Fala la Mulungu Ndamphanvu

Nkhaniyi yacosedwa mu Buku Lapachaka la Mboni za Yehova 2013

Asia

Tsamba 57, ndime 1 mpaka tsamba 59, ndime 2

Mwamuna Wakubziwona Ninga Mkazi Adacinja

Rek adakulira m’banja labwino-bwino ku Cambodja, tsono kutomera ali mwana, iye na m’bale wace wamamphase wakhabziwona ninga akazi. Iwo wakhasenzeka na bzidoli, ndipo wakhambafuna kubvala bzakubvala bzacikazi. Mai wawo adasaya bzakucita, akhabva manyazi, ndipo akhadziwa lini momwe angadawaimisire. Iwo wakhacoka pa mui wadabvala bzakubvala bzacimuna, koma wakafika ku xikola, wakhabvala bzakubvala bzacikazi. Pakupfitsa magole 16 yakubadwa, wamamphasewo wadapita mu mpikisano wa kudeka wa amuna wakubziwona ninga akazi, ndipo iwo wadakhala na mbiri, wacimbayamba kuwonekera m’bzikasi bza cithunzi-thunzi na kumbacita mthabwala. Mu nthawe yakucepa, Rek adayamba kumbagonana na amuna anzace, acicita uxamwali na amuna winango wakubziwonambo ninga akazi.

Mai wa Rek adayamba kumbayenda ku gereja pabodzi naye. Napo adabvuma kubvala bzakubvala bzacimuna pakuyendapo, iye adalambiratu kugwata tsisi lace litali. M’busa wa ku gerejakako, akhamunyoza kawiri-kawiri thangwe ra bzomwe akhacitabzo. Na tenepo, Rek adawona kuti iye angadayezera kupfunza Bibliya ku gerejako. Pa mdzinga wakutoma, iye adayenda na njinga ku gerejako ku macibe, napo ukhali ntanthu wa makilometro mazinji. Tsono atafika kumweko, m’busayo adalewa kuti angadakwanisa lini kumupfunzisa. Ndipo Rek adaipidwa kwene-kwene pomwe m’busayo alibe na kundowonekerako pa mdzinga waciwiri.

Tsono, pomwe Rek adafika ku mui, m’bale wace wamamphase adamuuza kuti akhadazungiridwa na mkazi munango, acimukumbira kuti apfunze naye Bibliya fovolo. Mkaziyo adasiya bukhu lakuti Kodi Baibulo Limaphunzitsa Chiyani Kweni-kweni? Wamamphasewo wadayamba kupfunza na mkaziyo pabodzi na bayace. Pambuyo pa minyezi mitanthatu, m’bale wa Rek adawona kuti akhali lini wakukonzeka kucinja moyo wace, ndipo adaleka kupfunzako. Tsono Rek, akhadatokonyedwa na 1 Wakolinto 6:9, 10, ndipo adadziwiratu bzomwe iye akhafunika kucita. Mwakulewenga na kupfunza Bibliya na nyongo, kupemba na kumbawonekera pa mitsonkhano, iye adakwanisa kucenesa moyo wace. Mai wa Rek ankupfunzambo Bibliya, ndipo ankuyenda patsogolo. Pomwe Rek adabatizidwa, mai wacewo adati na misozi m’maso: “Ndakomedwa kuwona mwanangu ankubatizidwa ninga mwamuna,” Iye tsapano ankutumikira ninga mpainiya.

Nyabezi Mkazi Adacinja Moyo Wace

Or-Ya akhakhulupira bza mizimu, akhalapa, kupasa malango na kulewa bza kutsogolo. Banja linango la apainiya wakupambulika, lomwe linkutumikira ku Haifa, m’dziko la Israel, lidamugumana mkaziyo mu utumiki bwa nyumba na nyumba. Pakuwamusa, mkaziyo adati: “Penu mwabwerera bza Mulungu, pitani!” Nyumba yace ikhadadzaza na bzinthu bzamizimu. Mkaziyo adalewa kuti akhatambira mafala yakucokera kwa Mulungu, ndipo manango yakhacokera kwa “mzimu” wa mpfunzisi munango wa cipembedzo ca Wajuda.

Pomwe wadamukumbira kuti wapfunze naye Bibliya na bukhu lakuti Baibulo Limaphunzitsa Chiyani, mkaziyo adakomedwa kwene-kwene. Nsiku ziwiri pomwe banja lire likhanati kufika pa mui pace, mkaziyo akhadapemba kwa Mulungu kuti amutumizire munthu kudzamupfunzisa Bibliya fovolo mwakusaya kuphatisa basa bzipfunziso bza apfunzisi wa gereja ya Wajuda. Mkati mwa mwezi, iye adabvunza kuti: “Kodi walipo wanthu winango womwe wambakhulupirambo bzibodzi-bodzibzi?” Iye adawonekera pa mtsonkhano wa gwere, ndipo adadabwa na lufoyi lomwe wadamulatiza. Kuyambira pamwepo, iye adayamba kumbayenda ku mitsonkhano mwakukhazikika.

Patapita minyezi miwiri acimbapfunza, Or-Ya adacita mbvunzo thangwe ra mtsonkhano ukulu omwe ukhabwera. Iye adati: “Kodi si pa mitsonkhano mikulu-mikulu pomwe munthu ambabatizidwa? Penu n’tenepo, imwepo muna minyezi miwiri yokha yakundikonzekeresa kuti ndidzabatizidwe!” Tenepo, cakutoma iye adataya bzinthu bzace bzense bzamizimu, napo bzikhali bzakuumira. Adaleka kucita basa la unyabezilo, aciyamba kumbapalizira wanthu winango, mwakuwalatiza bukhu la Baibulo Limaphunzitsa Chiyani na marevista kwa wanthu womwe kale akhawapasa mankhwala. Pomwe adaduwala, iye adalamba kulapiwa ninga momwe akhalapira anzace mule. Iye adacita minyezi minai wakusaya kobiri thangwe ra kusiya basa lacelo. Tsono pakunyang’ana basa, akhanyang’ana basa lomwe angadaphate basa nsiku ziwiri pa mdzinga na nthawe zitanthatu pa nsiku, kuti akwanise kucita mabasa ya uzimu. Ndipo iye adaligumanadi basa labwino. Patsogolo pace, iye adagulisa nyumba yace ikulu, acilugari nyumba ing’ono.

Patapita nthawe, Or-Ya adakwanisa bzense bzakufunika kuti abatizidwe, tsono iye adatcoka mwendo, utasala mdzinga m’bodzi kuti mtsonkhano uyambe. Napo bzikhali tenepo, iye adabatizidwa, mwendo wace utaikhidwa goma. Lero Or-Ya ni mpalizi wa nyongo, omwe ambapalizira na kumbapfunzisa wanthu womwe wakhabwera kudzathandizidwa naye.