Mianmar

Matsamba 136-137

Ndidabvuma Cadidi Thangwe ra Kukoma Mtima Kwawo

ZAW BAWM

GOLE LAKUBADWA 1954

GOLE LAKUBATIZIDWA 1998

MBIRI YACE Pakuyamba akhagulisa mbanje ndipo akhatsutsa cadidi, tsono adacinja thangwe ra kukoma mtima kwa Mboni za Yahova.

POMWE mkazangu Lu Mai adayamba kupfunza Bibliya na Mboni za Yahova, ndiribe kukomedwa nabzo ndipo ndidacita bzinthu bzakuipa kwene-kwene kuti iye asiye kupfunzako. Ndidamutaira mabukhu yace m’cimbudzu ndipo ndikhathamangisa Mboni za Yahova pamui pangu.

Ndidayamba kugulisa mbanje, ndicimangidwa. Nditamala nsiku ibodzi ndiri m’kawokomo, mkazangu Lu Mai adanditumizira Bibliya na tsamba lomwe likhana mavesi yakundilimbisa. Patapita nthawe, adandinembera pomwe matsamba manango yakundilimbisa mwauzimu. Ndidadzazindikira tsapano kuti bzingadakhala kuti ndidateweza malango ya m’Bibliya, ndingadagumanika lini m’kawoko mule.

Pa nsiku inango pomwe ndikhadikhirira lini, adafika alendo awiri ku kawoko kule. Amunawo wakhali Mboni za Yahova ndipo wadandiuza kuti mkazangu ndiye akhadawakumbira kuti wabwere kudzandilimbisa. Kuti wafike ku kawokoko wadafamba nsiku ziwiri. Ndidatokonyedwa kwene-kwene na bzomwe wadacitabzo. Pa nthawe imweire wadzinza wangu walibe kubwera kudzandiwona. Womwe wadabwera ni wanthu womwe ndikhawacitira bzakuipa.

Palibe kupita nthawe, ndidaduwala m’mimba na febre, ndicibaxari ku xipitali tsono ndikhalibe kobiri kuti ndilipirire mankhwala. Pa nthawe imweyi, kuxipitaliko kudabwera pomwe munthu munango wa Mboni za Yahova womwe akhadatumidwa na mkazangu kuti adzandiwone. Iye adandibvera nsisi, acindilipirira thandizo la ulapiro. Na bzimwebzi ndidacita manyazi, ndicilumbira kuti ndingadasanduka Mboni ya Yahova. Patapita magole maxanu, ndidacosedwa m’kawoko mule ndipo ndidasunga piciro langu lire.

[Cithunzi-thunzi pa tsamba 4]

Ndipo lero ndikadasunga piciro langu lire mwa kutumikira Yahova momwe ndikwanisiremo