Kukulisa Luso Lathu mu Utumiki—Kutawira Wanthu Womwe Wangatigwate Mafala
Thangwe Ranyi Mpsakufunika: Yezezerani kuti mwabva kuti mbuto yomwe mumbakhala inisefukiridwa na madzi. Wanthu wan’dzafa wakasaya kuthawira ku mbuto yakusungika. Imwepo munkuyenda kwa mwanzanu wakufendererana naye nyumba kuti mukamucenjeze, tsono iye ankukugwatani mafala, acilewa kuti ana basa kwene-kwene. Kulewa cadidi, imwepo mungadandofulumiza lini kumusiya tenepoyo, mucibwerera! Wazinji m’gawo lathu wambatithawa, wacisaya kuzindikira kuti nkhani yathu njakupulumusa moyo. Pa nthawe yomwe tinkuwazungirayo, pinango iwo wangakhale wakutanganika. (Mat. 24:37-39) Ayai pinango wambafuna lini kubva nkhani zakumwazidwa zomwe n’zakunama. (Mat. 11:18, 19) Iwo wangayese kuti ifepano ndife wakundendemerana na bzipembedzo bzomwe bzimbabala bzisapo bzakuipa. (2 Pe. 2:1, 2) Penu pakuyambirira mweneciro nyumba ankutitawira lini, tin’funikira lini kuthamangira kumusiya.
Momwe Mungacitire:
• Pomwe mukanati kuyenda kukapalizira nyumba na nyumba, pambulani tu mphindi kuti mukumbukire njira zomwe wanthu wangakugwatireni mafala na momwe mungawatawirire.
• Penu mweneciro nyumba an’kugwatani mafala, mwa njira yabwino yezerani kupitiriza kuceza naye. Pinango mungacite bzimwebzo mwakuyamba kumutenda. Mwa ciratizo, akati anaco kale cipembedzo cace, mungamutawire kuti: “Ndikhadikhira kugumana munthu ninga imwepo omwe ambafuna bzinthu bzauzimu.” Nthawe zinango, kuzindikira mkhalidwe wa mweneciro nyumbayo na bzomwe ankubva mu mtima mwace, bzingathandize kupitiriza kumucitira umboni. Mwa ciratizo, akati ndina basa, mungalewe kuti: “Ndinkubvesesa. Tsono pomwe ndikanati kuyenda, ndikhafuna kukusiyirani bukhuli.” Njira inango ndiyo kumubvunza mweneciro nyumbayo kuti an’funa kulewa ciani akati an’funa lini. Mungabvunze kuti: “Kodi munkulewa kuti mun’funa lini kubva bza Bibliya, ayai mun’funa lini kubva bza cipembedzo?”
• Khalani wakuzindikira bwino. Kumbukirani kuti Yahova ambaumiriza lini wanthu kuti wamubvere. (Bzak. 30:19) Munthu ali-wense an’dzabzitawirira yekha pa maso pa Yahova. (Wag. 6:5) Penu mweneciro nyumbayo an’pitiriza kuumirira, bziri bwino kucoka pa mui pacepo. Tikalemekeza bzomwe munthu ankubva mu mtima mwace, tingafungule njira kuti mpalizi munango adzamucitire umboni kutsogolo.—1 Pe. 3:15.
Yezerani Kucita Bzimwebzi Mkati mwa Mwezi Wathunthu:
• Mukagumana munthu wakukugwatani mafala, pambuyo pa kucoka pa mui pacepo, cezeranani na mwanzanu omwe munkupalizira nayeyo momwe mungadamutawirire mwa njira yabwino.