Ya m’Bukhu la Mateu

12 Pa nthawe imweyire, Jezu adapita na m’minda ya tirigu pa ntsiku ya Sabudu. Anyakupfunza wace akhabva njala ndipo adayamba kupulula ngala za tirigu, acimbadya. 2 Pomwe Afarizeu adawona bzimwebzi, adauza Jezu kuti: “Onani! Anyakupfunza wanu akucita bzinthu bzomwe mpsakubvumizidwa lini pa ntsiku ya Sabudu.” 3 Iye adawatawira kuti: “Kodi mulibe kuwerenga bzomwe Davide na anzace adacita pomwe iwo akhana njala? 4 Kodi iye alibe kupita m’nyumba ya Mulungu, acidya pau zakuperekedwa ntsembe zomwe iye na anzace akhafunikira lini kudya koma antsembe okha? 5 Ayai, kodi imwepo mukanati kuwerenga Lamulo lakuti antsembe akhaphata basa pa ntsiku ya Sabudu, koma acipitiriza kukhala wakusaya mulandu? 6 Tsono ndikukuuzani kuti, munthu wakufunika kwene-kwene kuposa templo, ali pano. 7 Tsono bzingadakhala kuti mudabvesesa thandauzo la mafala yakuti: ‘Nin’funa ntsisi, sikuti ntsembe,’ mungadapasa lini mulandu wanthu wakusaya thangwe. 8 Pakuti Mwana wa munthu ni Mbuya wa Sabudu.”

9 Pomwe adacoka pamwepo, iye adayenda, acikapita mu ­nyumba yawo yakunamatira,* 10 ndipo m’mwemo adakagumana munthu omwe akhadapunduka boko! Tenepo, wanthu winango adamubvunza kuti: “Kodi lamulo limbabvumiza kupoza munthu pa ntsiku ya Sabudu?” Iwo adacita mbvunzo umweyu kuti anyang’ane mathangwe. 11 Tsono iye adawatawira kuti: “Pakati panu pacikhala na munthu omwe ana bira wace m’bodzi ndipo birayo acigwera m’dindi pa ntsiku ya Sabudu, kodi iye angaleke kukamucosa m’dindimo? 12 Tenepo, munthu ngwakufunika kwene-kwene kuposa bira! Ndipopa, mpsakubvumizika kuphata basa labwino pa ntsiku ya Sabudu.” 13 Pamwepo, iye adauza munthu wakupundukayo kuti: “Futhula boko lako.” Iye adafuthuladi, ndipo bokolo lidalimba licindendemerana na linzace. 14 Tenepo, Afarizeu adabula panja ndipo adayamba kunyang’ana njira yakuphera Jezu. 15 Pomwe Jezu adadziwa bzimwebzi, adacoka pamwepo. Tsono wanthu azinji adamutewera ndipo iye adapoza wentse omwe akhaduwala, 16 ndipo iye adawacenjeza mwamphanvu kuti aleke kuuza winango kuti iye akhali yani, 17 kuti yakwanisike mafala yakulewedwa na mpolofeta Zaiya yakuti:

18 “Onani mtumiki wangu omwe ndamusankhula, wakufunidwa wangu omwe nimbakomedwa naye! Nin’dzaikha mzimu wangu pa iye, ndipo iye an’dzalatiza bwino kwa mitundu ya wanthu kuti cirungamo n’ciyani. 19 Iye an’dzapopotezana lini na munthu, ne kukuwa, ndipo palibe omwe an’dzabva fala lace m’miseu. 20 Ndipo iye an’dzamaliza lini kutcola phesi lomwe ndakutcoka kale pang’ono, ndipo an’dzathimisa lini kandiyero yomwe ikadacoka utsi, mpaka kubweresa cirungamo. 21 Kulewa cadidi, wanthu wa mitundu inango an’dzadikhirira m’dzina lace.”

22 Patsogolo pace, adamubweresera munthu omwe akhalewalewa lini ne akhawona lini thangwe rakuti akhana ciwanda, ndipo Jezu adapoza munthuyo, mwakuti iye adayamba kulewalewa na kuwona. 23 Ndipo thimu la wanthu lidayamba kudabwa, licimbalewa kuti: “Kodi umweyu ni Mwana lini wa Davide?” 24 Pakubva bzimwebzi, Afarizeu adalewa kuti: “Umweyu ambacosa bziwanda na mphanvu ya Belezebu,* omwe ni mtongi wa madimonyo.” 25 Pakudziwa bzomwe akhakumbuka, iye adawauza kuti: “Umambo buli-bwentse bukagawanika bokha, bumbapfudzika, ndipo mzinda ayai nyumba iri-yentse yakugawanika, imbagwa. 26 Mwa njira ibodzi-bodziyi, penu Sathani akucosa Sathani, ndiye kuti iye wagawanika yekha; kodi Umambo bwace bungapitirize tani? 27 Ndipo penu inepano nimbacosa bziwanda na mphanvu ya Belezebu, kodi wana wanu ambayacosa na mphanvu ya yani? Ndipopa ateweri wanuwo an’dzakutongani kuti ndimwe wakuphonya. 28 Tsono penu inepano nimbacosa bziwanda na mzimu wa Mulungu, ndiye kuti Umambo bwa Mulungu, bwakufikirani. 29 Ayai, kodi munthu angapite tani m’nyumba mwa munthu wamphanvu, acimutengera bzinthu bzace mwakusaya kuyamba kumumanga? Akamumanga ni pomwe angakwanise kutenga bzinthu m’nyumba mwacemo. 30 Ali-wentse omwe ali lini kumbali yangu, ni nyamadulanthaka wangu, ndipo ­ali-wentse omwe an’phata lini nande basa lakuthandiza wanthu kubwera kwa ine, ambawamwaza.

