Mun’dzawazindikira na Bzisapo Bzawo—Nkhanizi zacosedwa mu Buku Lapachaka la Mboni za Yehova 2013
Africa
Tsamba 47, ndime 1-2
“Mulungu Womwe Unkumutumikirayo Ngwamphanvu Kwene-kwene”
Caro ambakhala ku dziko la Uganda. Utandomala mwezi m’bobzi wakuyamba kupfunza Bibliya, bayace wakucemeredwa Martin, womwe akhambacita bza matsenga, adayamba kumbamutsutsa kwene-kwene. Martin adati: “Mabukhu yakoya yankutazisa mizimu ya anyamuya kupita m’nyumba muno.” Iye akhamuboneresa na kumbamugopsa kuti angadamupha akasaya kuleka kupfunza Bibliya. Bayaceyo adalekambo kupereka phoso kuna banjalo. Caro alibe kucita nabzo thupo. Akhambalima m’dimba kuti asamalire banjalo, acipitiriza kupfunza Bibliya. Pomwe bzidawonekeratu kuti moyo wa Caro ukhali pa ngozi, iye adathawa pa muipo. Iye adabonera kwene-kwene kuti ambabzidyese. Tsono, pomwe adabva kuti wana wace wakhaduwala, iye adatenga kobiri zace zing’onong’ono, aciwagulira mankhwala.
Patapita nthawe, Caro adapfuwiridwa mtedwe na bayace. Bayaceyo adati: “Ndin’funa kuti ubwerere kumui. Ndawona kuti Mulungu womwe unkumutumikirayo ngwamphanvu kwene-kwene ndipo ankukuthandiza. Ndin’funa uwauze wanthu womwe wankukupfunzisawo kuti wabwere kudzandipfunzisambo. Ndinkufunisisadi kucinja moyo wangu.” Martin akhadatsimikizadi mu mtima. Tsapano banjalo liri pabodzi ndipo ndakukondwa. Martin na Caro wadabatizidwa pa mtsonkhano wacigawo mu Agosto 2012.
Tsamba 52, ndime 1-6
‘Adandipasa Cakudya na Capeu Cace’
Mulumbwana munango wa magole 10 yakubadwa, wakucemeredwa Marcelo, pomwe akhali ku mtsonkhano wacigawo mu gole la 2010 ku dziko la Chile, iye adawona kuti mwamuna winango wacikulire womwe akhadakhala pafupi naye akhalibe na bukhulo.
Mwakazewe-zewe Marcelo adati kwa mai wace: “Amunawa alibe Bibliya.”
Mai wacewo adamutawira kuti: “Ona nawo pabodzi m’Bibliya lakolo.” Tenepo Marcelo adafendera kuna mwamunayo, womwe dzina lace akhali Victor, wacimbawona pabodzi m’Bibliya lace mavesi yense yomwe yakhambalewengedwa. Pomwe nthawe ya kupuma idakwana, Marcelo adauza mai wace kuti: “Iwo alibe cakudya.” Mai wace adamuuza kuti adyere pabodzi cakudya caceco. Tenepo, Marcelo adapereka pau na caya. Pomwe mwamunayo akhadya, Marcelo akhambamulatiza mavesi yense ya m’Bibliya yomwe iye akhayakumbukira.
Masikati dzuwa likhawatentha kwene-kwene. Marcelo adadzauza pomwe mai wace kuti: “Amunawa alibe capeu.”
Mai wace adati: “Apase cakoco.” Iye adawapasadi. Mtsonkhanoyo utamala, Marcelo na Victor wadagonekana.
Pa mtsonkhano wacigawo wa gole linangolo, Marcelo adayamba kunyang’ana kuti awone penu Victor akhadabwera ku mtsonkhanoyo. Marcelo adakondwa kwene-kwene pomwe adamugumana ndipo pa nthaweyi iye akhadabvala gravata. Pomwe Victor adawona Marcelo adati: “Ndiri pano lero thangwe ra mulumbwanayu. Gole lamalali ndidacemeredwa ku mtsonkhano wacigawo ndipo ndidabweradi. Mulumbwanayu adandipasa Bibliya lace kuti tilewengere pabodzi, adandipasambo cakudya cace ca masikati na capeu. Tsapano ndinkupfunza Bibliya.” Ndipo Victor adadzakhala mpalizi wakusaya kubatizidwa.