Ya m’Bukhu la Luka
22 Tsapano, Phwando la Pau Zakusaya Cakufufumisa lomwe likhacemeredwambo kuti Paskwa, likhadasala pang’ono kucitika. 2 Tsono, atsogoleri wa antsembe pabodzi na anembi akhanyang’ana njira yabwino yakuti aphere Jezu, thangwe iwo akhabva mantha na wanthu. 3 Patsogolo pace, Sathani adapita mu mtima mwa Djuda, omwe akhacemeredwambo Sikaliyoti omwe akhali m’bodzi wa anyakupfunza 12 wa Jezu, 4 ndipo iye adayenda kukacezerana na atsogoleri wa antsembe pabodzi na omwe akhanyang’anira templo bza momwe angaperekere Jezu kwa iwo. 5 Iwo adakomedwa kwene-kwene na bzimwebzi ndipo adabverana kuti amupase kobiri za prata. 6 Tenepo iye adabverana nabzo ndipo adayamba kunyang’ana mpata wabwino kuti amupereke kwa iwo pa mbuto yakusaya wanthu azinji.
7 Ntsiku ya Phwando la Pau Zakusaya Cakufufumisa idafika. Imweyi ikhalimbo ntsiku yomwe akhapha bzifuwo kuti apereke ntsembe ya Paskwa. 8 Tenepo, Jezu adatuma Pedru na Juwau aciwauza kuti: “Ndokoni mukatikonzere Paskwa kuti tidzadye.” 9 Iwo adabvunza kuti: “Kodi mun’funa kuti tikakonze kuponi?” 10 Iye adawauza kuti: “Mukapita mu mzindamu, mun’kagumana na mwamuna munango omwe adanyamula mtsuko wa madzi. Kamutewereni mpaka mu nyumba yomwe iye akapite. 11 Ndipo mukauze mweneciro nyumbayo kuti, ‘Mpfunzisi akubvunza kuti: “Ciri kuponi cipinda ca alendo kuti ine pabodzi na anyakupfunza wangu tidzadyere Paskwa?”’ 12 Iye an’kakulatizani cipinda cikulu ca m’dzaulu cakukonzedwa bwino. Katikonzereni Paskwayo m’mwemo.” 13 Tenepo, iwo adayendadi ndipo bzidacitikadi ndendende ninga momwe Jezu akhadawauzira, ndipo iwo adakonzekera Paskwayo kumweko.
14 Pomwe nthawe idakwana, iye adakakhala pa meza pabodzi na apostolo wace. 15 Ndipo iye adawauza kuti: “Ndikhafunisisa kudya namwe Paskwayi pomwe ndikanati kubonera; 16 pakuti ndikukuuzani kuti: Nin’dzadya lini pomwe Paskwa mpaka bzikadzakwanisika bzinthu bzentse mu Umambo bwa Mulungu.” 17 Iye adatambira kopo ya vinyu acipemba kwa Mulungu, ndipo patsogolo pace, adati: “Tambirani kopoyi, mumwe mucimbapasirana, 18 pakuti ndikukuuzani kuti: kuyambira lero, nin’dzamwa lini pomwe cakumwa cakucokera ku muti wa uva mpaka Umambo bwa Mulungu bukadzabwera.”
19 Patsogolo pace iye adatengambo pau. Pomwe adamala kupemba, adaibedula-bedula aciwapasa, ndipo adati: “Pauyi ikuimira thupi langu lomwe lin’dzaperekedwa thangwe ra imwepo. Pitirizani kumbacita bzimwebzi pakundikumbukira.” 20 Iye adacita bzibodzi-bodzibzo na kopo ya vinyu pomwe adamala kulalira, ndipo adati: “Kopoyi ikuimira mpangano upsa omwe un’dzayamba kuphata basa thangwe ra mulopa wangu omwe un’dzatsanulidwa thangwe ra imwepo.
21 “Tsono tetekerani! Munthu omwe an’ndipereka, ali pabodzi na inepano pa meza pano. 22 Pakuti bzentse bzomwe bzidanembedwa pakulewa bza Mwana wa munthu bzin’dzakwanisika; koma tsoka kwa ule omwe an’dzamupereka!” 23 Pakubva bzimwebzi, iwo adayamba kubvunzana okha-okha kuti mbani pakati pawo omwe akhakumbuka kucita bzimwebzo.
