NKHANI YA PA TSAMBA LAKUYAMBA

Kodi Mulungu Ambaiwona Tani Nkhondo?

Kodi imwepo mungatawire tani mbvunzo umweyu? Wanthu azinji wambakumbuka kuti Mulungu ambabvumiza nkhondo. Iwo wambalewa kuti kale-kale, iye adauza Ajirayeri omwe akhali anamati wace kuti akamenye nkhondo, ndipo bzimwebzi bzidanembedwambo m’Bibliya. Tsono winango wambawona kuti Jezu mwana wa Mulungu adapfunzisa ateweri wace kuti wambafune anyamadulanthaka wawo. (Mateu 5:43, 44) Tenepo iwo wambakumbuka kuti iripo nthawe pomwe Mulungu adacinja mawonedwe yace ya nkhondo ndipo lero iye ambafuna lini kuti wanthu wambacite nkhondo.

Kodi imwepo munkukumbuka tani? Kodi Mulungu ambabvumiza nkhondo? Penu n’tenepo, kodi iye ambakhala ku mbali iponi pa nkhondo za nsiku zino? Kugumana mitawiro ya mibvunzoyi, kungatokonye mawonedwe yanu pa nkhani imweyi. Mwa ciratizo, mungadadziwa kuti Mulungu ambabvumiza nkhondo ndipo ankuthandizira mbali yanu, mpsakudziwikiratu kuti imwepo mungadakomedwa na kusankhula kwanu mbali imweyo, mucimbakhulupira kuti mbali yanuyo in’kunda. Tsono kodi mungadabva tani mungadadziwa kuti m’mbuto mwakuthandizira mbali yanuyo, Mulungu ankuthandizira mbali inango? Mwakusaya kupenukira imwepo mungadakumbuka bzakucoka ku mbali yanuyo mucikathandizira ku mbali ya Mulunguyo.

Pana cinthu cinango cakufunika kwene-kwene. Kudziwa momwe Mulungu ambawonera nkhondo kungatokonye momwe imwepo mumbawonera Mulunguyo. Penu ndimwe m’bodzi wa wanthu bzulu na bzulu womwe wadasunama kwene-kwene thangwe ra nkhondo zomwe wanthu wambacita, mwakusaya kupenukira mun’funa kudziwa mtawiro wa mbvunzo uyu: Kodi Mulungu ni nyakupha ndipo ambabvumiza nkhondo ninga momwe winango ambalewera? Ayai iye ambalekerera ndipo alibe thupo na wale womwe wambaponderezedwa?

Pinango mungadabwisidwe kudziwa kuti mitawiro ya m’Bibliya imbasiyaniratu na bzomwe wanthu wambakumbukabzi. Kulewa cadidi, kuyambira kale-kale mawonedwe ya Mulungu pa nkhani ya nkhondo yalibe kucinja. Bwerani tiwone bzomwe Bibliya limbalewa na momwe Mulungu akhawonera nkhondo kale-kale na mu nthawe ya apostolo, pomwe Jezu akhali pansi pano. Bzimwebzi bzin’tithandiza kuwona momwe Mulungu ambawonera nkhondo nsiku zino, ndipo penu in’dzamala nsiku inango.