Kuyamba kwa Gawo 14

Akristau wakuyambirira adapalizira bzipsa bzabwino bza Umambo mpaka ku mbali zakutali za pa dziko la pansi. Jezu akhambawauza mbuto zomwe iwo akhafunikira kupalizira, ndipo mwakudabwisa, iye adawathandiza kupfunzisa wanthu m’cirewedwe ciri-cense comwe wanthuwo akhalewalewa. Akristauwo adagumana na mazunzo, tsono Yahova adawapasa mphanvu kuti apirire nakuti akhale wakulimba mtima.

Mpostolo Juwau adawonesedwa na Jezu mbiri ya Yahova. Patsogolo pace, iye adawonesedwa Umambo bwa Mulungu bomwe bukhakunda Sathani na kumalisa utongi bwace; adawonesedwa Jezu ankutonga pabodzi na anzace wakukwana 144.000, aciwonesedwambo dziko lense la pansi lomwe likhadasanduka paraizo, ndipo wanthu wense akhanamata Yahova mwakubverana na mwa mtendere.