24 Kuthumizira bzimwebzi, anyakupfunzawo adayamba kunesana kwene-kwene kuti mbani akhali mkulu pakati pawo. 25 Tsono iye adawauza kuti: “Atongi wa dziko ambatonga wanthu mwakubverana na kufuna kwawo, ndipo iwo ambadziwika ninga wanthu omwe ambacitira bzabwino winango. 26 Tsono imwepo mun’funika lini kucita tenepoyo. M’mbuto mwace, ule omwe ni mkulu pakati panu, an’funika kukhala ninga mng’ono, ndipo ule omwe an’kutsogolerani, an’funika kukhala ninga mtumiki wanu. 27 Kodi mkulu mbani, ngule omwe akudya pa meza ayai omwe akutumikira winango? Ni ule lini omwe akudya pa meza? Tsono inepano ndiri pakati panu ninga mtumiki wanu.
28 “Kulewa cadidi, imwepo mulibe kundisiya napo pomwe ndikhagumana na mabvuto; 29 ndipo ndikucita namwe mpangano, ninga momwe Baba wangu adacitira mpangano wa umambo na inepano, 30 kuti mudzadye na kumwa pa meza yangu mu Umambo bwangu, nakuti mudzakhale m’mipando ya Umambo kuti mudzatonge madzinza 12 ya Jirayeri.
31 “Simau, Simau, tetekera! Sathani akufunisisa kuti mwentsenemwe mupepetedwe ninga tirigu. 32 Koma nimbakupempherera kwa Mulungu na kumudandaulira kuti cikhulupiro cako cileke kutepa; ndipo iwepombo ukabwerera, ukalimbikise abale wako.” 33 Pamwepo Pedru adati: “Mbuya, Inepano ndidakonzeka kuyenda namwe m’kawoko napo kufa namwe.” 34 Tsono Jezu adati: “Pedru, ndikukuuza kuti lero, congwe akanati kulira, unilamba katatu kuti umbandidziwa lini.”
35 Ndipo iye adawauza kuti: “Pomwe ndidakutumani, ndidakuuzani kuti lekani kunyamula cikhwama ca kobiri, budu la cakudya na xango, kodi ciripo comwe mudasaya?” Iwo adati: “Ne!” 36 Tenepo, iye adawauza kuti: “Koma tsapano, ule omwe ana cikhwama cace ca kobiri na budu la cakudya, atakule, ndipo ule omwe alibe xipada,* agulise cakubvala cace cakunja ndipo agule ibodzi. 37 Pakuti bzinembo bzimbati: ‘Iye adawonedwa ninga m’bodzi mwa wanthu wakusaya kubvera malamulo.’ Ine ndikukuuzani kuti mafala yamweya yakulewa bza inepano. Na tenepo, bzentse bzomwe bzidanembedwa pakulewa bza ine, bzikukwanisika.” 38 Tenepo iwo adati: “Mbuya, tina xipada ziwiri.” Iye adati kwa iwo: “Zakwana zimwezo.”
39 Pomwe adacoka pamwepo, iye adayenda pa Phiri la Miolivera ninga momwe akhacitira nthawe zentse, ndipo anyakupfunza wace adamutewerambo. 40 Pomwe adafika kumweko, iye adawauza kuti: “Pitirizani kupemba, kuti muleke kuyezedwa.” 41 Iye adafundukira patali pang’ono ndipo adagodama aciyamba kupemba, 42 kuti: “Baba, mukafuna ndicosereni kopoyi. Koma kufuna kwanu kucitike sikuti kwangu.” 43 Tenepo anjo adabwera kucokera kudzulu aciwonekera kwa iye ndipo adamulimbikisa. 44 Tsono iye adaneseka kwene-kwene mu mtima, ndipo adapitiriza kupemba na mtima wentse, ndipo kaluma yace idakhala ninga mulopa omwe ukhagoga pantsi. 45 Pomwe adamala kupemba, iye adayenda kuna anyakupfunza wace, ndipo adakawagumana akugona thangwe akhadaneta na kusunama. 46 Iye adawauza kuti: “Thangwe ranyi mukugona? Lamukani, ndipo pitirizani kupemba kuti muleke kuyezedwa.”
