Ya m’Bukhu la Luka
10 Patsogolo pace, Mbuya adasankhula anyakupfunza winango wakukwana 70 aciwatumiza awiri-awiri kuti atsogole ku mizinda yentse na mbuto iri-yentse yomwe iye akhafuna kuyenda. 2 Patsogolo pace, iye adawauza kuti: “Kulewa cadidi, basa lakubvuna ndikulu, koma anyabasa mbakucepa. Tenepo, kumbirani mwenekaciro munda kuti atumize anyabasa kuti adzabvune. 3 Ndokoni! Inepano ndikukutumizani ninga mabira pakati pa mphumphi. 4 Lekani kutakula cikhwama ca kobiri ayai budu la cakudya ne xango, ndipo lekani kumusana na munthu ali-wentse* mu njira. 5 Pa nyumba iri-yentse yomwe mufikeyo, yambani na kulewa mafala yakuti: ‘Mtendere ukhale pa nyumba ino.’ 6 Ndipo pa nyumbayo mukagumana munthu wakufuna mtendere, mtendere wanu ukhale pa iye. Tsono pakakhala palibe munthuyo, mtendereyo ubwerere kwa imwepo. 7 Tenepo, khalani pa nyumba ya mtendereyo mucidya na kumwa bzomwe angakupaseni, pakuti nyabasa an’funika kupagalidwi. Lekani kucinja nyumba yomwe mwafikirayo muciyenda pa nyumba inango.
8 “Ndipo mu mzinda uli-wentse omwe mupiteyo, wanthu akakutambirani, dyani bzomwe angakupasenibzo, 9 pozani atenda mu mzindamo muciwauza kuti: ‘Umambo bwa Mulungu buli pafupi na imwepo.’ 10 Tsono mukapita mu mzinda uli-wentse ndipo wanthu acisaya kukutambirani, cokani m’mwemo muciyenda m’miseu yawo mikulu-mikulu mucikalewa kuti: 11 ‘Ifepano tikukunkhumula pfumbi la mu mzinda mwanu muno lomwe laphatirira ku nzayo zathu ninga umboni kwa imwepo. Tsono dziwani kuti Umambo bwa Mulungu bwafendera.’ 12 Ine ndikukuuzani kuti, kupfudzidwa kwa mzinda umweyo pa ntsikuyo, kun’dzakhala kwakuwawa kwene-kwene kuposa kwa Sodoma.
13 “Tsoka kwa imwe wanthu wa ku Korazini! Tsoka kwa imwe wanthu wa ku Betsaida! Thangwe rakuti bzakudabwisa bzomwe bzacitika m’mizinda yanu, bzingadakhala kuti bzacitikira wanthu wa ku Tiro na ku Sidoni, iwo angadakhala akungula kale acibvala magundiri na kukhala padotha. 14 Ndipopa, Ntsiku ya Kutongedwa in’dzakhala yakuwawa kwene-kwene kwa imwepo kuposa kwa wanthu wa ku Tiro na Sidoni. 15 Tsono tani pakulewa bza imwe wanthu wa ku Kafarnau? Kodi mukukumbuka kuti Mulungu an’dzakutumbizani kusiyana na winango? Ne. Iye an’dzakuthusani ku Thenje!*
16 “Ali-wentse omwe an’kutetekerani, watetekerambo inepano. Ndipo ali-wentse omwe an’kulambani, walambambo inepano. Kuthumizira bzimwebzi, omwe an’lamba inepano, walambambo Ule omwe adandituma.”
17 Patsogolo pace, anyakupfunza 70 wale adabwerera mwakukondwa, acilewa kuti: “Mbuya, napo bziwanda bzikhatibvera pomwe tikhaphatisa basa dzina lanu.” 18 Tenepo, iye adawauza kuti: “Ndikuwona Sathani wagwa kale ninga ciphaliwali kucokera kudzulu. 19 Inepano ndakupasani mphanvu yakuponda nyoka na mphiriri, na kukunda mphanvu zentse za nyamadulanthaka, ndipo palibe cinthu ciri-centse comwe cin’dzakucitani kuipa. 20 Tsono, lekani kukomedwa thangwe rakuti mizimu yakuipa yakubverani, koma komedwani thangwe madzina yanu yanembedwa kudzulu.” 21 Pa nthawe imweyoletu, mzimu wakucena udacitisa Jezu kukondwa kwene-kwene ndipo iye adati: “Ndikukutumbizani pamaso pa wanthu wentse Baba, Mbuya wakudzulu na dziko la pantsi, thangwe mudabisira bzinthu bzimwebzi adziwi na wanthu wanzeru, ndipo mwabzizimbula kwa wanthu wakubzicepesa ninga wana ang’ono. Inde Baba, thangwe bzimwebzi bzikubverana na kufuna kwanu. 22 Baba wangu wandipasa bzinthu bzentse. Ndipo palibe munthu omwe ambamudziwa Mwana kuposa Baba, ndipo palibembo munthu omwe ambamudziwa bwino-bwino Baba kuposa Mwana na munthu ali-wentse omwe angabvume kupfunzisidwa na Mwanayo bza Babayo.”
