Kufunika kwa Kukhala Wakulimbikira—Nkhaniyi yacosedwa mu Buku Lapachaka la Mboni za Yehova 2013

Africa

Tsamba 45 ndime 1 mpaka tsamba 46 ndime 1

‘Bzin’kwanisika Kulewa-lewa nawo?’

Ku dziko la Etiopia nyakunyang’anira dera winango akhapalizira nyumba na nyumba na m’bale winango. Pa nyumba inango, iye adagumana nyabasa mtsikana, acimubvunza penu bzingadakwanisika kulewa-lewa na mwamuna wa pamuipo. Pomwe mtsikanayo adatawira kuti bzingadakwanisika lini, iwo wadamubvunza penu angadafuna kuti wamusiire marevista mwamunayo. Nyabasayo adayenda kabvunza mweneciro nyumbayo. Pomwe adabwerera, iye adalewa kuti cakuyamba mwamunayo akhafuna kutoma kuyawona marevistayo.

Tenepo abalewo wadamupasa marevistayo kuti akamuwonese. Patapita mphindi pang’ono, iye adabwerera kudzawauza kuti abvuma kusala acilewenga. Ndipo m’bodzi wa abalewo adabvunza kuti: ‘Penu iye an’kwanisa lini kubwera panja pano, tingapite kuti tikalewe-lewe nawo?’ Nyabasa ule adayenda pomwe kamubvunza mwamunayo. Ulendo buno nyabasa ule adacedwa kucoka m’nyumbamo, ndipo abalewo wadayamba kukumbuka kuti pinango angadacoka lini pomwe. Tsono nyabasayo adadzabwera, aciwauza kuti wapite. Watapita m’nyumbamo, abalewo wadazindikira kuti mweneciro nyumbayo omwe dzina lace ni Yirgu, akhadakalamba kwene-kwene ndipo akhambakhala adagona kwa magole 10. Iye akhakwanisa lini kulamuka pakamapo ne kukhala. Tenepo nyabasa ule adacedwa kucoka m’nyumbamo thangwe akhamuthandiza kubvala na kukonza-konza m’cipindamo kuti abalewo wapite.

Abalewo wadamufokotozera bzipsa bzabwino mweneciro nyumbayo. Yirgu adakomedwa kwene-kwene na bzomwe adabvabzo, acibvuma kupfunza Bibliya. Pomwe pfunzirolo likhayenda patsogolo, iye adayamba kubva bwino thanzi lace. Patapita nthawe iye adayamba kumuka pa kama pale, acimbafamba pa njinga ya anyakulemala. Nthawe pang’ono adayamba kumbatsonkhana ndipo adabatizidwa pa mtsonkhano wa cigawo wapitayu.