47 Ali mkati mwakulewalewa, padafika thimu la wanthu, lomwe likhatsogoleredwa na m’bodzi mwa apostolo wace 12 wale, omwe akhacemeredwa Djuda, ndipo iye adafenderera Jezu kuti amumpsompsone. 48 Tsono Jezu adamubvunza kuti: “Djuda, kodi ukupereka Mwana wa munthu mwa kumumpsompsona?” 49 Pomwe wale omwe akhali pabodzi na Jezu adawona bzomwe bzikhafuna kucitikabzo adati: “Mbuya, kodi tiwateme na xipada?” 50 M’bodzi wa iwo adagwata khutu la kumadidi la kapolo wa mkulu wa antsembe. 51 Tsono Jezu adatawira kuti: “Lekani kucita bzimwebzi.” Ndipo iye adaphata khutulo acim’poza. 52 Patsogolo pace, Jezu adabvunza atsogoleri wa antsembe, anyakunyang’anira templo na akulu omwe akhadabwera kuna iyeko kuti: “Kodi thangwe ranyi mwabwera kudzandimanga na xipada na bzibonga ninga kuti ndine mbava? 53 Ntsiku zentse ndikhakhala namwe ku templo koma imwepo mulibe kundimanga, tsono ino ni nthawe yakuti mdima utonge.”
54 Tenepo iwo adamumanga, aciyenda naye m’nyumba mwa mkulu wa antsembe, tsono Pedru akhamutewera na patali. 55 Pomwe wanthu adagasa moto mkati mwa mpandamo acikhala pabodzi, Pedru adafendera acikhalambo nawo. 56 Tsono mtumiki munango wacikazi adawona Pedru akuwothambo motoyo. Iye adamunyang’anisisa acilewa kuti: “Munthuyu akhafambambo pabodzi na Jezu.” 57 Tsono iye adalamba aciti: “Inepano nimbamudziwa lini.” 58 Padandopita kanthawe kakucepa, mwamuna munango adamuwonambo aciti: “Iwepo ndiwe m’bodzi wa anyakupfunza wace.” Tsono Pedru adati: “Ndine lini.” 59 Pomwe padandopita pafupi-fupi ora ibodzi, mwamuna munango adayamba pomwe kulewa mwakutsimikiza kuti: “Kulewa cadidi, munthuyu akhanayembo pabodzi, thangwe umweyumbo ngwa ku Galileya.” 60 Tsono Pedru adati: “Mwamunawe, nin’dziwa lini bzomwe ukulewabzo.” Ndipo ali mkati mwa kulewalewa, nthawe imweyoletu congwe adalira. 61 Na bzimwebzi, Mbuya adazungunuka acinyang’anisisa Pedru, ndipo Pedruyo adakumbukira mafala yomwe Mbuyayo akhadamuuza yakuti: “Lero congwe akanati kulira, iwepo un’ndilamba katatu.” 62 Na tenepo, iye adabula panja, acikalira mwakuwawidwa mtima.
63 Tenepo wanthu omwe akhadamanga Jezu wale, adayamba kumbamunyoza acimbamumenya. 64 Iwo adamumpsinkha nkhope, acimbamubvunza kuti: “Penu ndiwedi mpolofeta, vima, mbani wakumenya?” 65 Ndipo iwo adamulewa bzinthu bzizinji bzakumunyoza.
66 Pomwe kudacena, thimu la akulu-akulu wa mbumba, atsogoleri wa antsembe na anembi adatsonkhana pabodzi. Iwo adamutenga, aciyenda naye ku Sinedriyo* ndipo adamuuza kuti: 67 “Penu iwepo ndiwedi Kristu, tiuze.” Tsono iye adawatawira kuti: “Napo ndicikuuzani imwepo mun’khulupira lini na pang’onopo.” 68 Kuthumizira bzimwebzi, ndicikubvunzani, imwepo mun’nditawira lini. 69 Kuyambira lero mpaka kutsogolo, Mwana wa munthu an’dzakhala ku boko lamadidi la Mulungu Wamphanvu-zentse.” 70 Pomwe adalewa bzimwebzi, wentse adati: “Kodi un’funa kulewa kuti ndiwe Mwana wa Mulungu?” Iye adawatawira kuti: “Imwepo mukulewa kale mwekha kuti ndine Mwana wa Mulungu.” 71 Iwo adati: “Tin’funiranyi pomwe umboni bunango? Ifepano tabzibvera kale tekha iye akulewa yekha na pa mulomo pace.”