzi, adakomedwa kwene-kwene ndipo adamuuza kuti angadamupasa kobiri za prata. Tenepo, iye adayamba kunyang’ana mpata wabwino kuti amupereke.

12 Pa ntsiku yakuyamba ya Phwando la Pau Zakusaya Cakufufumisa, anyakupfunza wa Jezu adamubvunza kuti: “Kodi mun’funa kuti tikakukonzereni kuponi mbuto yakudyera Paskwa?” 13 Na bzimwebzi, iye adatuma anyakupfunza wace awiri, aciwauza kuti: “Ndokoni mu mzinda, ndipo mwamuna omwe adanyamula mtsuko wa madzi an’kagumana namwe. Kamutewereni, 14 ndipo nyumba yomwe ankapitayo, mukauze mweneciro nyumbayo kuti, ‘Mpfunzisi akubvunza kuti: “Ciri kuponi cipinda ca alendo kuti ine pabodzi na anyakupfunza wangu tidzadyere Paskwa?”’ 15 Ndipo iye an’kakulatizani cipinda cikulu ca m’dzaulu cakukonzedwa bwino. Katikonzereni Paskwayo m’mwemo.” 16 Tenepo, anyakupfunzawo adapitadi mu mzindamo ndipo bzidacitikadi ndendende ninga momwe iye akhadawauzira, ndipo iwo adakonzekera Paskwayo kumweko.

17 Kumaulo, iye adafika pabodzi na apostolo wace 12 wale. 18 Ndipo pomwe iwo akhadya pa meza, Jezu adalewa kuti: “Cadidi ndikukuuzani kuti, m’bodzi wa imwepo, omwe akudya nande pabodzi, an’dzandipereka.” 19 Iwo adadodoma ndipo m’bodzi na m’bodzi adayamba kumubvunza kuti: “Kodi ndinepano?” 20 Iye adawauza kuti: “Ni m’bodzi wa apostolo khumi na awirimwe, ule omwe akupitisa boko lace m’palato pabodzi na inepano, ndiye omwe an’dzandipereka. 21 Pakuti Mwana wa Munthu akuyenda ninga momwe bzikhadanembedwera kale pakulewa bza iye, koma tsoka kwa ule omwe anipereka Mwana wa munthuyo! Bzingadakhala bwino iye angadasaya kubadwa.”

22 Pomwe akhapitiriza kudyako, iye adatenga pau ndipo pomwe adamala kupemba, adaibedula-bedula acipasa anyakupfunza wace ndipo adati: “Tengani; pauyi ikuimira thupi langu.” 23 Pomwe iye adatengambo kopo ya vinyu, adapemba aciwapasa, ndipo wentsenewo adamwa. 24 Ndipo iye adawauza kuti: “Vinyuyi ikuimira ‘mulopa wangu wa mpangano,’ omwe un’dzatsanulidwa kuti udzapulumuse wanthu azinji. 25 Cadidi ndikukuuzani kuti: Nin’dzamwa lini pomwe cakumwa cakucokera ku muti wa uva mpaka pa ntsiku yomwe nin’dzamwa vinyu ipsa mu Umambo bwa Mulungu.” 26 Pakumalizira, iwo adaimba nyimbo zakutumbiza Mulungu,* ndipo patsogolo pace, adayenda pa Phiri la Miolivera.

27 Ndipo Jezu adawauza kuti: “Mwentsenemwe mun’ndithawa, thangwe bzidanembedwa kuti: ‘Nin’dzapweteka makabusa, ndipo mabira yan’dzamwazika.’ 28 Tsono ndikadzalamusidwa kwa anyakufa, nin’dzabakatsogola ku Galileya.” 29 Koma Pedru adamuuza kuti: “Napo wentse acikuthawani, inepano nin’dzakuthawani lini.” 30 Na tenepo, Jezu adamuuza kuti: “Cadidi ndikukuuza kuti lero, inde, usiku buno, congwe akanati kulira kawiri, iwepo uti undilambe katatu-kentse.” 31 Tsono iye adapitiriza kungingimira kuti: “Napo bzicifunika kufa namwe pabodzi, inepano cipo ndicidzakulambani.” Ndipo winangowo adalewambo bzibodzi-bodzi.