23 Na bzimwebzi, Jezu adazungunuka acinyang’anisa anyakupfunza wace ndipo adawauza pa okha-okha kuti: “An’kondwa ni wale omwe maso yawo yakuwona bzinthu bzomwe imwepo mukuwonabzi. 24 Pakuti ndikukuuzani kuti: Apolofeta na amambo azinji akhafuna kuwona bzinthu bzomwe imwepo mukuwonabzi, koma alibe kubziwona, ndipo akhafunambo kubva bzomwe imwepo mukubvabzi, koma alibe kubzibva.”
25 Mwamuna munango omwe akhali mdziwi wa Malamulo, adamuka kuti amuyeze, ndipo iye adati: “Mpfunzisi, kodi nin’funika kucita ciyani kuti ndidzagumane moyo wakusaya kumala?” 26 Jezu adati kwa iye: “Kodi bzomwe bzidanembedwa m’Malamulo bzimbalewa ciyani? Kodi iwepo umbabvesesa tani?” 27 Pakutawira mwamunayo adati: “‘Umbafune Yahova Mulungu wako na mtima wako wentse, moyo* wako wentse, mphanvu zako zentse, nzeru zako zentse’ na ‘kufuna mwanzako ninga momwe umbabzifunira wekha.’” 28 Jezu adamuuza kuti: “Watawira bwino; pitiriza kucita bzimwebzi ndipo un’dzagumana moyo.”
29 Tsono, pakufuna kubziwonesa kukhala wakulungama, mwamunayo adabvunza Jezu kuti: “Kodi mwanzanguyo ni mbani maka-maka?” 30 Pakutawira Jezu adati: “Munthu munango akhacokera ku Jeruzalemu kuyenda ku Jeriko. Tsono mu njira, iye adagumana na akambowa omwe adamukhundula acimumenya kwene-kwene mpaka kumusiya wasala pang’ono kufa. 31 Tsono, bzidandocitikambo kuti wantsembe munango adagwata na njira imweyire. Tsono pomwe iye adawona munthuyo, adamutsembera. 32 Mpsibodzi-bodzimbo na Mlevi munango omwe adapitambo na njira ibodzi-bodziyo, pomwe adawona munthuyo, adamutsemberambo. 33 Tsono Msamariya munango omwe akhali pa ulendo, adagwatambo na njira imweyo, ndipo pomwe adawona munthuyo adamubvera ntsisi. 34 Tenepo, iye adamufenderera aciikha mafuta na vinyu bzirondabzo acibzimanga. Patsogolo pace, adamupakiza pa cifuwo cace, aciyenda naye ku nyumba ya alendo ndipo adakamusamalira. 35 Mangwana yace, iye adatenga madinario mawiri ndipo adayapereka kwa mwenekaciro nyumba ya alendoyo, acilewa kuti: ‘Samalirani bwino munthuyu, ndipo mukadzonga kobiri zakupitirira zimwezi, nin’dzakubwezerani ndikadzabwerera.’ 36 Kodi ni mbani pa wanthu atatuwa, omwe iwepo ukuwona kuti adalatiza lufoyi kwa munthu omwe adamenyedwa na akambowayo?” 37 Iye adatawira kuti: “Ni ule omwe adamubvera ntsisi.” Tenepo, Jezu adamuuza kuti: “Ndoko ukacitembo bzibodzi-bodzi.”
38 Pomwe iwo akhayenda, iye adakapita m’mudzi winango. Kumweko, mkazi munango omwe akhacemeredwa Marta, adamutambira ninga mulendo kumui kwace. 39 Iye akhana m’bale wace wakucemeredwa Mariya, ndipo Mariyayo akhadakhala pafupi na Mbuya, acimbatetekera bzomwe iye akhalewa.* 40 Tsono Marta, akhadedema na basa lizinji. Tenepo, iye adafendera pomwe pakhana Jezupo acimuuza kuti: “Mbuya, kodi mukuwona lini kuti m’bale wanguyu akundilekerera kuphata basa ndekha-ndekha? Muuzeni kuti adzandithandizembo.” 41 Pakumutawira, Mbuyayo adati: “Marta, Marta, iwepo ukucita thupo ndipo ukudedema na bzinthu bzizinji. 42 Ifepano tin’funikira lini bzinthu bzizinji, napo cinthu cibodzi cingakhale cakukwanira. Tsono Mariya, wasankhula cinthu cakufunika ndipo palibe omwe an’dzamutengera.”