31 “Na thangwe limweri, ndikukuuzani kuti, wanthu an’dzalekereredwa pikado ya mtundu uli-wentse na mafala yali-yentse yakunyoza, koma ule omwe aninyoza mzimu, cipo acidzalekereredwa. 32 Mwa ciratizo, ­ali-wentse omwe anilewa mafala yakunyoza Mwana wa munthu, an’dzalekereredwa, tsono omwe anilewa mafala yakunyoza mzimu wakucena, an’dzalekereredwa lini mu dziko lino* ne mu dziko lipsa lomwe likubwera.

33 “Penu imwepo ndimwe muti wabwino, mun’dzabala bzisapo bza­bwino, tsono penu ndimwe muti wakuipa, mun’dzabalambo bzisapo bzakuipa. Thangwe muti umbadziwika na bzisapo bzace. 34 Wana wa nyokamwe, kodi mungalewe tani bzinthu bzabwino pomwe imwepo ndimwe wakuipa? Thangwe pamulomo pambalewa bzinthu bzomwe bzadzala mu mtima. 35 Munthu wabwino, ambalewa bzinthu bzabwino thangwe mu mtima mwace mudadzala bzinthu bzabwino. Tsono munthu wakuipa, ambalewa bzinthu bzakuipa thangwe mu mtima mwace mudadzalambo bzinthu bzakuipa. 36 Ndikukuuzani kuti, pa Ntsiku ya Kutongedwa, munthu ali-wentse an’dzatawira mulandu pa mafala yentse yapezi-pezi yomwe adayalewa; 37 penu mafala yanu njabwino, mun’dzawonedwa wakulungama, tsono penu mafala yanu njakuipa, mun’dzapasidwa mulandu.”

38 Thangwe ra bzimwebzi, anembi winango na Afarizeu adalewa kuti: “Mpfunzisi, tin’funa kuti mutiwonese cizindikiro.” 39 Pakuwatawira iye adati: “M’badwo wakuipa na wakusaya kukhulupirika kwa Mulungu, ukufunisisa kuwona cizindikiro. Tsono un’dzapasidwa lini cizindikiro ciri-centse koma cizindikiro ca mpolofeta Djona cokha. 40 Ninga momwe Djona adakhalira m’mimba mwa cintsomba ntsiku zitatu, usiku na masikati, mpsibodzi-bodzimbo na Mwana wa munthu, iye an’dzakhalambo m’thenje ntsiku zitatu, usiku na masikati. 41 Wanthu wa ku Ninive an’dzalamusidwa pabodzi na m’badwo uyu pa Ntsiku ya Kutongedwa, ndipo iwo an’dzalatiza kuti m’badwoyu una mulandu, thangwe wanthu wa ku Ninivewo adakungula pomwe Djona adawapalizira. Tsono onani! Munthu mkulu kuposa Djona ali pano. 42 Mambo wacikazi wa* ku suli an’dzalamusidwa kwa anyakufa pabodzi na m’badwo uyu pa Ntsiku ya Kutongedwa, ndipo iye an’dzalatiza kuti m’badwoyo una mulandu, thangwe iye adacokera kutali kwene-kwene kuti adzabve nzeru za Salomau. Tsono onani! Munthu mkulu kuposa Salomau ali pano.

43 “Mzimu wakuipa ukacoka mwa munthu, umbayenda ku mbuto zakuuma kuti ukanyang’ane mbuto yakupumira, koma umbakaigumana lini. 44 Patsogolo pace umbati: ‘Nin’bwerera kumui komwe ndidacoka kule.’ Ndipo ukafika, umbagumana kuti m’nyumbamo mulibe munthu ali-wentse, koma mudapsairidwa ndipo mudakonzedwambo bwino. 45 Tenepo, umbayenda kukatenga mizimu inango yakukwana 7 yakuipa kwene-kwene kuposa iye, ndipo ikapita mkati mwa munthu, imbakhala m’mwemo; ndipo bzakucita bza munthuyo bzimbaipiratu kuposa momwe akhaliri pakuyamba. Bzimwebzi ndibzo bzomwe bzin’dzacitikirambo m’badwo wakuipayu.”

46 Pomwe akadalewalewa na mathimu ya wanthuyo, mai wace na abale wace akhadaima panja, ndipo akhafuna kulewalewa naye. 47 Tenepo, munthu munango adamuuza kuti: “Mai wanu na abale wanu ali panjapa, ndipo an’funa kulewalewa namwe.” 48 Jezu adatawira munthuyo kuti: “Kodi mai wangu mbani, ndipo abale wangu mbani?” 49 Iye adafuthula boko, acilata anyakupfunza wace, ndipo adati: “Awa ndiwo mai wangu na abale wangu! 50 Pakuti ule omwe an’cita kufuna kwa Baba wangu wakudzulu, umweyo ndiye m’bale wangu, mpfumakazi yangu na mai wangu.”