32 Tenepo, iwo adayenda ku mbuto inango yakucemeredwa Getsemani, ndipo iye adauza anyakupfunza wace kuti: “Bakakhalani pano, ndipo ine ndikuyenda kukapemba.” 33 Ndipo pakuyenda kumweko, Jezu adatenga Pedru, Tiyago na Juwau ndipo iye adayamba kusunama* acineseka kwene-kwene mu mtima. 34 Iye adawauza kuti: “Inepano* ndidasunama kwene-kwene mpaka kufuna kufa. Khalani pano, ndipo pitirizani kukhala mudapenya.” 35 Iye adayenda patsogolo pang’ono, ndipo adagodama pantsi aciyamba kupemba kuti penu bzingakwanisike, aleke kugumana na mayezoyo. 36 Ndipo iye adati: “Aba,* Baba, bzinthu bzentse mpsakukwanisika kwa imwe; ndicosereni kopoyi. Koma sikuti mwa kufuna kwangu, koma mwa kufuna kwanu.” 37 Iye adabwerera ndipo adawagumana akugona, ndipo iye adati kwa Pedru: “Simau, ukugona? Kodi ukhalibe mphanvu kuti upitirize kukhala udapenya kwa ora ibodzi yokha? 38 Pitirizani kukhala mudapenya ndipo mbapembani nthawe zentse kuti muleke kuyezedwa. N’cadidi kuti mtima ukufuna, tsono thupi ndakutepa.” 39 Iye adayenda pomwe kukapemphera ndipo adakalewa mafala mabodzi-bodzi yale. 40 Pomwe adabwerera, iye adawagumana akugona, thangwe maso yawo yakhadalemedwa na tulo, tenepo iwo adasaya cakumutawira. 41 Ndipo iye adabwerera pomwe kacitatu aciwauza kuti: “Pa nthawe ninga ino, imwepo mukugona mucipuma? Lekani kugona! Nthawe yafika! Mwana wa munthu akuperekedwa m’manja mwa anyapikado. 42 Lamukani tiyende. Omwe an’ndipereka ule, akufika.”

43 Pa nthawe ibodzi-bodziyo, ali mkati mwa kulewalewa, adafika Djuda, m’bodzi wa apostolo 12 wale, pabodzi na thimu la wanthu omwe akhana xipada na bzibonga. Iwo adacita kutumidwa na atsogoleri wa antsembe, anembi na akulu. 44 Nyakumuperekayo akhadawapasa cizindikiro, aciti: “Munthu omwe ndikamumpsompsoneyo ngumweyoletu; m’mangeni ndipo muwonesese kuti aleke kuthawa.” 45 Tenepo, iye adayenda lunga-lunga kuna Jezu ndipo adamufenderera acilewa kuti: “Mpfunzisi!”* Ndipo adamumpsompsona mwa lufoyi. 46 Tenepo iwo adamuphata acimumanga. 47 Tsono m’bodzi wa omwe akhali pamwepowo, adasolola xipada yace, acigwata khutu la kapolo wa mkulu wa antsembe. 48 Koma Jezu adawabvunza kuti: “Kodi thangwe ranyi mwabwera kudzandimanga na xipada na bzibonga ninga kuti ndine mbava? 49 Ntsiku zentse ndikhakhala namwe ndicimbapfunzisa mu templo, koma imwepo mulibe kundimanga. Tsono bzimwebzi bzacitika kuti Bzinembo bzikwanisike.”

