KUCITA ULENDO BWAKUBWEREZA
PFUNZIRO 7
Mbapirirani
Vesi: “Iwo akhapitiriza kupfunzisa mwakusaya kulekeza na kupalizira mafala yabwino.” — Mab. 5:42.
Kodi n’Ciyani Comwe Paulo Adacita?
1. Onani VIDIYO, ayai werengani Mabasa 19:8-10. Patsogolo pace kumbukirani mibvunzo iyi:
M’mbuto mwakusiya kupalizira thangwe ra kugazidwa na wanthu, kodi Paulo adapirira tani kuti akwanise kuthandiza wanthu omwe akhafuna kudziwa bzizinji?
Kodi Paulo adayenda kangasi kukazungira wanthu omwe akhafuna kudziwa bzizinji ndipo adacita bzimwebzi kwa magole mangasi?
Kodi Tikupfunza Ciyani na Bzomwe Paulo Adacita?
2. Tin’funika kucita nyongo yakucita maulendo yakubwereza na kumbayambisa mapfunziro ya Bibliya.
Tewezerani Paulo
3. Mbamuzungirani munthu pa nthawe yakuthemera. Bzibvunzeni kuti: ‘Kodi ni nthawe iponi yomwe ningamuzungire? Kodi ni lini pomwe an’dzakhala na mpata kuti ndidzaceze naye ndipo n’kuponi komwe iye angafune kuti tidzacezere?’ Khalani wakukonzeka kumbazungira wanthu napo kuti nthawe yomwe iwo angasankhule ingakhale lini yakuthemera kwa imwepo.
4. Panganani ntsiku yomwe mungadzaceze pomwe. Kuphampha kwa maceza yali-yentse, mbatsimikiziranani nthawe yomwe mun’dzaceza pomwe na munthuyo. Ndipo mbamuzungirani pa nthawe na ntsiku yomwe mudapanganayo.
5. Mbakhalani na cidikhiro. Lekani kumbakumbuka kuti munthu an’funa lini kudziwa bzizinji thangwe rakuti ambagumanika lini pamui kawiri-kawiri ayai thangwe rakuti ambakhala wakutanganidwa kwene-kwene. (1 Ako. 13:4, 7) M’mbuto mwace, pitirizani kucita nyongo yakuceza na munthuyo na kuphatisambo bwino basa nthawe yanu. — 1 Ako. 9:26.