50 Pamwepo, anyakupfunza wace wentse adamusiya acithawa. 51 Tenepo, mulumbwana munango omwe akhadandobvala cakubvala ca kunja cokha cabwino kwene-kwene, adayamba kumutewera na pafupi ndipo iwo adayeza kumuphata, 52 tsono iye adawasiyira m’manja mwawo cakubvala cace ca kunjaco, acithawa ali pezi.*

53 Iwo adatenga Jezu aciyenda naye kwa mkulu wa antsembe, ndipo atsogoleri wa antsembe, akulu na anembi wentse adatsonkhana kumweko. 54 Tsono Pedru akhamutewera na patali mpaka mkati mwa mpanda wa mkulu wa antsembe; iye adakhala pabodzi na anyabasa wa pa nyumbayo kuti awothe moto. 55 Atsogoleri wa antsembe na ayeruzi wa mu Sinedriyo* akhalinga umboni bwakunama kuti aphe Jezu, tsono iwo alibe kubuwona. 56 Kulewa cadidi, wanthu azinji akhamucitira umboni bwakunama, koma bzomwe wanthuwo akhalewa bzikhabverana lini. 57 Ndipo winango akhambaima acimbamunamizira kuti: 58 “Ifepano tidamubva umweyu akulewa kuti: ‘Inepano nin’dzagwesa templo yomwe idamangidwa na manjayi, ndipo nin’dzamanga inango yakusaya kumangidwa na manja mu ntsiku zitatu zokha.’” 59 Napo iwo akhalewa bzinthu bzimwebzi, umboni bwawobo bukhabverana lini.

60 Tenepo, mkulu wa antsembe adamuka acibvunza Jezu kuti: “Thangwe ranyi ukusaya kutawira? Kodi ukubva lini bzinthu bzentse bzomwe akukulewabzi?” 61 Tsono iye adapitiriza kunyamala ndipo alibe kutawira cinthu. Mkulu wa antsembeyo adamubvunza pomwe kuti: “Kodi iwepo ndiwe Kristu Mwana wa Mulungu Wakucena?” 62 Jezu adatawira kuti: “Inde ndine; ndipo mun’dzawona Mwana wa munthu adakhala ku boko lamadidi la Mulungu Wamphanvu-zentse akubwera na mitambo yakudzulu.” 63 Pamwepo, mkulu wa antsembeyo adang’amba cakubvala cace acilewa kuti: “Tin’funiranyi pomwe umboni bunango? 64 Mwacita kubva mwekha iye akunyoza Mulungu. Kodi imwepo mukuwonambo tani?”* Wentse adabverana kuti iye akhathemera kuphedwa. 65 Ndipo winango adayamba kumupsipira mata acimumpsinkha nkhope ndipo adamumenya na mafaiti, acimbalewa kuti: “Penu ndiwedi mpolofeta,” vima, mbani wakumenya? Pomwe adamala kumukwantsa, alindiri wa nyumba ya mphala adamutenga.

66 Pomwe Pedru akhali mkati mwa mpanda wa nyumba ya mphala, kudabwera mkazi m’bodzi omwe akhali mtumiki wa mkulu wa antsembe. 67 Pomwe adawona Pedru akuwotha moto, iye adamunyang’anisisa, acilewa kuti: “Imwepombo mukhafamba na Jezu Mnazareti ule.” 68 Tsono Pedruyo adalamba aciti: “Ne ndikumudziwa lini umweyo, ndipo ne ndikudziwambo lini bzomwe ukulewabzi.” Tenepo, iye adacoka aciyenda kufupi na msuwo ukulu. 69 Pamwepo, mtumiki munango wacikazi adamuwona ndipo adayamba pomwe kuuza wanthu omwe akhadaima pafupipo kuti: “Uyu ni m’bodzi wawo.” 70 Pedru adalamba pomwe. Pomwe padapita mphindi zing’ono-ng’ono, wale omwe akhadaima pafupi naye, adayamba kuuza Pedruyo kuti: “Kulewa cadidi, iwepo ndiwe m’bodzi wawo, thangwe ndiwembo wa ku Galileya.” 71 Tsono iye adayamba kubzitemberera na kulumbira kuti: “Nimbamudziwa lini ine munthu omwe mukumulewayo!” 72 Pa nthawe imweyoletu, congwe adalira kaciwiri, ndipo Pedru adakumbukira bzomwe Jezu akhadamuuza bzire kuti: “Congwe akanati kulira kawiri, iwepo un’dzandilamba katatu.” Tenepo iye adaneseka kwene-kwene mu mtima ndipo adayamba kulira.